Luka 8

Vanyamayi va nga bani va gu landra Jesu

1Khavbo avbo, hwane nya esi, a di gimbila khu madhoropani ni dzindrangani, a gimbila a hevbudza Mahungu yadi nya Mufumo wa Nungungulu, nari ni vapostoli vaye nya likhumi na vavili, 2va diri naye vanyamayi vale a nga va vbanyisago khu gu va tutumisela maphuvbo nya guvivbe ni gu va hawulugisa dzingumbe nya gutale. Adiri avo: Mariya Madhalene, a nga mu dusela livbandre na mavili maphuvbo nya guvivbe, 3Jowana, ngadza Kuza, muthangeli nya madhota ya Herodhi; Suzana, ni vambe nya gutale, va nga bani va gu phasa Jesu khu silo sawe.

Gipimaniso nya muyali

(Matewu 13:1-9; Marko 4:1-9)

4Gidzemo nya gingi gi dita hengeledzelana avbo gwaye, gumogo ni vathu nya vangi va nga bani na va guta khu madhoropani yatshavbo. Jesu a di ganela khu sipimaniso, khuye: 5“Nga wonani. A di khuga muthu nya gukari gasi guya yala mbewu yaye. Gikhati a nga yi swaya, yimbe yi di thegela bambe nya ndzila; yi gandredzedwa, gumogo ni gu rothedwa khu sinyoni sa damboni. 6Yimbe yi di thegela siwindrini; hwane nya gu bani yi bugide, yi di banga khu gu hamuga thomwa. 7Yimbe yi di thegela mibani; na yi dandride gumogo nayo, yi di padwa khu miba. 8Gasi yimbe yi di thegela wulimeni nya wadi; na yi bugide, mbewu ni mbewu yi di thela lizana dzimbewu.” Khavbo avbo, a di khuye: “Uye a gu ni dzindzeve nya guyingise, a napwe!”

Khu ginani Jesu a ganelago khu sipimaniso

(Matewu 13:10-17; Marko 4:10-12)

9Vapizane vaye va di mu wudzisa, khavo: “Gya gutshamusela ginani gipimaniso gegi.” 10Jesu a di va hakha, khuye: “Ga enu, Nungungulu a ngu tivisa misihalo nya mufumo waye; gasi ga vambe, a gu ganela khu sipimaniso, gufela gukhuye va ronoge, aholu va si woni; vapwe aholu va si si pimi.

Tshamuselo nya gipimaniso nya muyali

(Matewu 13:18-23; Marko 4:13-20)

11“Tshamuselo nya gipimaniso khowu: Mbewu khu magana ya Nungungulu. 12Mbewu yi nga thegela bambe nya ndzila khu vale va nga pwago Mahungu ya Nungungulu, aholu Sathane ata ma wandra myonyoni gwawe, gasi va si khodwi, va si mani guvbanyiswa. 13Mbewu yi nga thegela siwindrini, khu vale nya gu, na va pwide Mahungu ya Nungungulu va gu ma hakha khu gunengela. Kha nga ulo va gu mwalo mikhamba, va gu khodwa gikhati gidugwana; aholu sa gu vboha silingo, va gu ma diga. 14Mbewu yi nga thegela mibani khu vale nya gu, na va pwide mahungu ya Nungungulu va hegisa khu gu ma diga va padwa khu sigaradzo nya guvbanye, khu dzithomba ni sihungato nya mafu, iso si girago gu va si theli mihandro. 15Yile yi nga thegela wulimeni nya wadi khu vale nya gu, na va ma pwide, va ma hakha khu monyo nya wadi nya gululame, va ma vegedza nyamba rereka kala va gu thela mihandro.

Gipimaniso nya kandriya

(Marko 4:21-25)

16 # Wona gambe: Mat 5:15; Luk 11:33. “Mwalo a rothago kandriya a yi fenengedza khu gitundru, mwendro gu yi vega khwitshini. Aholu ya gu vegwa wulanga yi dzi kodzago gu wenengedza vatshavbo ava va belago nyumbani. 17Kholu, gimwalo gi sihadego gi na gu ne gu wonegiswa; kha nga gambe, mwalo sihalo a na gu ne gu tugudwa. 18#Wona gambe: Mat 25:29; Luk 19:26. Yingisani gwadi iso nyi mi embelago: Uye a gu naso a na engedzedwa; gasi uye a gu mwalo gilo, ni esi nya sidugwana a gu naso, a na dzegedwa.”

