Mbete Matiye 21
21
1Zezu ke nzuk-dih fal yeri ɗih mba ke Zurusalem. Ku ka̧h Beɗfaze. Puh-u na ɓel kasaw ké kpuh Olivehri na ri#21.1 Sa̧w nzak vbeh ɓahri, kasaw Oliveh. Nah sɔɓ vbeh ɓa kasaw ké kpuh Olivehri na ri ɓay hi̧ karaŋri ɓá lah ɓa gah-u.. Wara mí Zezu pih nzuk-dih fal yeri seɗe si Zurusalem. 2Ke ɓahri se : « Í si puh ké na pol woiri sa̧-aw. Ka̧hna woiri dale, i ɓay ko mah bamnde kú-u ŋga̧h ƴo. Gunu ƴo ɓelu. Í sel mah bamnde ra rah keni gunu gi hi̧ mi. 3Nzuk vbi wuri ɓahri, ani mí i sel mah bamnde ra le, í ɓah hi̧ ni kandɔkay : “Gaŋ bamnde-uri mí yih ɓayu.” Dale ke ɓay poŋ hi̧ wuri í gi keni. »
4Fe-u laɓ kaŋ hi̧ ɓay ké gun nzak pihna Ŋgerzah a lewsa̧ ɓah ra laɓ ƴo gelu. 5Ɓayu ɓah kandɔkay :
« Í ka-kah hi̧ nzukri ké Siyoŋ ɓahri,
kú ko, Mbay woyri ƴo gi ke ɗeŋ.
Law ye voh lɔm.
Ke kaɓ tul gun bamnde ƴo gina # 21.5 Ɓayay na ɓil Mbete Zacharie 9.9 ke Mbete Esaïe 62.11. Ké ta̧w ziɓri, mbay woyri kaɓ tul ɗeŋe mí rih keni ɓil puh le, sɔk ɓay ŋgermu. Mí mbay kaɓ tul bamnde rih keni ɓil puh le, fe laɓna-u sɔk ɓay ɗeŋ.. »
6Bale nzuk-dih fal yeri ké seɗe ra si gi ke bamnderi kandɔk ké Zezu pih niri. 7Mí ku mbala gar ku̧ tul bamnde-uri, mí Zezu kaɓ tul gunu. 8Dale daɓa nzukri ɓa ŋgi̧-u ŋgi̧-u gim gi. Nzuk a haniri fih gar woyri ku̧ ke ful ful, nzuk a ɓoruri ba, haw gay kpuhri, mí ku fih ku̧ mahful pi. 9Nzuk a haniri si pol, nzuk a ɓoruri ba, si fal. Ku vba̧ nzak le, ku vba̧ ra ɓáy ɓahri :
« Gun zih ŋgermbay Daviɗ,
mú ya̧ na#21.9 Sa̧w nzak vbeh Hosanna. Hosanna. Í ki̧ ɓay hosanna ɓil Mbete-ƴah tɔh riŋri, í lah sa̧w ɓayu..
Mgbɔkɔ Gaŋ tul feri riw ku̧ tul wo ké mu gi ke riŋ ɗina ye.
