ZEKARIA 2
2
Kendavü Kehyu
1Tsemi kecha nme ki ale temi nme le a-ben nyu kendovü nme sen kehü hyu. 2“Nle diki gü jü nla?” tse ale ketsoshü. Tsontsin a-le a jokenishü, “Jerusalem ndo ti, tsü kethon keda le dikho yo shwishü tile.”
3Tsüselo a zenkenthon kebin lilo gü le mhundyü ki chwi laryü, lilo nyu kecha nme le ryü a-teno. 4Lilo keri güle kecha gü ka zoshü, “Tin gü kendovü sen kehü ponyu gü ka zo shülo, Jerusalem nyu temi kechon lo senru chonrio chwida khwehun titse kethyü le gonritsin kethyüi le. 5Npugü le a-le a-npfü mah chwida nme thyüo nyida gü hun-o tsü ntsen ti, lo a-le a-zankechwi aphu sen tsünyu yhunti tse zoshwi shü laso.”
Me Kazü ki tinkela nyu No Kaki ryü Lotse Ko Keshü
6-7Npugü le a-temi dan ka zoshü, “Ale hagun hükezen pe tson rüli nyu shüla. Ai ntsoka we, hagun le me kazü ki hü tinkela, Babilon ki bin-o rani Jerusalem nyu ryü laso. 8Ligü higü hagun vü keshü tsüle agenyu a-minketsentsin vü bin nyo.”
Tsügenyu Kekvutsin Npugü le jolo higü pe a-temi hon selo kela senye dan tsüshü lotse anishü le: 9“Npugü le a-npfü hagun zen kenren ti, tson-o gwüngwa nme hagun go thyü kehü temi no hagun hon selo lati.”
Hihontse kela ka, temi aphu Kekvutsin Npugü le anishü letse sha loti.
10Npugü le zoshü, “Shekerhün genyu lüthyülo, Jerusalem temi dan! Ale hagun dan nyu yhun titse ryüjü nyo!”
11Tsü gwünkho ka senye kechon le Npugü ki ryüo a-temi thyü tin lati. A-le hagun dan nyu yhunti, lo hagun le a-le a nipe hagun ki shü letse shalo ti. 12Juda le Npugü kazü kenshün gü nyu a-hon kechashü thyüni loti, lo Jerusalem le a-le keso tsin nyida gü thyüti.
13Ntsema binlo, temi aphu, Npugü mhundyü ka, a-le a-kebin bin Kenshün günyu ryü kejü genyu.
Atualmente Selecionado:
ZEKARIA 2: REGSBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.