Mateo 9

So Jesús nataden so sa da'añiigue

(Marcos 2.1-12; Lucas 5.17-26)

1Nachi so Jesús qataq huenojñigui aso barco da naitague na le'ego aso lapel da ñi'iguelaxata so maichi lalamaxat lma'. 2Qaq huaña yimayi, co'ollaq qaidou'a so shiÿaxaua mayi sa da'añiigue, qaÿachitalec so lmala'. Qaq so Jesús co'ollaq ila'a da lpi'iÿaxa'c soomayi, nachi 'enapega som sa no'on, 'eeta':

–Ÿataqta 'an'añaxat qome, 'am ÿalec. Na 'adasouaxashitpi mashi 'enauac da qaÿapalaxat.

3Qaq huo'o som ÿalectauopi nam dapaxaguenataxaatapeguec na lqataxacpi so Moisés da deuennataxaatac, 'eeta': “Dam da' shiÿaxaua npa'aguene' ñi Dios naua l'aqtaqa.” 4Nachi so Jesús co'ollaq ilau'a da lhuennataxa somayipi, nachi 'enapega, 'eeta':

–¿Tá'ainco' yi ÿataqta qauema naua qadhuennataxacolli'? 5Cha'ayi ¿chaq négue't ca ÿoqta saq alaq da qoÿinapec? ¿Peta'a da qoÿiita': “Na 'adasouaxashitpi mashi qaÿapalaxat,” huo'otaq da qoÿiita': “Qoñishiguem, ime, qaq 'auqueuoÿapigui'?” 6Qalaxayi nachi 'en'am na shiÿaxaua llalec qami' nachaxanalo da ÿataqta huo'o naq 'enec da ishit da ÿapalaxat na nasouaxashitpi ana 'alhua.

Ime, nachi 'enapega so sa da'añiigue, 'eeta':

–Qoñishiguem qome, 'aunana't na 'admala'. Ime, qaq 'anqo'ona ca 'adma'.

7Nachi se'eso sa da'añiigue ñishiguem, nachi nqo'ona ca lma'. 8Nachi na shiÿaxauapi co'ollaq ÿauaachigui de'eda, nachi ÿataqta huo'o da lcolanaxa. Nachi ÿi'oxodeetac ñi Dios, souaxat da ñimayi ÿanem de'eda n'añaxac na shiÿaxauapi.

So Jesús iÿaxana so Mateo

(Marcos 2.13-17; Lucas 5.27-32)

9Qaq so Jesús co'ollaq ca'ai yi'iyi, nachi ila'a so shiÿaxaua l'enaxat Mateo. Somayi nso'ootañi, netaigui aso l'onataxanaxaqui. Nachi 'enapega, 'eeta':

–Aÿim qoquegue.

Nachi so Mateo ñishiguem, nachi ca'ategue somayi.

10Qaq so Jesús co'ollaq mashi hueta'a ca nma' da deque'etac, nachi ÿataqta qalota na ÿalectauo nam ÿacootapeeguet ana nshiitenaqte ca nta'a qataq nam laÿipi 'itaxaloxoicpi mayi anac da lqui'axaua somayi qataq soua nale't. 11Qalaxayi nam ÿalectaigui na fariseopi co'ollaq ÿauaachigui de'eda, nachi inatta'pe soua nale't somayi, 'eeta':

–¿Tá'ainco' ñim qami' ÿapaxagueeta'pe yi ishit da nhuana'ai' nam ÿacootapeeguet anam nshiitenaqte ca nta'a qataq nam 'itaxaloxoicpi?

12Nachi so Jesús co'ollaq hua'aqchigui de'eda, nachi 'enapeco':

–Sa ishit da iuen ca datannataxanapec cam qaica ca da, qataq no'oita, chaqnata nam sa no'onpi. 13Qauesomiÿa qome, nachi qanapaxaguiñiÿa cam naigui naua ñiyigui'shi l'aqtaqa ñi Dios mayi 'eeta': “Aÿim ñishitaique da qami' qauchoxonnataxañi. Qaq sa ishit da nachida da qai'añiiuo da qaÿavigaxat ca shiguiÿac da qadachitaqtaxanaqchi.” Cha'ayi aÿim sa ishit da ñanac da seÿaxanaique nam no'on da lataxac, chaqnata nam 'itaxaloxoicpi, da yaqto' ÿaxaadeec naua n'onataxaco.

