Mateo 7

Sa ishit da qanmit ca lasouaxashit ca nÿa

(Lucas 6.37-38, 41-42)

1Sa ishit qome da qauauo'oi ca lasouaxashit ca qadÿai, yaqto' ñi Dios sa ishit da ÿauo'o ca qadasouaxashichi. 2Cha'ayi ñimayi da qami' nmi't, qalaq i'enaxatteguet da 'eetec da qanmichi ca qadÿai, qataq i'enaxatteguet cam qami' qaualoqnaxañiÿa da qanaloqñi ca lataxac ca qadÿai. 3Qataq ¿tá'ainco' yi ishit da 'auamata'a cam 'auaqpi lsochi mayi huetangui ana l'aite ca 'adqaÿa, qaq sa ishito' da 'aula'a cam qo'ipaq lta'adaic mayi huetangui ana maichi 'ad'aite? 4Qaq da huo'otaq huetangui ana 'ad'aite ca qo'ipaq lta'adaic, qalaq ¿tá'ainco' da ishito' da qonapega ca 'adqaÿa da qoneta': “Ñaq aÿim 'auashiitem qome da ñaqat yi 'auaqpi lsochi mayi huetangui ana 'ad'aite?” 5Qaq ¡'am mayi qonetega da 'am 'eesa! 'Au'auaxaañi qome da 'anqat yi qo'ipaq lta'adaic mayi huetangui ana 'ad'aite, yaqto' ÿataqta 'anauaachiguiñi. Nachi ishit da 'anqat ca 'auaqpi lsochi mayi huetangui ana l'aite ca 'adqaÿa.

6Sa ishit qome da qai'añiim na pioxotpi cam nogoxoshit mayi sa qaishitapec. Ten, namayipi qom qami' ÿataxalguete, nachi ishit da qami' icolaxatta'pe. Qataq sa ishit qome da qauasaqÿot aca cos late'e aca qan'otaqchi perlas. Ten, qom ishit da petapigui.

Qaiÿaxanaique, qanmitaique qataq qaiuaxaneu'a ca lasom

(Lucas 11.9-13; 6.31)

7Qauÿaxañi, yaqto' ñi Dios qami' ÿanema ca qauÿaxañiÿaique; qaumitaxañi, yaqto' qauanachiÿa ca qanmichiitaique; qataq qautoqñiu'a ca lasom, yaqto' qami' qanauategueta. 8Cha'ayi cam deÿaxan, qalaq ÿaconguet ca iÿaxanaique; qataq cam demitaxan, qalaq ÿanata ca nmittaique; qataq ca itoqneu'a ca lasom, qalaq qanauateguet.

9Cha'ayi ¿négue't ca 'oonolec da qoñiita da ishit da ÿami' ca coma' ca llalec, da huo'otaq iÿaxanaique aca pan? 10¿Huo'otaq da iÿaxanaique ca nÿaq, qalaq ÿami' ca n'adaxanaq? 11Yi qami' matem qami' qauemaiqa, qalaq qauaÿajñi da qai'añiim ca no'on cam qai'alqui. Qaq ¡táloxochiyictoxo' da saq ÿacteec ñim qadta'ai mayi neta'ague da piguem da ishit da ÿanem ca no'on cam iÿaxanot ñimayi!

12Qaq ÿoqo'oyi qami' cam no'on mayi qanshiitaique da qami' i'oteque na shiÿaxauapi, nachica qome qau'ochiic 'enauac namayipi. Cha'ayi nachida dam damaxasoxoolec nam lqataxacpi so Moisés qataq naua lliyigui'shi so l'aqtaxanaxanecpi ñi Dios.

Lasom mayi qapi'olec

(Lucas 13.24)

13Qaunoxoñiÿoigui qome ñi lasom mayi sa lcagui. Cha'ayi ñi lasom qataq so nqa'aic mayi taÿa'a ca nleuaqa', somayi ÿataqta qalotegue, qataq qaica ca lqalaic. Qaq ÿataqta qalota nam quetague' somayi. 14Qaq ñim lasom qataq so nqa'aic mayi taÿa'a da nca'alaxa, qalaq ÿataqta qapi'olec qataq sa lca'ague. Qaq ÿataqta saq 'amaqtaq nam ÿanata.