Valongo va Jesu

(Matewu 12:46-50; Marko 3:31-35)

19Mayi wa Jesu ni vandriyaye va di mu yela, aholu kha va dzi kodza gu vboha vbafuvbi gwaye khu gu tala nya vathu. 20Va di mu embela, khavo: “Mayi wago ni vandriyago vomo vbavbandze; va guvbweta gu gu wona.” 21Uye a di va hakha, khuye: “Mayi wangu ni vandriyangu khu vale va pwago magana ya Nungungulu, va ma landrisa.”

Jesu a ngu rudzisa phuvbo nya yikhongolo

(Matewu 8:23-27; Marko 4:35-41)

22Tshigu mwedo, Jesu a di bela ngalavani ni vapizane vaye, a va embela, khuye: “Hongoleni tshatugo nya litsiva.” Va di hongola. 23Na va romo vbakari nya mati, Jesu a di lala. Yi di duga phuvbo nya yikhongolo; ngalava yi di tala khu mati, yi guvbweta gu dzama. 24Va diya mu wusa, va Mu embela, khavo: “Muhevbudzi, hi ngu mbemba!” Uye, na wugide, a di kawuka phuvbo ni mavimbi, si gu renga; ma di manega malenga nya makhongolo. 25Khavbo avbo, a di va embela, khuye: “Gomo hayi gukhodwa gwanu?” Na va tade khu hwanga ni guliwuga, va di wudzisana, khavo: “Gasi khu mani oyu nya gu ambari phuvbo ni mavimbi si mu yingela?”

Jesu a na ni tshivba nya gupale maphuvbo nya guvivbe

(Matewu 8:28-34; Marko 5:1-20)

26Va diya tshegema tigoni ga Vagadharenu, vbingano ni Galileya. 27Na dugide khu ngalavani, Jesu a di khingwa khu mwama moyo a nga bani a guta khu dhoropani. Mwama yoyo a diri ni maphuvbo nya mangi nya guvivbe. Adiri gale a nga bani a gu khala nyamba ambala gilo a di si khali ndrangani, a di vbanyela marowoni. 28Na wonide Jesu, a di dzi thesa migondroni gwaye, na gu gulumela khu tshivba, khuye: “Ginani nyi nga gu ghohela, Jesu, Mwamana wa Nungungulu a Khusegidego ngudzu? Nya gu lomba gukheni u nga nyi tshanisi.” 29A di ganela kharati, kholu Jesu a nga ruma liphuvbo nya guvivbe gasi li mu dige; kholu ilo li di gu mu sanisa dzinyondro nya dzingi. A di gu hungwa khu makhetshe ni gu thedwa maphili, aholu a di kavila ni gu pandra satshavbo, a gu pepudwa khu liphuvbo lile aya giwulani.

30Jesu a di mu wudzisa, khuye: “Khuwe mani, lina lago?” Mwama a di hakha, khuye: “Kheni lidhuma.” A di hakha kharati, kholu maphuvbo nya mangi a nga bani ari nawo. 31Maphuvbo ma di mu lomba gu a si ma dzudzugi phalani nya guthise. 32Dzi diromo vbafuvbyana vbale dzikhumba nya dzingi dzi nga bani dzi gu haviswa gigomoni. Maphuvbo ma di lomba ga Jesu gu a ma dzumedzise guya bela dzikhumbani. Uye a di ma dzumedzisa. 33Khavbo avbo, ma di duga ga muthu wule, ma guya bela mudzikhumbani. Dzikhumba dzi di tutuma dziya bela nondrwani, dzi gu mbemba dzatshavbo.

