Sirak 4
4
1Anak aku, anang nagang orang ke seranta ngidupka diri, lalu anang ngasuh sida lebu nganti utai ti diguna sida. 2Anang ngasuh orang ke lapar pedis ati, lalu anang ngasuh orang ke seranta tusah ati. 3Anang nuan nambahka penusah orang ke udah ringat. Anang laun meri sedekah ngagai sida ke seranta. 4-5Tulung meh orang ke minta sedekah benung tusah, lalu anang nulak peminta orang ke miskin enggaika sida nyumpah nuan. 6Enti sida ke benung tusah ati nyumpah nuan, iya ke ngaga sida deka ningaka peminta sida.
7Kereja manah-manah ngambika nuan dikerinduka orang, lalu bebasaka orang ke bekuasa. 8Dingaka jaku orang ke miskin, lalu saut sida enggau alus. 9Tulung sida ke dinyakka orang, lalu anang takut bejalaika pengelurus. 10Awakka nuan nyadi apai sida anak patu sereta nulung sida ke balu. Nya baru nuan nyadi anak Tuhan ke Pemadu Tinggi, lalu pengasih Iya lebih ari enggi indai nuan.
Rega Penemu Dalam
11Orang ke ngiga Penemu Dalam deka dibun sereta dikemesaika iya. 12Orang ke rinduka Penemu Dalam rinduka pengidup. Sebarang sapa dani tumu pagi ngiga iya deka gaga ati. 13Orang ke bisi Penemu Dalam deka panjai umur sereta diberekat Tuhan kini-kini endur sida bejalai. 14Orang ke ngereja pengawa ke Penemu Dalam, ngereja pengawa ke Allah Taala ke Kudus, lalu Tuhan deka rinduka sida ke rinduka Penemu Dalam. 15Sebarang sapa ke ningaka Iya deka ngakim orang enggau pengelurus, lalu sebarang sapa beratika Iya deka idup enggau ati lantang. 16Arap meh ke Penemu Dalam, nya baru nuan deka bulih Iya nyentukka peturun nuan ila. 17Mula-mula Penemu Dalam ngasuh nuan nengah jalai ti mar dataika nuan takut sereta begetar. Nuan diajar iya ngena jalai merinsa, sereta diuji enggau mayuh macham atur sampaika nuan arap ke iya. 18Penemu Dalam jampat datai ngagai nuan enggau nadai betangguh agi. Semua utai ti dipelalaika deka dipadah ngagai nuan lalu nuan gaga ati laban iya. 19Tang enti nuan limpang ari iya, iya deka ninggalka nuan, lalu ngelakka nuan merinsa.
Arap Ke Diri Empu
20Guna meh peluang ti manah, tang jaga nuan empu ari penyai lalu anang mai pemalu ngagai nuan empu. 21Laban pemalu ulih mai orang ngagai dosa, tang pemalu mega ulih mai orang bulih basa enggau pemanah. 22Anang setanah enggau orang sampaika diri empu rugi, lalu anang ngasuh diri empu tusah laban nuan enda ngereja utai ti patut dikereja nuan. 23Anang kakang ati bejaku enti asai patut bejaku, lalu anang ngelalaika Penemu Dalam nuan. 24Jaku nuan ngayanka Penemu Dalam enggau pelajar nuan. 25Anang ngelaban utai ti bendar, tang nuan patut malu laban nuan enda nemu utai. 26Anang malu ngaku dosa nuan empu; anang nguji nagang ai anyut. 27Anang ngelakka diri empu dikuasa ulih orang ke beli, lalu anang mega setanah enggau orang ke bekuasa. 28Gadai meh nyawa nuan kena ngeringka utai ti bendar, nya baru Tuhan deka nanahka nuan.
29Anang berani bejaku ngapa tauka buruk enggai ngereja pengawa. 30Anang ngaga diri baka singa di rumah tauka takut ba mua kuli nuan. 31Anang jari nuan jampat ngambi utai, tang udah nya enggai meri pulai.
Atualmente Selecionado:
Sirak 4: BK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Hakcipta © 2011, The Bible Society of Malaysia
Copyright © 2011, The Bible Society of Malaysia