Mbete Matiye 20
20
1Ɓay nzukri ké ƴo pol ke nzukri ké ƴo fal ra, mi ƴo mgba nzuk waka kpuh viyȩh tuh keni lák mbay a nunmbam. Nzuk waka kpuh viyȩh ƴah nzuk-laɓ pihnari. Nzuk waka ti̧h ke tipele za̧y si ƴah nzuk-laɓ pihnari ɓay kú si laɓ pihna ké waka ye. 2Nzuk waka ziŋ nzuk-laɓ pihnari, mí ke lek ɓay puh niri lari ké mah lari pihna nam mbew#20.2 Sa̧w nzak ɓahri, denari. Denari mbew ɓa lari ké mah lari pihna nam mbew. . Kaŋ mí ke pih niri si waka ye ra.
3Seh zaŋ ndi̧ mah sa̧wseh toŋndɔk mbew, mí ke el ti̧h ra ɓáy. Ke ko nzuk a ɓoruri ké gel daɓa ƴo ƴah pihna. 4Mí ke ɓah hi̧ niri ɓahri : “A woiri, í si waka kpuh bi laɓ pihna-u. Mi púh wuri lari mah gel pihna woiri.”
5Bale nzukri ra tɔr si waka ye. Nzuk waka ti̧h ra ɓáy ke sa̧wseh midi pi, ke sa̧wseh say pi. Ke ziŋ nzuk a mbaŋuri, mí ke pih niri si laɓ pihna waka ye pi.
6Nzuk waka ti̧h ra ɓáy ke sa̧wseh ndiɓi, seh toŋ ɗih ya ɓay riŋu, mí ke ziŋ nzuk a mbaŋuri ɓáy. Ke ɓahri : “Ani mí i ƴo gelay ke tipele sa̧ ka̧h aŋay dan láɓ pihna le ?”
7Ku ɓahri : “Ɓay fe le nzuk ɗi na si laɓ pihna ya.”
Ke ɓahri : “Í si wuri waka bi laɓ pihna-u.” Mí ku tɔr si waka ye ra.
8Seh na nzȩh bale, nzuk waka-u ɗi ŋgernzuk-ko tul pihna-u. Ke ɓahri : “Mú ɗi nzuk-laɓ pihnari ra ɓá gi titilu ke tul nzukri ké gi pihna aŋay ka̧h tul nzuk a gi polri. Mú puh niri.”
9Ŋgernzuk-ko tul pihna ra ɗi nzukri gi. Nzukri ké gi pihna sar fal, a ge ge le ziŋ lari mah lari pihna nam mbew mbew. 10Nzuk a titiluri ra ba, gi. Ku ker ɓahri, a woyri le ku ɓay ziŋ lari kal mbaŋ woyri. Mí ku ziŋ mah hani gba̧y. 11-12Ku ya̧ lari woyri ra, mí ku el su̧h ɓay ziŋ nzuk waka ra ɓahri : “Nzukri ké gi fá-fal, ku laɓ pihna ka̧h sa̧wseh mbew ya dih, mú-u mgba niri mah ke a wah ké nah laɓ ŋger pihna-aw ɓil birbiŋ seh.”
13Dale nzuk waka ɓah hi̧ nzuk ké sakra woyri ɓahri se : “Ya̧h, mi gɔɓrɔ mu ya. Nah lek ɓay ɓahri, mi púh mu lari mah lari pihna nam mbew, kaŋ ya le ? 14Mú ya̧ lari wo, mú si ɓa suki. A bi le, mi hi̧ kpandɔk hi̧ nzukri ké gi fal kandɔk ké mi yih. Mi hi̧ mu kpandɔk kandɔk ké mi yih kaŋ pi. 15Mi ƴo ke ful ɓay laɓ fe ké mi ƴo keni kandɔk ké mi yih, kaŋ ya le ? Uwa. Nun wo sih tul fe bi ɓay law suki bi ley ?”