34Vahavisi vakone, na va wonide esi, va di thava, vaya bika mahungu yaya madhoropani ni dzindrangani. 35Va di hongola vathu, gasi guya wona iso si nga dugelelago. Na va vbohide avbo a nga bani a romo Jesu, va diya wona wule a nga bani ari ni maphuvbo nya mandriki, na khade migondroni gwaye, na ambade dzingandzu dzaye, nari ni mapimo yaye yatshavbo, va di khala hwanga. 36Avo va nga si wonago va di va embela idzo a nga vbanyiswago khidzo madwali mwama wule. 37Vathu vatshavbo va tigoni ga Gerazi, va di mu lomba gu a khuge tigoni gwawe, kholu va di tade khu hwanga. Jesu a di bela ngalavani a gu khuga khu vbale. 38Muthu wule a nga duswago maphuvbo nya guvivbe a di mu lomba gu hongola naye, aholu Jesu a di mu embela, khuye: 39“Indra gaya gwago uya tivisa valongo vatshavbo iso Nungungulu a nga gu girelago.” Uye a di hongola a gimbila a ganela dhoropani gwatshavbo iso a nga giredwa khu Jesu.

Jesu a na ni tshivba nya guvbanyise

(Matewu 9:18-26; Marko 5:21-43)

40Gikhati a nga wuyago, Jesu a di hakhwa khu litsako, kholu gidzemo gyatshavbo gi di gu mu lindrela. 41A di tedwa khu mwama moyo nya gupwani khu Jayiro, a nga bani ari muthangeli nya nyumba nya nombelo. A di dzi thesa migondroni ga Jesu a gu mu lomba gu a hongole ndrangani gwaye, 42kholu a diri ni nyamahegyane wa moyo, nya likhumi na mivili myaga, a nga bani a gu dwala nya guhadza gufa. Vbakari nya ndzila, kha nga olu vathu va nga bani vari vangi, Jesu a di gundrwa maphuvbo yatshavbo. 43Vbakari gwawe a di romo nyamayi moyo a nga bani ari ni madwali nya gudugelele novba. Giride gipimo nya likhumi na mivili myaga, na gu phalalegisela thomba yaye yatshavbo dzinyangani, nyamba mana ni mweyo nya gu mu vbanyise. 44A di hidzimela khu hwane gwa Jesu, aya mu kuha tshoka nya libhadzi laye. Khavbo avbo, a di dzegela gu hawuluga, novba wu guhegisa gu duga. 45Jesu a di wudzisa, khuye: “Khu mani a nga nyi kuha?” Kha nga ulo vatshavbo va nga ganedzago. Pedro ni vangana vaye a di khuye: “Muhevbudzi, vathu va gu gundrago ni gu gu rindrividza maphuvbo yatshavbo nu gukhuwe: Khu mani a nga nyi kuha.”

46Aholu Jesu a di engedza gambe, khuye: “Womo a nyi khuhidego, kholu nyi ngupwa nya gukheni yi dugide tshivba khavbo gwangu.” 47Nyamayi wule na wonide nya gukhuye tugudwe, a di hidzimela, na gu ndrendremela. Na dzi theside migondroni gwaye, a di ganela na gu pwidwa khu vathu vatshavbo, iso si nga mu gira gu a khuhe Jesu, nidzo a nga dzegela gu hawuluga khidzo. 48Jesu a di mu embela, khuye: “Mwanangu, gukhodwa gwago gu gu vbanyiside; indra khu gurula.”

49Na nga guganela, wu di vboha mwango khu ndrangani ga muthangeli nya nyumba nya nombelo, wuta khuwo: “Mwanago fude; u nga garadzi gambe Muhevbudzi.” 50Aholu Jesu, na pwide satshavbo, a di mu embela, khuye: “U nga thavi, khodwa basi; mwanago a na vbanya.” 51Na vbohide ndrangani kha dzumedzisa gu bela nyumbani vambe vathu, vbavbandze ga Pedro, Johane ni Jakobe, ni vavelegi va gyanana. 52Vatshavbo va di gu lila khu gupwa gisiro. Aholu Jesu a di va embela, khuye: “Mu nga lili, kholu gyanana kha gyafa, gi di lala.”

53Kha nga ulo va nga bani va gu dziti nya gukhavo gyanana gi fude khu lisine, va di mu hega. 54Gasi uye, na gi pharide khu libogo, a di gi rana khu tshivba, khuye: “Nyamahegyane, wuga.” 55Hefemulo waye wu di wuya, a gu dzegela gu wuga, a khuga a ema. Jesu a di va ruma gu mu ninga guhodza. 56Vavelegi vakone va di tsaka ngudzu. Aholu Jesu a di va laya gu va si embeli muthu esi si nga dugelelago.

Atualmente Selecionado:

Luka 8: BGE2014

Destaque

Copiar