Aca qo'ipaq maichi qaÿauatton aca ala

(Lucas 6.43-44)

15Qavichiÿa'aguet qome nam tenataxanaxaicpi mayi 'eetega da l'aqtaxanaxanecpi ñi Dios. Namayipi qami' naÿalo, nachi ÿataqta i'enaxat da lataxac ana qagueta, qalaxayi na pa'atauo 'eeta'am da lataxac na shiguiÿac mayi dequi'iÿapec. 16Qalaxayi qami' ishit da qauauattoñi nam i'otpi. Cha'ayi da qanqat ana ala ana uvas, qalaq sa ishit da qaÿachigoxotaigui aca qo'ipaq huo'o ana le. Qataq da qanqat ana higo, qalaq sa ishit da qaÿachigoxotaigui aca huoue ÿaxataxadai. 17Qaq 'enauac anam qo'ipaqpi mayi no'on, anamayi ÿataqta no'on da alaÿaxac. Qataq anam qo'ipaqpi mayi qauem, anamayi qauem da alaÿaxac. 18Cha'ayi aca no'on qo'ipaq da ñaxateec aca ala, qalaq sa ishit da qauem. Qataq aca qauem qo'ipaq da ñaxateec aca ala, qalaq sa ishit da no'on. 19Qaq 'enauac anam qo'ipaqpi mayi qauem da alaÿaxac, anamayipi qome qaiquesoqot, nachi qaÿasaxangui ca nodec. 20Qaq ÿoqo'oyi qami' ishit da maichi qauauattoñi namayipi, souaxat nam i'otpi.

Sa ishit da qami' sauatto'n

(Lucas 13.25-27)

21Na shiÿaxauapi mayi aÿim iÿaxaatega, 'eeta': “'Am qadataxala',” namayipi sa ishit da 'enauac da inoxoneu'a cam ñaq natai' l'onataxanaxac ñi Dios mayi neta'ague da piguem. Nachaqcata cam i'ot ca 'eetapeguec ñi ita'a. 22Qaq qom ivita que'eca na'a'q, qaq qalota qome na aÿim 'enapega, 'eeta': “'Am qadataxala', qomi' so'onataxanaqtega naxa da 'ad'enaxat da sa'aqtaxanaqtac, qataq da so'odaqhuec na n'ecpi leguemaxaicpi, qataq da so'otaq na n'anecpi mayi i'ot da n'aalaxa.” 23Qalaxayi aÿim shinapega qome, shiita': “Sa ishit da qami' sauatto'n. Aÿim qoquiÿa'ai, qami' mayi qau'ochiitac na sa ÿaÿamaxañi.”

Soua dos l'oxonaxala'te ca noÿic

(Lucas 6.47-49; Marcos 1.22)

24Qaq ÿoqo'oyi cam ÿataqta aÿim n'axaÿaxana qataq i'ot da shiitega, qaq camayi 'eeta'am ca shiÿaxaua mayi ÿataqta ÿajnaxanaxaic mayi n'oxootelec naq'en ca coma' da n'oxooshiguem ca lma'. 25Qaq da ivita da anac na auot, qataq da i'auat so tala, qataq da anac na l'at lta'adaic, qalaq sa ishit da ÿañoxot da ÿalolaxajñi se'eso noÿic, cha'ayi ÿataqta n'oxootelec qanqoÿin so coma'. 26Qaq cam aÿim n'axaÿaxaatega, qalaq sa ishit da i'ot de'eda shiitega, qalaq camayi 'eeta'am ca shiÿaxaua mayi qaica ca ÿaÿajnapec, da n'oxootelec naq'en aca delec da n'oxooshiguem ca lma'. 27Qaq da ivita da anac na auot, qataq da i'auat so tala, qataq da anac na l'at lta'adaic, nachi ishit da ÿalolaxajñi. ¡Nachi ÿataqta nlachiguiñi!

28Qaq so Jesús co'ollaq imat da l'aqtaxanaxac, nachi so shiÿaxauapi ÿataqta huo'o da l'aalaxa, souaxat naua lapaxaguenataxanaxaco. 29Cha'ayi somayi da dapaxaguenataxaatac, qalaq qaila'a da hueto'ot da l'añaxac ñi Dios. Qaq sa ishit da 'eeta'am nam dapaxaguenataxaatapeguec nam lqataxacpi so Moisés.

Atualmente Selecionado:

Mateo 7: TBSNT

Destaque

Copiar