Mú ya̧ na, riŋ ɗina wo mgbe si ka̧h nunmbam a síɓa sa̧. »
10Zezu ɓá rih ɓil Zurusalem le, nzuk puh-uri si tul hani hali hali. Ku ɓahri se : « A ge mí ƴo-ay le ? »
11Daɓa nzukri ƴo ɓah hi̧ niri ɓahri : « Ke ɓa Zezu gun nzak pihna Ŋgerzah ké Nasareɗ ké tusiɓa Galile munu. »
12Zezu si rih ɓil ila vul kani Ŋgerzah. Ke el ni̧h nzukri ké kaɓ ke fe hɔlnari ɓay hi̧ nzukri ɓá yeh ɓa fe puhna woyri, ke ni̧h nzukri ké ƴo yeh fe hɔlnari-aw kara pi. Tabele nzuk-kom lari ŋgomna ke lari misoŋri#21.12 Pihna nzuk-kom lari ɓa kom lari nzuk-lak puhri ke lari vul kani Ŋgerzah dale, mahful ƴo ri ɓay gahruri ɓá yeh fe puhnari ke lari a vul kani Ŋgerzah ɓay gi keni., ke sɔkrɔ mgborvboŋ mgborvboŋ ku̧ siɓa, ke sɔkrɔ gel kaɓna nzuk-yeh ndoy mbɔreri#21.12 Nzukri ké ŋgerna woyri ŋgi̧ ya mí ku ta ke fe hɔlna kandɔk nday mini sami mini guy ɓay gi puh fe keni ya, ku gi ke ndoy mbɔreri ɓa fe puhna woyri hi̧ Ŋgerzah. Í mgba Mbete Luk 2.24 tuh ke gel ki̧na-ay. pi. 13Ke ɓahri se : « Ŋgerzah ɓah ɓil mbete ye ɓahri, nzukri ɓay tu vul ye ɓa vul-ɓah ɓay ziŋ ni#21.13 Ɓayay na ɓil Mbete Jérémie 7.11 ke Mbete Esaïe 56.7. . Mí a woiri-ay ba, i sɔɓ gelu ɓa hoh nam riɓari. »
14Ra̧wri ke nzuk kpereri#21.14 Ɓay tu ɓahri, ra̧wri ke nzuk kpereri ta ke ful ɓay rih ɓil ila vul kani Ŋgerzah ya ɓay sena woyri, í ki̧ Mbete Lévitique 21.18. Mí Zezu gi gah nzukri gbam mí teh mahful hi̧ niri kú si ta̧w Ŋgerzah. gi ta̧w ye ɓil ila vul kani Ŋgerzah, mí ke gah niri.
15Ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ko fe saŋri ké-e laɓ, mí ku ƴo lah bula gunri ké mgbe ɓil ila vul kani Ŋgerzah ƴo ɗi siŋ, « gun zih ŋgermbay Daviɗ, mú ya̧ na ge »
bale, ku ziŋ law fa̧hna. 16Mí ku ɓah hi̧ Zezu ɓahri : « Siŋ ké gunri ɗi-aw, mu lah gaŋ ley ? »
Zezu ba, ɓahri : « Ɓa teh-u. Gel ki̧na-ay, i ki̧-ki̧, kaŋ ya le ? Dimna ké ti̧h ke nzak gun a leleri ke nzak gun nzak pamri ra Ŋgerzah mbar riŋ ɗina ye ɓilu#21.16 Ɓayay na ɓil Mbete Siŋ 8.3. . »
17Zezu sɔɓ fal hi̧ niri, mí ke ti̧h ke puh a luki ra si Beɗtani.
18Tipele-u, Zezu ƴo el ma puh a luki-aw dale, ɗaka i ni. 19Ke ko kpuh nzu̧y mbew ƴo ɓel ful, mí ke reh si bɔk kpuh nzu̧y ra. Ke ziŋ lehna-u ya, ɓa gayuri kaŋto. Mí ke ɓah ɓay hi̧ nzu̧y ra ɓahri : « A wo nzu̧yay#21.19 Ké ɓil mbete Ŋgerzah a haniri, ƴo ɗi gun Izarayelri ɓa kpuh nzu̧y. Ku ɓa kpuh ké Ŋgerzah ma̧, mí ku sa leh lehna hi̧ ni ya., ndɔk wo ta leh lehna mba wu̧m wara. »
