Mateo 17

Kꞌuíxitoxi̱n nkexrín tsjehe Jesús

(Mr. 9:2-13; Lc. 9:28-36)

1Ndá injon ña̱o chrꞌéxi̱n, la chꞌin Jesús sákjui̱ko ti chꞌin Pedro, Jacobo la ko ti kícho chꞌan Juan, chritaón ijnko ijna̱ imá noi. 2A̱ndá ntiha la kꞌuíkon sin kixin kꞌuíxitoxi̱n nkexrín tsjehe chꞌin Jesús. Ti nkayakon chꞌan la imá tjáki̱ni éxi ti ña̱o la ti iké chꞌan la kótjóá éxi ijnko xrohi tꞌinkaséña. 3La xrína̱hña kꞌuíkon sin kixin ntiha itjen Moisés la ko Elías tjejótjo sin ti chꞌin Jesús.

4Ndá chꞌin Pedro ndáche ti chꞌin Jesús:

―Ìnchéni, jína kixin tjejóni ntihi. Ti tjinkaoan la sichꞌénani iyꞌá itsꞌuan, ijnko kuèntá la ijnko kuènté Moisés la íjnko kuènté Elías ―ichro chꞌan.

5 # Gn. 22:2; Sal. 2:7; Is. 42:1; Mt. 3:17; 12:18; Mr. 1:11; Lc. 3:22; Dt. 18:15. # 2Pe. 1:17, 18. *A̱ndá na̱xa̱ tenixja chꞌin Pedro, la ikui ijnko itji̱ imá tjáki̱ni chritaón ti ijna̱ tjejó sin. La chríkjan ti itji̱ mé kuíhin sin itén ijnko nkexro níxja, ndáchro:

―Tíhi mé xja̱na. Imá tjua̱ha̱ la ko chàna kixin itjen chꞌan. Tihínra ti nkehe tjako chꞌan.

6Ndá ti ó kuíhin ti sin kꞌuájiko chꞌin Jesús xi̱kaha. La xrakja̱niani sin nonte kixin imá chrakon sin. 7A̱ndá kóchjina chꞌin Jesús ti tjejó sin la kuákóxi̱n chꞌan ti jehe sin la ndáchro chꞌan:

―Chrakonhñara, tꞌàyára.

8La ti ó tsjehe sin la í kohya ninkexró. Jehó chꞌin Jesús itjen.

9Ndá ti ó kꞌuínkaji̱nxi̱n sin ti ijna̱ la chꞌin Jesús kꞌue̱to̱an, ndáchro:

―Ninkexró chenkahyara ti nkehe kꞌuíkonra hasta tsoxechónjña ti Xje̱en Díos kꞌóna Chojni ―ichro chꞌan.

10 # Mal. 4:5. *Ndá ti sin kꞌuájiko chꞌan mé kjuanchankí sin, ndáchro sin:

―¿Nkekuènté ndáchro ti sin tjako ley kixin sa̱o itsi Elías ndá chrꞌéxi̱n itsi ti nkexro tsaáxini? ―ichro sin.

11Ndá kjuáte̱he chꞌin Jesús, ndáchro:

―Chaxín tíha, sa̱o itsi Elías kixin tsjasiyóxin chꞌan kaín nkehe. 12#Mt. 11:14.*Kjánchó ndáxrja̱n kixin Elías la chaxín ó ikui la kjuátso̱anhña sin, la kjuínchekjasóte sin chꞌan éxi kóxríhi̱n sin. Mé xi̱kaha sinchekjasóte sin ti Xje̱en Díos kꞌóna Chojni kja̱xin ―ichro chꞌin Jesús.

13Ndá xi̱kaha kienxín ti sin kꞌuájiko chꞌan kixin nixja chꞌan kuènté ti chꞌin Juan Bautista.

Jesús kjuínchekito̱he jína ijnko xjan chónta ncha̱kuén jínahña

(Mr. 9:14-29; Lc. 9:37-43)

14Ndá ti ó kjuíji sin ti siín itsjé chojni la kóchjina ijnko nkexro ti itjen chꞌin Jesús la kjuákꞌexín tochꞌin la ndáchro:

15―Ti̱konoéhéni, tjinki̱tsa ti xje̱eni kixin níhi chꞌan, tꞌaniáte chꞌan. Nchónhña vece la titsínkate chꞌan xrohi la o̱ titsínkankí chꞌan ìnta̱. 16Ndá kꞌuinkakian chꞌan ntihi la ti sin xriko̱a la kjuachahya sin kjuínchekito̱he sin jína.

