Luka 6

Mwamana wa muthu a na ni tshivba vbatshani nya Sabhadho

(Matewu 12:1-8; Marko 2:23-28)

1Tshigu mwedo nya Sabhadho, Jesu a di vbindra khu thembweni nya mavbila. Vapizane va di fanya mavbila madugwana, va tshigira mandzani, va hodza. 2Vafarisi nya gukari va di khavo: “Khu ginani mu girago iso si himbedzedwago khu litshigu nya Sabhadho?” 3Jesu a di va phindrula, khuye: “Mu si gu hevbuli iso a nga girago Dhavhidhe, gikhati a nga pwago ndzala uye, ni avo a nga bani ari navo, gani? 4Idzo a nga belago khidzo Nyumbani ga Nungungulu, aya dzega sibaba nya miphaso a hodza, a ninga ni ava a nga bani ari navo, sibaba si nga bani si gu lumba gu hodzwa basi khu vaphasi nya mhamba, gani?” 5A di engedza gambe, khuye: “Mwamana wa Muthu a ngu fuma Sabhadho yinene.”

Muthu nya gulimale libogo

(Matewu 12:9-14; Marko 3:1-6)

6Khu yimbe Sabhadho a di bela nyumbani nya nombelo, a gu phela gu hevbudza. A diromo vbale muthu a nga bani a limade libogo. 7Vahevbudzi nya Nayo ni Vafarisi va di khusa maho va mu khedza, gasi gu mu wona mwendro a na mu hawulugisa khu Sabhadho, va fela gu mana igyo nya gu mu mole khigyo. 8Na wonide mahingigedzo yawe, Jesu a di embela uye a nga bani a limade libogo, khuye: “Nga ema vbakari vbavba.” Uye a di khuga a ema. 9Khavbo avbo, Jesu a di khuye: “Olu nya guvbweta gu mi wudzisani: Ginani gi yelago gu girwa khu Sabhadho: Gu gira nya sadi, mwendro nyamba sadi? Guvbanyisa muthu, mwendro gu mu mbembisa?” 10Uye, a di khedzisa gwadi vatshavbo va nga bani va mu randrede, a gu embela mudwali, khuye: “Nga thawuludza libogo.” Na li thawuludzide, li di hawuluga. 11Avo va di tala khu giviti, na va gu wudzisana khu gyawe, khavo: “Ginani hi na gu girago khu Jesu?”

Guhathwa nya vapostoli

(Matewu 10:1-4; Marko 3:13-19)

12Khu matshigu yale, Jesu a di gwela mugigomoni, gasi guya gira nombelo. A di pilekelana wutshigu watshavbo na gu lombelela ga Nungungulu. 13Na gugide, a di rana vapizane, gasi gu hatha, vbakari gwawe, likhumi na vavili, avo a nga va ranago vapostoli: 14Simoni a nga mu thangisago lina la Pedro, ni ndriyaye Andreya, Jakobe, Johane, Filipi ni Bharitolomewu; 15Matewu ni Tomasi; Jakobe, mwamana wa Alifewu, ni Simiyoni, a ranwago Mupinyameli; 16Judha, mwamana wa Jakobe, ni Judha Sikarioti, a gu uye a nga mu ningelago.

Jesu a ngu hawulugisa vadwali nya vangi

(Matewu 4:23-25)

17Jesu a di relela navo a gu ema panini, avbo a nga mananago ni vapizane nya vangi ni gidzemo nya gingi nya vathu va nga bani va dugela Judheya gwatshavbo, ni Jerusalema, ni bambe nya yiphwa ya Tiro ni Sidhoni, 18va nga bani va dzude guta mupwa ni gu hawulugiswa madwali yawe, ni avo va nga bani vari ni maphuvbo nya guvivbe, avo navo va dita vbanyiswa. 19Vathu vatshavbo va di vbweta gu mu kuha, kholu yi di gu duga khu mu givilini gyaye tshivba yi nga bani yi gu hawulugisa vatshavbo.

Makategwa

(Matewu 5:1-12)

20Na khuside maho a khedza vapizane vaye a di khuye:

“Mu kategide enu, sisiwana;

kholu khwanu Mufumo wa Nungungulu.

21Mu kategide enu, mu gu ni ndzala olu;

kholu mu na khuriswa.

Mu kategide enu, mu lilago olu;

kholu mu na hegela.

22 # Wona gambe: 1 Ped 4:14. “Mu kategide mwa gu vengwa khu vathu, va mi tutumisa, vbakari gwawe va mi vala ni gu nyenya lina lanu khwatshi li di nyenyeza, khu kotani ya Mwamana wa Muthu. 23Tsakani ni gu ghiya litshigu lolo, kholu tshatshazelo wanu wu na bani wuri wukhongolo Ndzadzini. Khidzo kharati vababe vawe va nga bani va gu sanisa vaprofeti.

24Aholu, libango lanu, enu sitetema;

kholu mu hakhide tshatshazelo yanu;

25Libango lanu enu mu khuridego olu;

kholu mu na khala ni ndzala.

Libango lanu enu mu hegelago olu,

kholu mu na womba dzihuwa ni gu lila.