16Kandɔkaw mí nzukri ké ƴo sar fal mbaɗ ɓay kal ma pol. Nzukri ké ƴo pol ba, ɓay si sar fal mgbaɗ. »
17-18Zezu ƴo hil ma Zurusalem, mí ke fa̧h nzuk-dih fal ye a boh falu seɗeri ɓoɗ. Sina woyri ké ful ra, ke el ɓahri se : « Í lah, nah ƴo hil wuri ma Zurusalem, mí nzuk ɓay ndoh gun nzuk pirmatulay ndɔk ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri. Ku ɓay kuŋ salɓay hul kan tul ye. 19Ku él ndoh ni ndɔk sa̧wnzuk a ɓoruri hi̧ kú sak ni, kú zɔr ni ke ndehdɔŋ, kú ɓar ni ké tul kpuh vbatay. Nam a sayu dale, ke tí̧h ke puh záhri ke pa̧ymun a foyu. »
20Wara mí wu̧y Zebede fa̧h gun woyri seɗe gi pol Zezu. Ke huk siɓa, ke yih vbi ni ɓay mbew. 21Mí Zezu ɓahri : « A fe mú-u yih ɓayu le ? »
Wu̧y ra ɓahri : « Mú wahɓay hi̧ mi, gun biri ké seɗe-ay ku káɓ ɓa gɔŋrɔŋ mbay wo ké puh lakna wo. Nzuk a mbewu ɓá kaɓ ndɔk lakna wo, nzuk a ɓoru ba, ɓá kaɓ ndɔk kperu wo. »
22Zezu ba, ɓah hi̧ gunri-aw ɓahri : « Fe ké i goŋaw, i tu ya. Koɓ koseh#20.22 Ɓay tu ɓay kɔɓɔ ra, í mgba Mbete Siŋ (Psaumes) 75.8, Mbete Esaïe 51.17,22, Mbete Jérémie 49.13 tuh ke gel ki̧na-ay. Fe nzona ké na ɓil kɔɓɔ ra ɓa haŋ fa̧hna Ŋgerzah ké tul suya. Koseh ra ɓa salɓay hul ké ɓay ta tul ye. ké mi ɓay nzo-u ra, i mah ɓay nzo pi le ? »
Ku ɓahri : « Nah ma-mah. »
23Zezu el ɓahri se : « Fe nzona ké na ɓil koɓ ra i ɓay nzo-u gaŋ. Mí ɓay hi̧ nzukri ɓá kaɓ ndɔk lakna ke ndɔk kperu bi ra ɓa fe bi ya. Wara le ɓa fe bah bi ké lek gel kaɓna-aw ɓay hi̧ niri. »
24Tɔr nzuk-dih fal Zezu a bohri lah goŋna ra mí haŋ woyri fa̧h niri ké tul gun ɓil mahri ké seɗe ra. 25Bale Zezu ɗi nzuk-dih fal yeri gi ma ta̧w ye, mí ke ɓahri : « A woiri i tu-tu. Mbay tusiɓari ƴo lak mbay tul nzuk woyri ke ŋgerna. Nzuk a lukiri ƴo pih bolnzak woyri hi̧ nzukri laɓ. 26Mí a woiri le, i ná kandɔk nzuk riŋ ɗinari-aw ya. Wara le nzuk a a̧y ké yih ti̧h ɓa ŋgernzuk tul mbaŋ yeri le, ke ná ɓa gun-laɓ pihna hi̧ mbaŋ yeri. 27Nzuk a suŋ suŋ ké yih na ɓa tul ké sakra mbaŋ yeri le, ke ná ɓa mgbal mbaŋ yeri. 28Kaŋ gaŋ mí gun nzuk pirmatul gi tusiɓa ɓay hi̧ nzukri ɓá laɓ pihna hi̧ ni ya. Wara le ke gi ɓay laɓ pihna hi̧ nzuk mbaŋ yeri. Ke gi ɓay poŋ mun ye ɓa fe puhna ɓay sel daɓa nzukri ke ndɔk hul. »
29Zezu ke nzuk-dih fal yeri ƴo ti̧h ke Zeriko, daɓa nzukri ɓa ŋgi̧-u dih fal ye pi. 30Mí í ko, ra̧wri seɗe kaɓ ɓel mahful. Kú-u lah ɓahri Zezu mí ƴo kalna bale, ku vba̧ nzak ɓeleŋ ɓeleŋ : « Gun zih ŋgermbay Daviɗ, í laɓ law in ziŋ na ge. »
31Daɓa nzukri-aw pom niri ɓay kú tuh nzak. Mí ku toŋ vba̧ nzak ɓa mgbe-u ma síɓa síɓa : « Gun zih ŋgermbay Daviɗ, í laɓ law in ziŋ na ge. »
32Zezu ta̧h ƴo, mí ke ɗi ra̧wri ra gi. Ke ɓahri : « A fe mí i yih ɓay mí laɓ hi̧ wuri le ? »
33Ku ɓahri : « Gaŋ wah, nah yih ɓay í hi̧ nun wah ɓá ko gel. »
34Law Zezu sa̧h, mí ke ndar ndɔk za nun woyri. Dale nun woyri teh hi̧ niri ku ko gel, mí ku dih fal ye.
Atualmente Selecionado:
Mbete Matiye 20: SIAFNK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Wycliffe Bible Translators, Inc. All rights reserved.