Kpuh nzu̧y ra ho̧k wɔh gaŋ ba. 20Nzuk-dih fal yeri ko fe ké kal, mí na niri ɓa saŋ. Ku ɓahri : « Ani mí kpuh nzu̧y ra ho̧k wɔh sa sari-ay le ? »
21Bale Zezu ɓahri : « Nzu̧y ra ho̧k wɔh ɓa ketina, mi ƴo ɓah ɓayay hi̧ wuri, law woiri ƴo mbew ke law Ŋgerzah, mí fahɓay ta law woiri ya le, i láɓ kandɔk ké mi laɓ ke kpuh nzu̧yay kaŋto ya. Wara le i ɓah ra hi̧ baw kasaw ké na sa̧-aw ɓahri, kasaw ɓá loh ke gelaw si vbu ɓil mahmbih le, fe-u ɓay laɓu gaŋ ba. 22Ɓay fe a suŋ suŋ gbam ké i vbi Ŋgerzah, mí law woiri ƴo mbew ke law ye le, ke láɓ fe-u hi̧ wuri. »
23Zezu si rih ɓil ila vul kani Ŋgerzah ƴo firma nzukri ɓay lák mbay Ŋgerzah bale, ŋgernzuk fe puhna Ŋgerzahri ke ŋgernzuk puh woyri gun Izarayelri gi ta̧w Zezu ké gel fe firma ye. Ku ɓahri : « Ke bolkusol ge mú-u laɓ keni pihna wo-ayri le ? A ge mí hi̧ mu ŋgerna-u le ? »
24Zezu ba, yih nzak woyri ɓahri : « A bi kara mi vbi wuri ɓay mbew. Í yih vbiɓayu hi̧ mi mí lah dara mí-i sɔ́k wuri ke bolkusol ge mí-i ƴo laɓ pihna biri-ay ɓáy. 25Batem ké Za̧h soh nzukri ra wa, sa̧wu ɓa nunmbam mini ɓa nzuk pirmatulri le ? »
Mí ku fah ɓay ké sakra woyri. Ku ɓahri : « Nah ɓah ra ri se, sa̧wu ɓa nunmbam le, ke él vbi na, ɓay fe mí nah sa ya̧ ɓay ké Za̧h ɓah ra ya. 26Mí náh ɓahri, sa̧wu ɓa nzuk pirmatulri le, nzukayri riw ɓay i na. » Hȩkme nun nzukri tuh nzak ŋgernzukri-aw ɓayu ké daɓa nzukri riw tu Za̧h ɓa gun nzak pihna Ŋgerzah.
27Mí ku yih nzak Zezu ɓahri : « Nah tu sa̧wu ya. »
Le Zezu el ɓahri : « A bi kara mi ta sɔk wuri ke bolkusol ge mí-i laɓ keni pihna-ayri ya pi. 28A woiri í sɔk mi kerɓay woiri, mí lah. Nzuk mbew ƴo ke gun wo̧rori ɓa seɗe. Ke ɓah hi̧ gun pol ɓahri : “Gun bi, mú si waka viyȩh bi, mú laɓ ri pihna.”
29Gun pol ra yih nzak bah ye ɓahri : “Mi sí ya.”
Zah le law ye nzah ɓay hi̧ ke kaɓ ke kerɓay, mí ke tɔr si waka. 30Bah gun si ta̧w toŋnafal gun pol pi. Ke ɓah ɓay ra hi̧ ni. Toŋnafal yih nzak bah ye ɓahri : “Mi lah wuri lah, mi si-u.”
Mí ke si ya dih.
31-32Ké sakra gunri ké seɗe-aw ra wa, gun a suŋ mí laɓ fe ké bah ye yih ɓayu le ? »
Ku ɓahri : « Gun pol mí laɓ fe ké bah ye yih ɓayu. »
Zezu el ɓahri : « Gelu munu, mi ƴo ɓah hi̧ wuri ɓahri se, nzuk-mbu̧h lampohri ke wu̧y nunpukiri ƴo ti̧h ɓa gunri ké Ŋgerzah lak mbay tul woyri poŋ wuri ɓayu ké Za̧h gi te-teh ɓay mahful-ƴo ke Ŋgerzah ɓa záh woyri hi̧ nzukri lah ɓayu, mí i sa lah ni ya. Nzuk-mbu̧h lampohri ke wu̧y nunpukiri ba, ya̧ ɓay ye. I ko pi. Mí yá̧ ɓay ye ra, ɓayu se law woiri mbew ya.
