Mbete Matiye 22
22
1Zezu ba, el ɓah lawɓay a ɓoru hi̧ niri ɓáy#22.1 Í mgba Mbete Efezeri 5.25-27 ke Mbete Ten sa̧wɓay 19.7-9 tuh ke gel ki̧na-ay.. 2Ke ɓahri : « Mi ƴo mgba ɓay mbay mbew tuh ke ɓay lák mbay Ŋgerzah. Mbay ra laɓ ti̧hmbih-ya̧ hani wu̧y gun ye. 3Mí ke pih gun nzak pihna yeri si ɗi nzukri ké-e wahɓay ziŋ niri pol ra, kú gi su̧ fe ti̧hmbih wara. Mí ku sa gi ya. 4Mbay el pih gun nzak pihna ye a ɓoruri ɓáy ɓahri : “Í ɓah hi̧ nzukri ké mi wahɓay ziŋ niri pol ra ɓahri se, í ko, fe su̧na ti̧hmbih lek da. Nday biri ke guy biri ké hu̧h taɓ taɓ ké ɓa numu numu ra, mi vbeh da. Fe su̧nari riw ku̧ ndekle ndekle geŋ niri. Kú gi gel ti̧hmbih-ay wara.”
5Mí nzukri-aw deh ɗina-aw. Nzuk a suŋ suŋ le, tɔr si gel-laɓ pihna ye, laɓ pihna ye. Nzuk a haniri tɔr si waka woyri, nzuk a ɓoruri ba, tɔr si gel-ƴah lari woyri. 6Tɔr nzuk a ɓoruri ɓáy, ku mgba gun nzak pihnari ra laɓ fe-se su̧hru ziŋ niri pi, ku i nzuk a ɓoruri pi. 7Mbay ziŋ haŋ fa̧hna. Ke pih soze yeri si i nzukri ké i gun nzak pihna yeri-aw. Ku nzuh puh woyri ke hɔrɔ gbɔlɔk gbɔlɔk pi.
8Wara mí mbay ɓah hi̧ gun nzak pihna yeri ɓahri : “Ti̧hmbih-ya̧ hani wu̧y ke gun bi lek gbam da. Nzukri ké mi wahɓay ziŋ niri pol ra, ku mah gi gel ti̧hmbih-u ya. 9Kaŋaw ba, í mbi zelfulri ké ka̧w puhri. Nzuk a suŋ suŋ ké i ziŋ niri le, í sɔk niri ɓay ti̧hmbih-ay, kú gi mbu̧h ndɔk woyri ziŋ mi.”
10Kaŋ mí gun nzak pihna yeri si ke zelful ɓil ka̧w puhri ka-kah hi̧ nzukri, kú gi. Nzuk law piri-uri ke nzuk law sukiri, ku gi mbah gel ti̧hmbih ra mer mer gaŋ ba. 11Bale mbay gi gelu ɓay mgba gahru yeri ɓa suki. Mí ke ko nzuk mbew kaɓ ri. Nzuku saŋ ndoh gar ti̧hmbih kú-u hi̧ ni ra#22.11 Mbay a lewsa̧ri wal gar hi̧ nzukri kú-u ɗi niri gi gel ti̧hmbih woyri. Sa̧wu mí nah sɔɓ vbeh ɓahri, nzuku saŋ ndoh gar ti̧hmbih. Mbete Ten sa̧wɓay (Apocalypse) ɓah ɓay gar ra ɓa ŋgi̧-u kandɔk gel ki̧na ɓil Mbete Ten sa̧wɓay 3.5.. 12Mbay ɓah hi̧ nzuk ra ɓahri : “Ya̧h, ani mú-u gi kaɓ ba, mí gar ti̧hmbih le, mu saŋ ndoh-u le ?” Gelɓay mba nzuk ra. 13Wara mí mbay ɗi gun-laɓ pihna yeri ɓahri : “Í mgba ni, í ŋga̧h bɔk ye ke ndɔk ye, í mbi ni vbu kala ɓil tirima ké na nduŋ. Gelaw, ke vúh rew ke mbihnun, ke sú̧ sel ye ŋger ŋger.” »
14Kandɔkaw mí daɓa nzukri lah ɗina mbay, mí nzukri ké-e lu niri ké sakra daɓa nzukri ra ŋgi̧ ya.
