Mbete Matiye 19
19
1Kandɔkaw mí Zezu ɓah ɓayri-aw ɔh dale, ke poŋ tusiɓa Galile mí si tusiɓa Zude ké na fál kala mbih Zurdeŋ. 2Daɓa nzukri ɓa ŋgi̧-u si fal ye, mí ke gah nzuk senari ké ri. 3Fariziri ba, gi ndoh law ye ke ɓay. Ku ɓahri : « Bolkusol Ŋgerzah hi̧ nzuk ful ni̧h wu̧y ye ɓay tul ɓay a suŋ suŋ le ? »
4Zezu ba, ɓahri : « Ke titilu da̧y ké Ŋgerzah laɓ nunmbam ke tusiɓa ra, ke laɓ nzuk pirmatul ɓa wo̧ronzuk ke wu̧ynzuk. I ki̧-ki̧, kaŋ ya le ? » 5Ke el ɓahri se : « Sa̧wu mí wo̧ronzuk ɓay poŋ bah ye ke mah ye. Ku yá̧ hani ke wu̧y ye. Ku ɓa nzuk ké mbew, 6ku ɓa nzukri seɗe mba. Wara le ku ɓa nzuk ké mbew yaŋ. A a̧w ké Ŋgerzah mbu̧h niri ɓa nzuk pirmatul mbew ra, nzuk ɓá kehr niri ya. »
7Fariziri ɓahri : « Mí-aw ba, ɓay fe mí Moyiz hi̧ bolnzak ɓahri, nzuk ké yih ni̧h wu̧y ye le, ké vbeh mbete-ni̧h wu̧y ndoh ndɔk wu̧yu dara ké ni̧h ni ɓáy le#19.7 Ɓay-ni̧h wu̧y na ɓil Mbete Deutéronome 24.1-4. Ŋgerzah hi̧ Moyiz vbeh bolkusolaw ɓay pɔr keni tul wu̧y ɓay mgbɔrna wo̧ronzukri. ? »
8Zezu ɓahri : « Ɓay fe le law woiri kpu-kpuh mí Moyiz poŋ ful hi̧ wuri ɓay ni̧h wu̧y woiri. Ke titilu da̧y le, ta kaŋ ya. 9Mi ƴo ɓah hi̧ wuri ɓahri se, wu̧y ti̧h mbi wo̧ro a ɓoru ya, mí wah ye ni̧h ni mgbum mí el ya̧ wu̧y a ɓoru soh gelu le, salɓay nunpuki ta tul nzuku. »
10Nzuk-dih fal yeri ɓahri : « Ké sakra wu̧y ke wo̧ro, ɓayu na kandɔkaw le, kaɓ ɓa iw dan yá̧ wu̧y mí su. »
11Bale ke ɓah hi̧ nzuk-dih fal yeri ɓahri : « Ta ɓa nzukri gbam mí mgba ketina ra ya. Wara le ɓa nzukri ké Ŋgerzah hi̧ niri kaɓ ɓa iw kaŋ, mí mgba ɓayu. 12Nzuk a haniri kaɓ ɓa iw ɓay ndi̧w woyri ké hu sa ɓil mah woyri sa̧. Iw a ɓoruri-aw kaɓ kaŋ ɓay fo̧hro ké nzuk a ɓoruri lu. Nzuk a haniri bale, gboh mun woyri. Ku mbi mun woyri hi̧ Ŋgerzah lak mbay tul woyri. Ku sa ya̧ wu̧y ya. Nzuk ké mah mgba ketina ra le, ké mgba, ké kaɓ ɓa iw dan ya̧ wu̧y. »
13Wara mí nzukri ƴo gi ke gunri ma ta̧w Zezu ɓay ké lu mgbɔkɔ#19.13 Sa̧w nzak ɓahri, ɓay ké ɓaŋ ndɔk kan tul gunri mí goŋ Ŋgerzah tul woyri. Fe laɓna-u ɓa mahful lu mgbɔkɔ ké ta̧w ziɓri, sa̧wu mí nah sɔɓ vbeh lu mgbɔkɔ ɓay hi̧ karaŋri ɓá lah ɓa gah-u. ku̧ tul gunuri, ké goŋ Ŋgerzah ɓay tul woyri. Mí nzuk-dih fal yeri hah gina woyri. 14Zezu ba, ɓahri : « Í poŋ gunri ɓá gi ta̧w bi. Í gboh gina woyri ya, ɓayu ké lák mbay a nunmbam na ɓay sam gun a kandɔkayri. »
15Fal mgbɔkɔ ké-e lu ku̧ tul gunri ra ke poŋ gelu, mí ke kal ma pol.
