MATHI 7
7
Nyu Kesami Kebha
(Luk 6.37-38,41-42)
1“Nthu nyu kesami nbha la, isathu Anyiza la nthu kesami bha nben, 2#Mrk 4.24. kepaghenanye nthu na nyu kesami kebha tsüti Anyiza la nthu kesami bha ben, nu nthu na kede pi nyu kecü tsüti ma tsü kede pi nthu cüaben. 3Mangkesa na n-nyon wi kenenkuwa keti keben tsü nmeshenla ncünyuwa nyon wi kenenkuwa kizzakeu tsü ghangten nu? 4N-nyon wi kenenkuwa keti na ben lethu no khatinu ncünyuwa kizala, ‘Hi n-nyon wi kenenkuwa kizzakeu tsü khüshi cü na,’ isa khiya mehai nu? 5Nthu nkenyeghe kesathu, atuwa sa nthu nyon wi kenenkuwa keti tsü khüshilo, isathu tsaseng wi ncünyuwa nyon wi kenenkuwa kizzakeu tsü mehaitsü muya mehai.
6“Pala kemetha pi affü ncü lalo, tsüthu na kheneng nthu ssisale sa keben ketan. Nthu mejüti pi avü tuwi nchi la, tsüthu na tsü cüten keben ketan.
Khie, Bha nu Kekhalo
(Luk 11.9-13)
7“Khielo, pi nthu cüben na; bhalo, nthu muya ben na; nu ajenka kekhalo, sha pi nthu cüben na. 8Kepaghenanye pi khie ketenthu tsüdila cüben; bha ketenthu tsüdila muyaben; nu sha pi kekha ketenthu tsüdila cüben. 9Nthu nyu ba kesathu kesü la nthu tsa na amesa khiethu alon pi cüten kwe? 10Nyelela ma anga khiethu amaghang pi cüten kwe? 11Nthu nkemehaithu ccünkhala pala kemehai pi nthu tsangathu kecü yen chüben. Tsü miwi tang wi kebenwa nthu Ba tsü pala kemehai khaju khatila pi ma wi khie ketenthu cüten nu! 12#Luk 6.31 “Nyu yala nthu kenenwa sa thsü mvu keben tsüti nthu nyu kenenwa tsü sa tenlo: hawa ha Mosa Yenwa nu atusenjüh-kechüthu na pi kesansijüh jjügiwa tsüle.
Ajenka Kemanghanwa
(Luk 13.24)
13“Ajenka kemanghanwa wi tsü dulo, kepaghenanye annighajü wi kewa jenkawa tsüna mezaqo nu ciwi kewa len tsüna lekete, nu anyi kejon na ciwi waden. 14Isala kahang wi kewa len jenka tsüna manghanka nu ciwi kewa len tsüna dhu ntsa, nu ciwi anyi kezeng-u ketan tsü muyaben.
Achanton Kesü nu Mabi
(Luk 6.43-44)
15“Milikemesa atusenjüh-kechüthu ghena nthu kiden-kesha yalo; mathu na amei wi tsü khaghanenithu ti nthu jawi ghoden, isala mathu non wi tsü ntsakhiwa adennithu ti le! 16Nthu na mathu kekuli wina mathu na khati kesa khe chüyaben. Aghazüton wi kemeshentsse bi bün nten, nyelela ataqaeton wi khhaghabvü bün nten. 17Achanton kemehai na ma bi kemehai bünden, nu achanton nkemehai na ma bi nkemehai bünden. 18Achanton kemehai na ma bi nkemehai bün meyacha; nu achanton nkemehai na ma bi kemehai bün meyacha. 19Achanton ma bi kemehai nkebünwa shüchi pi anni wi khala chiaden. 20Tsalina nthu na mathu kekuli wina milikemesa atusenjüh-kechüthu tsü chüyaben.
Hi khiela Nthu Nchü
(Luk 13.25-27)
21“ ‘Apvüwa, Apvüwa’ isa hi ci ketenthu tsüdila tang Kadiyyi wi duyakhi nben, isala tang wi kebenwa iBa kenenwa sa ketenthu ketan na duyaben. 22Ajühkaghaten tsathang na kegho wi anyi kejon na hi wi, ‘Apvüwa, Apvüwa, isaben! Ithu na n-nyan wina Anyiza ketsijüh khi, n-nyan wina ithu atsaghangthu kejon jügüshi, nu amankesa kejon kuli le!’ 23#Zak 6.8. Isala hi mathu wi, ‘Hi khiela nthu nchü. Nthu gheshighena nyithu hi wina bvülo’ isa khiaben!
Ajjen Keni Kesathu
(Luk 6.47-49)
24“Tsalina anyi kesü le kesü lela ijühthu zaya nu tsüthu nie ketenwa na anyi kemetsa kesü na ma jjen pi alon miwi sakeya tsüti le. 25Atsan shathi ntsa gho, aghakuthu pongmeni, nu ameghü na khang ntsa sho pi ajjen tsü shun. Isala ajjen tsüna nqanca, kepaghenanye tsü pi alon miwi sa theng.
26“Isala anyi kesü le kesü lela ijühthu zaya nu tsüthu nkeniewa tsüna anyi kejüphon kesü na ma jjen pi ahachan miwi sa ketheng tsüti. 27Atsan shathi ntsa gho, aghakuthu na pongmeni nu ameghü na khang ntsa sho pi ajjen tsü shun, nu tsüna qanca. Nu tsüna khatila qhethiketen sa qancadha nu!”
Jisu kekhangkeben
28 #
Mrk 1.22; Luk 4.32. Jisu na ajüh hathu ha kekhi seng wi anyitenti na ma khati nyu zhüsansi khe amansa. 29Ma Ayenkesansithu ti kesawa nyela kekhang sen nu nyu zhüsansi.
Atualmente Selecionado:
MATHI 7: RENGNBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