26“Libango lanu mwa gu zundzwa khu vathu vatshavbo. Khidzo kharati vababe vawe va nga bani va gu gira ni vaprofeti nya malipha.

Gugola valala

(Matewu 5:38-48; 7:12a)

27“Gasi enu mu nyi yingisago, nyi ngu mi embelani, kheni: Golani valala vanu, girelani gutshamba vale va mi vengago. 28Kategisani ava va mi valago, lombelelani khu ava va mi singedzago. 29Wa gu vetwa pama gihaya gimwegyo, ningedzela gimbe gihaya; uye a gu dzegelago libhadzi, mu dige a dzega gambe ni ngandzu. 30Uye a gu lombago mu ninge; uye a gu dzegelago silo sago u nga mu wudzisi gambe; 31iso mu golago gukhenu va mi girele, va gireleni nenu.

32“Mwa gu gola ava va mi golago basi, tshatshazelo muni mu yi lindrelago? Kholu sighohi niso si ngu gola vale va si golago. 33Mwa gu girela nya sadi basi vale va mi girelago gutshamba, tshatshazelo muni mu yi lindrelago? Kholu sighohi niso si ngu gira kharato. 34Mwa gu fiyarisa basi ga vale mu va thembago khenu va na mi livba, tshatshazelo muni mu yi lindrelago? Kholu sighohi niso si ngu fiyarisa ga sighohi sikwawe, na va gu themba gu livbwa. 35Gasi enu, golani valala vanu, girani esi si gu sadi; lombisani, na mu si lindreli gu livbwa. Mwa gu gira kharato, tshatshazelo yanu yi na bani yiri yikhongolo. Gambe, mu na bani muri sanana sa Wule a khusegidego ngudzu, kholu uye khwadi ambari ga vale va si gu vadi, va si mu bongigo. 36Girelani wuhindzi vakwanu kha nga Babe wanu a gu ni wuhindzi.

Girelani wuhindzi muthu kwanu

(Matewu 7:1-5)

37“Mu nga lamuli, gasi mu si lamudwi nenu. Mu nga ningi nandru muthu, gasi mu si ningwi nenu. Tsetselelani, mu na tsetseledwa nenu. 38Ningani, mu na ningwani nenu; mu na ningwa gipimo nya gyadi, nya gutale, gi gonyeledwa, bwelo khavbo gi phathamela. Kholu Nungungulu a na mi pimela khu gipimo mu na pimago khigyo vakwanu.”

39A di va embela gambe gipimaniso gegi: “Ina gi ngu dzi kodza gikhumu gu phara kunga gikhumu gikwawe, gani? Kha si na thegela phalani sa sivili, gani? 40Mwalo mupizane a vbindrago muhevbudzi waye; aholu, mupizane a vbeledego a na ningana ni muhevbudzi waye. 41Khu ginani u khedzago gitoti gi guromo lisoni ga ndriyago, u si khedzi vhambala wu guromo lisoni gwago? 42U na dzi kodza kharini gu embela ndriyago, khuwe: ‘Wandruye, nga hidzimela nyi gu dusa gitoti gi guromo lisoni gwago’, uwe u si wonigo vhambala wu guromo lisoni gwago? Nya maliphawe, dusa guphela vhambala lisoni gwago, khavbo u na dzi kodzago gu dusa gitoti lisoni ga ndriyago.

Simbo gu tidwa khu mihandro yaye

(Matewu 7:16-20; Marko 12:33-35)

43“Mwalo simbo nya wadi wu ningago mihandro nyamba yadi, kha nga gambe a gu mwalo simbo nyamba wadi wu ningago mihandro nya yadi. 44Simbo ni simbo wa gu tidwa khu mihandro yaye; kholu, kha gu hawi dzikhure sikakaradzani, mwendro saye dziuvha mu sirangalabwani. 45Muthu nya wadi a gu dusa khu monyoni gwaye nya guhandzege silo nya sadi; gasi uye a si gu wadi a gu dusa khu monyoni gwaye nya guvivbe silo nyamba sadi; kholu likana la gu dusa iso si tadego monyoni.

Fanelo nya gugire mithumo ya yadi

(Matewu 7:24-27)

46“Khu ginani mu nyi ranago: ‘Pfhumu, Pfhumu,’ mu si giri iso nyi mi embelago? 47Nyi na mi yeyedzani uye a fananago naye muthu wule a tago gwangu, a ta pwa magana yangu, bwelo khavbo a ma landrisa. 48A ngu fanana ni muthu a nga vbahago nyumba, a phela khu gu kemba gwadi, a reledza ngudzu, gasi gu tadza khokhweni. Na vbohide talo nya mati, yi di taledwa nyumba yile, yi vetwa khu mati khu tshivba ni tshivba, aholu kha ya thega, kholu yi vbahidwe gwadi. 49Gasi muthu a pwago magana yangu a si ma theli kota, a ngu fanana ni muthu a nga vbaha nyumba yaye mu lipfuleni, a si pheli khu gu kela a tadza khokhweni. Na wu vbohide talo nya mati yita vetwa khu mati khu tshivba ni tshivba, yi di dzegela gu pfhungumuga wufendretiri.”

Atualmente Selecionado:

Luka 6: BGE2014

Destaque

Copiar