Mateo 16

Tjanchia sin ijnko kjuaxroan tsꞌikon sin

(Mr. 8:11-13; Lc. 12:54-56)

1 # Mt. 12:38; Lc. 11:16. *A̱ndá iso ti sin fariseo la ko ti sin saduceo mé kuitsjehe sin chꞌin Jesús, kixin tjinkaon sin chrókjua̱cha̱xi̱n sin chꞌan la kjuanchia sin kixin chrókjua̱ko̱xi̱n chꞌan ijnko kjuaxroan ijié kixin tso̱nohe sin á chaxín tsíki̱xi̱n chꞌan ti itjen Díos. 2A̱ndá chꞌin Jesús, ndáchro:

―Ti ó ndá kójín la kontara nka̱jní la ndáchrora kixin itsi ijnko ña̱o jína kixin ti nka̱jní la kjátse tsjehe. 3La ti ó nchítjen la kontara nka̱jní la ndáchrora kixin ijie la tsꞌaniá ichrin kixin kjátse tsjehe ti nka̱jní la ko tjenkáya itji̱. Ndá xi̱kaha ti ó nohara nkehe tso̱hen kixin tjátso̱anra ti nkehe siín nka̱jní, la nkekuènté tjátso̱anhñara ti nkehe sítóhen ijie. 4#Mt. 12:39; Lc. 11:29.*Ti chojni tjenka̱yáxin nkehe jínahña la ko ti chojni titekakonhña la tjanchia ijnko kjuaxroan ijié tsꞌikon. Kjánchó jehó ti nkehe kóhen chꞌin Jonás ó tsjákohá sin ―ichro chꞌin Jesús.

Ndá kuito̱he chꞌan sin la sákjuí chꞌan.

Ti nkehe tjako ti sin fariseo

(Mr. 8:14-21)

5Ti sin kꞌuájiko chꞌin Jesús mé kꞌuatsínka sin tóhe nda̱ñao la tsíkꞌitjáñehen sin tsíkjikohya sin nio̱tja̱. 6#Lc. 12:1.*Ndá chꞌin Jesús ndáchro:

―Chrokóxakohanra chrókuákjáhyara ti nkehe tꞌánkíxin nio̱tja̱ kuènté ti sin fariseo la ko ti sin saduceo.

7Ndá ti sin kꞌuájiko chꞌan mé ikjo kícho sin, ndáchro sin:

―¿Á xi̱kaha ichro chꞌan kixin tsíkjikohyani nio̱tja̱ ní?

8Ndá chꞌin Jesús kónohe kixin xi̱kaha ikjo kícho sin, la ndáchro chꞌan:

―¿Nkekuènté itjóra kichuara ndáchrora kixin chontahyara nio̱tja̱? Jahara la chaxínhña titekaonra ti janhan. 9#Mt. 14:17-21.*¿Á na̱xa̱ tiénxinhñara ní? ¿Á xráxinkákonhñara ti inꞌó nio̱tja̱ kjónie inꞌó mil chojni la ko nkekja̱ín ntaxra kjuénájinra ti nkehe xehe̱ ní? 10#Mt. 15:34-38.*La ko, ¿xá xráxinkákonhñara ti yato nio̱tja̱ xika̱ye̱he kjónie noó mil chojni la ko á xráxinkákonhñara nkekja̱ín ntaxra kjuénájinra ti nkehe xehe̱ ní? 11A̱ndá, ¿nkekuènté tiénxinhñara kixin janhan la jehya kuènté ti nio̱tja̱ tjénixja ti ó ndáxrja̱n kixin chrókóxakohanra chrókuákjáhyara ti nkehe tꞌánkíxin nio̱tja̱ kuènté ti sin fariseo la ko ti sin saduceo? ―ichro chꞌan.

12Ndá kienxín sin kixin nixjahya chꞌan kuènté ti nkehe tꞌánkíxin nio̱tja̱. Náhí. Nixja chꞌan kixin chrókóxakohen sin kixin chrókjuíchꞌiyehya ti nkehe tjako ti sin fariseo la ko ti sin saduceo ti jehe sin.

Chrónka Pedro kixin Jesús mé ti Cristo

(Mr. 8:27-30; Lc. 9:18-21)

13Ndá ti ó kjuíji chꞌin Jesús chjina ti chjasin Cesarea Filipo ndá kjuanchankíhi chꞌan ti sin kꞌuájiko chꞌan, ndáchro chꞌan:

―Nkehe itjo sin, ¿nkexro ti Xje̱en Díos kꞌóna Chojni? ―ichro chꞌan.

14 # Mt. 14:1, 2; Mr. 6:14, 15; Lc. 9:7, 8. *Ndá jehe sin kjuáte̱he sin ndáchro sin:

―Iso sin la ndáchro kixin chꞌin Juan Bautista. Íso sin la ndáchro kixin chꞌin Elías. A̱ndá íso sin la ndáchro kixin chꞌin Jeremías o̱ íjnko nkexro kꞌuéchronka itén Díos ósé ―ichro sin.

15Ndá ndáchro chꞌin Jesús:

―A̱ndá jahara, ¿nkehe ichrora, nkexro ti janhan? ―ichro chꞌan.