Qainat so Jesús ca llic da qouaqchitaxac

(Marcos 2.18-22; Lucas 5.33-39)

14Nachi soua nale't so nachilaxanataxanaq mayi l'enaxat Juan nadeu'a so Jesús. Nachi inatta'pe, 'eeta':

–¿Tá'ainco' yi qomi' qataq na fariseopi yi ÿataqta qalota naxa da ñoqouaqchitaq, qaq naua 'anale't yi sa ishit da nqouaqchi't?

15Nachi so Jesús 'enapeco':

–¿Peta'a ishito' da ÿaatañi ca lasouaxaqui cam qaicoyiguen da ÿalectau'a cam nadonaxac da huo'otaq ña qaÿalecta'aguet ca auonaxaua? Qalaxayi huo'o ca na'a'q da ivita da qanqat ca auonaxaua, huaña, nachi ishit da nqouaqchit camayipi.

16Qaica ca ishit da napaden ca nogoxot ltoxoic da huo'otaq dapannaxana ca dalaxaicolec hualoq laÿi. Cha'ayi que'eca dalaxaicolec napannaxanaxat, da huo'otaq nquiga't, nachi ishit da icolaxata'ague cam ltoxoic, nachi ishit da nquiguec ca lcolaxa. 17Qataq sa ishit da qaÿachagui ca dalaxaic lataxa aca shiguiÿac l'oc ltoxoi. Cha'ayi da nachi qoÿiitec de'eda da qaÿachagui, nachi ishit da icolaxata'ague aca l'oc. Nachi que'eca lataxa qataq acam l'oc ishit da n'e'n. Qaq ÿoqo'oyi ca dalaxaicolec lataxa, camayi qaÿachagui aca shiguiÿac l'oc dalaxai, yaqto' caamayi nachi 'eetai'salo da sa ishit da n'e'n.

Aso llale so Jairo qataq aso 'alo mayi ipoteu'a na laÿi so lapo' so Jesús

(Marcos 5.21-43; Lucas 8.40-56)

18Qaq so Jesús co'ollaq ña i'axattac de'eda, nachi anac som lataxala' na judiopi, nachi i'adoto naua l-llicte somayi. Qaq 'enapega, 'eeta':

–Ayi ÿale chita'ague da ileu. Qalaxayi 'am da ishit da 'anqo'ona da 'auashil-lec, yaqto' qaltaq nca'aleec.

19Nachi so Jesús ñishiguem da ca'ategue somayi, qaq nnaictagueto soua nale't. 20Nachi huo'o aso 'alo sa no'on. Asomayi mashi ivi' naua doce vi'iyi da nque'ejnaxac da anactac na ltago'q. Nachi nqo'oneu'a so Jesús, queteu'oguet na l-laq. Nachi ipoteu'a na laÿi so lapo', 21cha'ayi asomayi da lhuennataxa co'ollaxa 'eeta': “Qom chochi sepoteu'a na laÿi so lapo', nachi aÿim no'oita qome.” 22Qalaxayi so Jesús nqoilec, nachi ila'a asa'aso 'alo. Nachi 'enapega, 'eeta':

–'Am ÿaqaÿole, 'an'añaxat qome. Nagui mashi 'am no'oita, cha'ayi 'au'amqajnataxan.

Huaña, nachi asomayi no'oita.

23Qaq so Jesús co'ollaq iviteu'a so lma' se'eso nataxala', nachi ila'a som nvique l'opi da naÿamaxattac da qaÿauotaique da qailayiñi aso qa'añole, qataq na shiÿaxauapi ÿataqta n'alaqtapiguiñi da nnoinaxac. 24Nachi so Jesús 'enapega somayipi, 'eeta':

–Qapa'aiuec qome, cha'ayi ayim qa'añole sa ishit da ileu. Ayimayi chochi do'ochita.