15Wara mí fariziri mbu̧h nzak woyri mbew, ku hɔl ndawɓay ɓay mgba keni Zezu, 16mí ku pih nzuk-dih fal woyri ke nzuk mbay Eroɗri si ta̧w Zezu ɓahri : « Metere, nah tu ɓahri, i ɓa nzuk a ketina. I firma nzukri sí siŋ sina Ŋgerzah ke fulu fulu. I lu nun nzuk ya ɓayu ké hȩkme nun nzuk se wuri ya. 17Kaŋ dale í sɔk na kerɓay woiri, náh lah. Ŋgerzah hi̧ na gun Izarayelri ful ɓay puh lampoh hi̧ ŋgermbay sa̧wnzuk a ɓoruri kandɔk sezar mini ani le#22.17 Sa̧w nzak ɓahri, ful ƴo ri ɓay náh puh lampoh hi̧ mbay sezar le ? Ŋgernzuk gun Izarayelri ɓahri, sa̧w woyri ɓá puh lampoh hi̧ Ŋgerzah mbew yaŋ, kú puh hi̧ mbay sa̧wnzuk a ɓoru ya ɓay fe le, Ŋgerzah mbew yaŋ ɓa mbay woyri. Ku ɓahri, nzuk puh sezar le, nzuku ko ni ɓa mbay poŋ Ŋgerzah. Zezu ɓah ra ɓahri, mahful ƴo ri ɓay puh sezar le, ŋgernzukri-aw ɓay laɓ ɓay kan tul ye. Zezu ɓah ra ɓahri, puh lampoh ɓá ta-a le, nzuk ŋgomnari Eroɗ ɓay mgba ni ke ɓay. Sa̧wu mí nah vbeh ɓahri, hi̧ mbay a ɓoruri kandɔk sezar ɓay hi̧ karaŋri ɓá lah ɓa gah-u. ? »
18Zezu ba, tu ɓay a pipiri-u woyri ra, mí ke ɓahri : « Ɓay fe mí i gi ndoh law bi ke ɓay kandɔkay le ? 19Nzuk-mu̧h ketinari, í ten lari ké nzukri puh keni lampoh ra hi̧ mí ko. »
Ku ten lari-u hi̧ ni. 20Mí Zezu el ɓahri : « Tem nzuk a suŋ mí ku vbeh kan ri-ay le ? Riŋ nzuk a suŋ mí ku vbeh kan ri-ay le ? »
21Ku ɓahri : « Temu ɓa tem sezar. Riŋu kara pi. »
Wara mí ke ɓahri : « Kaŋ dale fe sezar le, í hi̧ sezar. A wo nzuk pirmatul ké Ŋgerzah laɓ mu ɓa fe tem ye le, mú hi̧ Ŋgerzah gaŋ ba#22.21 Sa̧w nzak vbeh ɓahri, fe Ŋgerzah le, hi̧ Ŋgerzah, mí vbiɓay Zezu si tul fe tem. Mahɓay ké na ɓil Mbete Sa̧w fe 1.27 le Zezu yih keni nzak nzukbaa yeri le, nzuk-sɔɓ mbeteri ten kerɓayu ɓay hi̧ karaŋri ɓá lah.. »
22Gosoɓay zi niri zi-zi hi̧ ku kaɓ silili, mí ku poŋ ni, ku tɔr.
23-24Namu-aw sadusiri gi ta̧w Zezu. (A woyri-aw, ku ɓahri, nzuk hu le, záh ye ta-a. Ke ta ziŋ pa̧ymun a foyu ya pi.) Mí ku vbi ni ɓay ɓahri : « Metere, Moyiz vbeh ɓil mbete bolkusol Ŋgerzah ɓahri, gelke nzuk ya̧ wu̧y mí ke hu dan mbuŋ gun le, yi̧n ye ɓá ya̧ wu̧y kaŋpele ra, ké mbuŋ keni gun ɓa mi̧hri yi̧n ye ké hu-aw. 25Dale ké sakra wah-ay, nzuk ɓil mahri ɓa toŋndɔk say ƴo ri. Ŋgernzuk ya̧ wu̧y bale, ke hu dan mbuŋ gun. Mí toŋnafal el ya̧ wu̧y kaŋpele ra. 26Ke hu dan mbuŋ keni gun. Nzuk a sayu ya̧ wu̧y ra. Ke hu dan mbuŋ keni gun pi. Fe-u laɓ kaŋ kaŋ ka̧h tul yi̧n a toŋndɔk sayu pi. Gbam ku hu dan mbuŋ gun ɓa mi̧hri yi̧n woyri. 27Ɔh tɔru bale wu̧y ra hu pi. 28Kaŋaw ba, seh ké záhri ɓay ziŋ pa̧ymun a foyu ra wa, wu̧y ra ɓay na ɓa wu̧y nzuk a suŋ le wo ? Ɓayu ké nzukri ké toŋndɔk sayaw ya̧ ni ke gel woyri mbew mbew gbam. »
