MATHI 9

Dsidsi sürü Nyüh Khüdu Kyangjücho

(Mrk 2.1-12; Luk 5.17-26)

1Jisu-nü kihtang la tsü züducho ko kih kehnü apu yangdi lang thali wücho, 2khürünü abi yang dsidsisüba nyüh khüdu yüpji chahnü hirocho. Jisu-nü arüh yudsi mülahcho ngu abinü dsidsi süba te yocho, “Müci zieng, Itso, nü münyi pehjüko.”

3Hütsünü yuzeng dorü khürünü arüh lüm la yorü, “Hiba nyitsarünü Tsingrangba müthsamünyüre!”

4Jisu-nü arüh lümba tsü müdhenü yocho, “Tuepü nührü lasih la amünyi lümro? 5Nü münyi pehjüko, pü yonung amülaba a, mahkhang, Shemüsung ko tsehng, pü yonung amülabao? 6Khang, Ihnü nührü te yuzi yonung, Nyitsarü Tsurü chah hiba limih la münyi pehjünung tase kehle. Hütsüpü abinü dsidsi süba te yocho, Shemüsung, nü yüpji dhieng ko kulang wüng!”

7Nyitsarüba tsü shemüsucho ko kulang tsicho. 8Sühdinü hütsü ngude, arühnü drücho, ko nyitsarü khyang zii hütsütoh-i jücho nengdang Tsingrangba neng secho.

Jisu-nü Mathi Dsicho

(Mrk 2.13-17; Luk 5.27-32)

9Jisu-nü hütsü müdüm pehjücho, ko abi lahkhu tside, alihmüthsü dhrirü khüdu anengnü Mathi, abi dochungkuh la püm ngucho. Jisu-nü abi te yocho, “Ih iirung.”

Mathi-nü shemüsu abi khanglang iiwücho.

10Mathi kuh la Jisu yangtsu pümde, alih müthsüh dhrirü ko müyudsirü adrong ro Jisu ko monoti yola pümcho.#Luk 15.1-2 11Farisirü khürünü hi ngu amonoti te tsingdhingcho, “Tuepü nührü adorünülü hitari yola tsuyongro?”

12Jisu-nü hütsü yuchi arüh te lalingcho, “Tsayengrü nengdang akyangjürü müdhsütah, ta füdhsarü nengdang dhsütahre. 13Wüng ko Amüsa yunü yoba tsü rangchehng: ‘Ihnü müruba tsü kangmübü mah, ta achomang.’ Ih amüsarü nengdang mah, ta münyirü dsinung rocho.”#Mat 12.7; Hos 6.6

Kongcho Nengdang Tsingdhingcho

(Mrk 2.18-22; Luk 5.33-39)

14Hütsütade baptijüba Johan monoti Jisu yang ronü yocho, “Farisirü e ihrü adrongpi kongde tuepü nü monolü seh mükongro?”

15Jisu-nü lalingcho, “Kuthriba arüh yola pümpü, thsütila rorüti wah ngunung do? Hütsüta mah! Ta kuthribong arüh tenü notsipehnung nyümong tsü ronung, hütsüde du arüh kongnung.

16“Sünüsü shü ahi chah asi mükhümkehre, tunüo shü asi tsü tsingde ahiba tsü adiu rohphohre. 17Mahkhang sünüsü cikih asi shinga ahi la müliire, tunüo shinga tsü tsohrüp cikih tsü khatohnung, ko shinga tsüsü thsangnyangnung. Hütsü müli cikih asi tsü shinga asi la liire, ko anyüding tsa yohpüre.”

Adirü Tsulatpü ko Jisu Fükhüm chah Thahpüba Khingkurü

(Mrk 5.21-43; Luk 8.40-56)

18Jisu-nü hi yochi yade, Jihudarü khüdu abi yang rocho ko ajingte mükhukeh yocho, “I tsulatpü ade tsatsa süko, ta rung ko nü khehnü abükyü chah thahpüng ko abükyü kanglinung.”

19Hütsünü Jisu-nü shemüsu abi iiwücho, ko amonotisü abi yola wücho.

20Khingkurü khüdu kang dhüreanyüh ashüh shonü licho, ko Jisu hongkoh langnü abi shüyo chah abükyünü thahpücho. 21Abükyünü lümcho. “Ihnü ashü chah dusü thahpükhang, Ih kyangnung.”

22Jisu-nü ximüla abükyü ngunü yocho, “Tülümxü, Alechü! Nü yudsinü nüh kyangjüko.” Ko hütsüdenü khingkutpü tsü kyangpehcho.

23Hütsüpü Jisu-nü adiba kulang tsü wücho. Khode abinü meshü khithsarü ko nyitsarüti duduyaya ngucho, 24abinü yocho. “Atümung shehkhung! Azatpü tsü sücho mah, ta yüpsehcho due!” Hütsütade arüh atümungnü abi münyodhingcho. 25Ta nyitsarüti shehkhusohyeng Jisu-nü azatpü yüpjilang züducho ko akheh la marehcho, ko abükyü tsü shemüsucho. 26Hiba yusi tsü hütsüba lih apümlang sobhocho.

Jisu-nü Nahtohrü Nyüh Anyüh Kyangjücho

27Jisu-nü hütsü müdüm pehjüpü tsichi yade, anahtohrü nyüh anyüh abi khanglang iiwücho. “Ihrü te chomang, David tsurü, arühnü züdecho!”

28Khode Jisu kuh la züducho, anahtohba nyüh tsü abi yang rocho, ko abinü anyüh te tsingdhingcho, “Ihnü nühjü kyangjüchehnungepü yudsirü mah-o?”

“Ho, adirü, anyünü lalingcho!”

29Hütsüpü abinü anyüh nahtse la thahponü yocho, “Nühjünü yudsicho roh-i tikehsohng!” 30Ko anyüh nah khangthrucho. Jisu-nü anyüh te khahkhah yocho. “Hi sütesü tüyo!”

31Ta anyünü wü hütsüba lih apümlang Jisu yusi tsü sobhocho.

Jisu-nü Amongdongrü Khüdu Kyangjücho

32Nyitsarüti tsü tsiyade, Jisu yang khürünü amünyi nbünü rangcho amongdongrü khüdu norocho. 33Ko amünyi nbü tsü iipehjüyeng, nyitsarüba tsünü chotamüsucho, ko ayangthri nyemüyangcho. “Ihrünü Israel la hi kyo khodesü müngudhing, arühnü züdecho!”

34Ta Farisirü-nü yocho. “Motsing ayingbanü abi khyang amünyi nbü iipehnung zii jüre.”#Mat 10.25; 12.24; Mrk 3.22; Luk 11.15

Jisu-nü Nyitsarüti Nengdang Dhsa Lümcho

35Jisu-nü yangditi ko yangdongti xodhingnü wücho. Abinü Sinagog la docho ko ninglang Yanglih Yusi Atsa thsingyucho, ko dhsara ko füdhsa papa kyangjücho.#Mat 4.23; Mrk 1.39; Luk 4.44 36Abinü sühdi tsü ngude, arüh nengdang lasih dhsa lümjücho, tunüo anyahrü mülicho san roh-i arüh axükümrü mülicho.#Khi 27.17; 1 Yang 22.17; 2 Roh 18.16; Ezk 34.5; Mrk 6.34 37Achotsü abinü amonoti te yocho, “Luh nyithoh lile, ta nyükheh müdsile.#Luk 10.2 38Hütsüeko luh abüdongba te maxanung nyükheh müthehng pü kihchieng.”

Atualmente Selecionado:

MATHI 9: SANGBSI

Destaque

Copiar