17Ndá kjuáte̱he chꞌin Jesús, ndáchro:

―Jahara la chaxínhña titekáonra ti janhan la ko nduáhya tjénka̱yáxinra. ¿Xá hasta nkesá tjinkáonra tsꞌejóni? ¿Hasta nkesá tsjakꞌé tsjákohára? Xrákoana ti xjan ―ichro chꞌan.

18Ndá kꞌue̱tue̱hen chꞌan ti ncha̱kuén jínahña la ti ncha̱kuén jínahña la tuénxín kꞌuaxrjexín ti chájan la kuíto̱he chꞌan jína.

19Ndá ti ó kjuixin sákjuí ti chojni, la kóchjina ti sin kꞌuájiko chꞌan, la kjuanchankí sin, ndáchro sin:

―¿Nkekuènté kixin jeheni la kjuachahyani kuakitsjeni ti ncha̱kuén ti jínahña? ―ichro sin.

20 # Mt. 21:21; Mr. 11:23; 1Co. 13:2. *Ndá ndáchro chꞌin Jesús:

―Jahara la kjuáchahyara kuakítsjera ti ncha̱kuén jínahña kixin kanhñó titekáonra ti janhan. Chaxín ndáxrja̱n kixin ti chrókuitekáonra ti janhan, kjónté intsíkoá éxi ijnko itje mostaza, la chróndáchera ti ijna̱ í: “Sátjixian ntihi la sáchrokjui.” Mé xi̱kaha kaín nkehe chrókjuachara chrókjui̱chꞌera ti chaxín chrókuitekáonra ti janhan. 21Méxra̱ ti tsakítsjera ijnko ncha̱kuén jínahña la ticháxi̱n tsonixjehéra Díos la sintehyara.

Jesús chronka ínaá kixin itsꞌen

(Mr. 9:30-32; Lc. 9:43-45)

22Na̱xa̱ nkoko̱a ixri sin Galilea la ndáchro chꞌin Jesús:

―Ti Xje̱en Díos kꞌóna Chojni mé tsotsé sin la ko tsjikaán sin ti siín ti chojni tꞌe̱to̱an, la sinchekjasóte sin chꞌan 23la ko tsꞌóñá sin chꞌan. Kjánchó níxin ña̱o la tsoxechón chꞌan ínaá ―ichro chꞌin Jesús.

Ndá ti ó kuíhin ti sin kꞌuájiko chꞌan la imá kꞌuává sin.

Jesús kjue̱nka̱ ti nkehe kjuanchia sin kuènté ni̱nko

24 # Ex. 30:13; 38:26. *Ndá ti ó kjuíji chꞌin Jesús la ko ti sin kꞌuájiko chꞌan Capernaum la ti sin nchekjènki̱ kuènté ni̱nko mé kóchjinehe sin ti chꞌin Pedro la kjuanchankí sin:

―Ti maestro kuèntá la, ¿á tje̱nka̱hya chꞌan ti nkehe tjanchia ti sin nchekjènki̱ kuènté ni̱nko ní? ―ichro sin.

25Ndá kjuáte̱he chꞌin Pedro, ndáchro:

―Jeén, tje̱nka̱ chꞌan.

Ndá kꞌuíxehen chꞌan ti nchia tjejó ti íso sin la chꞌin Jesús sa̱o kjuanchankí, ndáchro:

―¿Jaha Simón, nkechrua? ¿Nkexro tje̱nka̱ ti nkehe tjanchia ti sin tꞌe̱to̱an ntihi chjasintajni, á ti chojni chjasin ní o̱ á ti sin ti̱xi̱n ókjé nketí? ―ichro chꞌin Jesús.

26Ndá kjuáte̱he chꞌin Pedro, ndáchro:

―Ti sin ti̱xi̱n ókjé ―ichro chꞌan.

Ndá ndáchro chꞌin Jesús:

―Ti xi̱kaha, la ti sin chjasén ntihi la ticháxi̱nhña tje̱nka̱. 27Kjánchó janhan la tjínka̱konhña tso̱nínkaon chojni ntihi. Méxra̱ sátjia ti nda̱ñao sátjiko̱a ti ichjo̱n chónta gancho tse̱xian koche la ntiha ité ti chjo̱n chrínkí ti nda̱ñao. Ndá ti koche sa̱oxín tso̱tsé la takítjehé ti irꞌua va la tsꞌitja ijnko chichaon. Tíha la tsjacha tsjènka kaín ti tjásikáha̱n sin la ko ti tjasikéhén sin ―ichro chꞌin Jesús.

Atualmente Selecionado:

Mateo 17: poeNTplus

Destaque

Copiar