MATHI 7
7
Aparü Yukhacho
(Luk 6.37, 38, 41, 42)
1“Tsingrangba-nü nührü yu mükhanungthsa bürü yu tükha, 2tunüo nührünü khüta bürü yu khanang hütsü roh-i Tsingrangba-nü nührü yu khanung, ko nührünü bürü te tu yuzeng bichinang nührü te abinü hütsü kyo bichinung.#Mrk 4.24 3Hütsükhang, tuepü nüpu nahtse la singnah zehpü nü jünirü nah la zehcho anyah dhingro? 4Nüpu nahtse lalü singnah zehpü, nühnü khüta nü jünirü nah la anyah pehjünung pü yoro? 5Khürahbong! Akhu nüpu nah lanü singnah tsü pehng, hütsüpü du nü jünirü nah la anyah tsü pehjünung tsidsa ngunung.
6“Tu Amüsa liro hütsü füza khyang tüjü, arühnü ximüla nüh mükahnung. Shüka bete bhürüm tüthohpeh, arüh jingnü hütsü dhrümchinung.
Ching, Yangching, Hamching
(Luk 11.9-13)
7“Ching, ko hütsü nührü khyang jünung; yangching, ko nührünü ngunung; hamching, ko hütsü nührü khyang khangthrujünung. 8Tunüo achingrü müipinü khyüchore, ko sünü yangchiro abinü ngure, ko sünü drongdrongchiro abi khyang khangthrujüre. 9Nührü auti yola khürünü atsurünü hümdhse chingde abi khyang lung jürü do? 10Mahkhang abinü nguh chingde mürü jürü do? 11Nü roh-i amütsanü mii, tsuzarü khyang atsa jünung müdhekhang, ninglang liba nührü Aunü abi te chingrü khyang kohro atsa khüta alaa müjünung!
12“Nührü te nguchisohnyücho roh-i aparü tesü nguching: hiba hi Mosa yuzeng adüzü ko azikehrü adoba tsü lile.#Luk 6.31
Akongsüm Tbükhüm
(Luk 13.24)
13“Akongsüm tbükhüm khu züdung, tunüo mümehmi tbükhüm tsü müzadile ko hütsülang nüba lang tsü mülakhütile, ko hütsüla züdurü khütango. 14Ta akang lang tbükhüm tsü akongsüm ko hütsülang nüba lang tsü athsah-e, ko hütsü ngurü aikyah du.
Singdong ko Asih
(Luk 6.43, 44)
15“Arahkheh azikehrü nengdang müzahng; nührü yang adhingnung san kyo rore, ta ayonglanglü arüh rangfü kyole. 16Arühnü tu nguchiro hütsü khu nührünü arüh müdhenung. Zengsih dongchah shükusih müsire, ko abengpingzeng chah ngurüsih müsire. 17Singdong atsa chah asih atsa sihre, ta singdong amütsa chah asih amütsa sihre. 18Singdong atsa chah asih amütsa müsihcheh, ko singdong amütsa chah asih atsa müsihcheh. 19Ko khüiba singdong chah asih atsa müsinang hütsü resah michang la yohre.#Mat 3.10; Luk 3.9 20Hütsü roh-i, nührünü arahkheh azikehrü tsü arüh nguchinü müdhenung.#Mat 12.33
Ihnü Khodesü Nührü Mümüdhe
(Luk 13.25-27)
21“Ite, ‘Abüdongba, Abüdongba’ pü dsirü müipi ninglang Yanglih la müzüdunung, ta sünü ninglang liba I U-nü khyünyücho nguchinang abi du züdunung. 22Khode yukha nyümong ronang, adrongnü Ite yonung, ‘Abüdongba, Abüdongba! Nü nengla Ihrünü Tsingrangba yu choko, nü nengla Ihrünü amünyi iipehko ko thsayahiya adrong nguchiko!’ 23Hütsütade Ihnü arüh te yonung, ‘Ihnü khodesü nührü mümüdhe. Nührü amütsa nguchirüti, Ibe tenü shehkhung!’#N. Khi 6.8
Kuh Anyüh Thsarü
(Luk 6.47-49)
24“Hütsüeko, sünü I yu hiri yuchiro ko bichiro, abi alümzeh nyitsarü lung michah kuthsabong kyole. 25Tsing rocho, kih dicho, ko hütsü kuh chah nyübong amülahnü fücho. Ta hütsü mükhülu, tunüo hütsü lung michah khyüm thsacho.
26“Ta sünü I yu hiri yuchipü mübichiro, abi lihpi michah kuh thsaba amüsithsabong tsü kyole. 27Tsing rocho, kih dicho, ko hütsü kuh chah nyübong amülahnü fücho, ko hütsü khülucho ko hütsü khüluba tsü khütoh-i adrünung thsacho!”
Jisu Tase
28Khode Jisu-nü hiri chozahcho, abi dochola sühdinü nyemüyangcho.#Mrk 1.22; Luk 4.32 29Abinü yuzeng adorü roh-i müthsapü tase bichi chocho.
Atualmente Selecionado:
MATHI 7: SANGBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
