Mateo 8

So Jesús nataden so nchiga na l'oc

(Marcos 1.40-45; Lucas 5.12-16)

1Qaq co'ollaq chigoqtalec aso qasoxonaxa so Jesús, nachi ÿataqta qalota so shiÿaxauapi quetague'. 2Nachi anac so shiÿaxaua mayi nchiga na l'oc, nachi i'adoto naua l-llicte so Jesús, nachi 'enapega, 'eeta':

–'Am ÿataxala', da 'aushit, qaq no'on da aÿim 'anataden.

3Nachi so Jesús ipoteu'a somayi, nachi 'eeta':

–Aja', seshit. Nagui 'am no'oita.

Nachi co'ollaq chochi nasaxauec de'eda l'aqtac, nachi som nchiga na l'oc, somayi ÿataqta no'oita. 4Nachi so Jesús 'enapega somayi, 'eeta':

–Sa ishit qome da huo'o ca 'au'axatem de'eda. Chaqdata da 'am qojec, 'anachaxaneu'a ñim ltaxaÿaxanaxanec na shiÿaxauapi da qaitaxaÿapegue' ñi Dios, qataq 'ai'aneuo qome aca 'adachitaqtaxanaqte mayi damaxasoxoolec co'olloxochiyi so Moisés, yaqto' qaÿaÿaten da mashi 'am no'oita.

So Jesús nataden so lamaxashic so huataxanaq lta'a mayi l'ec yi Roma

(Lucas 7.1-10)

5Qaq co'ollaq taÿau'a so Jesús yi pueblo Capernaum, nachi anac so huataxanaq lta'a mayi l'ec yi Roma da nachoxodeetot somayi, 6'eeta':

–'Am ÿataxala', yi ÿamaxashic huetaña yi ima', huetalec yi lmala', yimayi sa da'añiigue, ÿataqta lta'adaic da nque'ejnaxac souaxat da nqui'ic.

7Nachi so Jesús 'enapeco':

–Aÿim ñoqo'ona da ñataden.

8Nachi so huataxanaq lta'a 'enapeco':

–'Am ÿataxala', aÿim ÿataqta saq saiguet da 'aunoxonoigui ñi ima'. Chaqdata da 'am 'ai'an ca 'ad'aqtac, nachi ca ÿamaxashic no'oita. 9Cha'ayi aÿim nataq'en sootañot da lamaxasoxonaxac na nta'alpi, qataq nataq'en aÿim huo'o na ñallippi mayi samaqtac. Qaq da huo'otaq huo'o ca samaq, qalaq jec. Qataq da seÿaxana ca lÿa, qalaq anac. Qataq da huo'otaq samaq ca ÿamaxashic da huo'o ca samaxalec, qalaq i'ot.

10Qaq co'ollaq hua'axaÿa de'eda so Jesús, nachi ÿataqta huo'o da l'aalaxa. Nachi 'enapega som nnaictague'pi, 'eeta':

–Aÿim ÿataqta 'eesa de'eda shinapec da 'enauac na llalaqpi so Israel qaica ca selalec da ÿapacteec da lpi'iÿaxac da huo'otaq 'eeta'am de'eda shiÿaxaua. 11Qaq aÿim shinapec da ÿataqta qalota qome na chigaqa'ague da yi'oxoñi qataq da avit da anac da nso'ona'ai' da lqui'axaua so Abraham, Isaac, qataq so Jacob, qom qainoxoneu'a cam l'onataxanaxac ñi Dios mayi neta'ague da piguem. 12Qaq nam ÿoqta qaÿauotaiquéctaxa da inoxoneu'a que'eca n'onataxanaxac mayi hueta'ague da piguem, namayipi qome qaÿamaxauga ca napalaxa na pa'auec. Huaña, nachi noÿiitac, qataq inaga't naua lhue da nqui'ic.

13Nachi so Jesús 'enapega se'eso huataxanaq lta'a, 'eeta':

–'Avi'iguelaxa qome ca 'adma'. Qaq ÿataqta ipacchigui qome da 'eetec da 'adpi'iÿaxac.

Nachi ipacchigui da no'oita se'eso namaxashic co'ollaq qoÿan da n'aqtac.

So Jesús nataden aso lachodo so Pedro

(Marcos 1.29-31; Lucas 4.38-39)

14So Jesús nqo'ona so lma' so Pedro. Qaq co'ollaq ivita, nachi ilalec aso lachodo so Pedro da sa no'on, huetalec so lmala', qataq huo'o na l'edaxa. 15Nachi somayi ipoteu'a, nachi se'eso l'edaxa qaica. Nachi asomayi ñishiguem, nachi huetapegue' somayipi.

So Jesús nataden so qalota dalolaxaicpi

(Marcos 1.32-34; Lucas 4.40-41)

16Qaq co'ollaq mashi napaltapiguiñi, nachi qanauegueu'a so Jesús so qalota shiÿaxauapi mayi huo'o na l'ecpi leguemaxaicpi. Nachi somayi 'oonolec naq'en so l'aqtac da i'odauec se'eso n'ecpi, qataq nataden 'enauac som dalolaxaicpi. 17Qaq 'eetec de'eda, yaqto' ÿataqta ipacchigui dam i'axat co'ollaxa so l'aqtaxanaxanec ñi Dios l'enaxat Isaías, co'ollaq 'eeta': “Camayi nachishiguem 'enauac na qanqui'iguesat, qataq ÿachi 'enauac na qadalolaxapi.”

