MATHI 8
8
Jisu-nü Nyüh Khüdu Kyangjücho
(Mrk 1.40-45; Luk 5.12-16)
1Khode Jisu akhang lanü jürocho, nyitsarü adrong abi khanglang iiwücho. 2Hütsütade mübhira kehrü nyüh khüdu abi yanglang ro, mükhukehnü kihchi abi te yocho, “Adirü, nühnü lümkhang, nühnü Ih müsachehjünung kohle.”
3Jisu-nü akheh müyungchü abi chah thahpo yocho. “Ihnü lümre,” “Nüh müsachehng!” Hütsüdenü nyitsarüba tsü kyangpehcho. 4Hütsüpü Jisu-nü abi te yocho, “Nyieng! Sütesü hi tüyo, ta Bebüba yanglahnü wüng ko abi khyang dhingsohng; ko atümung bete nüh müsachehkopü yuzithsanung nengdang, Mosa-nü mülacho amübü jüng.”#Lev 14.1-32
Jisu-nü Adirü Kulirü Kyangjücho
(Luk 7.1-10)
5Khode Jisu Kapernaum la züducho, Roman rothsazirü khüdunü ro abi shirücho ko abi rükungpü kihchicho: 6“Adirü, I kulirü dee dhsangnang mümühachicheh kuh la yüpjole.”
7“Abi kyangjünung Ih ronung” Jisu-nü yocho.
8“Doh adirü” Roman-rü anüchiba tsünü yocho. “Nüh I kulang rosohnung Ihnü müdekheng. Yah yuzeng du jüng ko I kulirü kyangnung. 9Ihsü I pohki rothsarüti lipü I mungthri adirü pohki liba nyüh khüdue. Ihnü nyüh khüdu te, ‘Wüng khang abinü wü ko akhüu te, rung, khang rore ko I kulirü te’ Hi nguching; khang abinü hütsü nguchire.”
10Khode Jisu-nü hi yuchicho, abi nyemüyangcho ko abi khanglang iirorüti te yocho, “Ihnü nührü te yore, Israel la hiroh-i yudsi lirü Ihnü müngue. 11Ihnü nührü te yore, nyüchüro langnü ko nyüzüdu langnü adrong ronung ko ninglang Yanglih thsütila tsü Abraham, Isak, ko Jakob yola pümnung.#Luk 13.29 12Ta alimih yanglih tsurüti tsü amarürah la dhiyohchünung, ko hütsüla arüh ha mütrehkehta tranung.”#Mat 22.13; 25.30; Luk 13.28 13Hütsüpü Jisu-nü anüchiba te tsü yocho, “Kulang wüng, ko nühnü yudsicho roh-i nü nengdang nguchinung.”
Ko anüchiba kulirü tsü hütsüdenü kyangpehcho.
Jisu-nü Nyitsarü Adrong Kyangjücho
(Mrk 1.29-34; Luk 4.38-41)
14Jisu-nü Peter kuh la züducho, ko hütsüla Peter nitpü atpa rihminü füdhsa yüpjo ngucho. 15Abinü abükyü kheh chah thapücho; ko rihminü abükyü pehjücho, ko abükyünü shemüsu abi dikehcho.
16Nyüzeh rode, nyitsarütinü Jisu yang amünyi nbünü rangchoba nyitsarü adrong norocho. Jisu-nü yu khüdunü amünyi nbüti iipehjücho ko füdhsarü atümung kyangjücho. 17Abinü hi Isaya azikehrünü, “Abinü Ihsa füdhsa khyücho ko Ihsa dhsara hicho” pü chocho tikehsohnungba nguchicho.#Isa 53.4
Jisu Iiwünungerüti
(Luk 9.57-62)
18Khode Jisu-nü abi mükang sühdi tsü ngucho, abinü amonoti te kihkeh khüulang tsü wünung yuzengjücho. 19Yuzeng adorü khüdu abi yang ro yocho, “Adorü, Nüh khüdederü wünang, nüh iironung Ih rungnüm lile.”
20Jisu-nü abi te lalingcho, “Shirungti lungkhi lile, ko uzati asüp lile, ta Nyitsarü Tsurülü khüdesü aku ngakeh chah mühle.”
21Aparü mono khüdunü abi te yocho, “Adirü, akhu Ih thali wü I U me rangsohng.”
22Jisu-nü abi te yocho, “Ih iirung,” “ko asücho tsü abürü jangjang dhrürangsohng.”
Jisu-nü Tsingxinyübong Zahsohcho
(Mrk 4.35-41; Luk 8.22-25)
23Jisu-nü kihtang khüdula züducho, ko amonoti abi iiwücho. 24Dhrongyengnü adrünung tsingxinyübong chürocho ko kihtang tsü amülingyohrü thsacho. Ta Jisulü yüpseh licho. 25Monotinü wü abi khamüsu yocho, “Ihrü khümchoung, Abüdongba!” “Ihrü achangrüdue!” 26Jisu-nü yocho, “Nührü tuepü hitoi drüro?” “Nührü yudsi samrale!” Hütsüpü abinü shemüsu nyübong ko kiloh te zahnung yuzengjücho ko longlüm kangcho.
27Atümungnü nyemüyang yocho. “Nyübong ko kilohnü mii ayu nyinungthsa, hi khütari nyitsarüo!”
Amünyi Nbünü Rangcho Nyüh Anyüh Kyangjücho
(Mrk 5.1-20; Luk 8.26-39)
28Khode Jisu-nü kihdi khüulang Gadara limih lang rocho, kongyo langnü nyüh anyüh ro abi mütohcho. Arüh chah adrünung amünyi nbü lichonü sünüsü hütsüba langla mülahkhucho. 29Khüdupinü arühnü khongcho, “Ihrü chah tu nguchinyüro, nüh Tsingrangba Tsurü? Becho müchienü nüh ihrü khingchinung rocho mah-o?”
30Hütsü amünyeh shüka atii thütsuthüyong rachicho. 31Ko amünyi nbüti tsünü Jisu te kihchicho, “Nühnü ihrü iipehkhang, shüka atii yola tsü ihrü züdusohng.”
32Jisu-nü arüh te yocho: “Wüng” ko arühnü chürocho ko shüka atii la züducho. Atii shünü lungdhonglang tsohnah jowü kihdi la tsü dhsangsehkhangcho.
33Shüka nyahrü tsünü yangdi lang shang wünü amünyi nbünü rangcho nyitsarü chah tikehcho yukheh apüm yocho. 34Achotsü yangdila lirü atümung Jisu shirünung wücho; ko khode arühnü abi ngucho, arühnü abi te arüh lih pehjüpü tsinung kihchicho.
Atualmente Selecionado:
MATHI 8: SANGBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