16Í ko. Nzuk mbew gi ta̧w Zezu, mí ke ɓahri : « Metere, fe suki fe mí-i láɓ ɓay mí ƴo ke ɔkna sew ke sew ɓa ŋgɔh le ? »
17Mí ke ɓah hi̧ ni ɓahri : « Ani mú-u vbi mi ɓay tul ɓay fe suki le ? Fe suki mbew yaŋ. Mu yih ƴo ke ɔkna sew ke sew ɓa ŋgɔh le, mú ƴo tul ɓayri ké-e ŋga̧h ziŋ ziihri. »
18Nzuk ra el ɓahri : « Bolkusol a ani-uri le ? »
Mí Zezu ɓahri : « Ɓay a a̧yayri : mu í hul ya, mu mbí wu̧y nzuk mbaŋ wo ya, mu ríh riɓa ya, mu kúŋ ɓay ku̧ nzak nzuk ya. 19Mú hȩk bah wo ke mah wo, mu sá nzuk mbaŋ wo eŋ mun wo kaŋ. »
20Nzuk ra el ɓahri : « Mi ƴo tul ɓayawri gbam. A fe mí toŋ mi ɓáy le ? »
21Dale Zezu ɓah hi̧ ni ɓahri se : « Mu yih ɓay ƴo tul bolkusol gbam ke gelu ɓa nzuk pirmatul ké eŋ Ŋgerzah kandɔk ké-e laɓ ra le, mú si fa̧h fe ziŋna wori, mú yeh. Mú wal lari-u hi̧ ko̧hkori. Mu ɓay ziŋ suki a nunmbam ŋgi̧ mbamba. Fal walu dale, mú el gi dih fal bi. »
22Ke lah ɓay ké Zezu ɓah ba, law ye rih ni mba, mí ke tɔr ɓayu ké ndɔk ye ah ŋgi̧ mbamba. 23Mí Zezu el ɓah hi̧ nzuk-dih fal yeri ɓahri : « Law nzuk fe ziŋna ra kuŋ ni kuŋ gaŋ. Mi ƴo ɓah hi̧ wuri ɓahri se, kpuh mbamba ɓay hi̧ nzuk va̧na ɓá hi̧ mbay ké nunmbam ɓá lak mbay ké tul ye. 24Mi el ɓah hi̧ wuri ra ɓáy, ɓay hi̧ zɔŋzɔŋ ɓá rih lɔkɔ bahtal ti̧h ra, gelu kpuh ya. Mí ɓay hi̧ nzuk va̧na ɓá hi̧ Ŋgerzah lak mbay ké tul ye, gelu kpuh mbamba. »
25Nzuk-dih fal yeri lah ɓay ké Zezu ɓah kaŋ bale, gosoɓay zi niri zi-zi, ku ɓahri : « Mi-aw ba, nzuk a suŋ mí mah kaɓ ke ɔkna le ? »
26Zezu ko niri zi̧h bale, ke ɓahri : « Káɓ ke ɔkna le mba nzuk pirmatul. Ŋgerzah mí mah ɓay hi̧ nzuk kaɓ ke ɔkna. »
27Wara mí Piyer el ke ɓay ɓahri : « Mú ko. A wah nah poŋ feri riw, mí nah dih fal wo-ay ra ba wa, ɔh tɔr wah ɓay na ani ɓáy le ? »
28Bale Zezu ɓah hi̧ niri ɓahri : « Ɓa ketina, i dih wuri fal bi gaŋ. Mi ƴo ɓah ɓayay hi̧ wuri ɓahri, ké i dih fal bi ra, sew ké nunmbam ke tusiɓa ɓay laɓ ɓa foyu, ké gun nzuk pirmatul ɓay kaɓ gel kaɓna mbay ɓil riŋ ɗina ye le, a woiri kara i káɓ tul arŋgaw ké boh falu seɗe ɓa nzuk-nda pol#19.28 Nzak faraŋse sɔɓ ɓa juges. Juges ke sewu-aw ta ɓa nzuk-kuŋ salɓayri kaŋto ya, wara le ɓa nzukri ké nda pol kandɔk mbay puh nda pol nzuk puhri. Seh a haniri ba, ke kuŋ salɓay ké ndiseŋe ziŋ ŋgernzuk a ɓoruri pi. Sa̧wu mí nah sɔɓ ɓa nzuk-nda pol. hi̧ sa̧w gun Izarayelri ké vba ɓa boh falu seɗe. 29Nzuk a suŋ suŋ gbam ké poŋ sa̧w ye, yi̧n yeri, in yeri, bah ye ke mah ye, gun yeri, waka yeri ɓay tul riŋ ɗina bi le, ke ɓay ya̧ fe baah ké ɓa ɔkna a ké na sew ke sew ɓa ŋgɔh. Fe ziŋna ye ɓay ro sɔɗ kal nzuku a pol. 30Kandɔkaw mí daɓa nzukri ké ƴo pol ɓay el si sar fal mgbaɗ. Daɓa nzukri ké ƴo fal ba, ɓay kal ma pol.
Atualmente Selecionado:
Mbete Matiye 19: SIAFNK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Wycliffe Bible Translators, Inc. All rights reserved.