33Lawɓay a ɓoru ké na-ay, í lah wuri, í sɔk mi kerɓay woiri, mí lah. Nzuk mbew laɓ waka kpuh viyȩh#21.33 Ɓay lah ɓay lawɓayay, í ki̧ Mbete Esaïe 5.1-4,7. . Ke vba̧ kpaŋ ɗoŋ ri gbik gbik. Ke laɓ gel-ha̧h mbih lehna kpuh-u ké ɓilu. Ke laɓ gel ƴona nzuk-kɔr wakari ɓa gaŋu dara mí ke ndoh waka ra hi̧ nzuk-laɓ pihna-uri ɓáy. Ke tɔr si gahru ɓa ɗih-u. 34Few-hal lehna kpuh ka̧h dale, nzuk waka pih gun nzak pihna yeri si ta̧w nzuk-laɓ pihna wakari ɓá fa̧h lehna kpuh-u gi keni hi̧ ni. 35Mí nzuk-laɓ pihna wakari ra mgba gun nzak pihnari-aw. Ku vboŋ nzuk a hani-uri, ku i nzuk a ɓoruri, nzuk a haniri ba, ku vbuk ke kasaw i-i. 36Nzuk waka el pih gun nzak pihna ye a ɓoruri ɓa ŋgi̧-u ɓáy, mí nzuk-laɓ pihna wakari ra laɓ niri mah hani ke nzuk a polri. 37Ɔh tɔru bale, ke pih gun sana ye si ta̧w nzuk-laɓ pihna wakari ra. Ke ker ɓahri, ku ɓay hȩk gun ye.
38Nzuk-laɓ pihna wakari ɓá ko gun nzuk waka ƴo gina bale, ku lek ɓay mbew ɓahri : “A ye ké-e gi-aw ra, ke ɓa gun-ya̧ fe bah ye munu. Náh i wuri ni dale, waka-ay ɓay ti̧h ɓa fe wahri.”
39Gun ra ka̧h ba, mí nzuk-laɓ pihna wakari mgba ni, ku kɔklɔ ni si fal kpaŋ, mí ku i ni. » 40Zezu el ɓahri : « Kaŋaw ba, nam ké nzuk waka ra gi le, ke láɓ ani mí ziŋ nzuk-laɓ pihna wakari-aw le ? »
41Ku ɓahri : « Ke í nzuk a suya-awri ra, mí ke él ndoh waka kpuh ra hi̧ nzuk a ɓoruri. Gelke few-hal lehna kpuh ka̧h dale, ku hí̧ ni lehna-u. »
42Zezu el ɓah ra ɓáy hi̧ niri : « Ɓay ké na ɓil mbete Ŋgerzah-ay, i ki̧-ki̧, kaŋ ya le ?
Kasaw ké nzuk-mboh vul kani Ŋgerzahri poŋ kan kpah ra,
kasawu mí el ti̧h ɓa mah kasaw-mboh diŋ vulu # 21.42 Í mgba gel ki̧na-ay tuh ke Mbete 1 Piyer 2.4-5, Mbete Efezeri 2.20 ba, Mbete 1 Kɔrenteri 3.11,16 pi..
Miƴori mí hi̧ kasaway el ti̧h ɓa mah kasaw,
mí ɓa fe saŋ ké nun wah # 21.42 Ɓayay na ɓil Mbete Siŋ (Psaumes) 118.22-23..
43Sa̧wu mí-i ɓah ɓay ra hi̧ wuri ɓahri se, Ŋgerzah ɓay nah ŋgerna lák mbay ye ké ndɔk woiri. Ke ɓay el ndoh ndɔk sa̧wnzuk a ɓoru ké laɓ pihna hi̧ waka ra leh lehna-u. 44[Nzuk ké ɓe kasaway mí lih le, ɓay gur mun ye rukruk. Mí nzuk a a̧y ké kasaway toh tul ye le, ɓay naŋ nzuku ɓa som ri̧nini#21.44 Gel ki̧na-ay ta ɓil mbete sa̧w nzak a hani-uri ya..] »
45Ŋgernzuk fe puhna Ŋgerzahri ke fariziri lah lawɓayawri, mí ku tu ɓahri, lawɓayuri tuŋ tul woyri. 46Ku ƴah ful ɓay mgba ni, mí hȩkme daɓa nzukri laɓ niri kandɔk ké nzukri tu ni ɓa gun nzak pihna Ŋgerzah.
Atualmente Selecionado:
Mbete Matiye 21: SIAFNK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Wycliffe Bible Translators, Inc. All rights reserved.