Soua nshitraique da quedegue so Jesús

(Lucas 9.57-62)

18Qaq so Jesús co'ollaq ila'a da ÿataqta qalota na shiÿaxauapi da laponeu'a, nachi 'enapegalo soua nale't da tadetague da le'ego asom lapel late'edai. 19Nachi anac som 'oonolec nam dapaxaguenataxaatapeguec na lqataxacpi so Moisés da 'enapega, 'eeta':

–'Am napaxaguenataxanaq, aÿim ñishitaique da 'am seca'ategue, nai'ctaxa cam 'auataigue.

20Nachi so Jesús 'enapeco':

–Anam huaxaÿaxapi huo'o na lauacpi, qataq nam maÿopi huo'o na lpata'cpi. Qaq nam shiÿaxaua llalec, qalaxayi sa ishit da huo'o ca l'axasoqo'.

21Qataq anac so 'oonolec nam lapaxaguenatacpi, nachi 'enapega, 'eeta':

–'Am ÿataxala', ñaq aÿim 'au'axaÿa'a qome da ña sa'auaxaañi da selayiñi yi ita'a.

22Nachi so Jesús 'enapeco':

–Aÿim 'auca'ategue, 'au'axaÿa'a nam 'ico' leuaxaicpi da ña ilayiñi nam lqatacpi.

So Jesús vi'iiguet naq'en so l'at qataq aso lapaxa

(Marcos 4.35-41; Lucas 8.22-25)

23Nachi so Jesús huenojñigui aso barco, qataq soua nale't mayi nnaictapegueto. 24Qaq co'ollaq mashi qanayictalec aso lapel, nachi anac so l'at lta'adaic, Nachi ana lapaxa so 'etaxat tangui aso barco. Qalaxayi so Jesús do'ochita. 25Nachi soua nale't nqo'onalo somayi da qanqotoxon, qoÿiita':

–'Am qadataxala', ña qomi' 'anca'alaxatreec. Ten, huotaique da qomi' iyiiyiñi.

26Nachi somayi 'enapeco':

–¿Tá'ainco' yi qayi'ii? ¡Qami' ÿataqta qapi'olec da qadpi'iÿaxaqui!

Nachi somayi ñishiguem, nachi nlaxa so l'at qataq na 'etaxat, nachi ÿataqta vi'iteguet qataq ntochiguiñi. 27Nachi so shiÿaxauapi ÿataqta huo'o da l'aalaxa. Nachi 'eeta':

–¿Négue't dam da' shiÿaxaua, yi ivida'a na l'at qataq ana lapel da ÿalaxaguet?

Soua Gadara lashi' mayi huo'o so l'ecpi leguemaxaicpi

(Marcos 5.1-20; Lucas 8.26-39)

28Qaq so Jesús co'ollaq mashi ivittague da le'ego aso lapel late'edai, nachi ana'c soua dos shiÿaxa'u, chigoqtroigui ca napa'alpi da ca'attra'aguet somayi. Qaq se'esoua dos shiÿaxa'u huo'o so l'ecpi leguemaxaicpi, qaq soomayi ÿataqta chaqaiqa. Qaq ÿoqo'oyi sa ishit da huo'o ca i'axasoxooteuga se'eso nqa'aic. 29Nachi soomayi i'alaqtai'salo, 'eeta':

–¿Tá'ainco' yi qomi' 'atapegueu'alo, 'am Jesús mayi 'am llalec ñi Dios? ¿'Am 'auanaicna'a peta'a da 'auauo'o da qanque'ejnaxac, qamaq saxanaxa da sevitaxa ca qadaloqo'?

30Qaq que'eca sa qaÿauga se'eso 'alhua, nachi netaña aso qalota cos late'epi, deque'etac. 31Nachi se'eso n'ecpi leguemaxaicpi nachoxodeetacot so Jesús, 'eeta':

–Da qomi' 'au'oldaue'c, qaq no'on da qomi' 'auashiitema da senoxonaxaigui ayi'ayi cos late'epi.

32Nachi so Jesús 'enapeco':

–Aja', qaunoxoñiÿoigui ayimayipi.

Nachi se'eso n'ec leguemaxaicpi ca'aisalo se'esoua shiÿaxa'u, nachi taigui aso cos late'epi. Qaq co'ollaq ime da taigui, nachi 'enauac aso cospi chigoqtelec so tocot da nqalgaqañi, nachi tangui aso lapel, nachi 'ogaxaipi.

33Qaq som ilotague' aso cospi nachi datauec, ÿataqta ñi'i. Qaq co'ollaq ivideu'a ca pueblo, nachi i'axattac 'enauac de'eda qataq dam huaiguilo soua shiÿaxa'u mayi huo'o so l'ec leguemaxaicpi. 34Nachi 'enauac na shiÿaxauapi mayi lma' se'eso pueblo nca'ateuga ca hueta'a so Jesús. Qaq co'ollaq qaila'a somayi, nachi qanachoxodeetacot da yaqto' ca'ai yi lma' somayipi.

Atualmente Selecionado:

Mateo 8: TBSNT

Destaque

Copiar