Mateo 15

Ti nkehe tókji̱ta̱xin chojni

(Mr. 7:1-23)

1A̱ndá iso ti sin fariseo la ko ti maestro tjako ley tsíkji̱xi̱n Jerusalén mé kóchjinehe sin chꞌin Jesús la kjuanchankí sin, ndáchro sin:

2―¿Nkekuènté kixin ti sin xriko̱a la nchexiteyáhya sin ti nkehe kjuako ti sin kꞌuaxrjeníxini kixin tꞌóntihya sin itja sin ti ó inie sin? ―ichro ti sin fariseo.

3A̱ndá chꞌin Jesús kjuanchankí, ndáchro:

―¿Nkekuènté kixin kja̱xinra nchexiteyéhyara ti nkehe kꞌue̱to̱an Díos?, landá a̱ntsí nchexiteyára ti nkehe tsíchronka ti sin tsíkꞌaxrjeníxinra. 4#Ex. 20:12; Dt. 5:16; Ex. 21:17; Lv. 20:9.*Kixin Díos la ndáchro: “Tjikosayéhéra itꞌára la ko ìnára”, “Ti nkexro tsꞌándaxínhi̱n itꞌé la ko ìñé la itsꞌen.” 5A̱ndá jahara ndáchrora kixin ti nkexro tsondáche itꞌé la ko ìñé: “Í xrokjuahya tsjinki̱tsani ti jaha kixin kaín ti nkehe chóntani chrókjuajoni la ó chjéheni Díos”, 6la í tsicháxi̱nhña tsjinki̱tsa sin ti itꞌé sin la ko ti ìñé sin. Ndá ti xi̱kaha ichꞌera la ti̱to̱héra ti nkehe kꞌue̱to̱an Díos kixin titekáonra ti nkehe tsíkꞌe̱to̱an ti sin tsíkꞌaxrjeníxinra. 7Jahara, chojni nkojinxónhña tjenka̱yáxin. Ndoá ndáchro Isaías:

8 # Is. 29:13. *Ti chojni chjasin i la irꞌua sin ó ndáchro sin kixin tjikosáyehe sin ti janhan,

a̱ndá ti a̱sén sin la ikjín kuito̱he.

9Méxra̱ ó chónkó tjikosáyehe sin ti janhan

kixin ti nkehe tjako sin la nkehe kuènté chjasintajni.

10Ndá chꞌin Jesús kꞌuéye̱he̱ ti chojni siín ntiha la ndáchro:

―Chrokuihínra la ko chrókiénxinra. 11Ti nkehe inie chojni la jehya ijie̱ tíha. Ti ijie̱ la ti nkehe tꞌaxrjexín a̱sén chojni ―ichro chꞌan.

12A̱ndá ti sin kꞌuájiko chꞌin Jesús mé kóchjina la ndáchro:

―¿Á noha kixin ti sin fariseo la kónínkaon sin ti kuíhin sin ti nkehe chro̱nka ní?

13Ndá kjuáte̱he chꞌan ndáchro chꞌan:

―Kaín ti kayoa jehya Tꞌaná itjen nkaya nka̱jní kꞌue̱nka̱xin, la tsꞌaxrjenkíxin nuèeí. 14#Lc. 6:39.*Méxra̱ ti̱to̱héra sin. Jehe sin la ntakótán#15:14 ntakótán tꞌikohña sin ciego sin la tꞌe̱tue̱hen sin íso ti sin ntakótán. A̱ndá ti ijnko ntakótán tjetaón nti̱a tja̱ko̱he̱ íjnko ntakótán la yóí tsꞌánótje̱ñá ijnko tòye̱ ―ichro chꞌin Jesús.

15Ndá chꞌin Pedro ndáche ti chꞌin Jesús:

―Chro̱nkaxian nkehe tꞌaxrjexín tíhi.

16Ndá chꞌin Jesús ndáchro:

―¿Kja̱xinra tiénxinhñara tíhi ní? 17¿Á tiénxinhñara kixin kaín ti nkehe inieni la sátji nkaya tse̱eni la chrꞌéxi̱n tsꞌaxrje ní? 18#Mt. 12:34.*A̱ndá ti nkehe tꞌaxrjexín irꞌua chojni la tꞌaxrjeníxin ndesi a̱sén sin, la tíha mé tjasinxín chojni ijie̱. 19Kixin nkaya a̱sén chojni mé tꞌaxrjexín ti nkehe jínahña tjenka̱yáxin chojni, ti tꞌóñá kícho, ti tja̱che̱he̱ kícho, ti chónta íjnko chojnichjin jehya ichjién, ti kjuache̱e, ti kjuachꞌia, la ko ti tꞌándaxíhi̱n kícho chojni. 20Kaín tíha mé tjasixín chojni ijie̱. A̱ndá ti nkehe sinie chojni, kjónté tꞌóntihya itja, la jehya ijie̱ tíha ―mé xi̱kaha ichro chꞌin Jesús.

Ijnko tjan cananea kuitekaon Jesús

(Mr. 7:24-30)

21Ndá chꞌin Jesús kꞌuaxrjexín ntiha la sákjuí chꞌan nó chjasin Tiro la ko Sidón. 22Ndá ijnko chojnichjin cananea kjuákꞌe chjinaxón ntiha, mé kóchjinehe tjan ti chꞌin Jesús la itsen, ndáchro tjan:

―Jaha, Xje̱en David, ti̱konoéhéni kixin ti xje̱eni la níhi tjan, chónta tjan ijnko ncha̱kuén jínahña ncheníhi ti jehe tjan ―ichro tjan.