16 # Jn. 6:68, 69. *A̱ndá chꞌin Simón Pedro kjuáte̱he ndáchro:

―Jaha mé ti Cristo ti Xje̱en Díos tjechón ―ichro chꞌan.

17Ndá kjuáte̱he chꞌin Jesús, ndáchro:

―Díos sincheñao ti jaha, Simón xje̱en Jonás, kixin nijnko chojni kjua̱ko̱ha tíha. Jehó Tꞌaná itjen nkaya nka̱jní mé kjua̱ko̱ha. 18Méxra̱ ndáxrja̱n kixin jaha mé Pedro mé tꞌaxrjexín kixin tíha ijnko “ixro̱”, la chritaón ti ixro̱ mé si̱tꞌána ti ni̱nko kuénta̱na, la ti kjuachaxin kuènté ti kjuachꞌén#16:18 kjuachꞌén muerte la tsjachahya sinchekꞌitjáña. 19#Mt. 18:18; Jn. 20:23.*La tsotjahá ti llave kuènté ti kjuachaxin nkaya nka̱jní, la kaín ti nkehe tsjájonhña kjuachaxin tso̱hen chjasintajni la kja̱xin nkaya nka̱jní tsochóntahya kjuachaxin tso̱hen. A̱ndá kaín ti nkehe tsjánjua kjuachaxin tso̱hen ntihi chjasintajni la kja̱xin nkaya nka̱jní siín kjuachaxin tso̱hen.

20Ndá ti ó kjuixin la chꞌin Jesús kꞌue̱tue̱hen ti sin kꞌuájiko kixin tsochenkahya ninkexró kixin jehe chꞌan mé ti Cristo.

Jesús chrónka kixin itsꞌen

(Mr. 8:31—9:1; Lc. 9:22-27)

21Ndá chꞌin Jesús kjuankíxin chenka ti sin kꞌuájiko kixin ticháxi̱n sátsji̱ chꞌan Jerusalén la ntiha ti sin tꞌe̱to̱an kuènté ni̱nko la ko ti sin ncha̱tꞌá tjetoan la ko ti sin tjako ley mé sinchekjasóte sin ti jehe chꞌan. La chrónka chꞌan kixin tsꞌóñá sin chꞌan, kjánchó níxin ña̱o la tsoxechón chꞌan. 22A̱ndá chꞌin Pedro mé kuakitsjentá chꞌan ti chꞌin Jesús, la ndáchro chꞌan:

―Díos tsjajonhña kjuachaxin kixin xi̱kaha tso̱han, Ìnchéni, kixin jaha la xitjahya tsjasóte ―ichro chꞌin Pedro.

23A̱ndá chꞌin Jesús kuinkátjíá la ndáche ti chꞌin Pedro:

―Sátjixian ntihi, Satanás. Tjiatéhya ti nkehe tso̱na. Jaha la tjinkaoan chrókꞌuinka̱kohén ti nkehe tjinkaon Díos la tjenka̱yáxinhña éxi tjenka̱yáxin Díos kixin tjénka̱yáxian éxi tjenka̱yáxin chojni ó ―ichro chꞌin Jesús.

24 # Mt. 10:38; Lc. 14:27. *Ndá chꞌin Jesús nixje̱he̱ íso ti sin kꞌuájiko, la ndáchro:

―Ti nkojinra tjinkáonra tsochrehéra ti janhan la ticháxi̱n tsi̱to̱héra kaín ti nkehe tjaké a̱sánra, la tsamára ti ntacruz kuèntára, ndá tsochrehéra ti janhan. 25#Mt. 10:39; Lc. 17:33; Jn. 12:25.*Kixin ti nkexro tjinkaon sinchekaá a̱sén la sinchekꞌitjáña sin. A̱ndá ti nkexro hasta chrókjuinchekꞌitjáña a̱sén kixin tinkáchónki ti janhan mé tsaá sin. 26¿Nke tso̱hen chrókjuachara chróchontara kaín ti nkehe siín chjasintajni, ndá chrókjui̱nchekꞌitjáñara ti kjuachón? ¿O̱ nkehe chrókjuènkara kixin chróchontara ti kjuachón? 27#Mt. 25:31; Sal. 62:12; Ro. 2:6.*Kixin ti Xje̱en Díos kꞌóna Chojni mé tsi̱ka̱o chꞌan ti kjuachaxin ijié kuènté Itꞌé chꞌan itjen nkaya nka̱jní la tsi̱ka̱o chꞌan kaín ti sin ángel la tsje̱nke̱he chꞌan nkojnko chojni éxi ti ixra̱ kjuíchꞌe sin. 28Chaxín ndáxrja̱n kixin nkojinra tjejora ntihi la na̱xa̱ tsꞌenhñara tsꞌikonjñara ti kjuachaxin chónta ti Xje̱en Díos kꞌóna Chojni ti ó tsi̱ka̱o chꞌan ti kjuachaxin ijié kuènté chꞌan ―ichro chꞌin Jesús.

Atualmente Selecionado:

Mateo 16: poeNTplus

Destaque

Copiar