Nachi som shiÿaxauapi ÿataqta i'eetac somayi. 25Qalaxayi so Jesús ipa'axaneec 'enauac somayipi. Ime, nachi inoxoneu'a asomayi, nachi ÿacona na lhuaq, nachi aso qa'añole ñishiguem. 26Nachi se'eso qanayiuta'a 'alhua ividauec da ÿaÿaten 'enauac de'eda qai'ot.

So Jesús natade'n soua dos qanamaiqa

27Qaq co'ollaq ca'ai yi'iyi so Jesús, nachi ana'c soua dos qanamaiqa. Nachi ca'attraueegue somayi, ÿataqta i'alaqtai'salo, 'eeta':

–¡'Am llalec so David, qomi' 'auchoxode'n qome!

28Nachi so Jesús co'ollaq mashi ivideu'a ca nma', nachi se'esoua qanamaiqa nqo'oodeu'a somayi. Nachi so Jesús ina't soomayi, 'eeta':

–¿Qami' qau'amaqchiñi peta'a da ishit da so'ot de'eda?

Nachi soomayi 'ena'po':

–Aja', sa'amaqtenaq, 'am qadataxala'.

29Nachi so Jesús ipoteu'alo naua l'ai'te soomayi. Nachi 'enapeco':

–Ÿataqta ipacchigui qome da 'eetec dam qadpi'iÿaxaqui.

30Nachi naua l'ai'te soomayi huo'oi. Nachi so Jesús huaqattegalo soomayi, 'eeta':

–Ÿataqta sa ishit qome da huo'o ca qau'axachiim de'eda.

31Qalaxayi co'ollaq chochi huenoxoodeec, nachi i'axatrem 'enauac nam hueta'a que'eca 'alhua da i'otec so Jesús soomayi.

So Jesús nataden so qaicaua naua l'aqtaqa

32Qaq co'ollaq chochi je'c soomayi, nachi huo'oi soua shiÿaxa'u naueguedeu'a so Jesús so qaicaua naua l'aqtaqa mayi huo'o so l'ec leguemaxaic. 33Qaq co'ollaq chochi i'odauec se'eso l'ec leguemaxaic so Jesús, nachi se'eso qaicaua naua l'aqtaqa ishit da detaqa. Nachi na shiÿaxauapi ÿataqta huo'o da l'aalaxa. Nachi 'eeta':

–Ÿataqta sa ÿauanaga da huo'o ca qaÿauaachigui da huangui na llalaqpi so Israel da huo'otaq 'eeta'am de'eda.

34Qalaxayi nam ÿalectaigui na fariseopi 'eeta':

–De'eda shiÿaxaua do'otaxaatega da l'añaxac som lataxala' nam saq cha'api da i'odauec nam n'ec leguemaxaicpi.

So Jesús ÿataqta huo'o da lchoxonnataxanaxa na shiÿaxauapi

35So Jesús coleetapigui 'enauac nam pueblopi qataq nam nañalo nam saq 'amaqtaq shiÿaxauapi da dapaxaguenataxaatapoigui ana laponaxaqui na judiopi, i'axattac dam no'on qad'axaÿaxac mayi naigui da ilo'ogue 'enauacna ñim Dios, qataq natadeetac 'enauac nam ÿotta'a't lalolaxa qataq da nqui'ic na shiÿaxauapi. 36Qaq co'ollaq ila'a na shiÿaxauapi, nachi ÿataqta huo'o da lchoxonnataxanaxa. Cha'ayi namayipi ÿataqta daquico qataq qaica ca l'añaxac, 'eeta'am ana qagueta mayi qaica ca ilo'ogue. 37Nachi 'enapegalo soua nale't, 'eeta':

–'Eesa da ÿataqta qalota na ala na nanguishic da yaqto' qanqat, qalaxayi nam 'onataxanaxaicpi saq 'amaqtaq. 38Qaq ÿoqo'oyi qami' qauÿaxañiÿot qome ñim lalamaxat na nanguishic, da yaqto' ñimayi namaq cam 'onataxanaxaicpi.

Atualmente Selecionado:

Mateo 9: TBSNT

Destaque

Copiar