23A̱ndá chꞌin Jesús la kjuáte̱hya chꞌan. A̱ndá ti sin kꞌuájiko chꞌan la kóchjina sin, ndáchro sin kixin:

―Ndáche tjan sátsji tjan kixin tinkákꞌóyako tjan, chréhe̱ tjan nótoni ―ichro sin.

24Ndá chꞌin Jesús ndáchro:

―Díos la ichrꞌán ti janhan kixin tsjínki̱tsa jehó ti kolélo tsíkꞌitjáña kuènté ti chjasin Israel ―ichro chꞌan.

25A̱ndá jehe tjan la kóchjina tjan, la kjuákꞌexín tjan tochꞌin tjan nkayakon chꞌin Jesús, la ndáchro tjan:

―¡Tjinki̱tsani!

26A̱ndá chꞌin Jesús kjuáte̱he, ndáchro:

―Jehya jína chrókuakítsja̱ha̱ ti nio̱tja̱ ijnko xjan ndá chrótja̱ha̱ ti koni̱a̱ chrókjonie ―ichro chꞌan.

27A̱ndá jehe tjan ndáchro tjan:

―Chaxín tíha, kjánchó, ti koni̱a̱ la kjónté inie va ti nkehe to̱tꞌo̱ xèjinxín ti mesa kuènté ti ìnché va ―ichro tjan.

28Ndá chꞌin Jesús ndáchro:

―Jaha la chaxín titekaoan ti janhan. Ti nkehe tjanchia la tsoxiteyá ―ichro chꞌan.

La tuénxín kuito̱he jína ti xje̱en tjan.

Jesús kjuínchekito̱he jína itsjé chojni

29Ndá chꞌin Jesús sákjuixin ntiha la kjuíji chꞌan chrínta nda̱ñao Galilea. La chrìin chꞌan ijnko ijna̱ la ntiha kjuákꞌetja̱xi̱n chꞌan. 30Ndá nchónhña chojni kóchjina ti itjen chꞌan kjui̱ka̱o sin chojni xitjahya itji, chojni tꞌikonhña, chojni nixjahya, chojni tsíxénká la ko kaín íso si̱níhi, la chꞌin Jesús kjuínchekito̱he chꞌan jína. 31La kaín chojni imá chrákon sin ti ó kꞌuíkon sin kixin ti sin kꞌuénixjahya la ó nixja sin, ti sin tsíxénká la ó tsíkito̱he sin jína, ti sin xitjahya itji la ó itji sin la ko ti sin kuékꞌikonhña la ó tꞌikon sin. Ndá kjuankíxin chjéhe sin kjuasáya ti Díos kuènté ti sin Israel.

Jesús kjuínchekjinie noó mil chojni

(Mr. 8:1-10)

32Ndá kꞌuéye̱he̱ chꞌin Jesús ti sin kꞌuájiko la ndáche:

―Imá ti̱konóa̱ha̱ ti chojni i, kixin ó iní ña̱o tjejókoni sin la chóntahya sin nkehe sinie sin. Tjinka̱konhña tsétua̱nha̱n sin sátsji sin ti na̱xa̱ kjoniehña sin; ti náhí la nti̱a ó tsꞌáñátexín sin kjinta ―ichro chꞌan.

33Ndá ndáchro ti sin kꞌuájiko chꞌan:

―Jaha la ó noha kixin nte̱je̱ tjejóni, la kohya nkehe tsochjéheni kaín ti chojni i ―ichro sin.

34Ndá chꞌin Jesús kjuanchankí, ndáchro:

―¿Nkekja̱ín nio̱tja̱ chontara? ―ichro chꞌan.

Ndá ndáchro sin:

―Jehó yato nio̱tja̱ la ko iso koche ntsíntsí ó chóntani.

35Ndá chꞌin Jesús kꞌue̱to̱an kixin kaín chojni tsꞌixitja̱xi̱n nonte. 36Ndá kuákja chꞌan ti yato nio̱tja̱ la ko ti koche ntsíntsí la chjéhe chꞌan Díos kjuasáya. La kóchrítꞌo̱ chꞌan ti nio̱tja̱ la kꞌue̱tue̱hen chꞌan ti sin kꞌuájiko chꞌan kixin tsꞌóxíke̱he sin ti nio̱tja̱ la ko ti koche kaín ti chojni siín ntiha, kixin sinie sin. 37La kaín sin kjónie sin la kókje̱he sin, ndá ti ó kjuixin la ti sin kꞌuájiko chꞌin Jesús kjuenájín sin to̱tꞌo̱ ti nkehe tsíxehe̱ la kaón yato ntaxra. 38Ti chojni kjónie mé noó mil chojnindoa. La kuákjahya sin kuentá nkekja̱ín ti chojnichjin la ko chájan. 39Ndá ti ó kjuixin la chꞌin Jesús nixje̱he̱ sin la sákjuí sin, ndá kꞌui̱tꞌótjen chꞌan ijnko ntabarco la sákjuí chꞌan nó Magdala.

Atualmente Selecionado:

Mateo 15: poeNTplus

Destaque

Copiar