ZEKARIA 1
1
Npugü le A-temi Dan no A-ki Raniryü Lotse Kokebin
1Darius le Persia nyu raja thyükelo chen hvu gü shye tetse ka Npugü le jo higü pe Berekiah nyu gü sidyükesha gü Zekariah, a-bon le Iddo gü tsüshü. 2Npugü Kekvutsin gü le Zekariah no temi dan ka zoshü lotse shü, “Npugü, Ale, hagun pvübon nyu ge a-nyunta la, 3ai ntsoka ale hagun ka zobin nle, ‘Rani aki ryülo, lo ale rani hagun ki ryüti.’ 4Hagun pvübon nyu dan hontse nya. Jon kethon gü kela ka, sidyükeshanyu dan le ajo pe anyugun ka zo-o anyugun no gwakemvu, kemu nyu yhun sin bin nyalo tse shü. Ai anyugun le ajo nyü nmvue zen mvu. 5Hagun pvübon nyu lo sidyükeshanyu tsüdan le yhun bin mvu laso. 6A gonyu sidyükesha nyu tsüdan ge bin-o ale hagun pvübon nyu dan ka johoshü lo pütsü lolo tse shü, ai anyugun le tsü rüchün mvu kela genyu tsüchün kenjün thyülo. Tsüsiki anyugun le anyugun nyunkelu lo-o Kekvutsin Npugü, ale thyüshü titse rhilo kela anyugun le hyulo kezü shaja gü pe anyugun tsü le tse shalo.”
Sidyükesha gü Le Tsemi Ki Keru Kehyu
7Darius le raja thyü kelo, chenhvu ka shye tseryü nme gü Shebat shye jon nkipezi nyü kheje ki Npugü le tsemi ki jo nme pe atsüshü. 8Ale Npugü lilonyu nme le keru kenhon nme ge dun kebin hyu. A-le ketejon nme nyu myrtle senbin dan nyu sobin, lo a-siki keru kecha kenhon, kemeren lo kechon le bin. 9Tsü selo ale a-ketsoshü, “Kedagü keru hidan a-kon le nyula?”
tsontsin a-le a jokenishü, “Tsüdan kon le nyuyo ale pe nhi shüti. 10Npugü le nipe kazü gü nrikeshü dan le.”
11Anyugun le lilo gü ka zoshü: “Agun le kazü apentha nyu gü hyukelo le kazü apentha keche ndi lo mele lolo laso.”
12Tsontsin lilo gü le zoshü, “Kekvutsin Npugü, nle Jerusalem lo Juda nyida dan ge chen hentsenyü nnyunta bin laso. Nle shwikenjün pe anyugun hikeshü mhundyü dithen laki anyugun no kenjün thyü bin tila?”
13Npugü le nyunthyü kenbwen jozo-o lilo gü jokenishü, 14lo lilo gü le Kekvutsin Npugü le nyu zo shüyo ano tsüpe zosen shülo tse aka zoshü. “Ale Jerusalem a nyida kenshün gü so lo phin rüchün sa bin nle, 15lo ntsema tse bwenye kebin senye dan ge ale anyunta sa bin nyo. Ale atemi ge anyunkenta süni kebin ka, senye tsüdan le atemi thyüpe no kenjün thyü kvu laso. 16Tsügenyu ale shwikenjün pe nyida gü hishü titseo Jerusalem nyu rani ryü laso. A Kershvuka thyünilo lo nyida gü thyü soni loti.”
17Lilo gü le ano zosen shü lotse zoshü: “Kekvutsin Npugü le zokebin le a-nyida dan le gwakenye ni loti, lo a-le Jerusalem keche gwani shüo nyida gü le a-hon letse nkheti.”
Tsemi Ki Methu tse Kehyu
18Tsemi kecha nme ki muthu tse pezi hyu. 19Ale a nthon kebin lilo gü ka, “Methutse hidan hile a-kon le nyu la?” tse ketsoshü.
Tsontsin a-le a jokenishü, “Tsüle Juda, Israel, lo Jerusalem temi hü kezen kela kekvu dan sun ka bin nle.”
20Tsüsika Npugü le thatho kethyü nyu mizi le kejonvü sen kehü tsinpe ahishü. 21Ale ketso shü, “Temi hidan hile nyu thyü ryü bin nla?”
Tsontsin a-le a jokenishü: “Anyugun le ryü Juda kazü nkeshü lao a-temi hü kenmhen kela senye dan ketsun lo hüpe shwela nrün genyu le.”
Atualmente Selecionado:
ZEKARIA 1: REGSBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.