MATHI 6
6
Nanketizen Cüki pi Kesansi
1 #
Mat 23.5. “Anyithu yala nthu na mangwa saben khe chüya thsüle kesalina mathu tuwi ketan nthu keccüna kekulithu tsü nsa la metsilo. Keujüla nthu na anyithu tuwi ketan hathu ha saten lethu nthu na nthu Ba tang wi kebenwa tuwi akutimen mangla muya nben.
2“Tsalina nthu tsü nkenyeghe kesathu na kekinyijjen nu alentontithu wi sa keten ti nthu na pala pi kehhatu nyi kecü wi ammi nsa lalo. Anyithu ya mathu seng thsüle kesalina mathu na tsüti saden. Hi nthu kizaden, mathu na mathu kutimen tsüdi muyadha. 3Isala nthu na kehhatu nyi kiqa lethu pi nthu pvüshang ntsawa lela nchü thsüla sa tenlo. 4Isanu kekuli tsüna kekuthi wina salo. Isathu nthu Ba na nthu kekuthi wina kuli keben tsü muya nu nthu kutimen sa cüben.
Kekhie Cüki pi Kesansi
(Luk 11.2-4)
5 #
Luk 18.10-14. “Nthu na kekhie kesa wi nkenyeghe kesathu ti nsa lalo! Nyu tsüdi ya mathu muya thsüle kesalina mathu na kekinyijjen nu alentontithu wi shagha nu kekhie kesa tsü mathu nenden. Hi nthu kizaden, mathu na akutimen tsüdi muyadha. 6Isala nthu tsü kekhie kesa wi ajjen khenten pvü nu nkemu wi kebenwa nthu Ba wi kekhie salo. Isathu nthu Ba na nthu kekuthi wina tsüti sa keben tsü mu nu nthu kutimen sa cüben.
7“Nthu na kekhie kesa wi Anyiza nkechüthu na kekhie kesie kesalina Anyiza na mathu kekhie kina cübenle meshen keten tsüti ajjügi nkemi jüh kejon nkhi lalo. 8Mathu ti nsa la. Nthu Ba na nthu ma wi npi kekhie wina ma nthu nsenthu keyishü tsüdila chüben. 9Tsalina nthu na hati kekhie kesa-u le:
‘Ithu Ba tang wi kebenwa:
N-nyan ya kemethawa sayalo.
10No kadiyyi ya keghowa salo;
Tang wi ti ayyi ha miwi no kesasa sayalo.
11Nansü ghena nsenthu keyishü kedsakejjü pi ithu cülo.
12Ithu na nyu kesami teshi pi kecü tsüti,
ithu kesami teshi pi ithu cülo.
13Ithu pi kemechu wi ndu thsü la,
Isala Nkemehaiwa wina ithu noncca yalo.’ #6.13: Zhükechi pahan wi hati pi wwatheng: Kepaghenanye kadiyyi, kekhang, nu anyankethang tsüna anuphan la nji. Amen
14 #
Mrk 11.25,26. “Keujüla nthu na nyu kesami teshi pi cü lethu, nthu Ba tang wi kebenwa la nthu kesami teshi pi nthu cüben. 15Isala keujüla nthu na nyu kesami teshi pi ncü lethu, nthu Ba la nthu kesami teshi pi nthu cü nben.
Kezi Cüki pi Kesansi
16“Nthu na kezi wi nkenyeghe kesathu na sa keten ti ahathanathi nsa lalo. Nyu yala mathu zi benle kesa chüya thsüle kesalina mathu na atsi nsala benden. Hi nthu kizaden, mathu na akutimen tsüdi muyadha. 17Nthu na zi wa lethu, nthu mmi miya nu nthu li la hheyalo, 18isathu nthu Ba nkemu wi kebenwa ketan chükeben khe thola nthu na zi benle kesa chüya nben. Isathu nthu Ba na nthu kekuthi wina tsüti sa keben tsü mu nu nthu kutimen sa cüben.
Tang wi Keben
(Luk 12.33-34)
19 #
Jos 5.2,3. “He ayyi wi amaqhha na pvü, avüjjü na dsa, nu kaghanfüthu na yasa nu ghanfüya kesa pen wi ha nthu keben saghu nben lalo. 20Tsüti kesawa nye, tang wi amaqhha na pvü, avüjjü na dsa, nu kaghanfüthu na yasa nu ghanfüya nkeben pen wi tsü nthu keben saghu pi tsanqai yalo. 21Kepaghenanye nthu leben na keshüthangla nthu keben wi tsü benden.
Agwo wi Kewegüwa
(Luk 11.34-36)
22“Anyon tsüna agwo wi ahula kecanki kesü ti kesa, keujüla nthu nyon na mehai ben lethu nthu gwo maben la wegü ben; 23isala keujüla nthu nyon na nmehai la lethu nthu gwo maben la kejang sa shaben. Tsalina keujüla nthu wi kewegüwa tsüna kejang sa lethu, khatila jang shaben nu!
Anyiza nu Keben-keyeng
(Luk 16.13; 12.22-31)
24“Anyi thola apvüwa keni nssümagha saya nben; ma kesü nanmeghü nu kepawa tizenben; ma kesü jühya nu kepawa nkhichi saben. Nthu na khiela Anyiza nu keben manyi qho kekuli saya nben.
25“Tsalina hi nthu kizaden, nthu kahang ghena mangwa dsa nu jjü, nyelela nthu gwo ghena athsümeni mangwa mphi nu kesa leben ketizen nsa lalo. Tsüdi miwi la kahangli na kedsakejjü miwi ma men benki nu agwo na athsümeni miwi ma men benki nsa kwe? 26Awathu tsü ghang chilo: mathu na mangla pi yang nten, nu saghu pi asabe wi chi nten; isala nthu Ba tang wi kebenwa na mathu noncca ben ten le! Nthu na awathu miwi ma men nbenki kwe? 27Nthu kesü la tsü meshen pi leben ketizen kesa ghena sie kayi hangya mehai kwe? 28“Mangkesa na athsümeni ghena leben ketizen saten nu? Ashagha thighithu tsü khati shigü ten khe ghang chilo; tsüthu na kuli nu mathu ghena athsümeni sa nten. 29#1 Kad 10.4-7; 2 Kc 9.3-6. Isala hi nthu kizaden, Kadimi Solomon lela ma keben tsüdi wi athighi hathu ti athsümeni tsikemehai mpvü le! 30Anyiza na agheja wi aghangthu nansü benla nu dhitsü wi pi annibhon wi mecang ketenthu tsi tsü sa cü. Ma tsüthu miwi nthu tsi sa cü nben kwe? Nthu kenondi khatila zeng nu!
31“Tsalina ‘Mangwa dsa nu mangwa jjü, nyelela mang mphi nu?’ kesa leben ketizen nsa lalo. 32(Anyi Anyiza nkechüthu na keshüthangla hathu ha meshen benden.) Nthu Ba tang wi kebenwa na nthu ha tsüdila nsenthu keyishü tsü chüben. 33Isala atuwa sa Anyiza kadiyyi nu ma ketsatanwa tsü bha yalo, isathu pala hathu ha tsüdi pi nthu cüaben. 34Tsalina dhitsü ghena leben ketizen nsa la; kepaghenanye dhitsü wi tsü ghanan ghena leben ketizen saben. Ghanan kesü wi tsü ghanan ghena ketan leben ketizen saya.
Atualmente Selecionado:
MATHI 6: RENGNBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