29Zezu ba, ɓah hi̧ niri ɓahri : « A woiri-ay i reh ful kandɔk ké i sa tu sa̧wɓay ké na ɓil mbete Ŋgerzah ya, ké i sa tu ŋgerna Ŋgerzah ya pi. 30Seh ké záhri ziŋ pa̧ymun a foyu le, yá̧ hani ɓay ta-a. Wara le ku káɓ ké nunmbam ɓa ŋgɔh kandɔk tem nzak pihna Ŋgerzahri. 31Ɓay ti̧hna záhri ke pa̧ymun a foyu ra wa, gel ki̧na a a̧y ké Ŋgerzah ɓah ɓayu hi̧ na, i ki̧-ki̧, kaŋ ya le ? 32Ke ɓahri se, a ye, ke ɓa záh zih woiri Abaraham, Isak, Zakoɓ. Kandɔkaw mí Ŋgerzah ɓa záh nzuk a huluri ya. Wara le ke ɓa záh nzuk a ƴo ke ɔknari ké kaɓ ke pa̧ymun a foyu sew ke sew ɓa ŋgɔh. »
33Daɓa nzukri lah fe firma ké Zezu firma niri ra, mí gosoɓay zi niri zi-zi.
34Fariziri ɓá lah ɓahri, Zezu mgba nzak sadusiri ke ɓay dale, ku mbu̧h hani ke sadusiri#22.34 Fariziri ke sadusiri, ku ɓa nzukbaari. Ɓay tul Zezu mí ku mbu̧h hani wara.. 35Ku pih nzuk goso fe tuna mbete bolkusol Ŋgerzah mbew ké haŋsekle woyri gi ndoh law Zezu ke ɓay ɓahri : 36« Metere, ké sakra ɓayri ɓil mbete bolkusol Ŋgerzah ra wa, ɓay a suŋ mí ŋger mba ɓay a ɓoruri gbam le ? »
37Zezu ba, ɓahri : « Miƴori ɓa Ŋgerzah wo, mu sá ni ke law wo gbam ke mun wo gbam ke kerɓay wo gbam. 38Ɓayay ɓa ɓay a luki, ɓa tul ɓay ké kal tul ɓayri gbam ɓil mbete bolkusol. 39Ɓay a seɗe-u ƴo ri ké si mbew ke tul ɓayay mí na-ay : Mu sá nzuk mbaŋ wo eŋ mun wo kaŋ. 40Ɓayri ké seɗe-ay mbu̧h ɓayri gbam ké na ɓil mbete vbehna Moyiz ke mbete vbehna gun nzak pihna Ŋgerzah a lewsa̧ri. »
41-42Zezu ba, el vbi fariziri ra ɓahri : « Í sɔk mi kerɓay woiri, mí lah. Ŋgermbay ra wa, ɓa gun zih ge le ? »
Ku ɓahri : « Ŋgermbay ɓa gun zih ŋgermbay Daviɗ. »
43Ke ɓahri : « Mí-aw ba, ani mí Tempuki mgba tem ŋgermbay Daviɗ hi̧ ni ke ɗi gun zih ye ɓa Ŋgermbay tul ye ɓáy le ? 44Ke ɓahri se : Miƴori ɓah hi̧ Ŋgermbay bi ɓahri, ké kaɓ ɓel ye Miƴori ɓa ndɔk lakna ye, ke ƴo ɔh ŋgerna nzukbaa yeri hi̧ kú ti̧h ɓa gel-ku̧ bɔk ye#22.44 Gel ki̧na-u na ɓil Mbete Siŋ 110.1.. 45A ké ŋgermbay Daviɗ ɗi gun zih ye ɓa “Ŋgermbay” ye ra ba wa, ani mí Ŋgermbay ɓa mi̧hri ŋgermbay Daviɗ ɓáy le ? » 46Ke mgba nzak woyri ke ɓay. Nzuk mbew yih nzak ye ya. Ur ke seh-u-aw, nzuk mbew ké hi̧ tul ye ɓay vbi Zezu ɓay ta mba.
Atualmente Selecionado:
Mbete Matiye 22: SIAFNK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Wycliffe Bible Translators, Inc. All rights reserved.
