MATHI 6
6
Amüi Nguchi Nengdang Docho
1 #
Mat 23.5
“Nyitsarü khyang ngusohnung nengdang nührü amüi nguchi amülung bete nguchi tüngu. Hiri tsü nührünü misha nguchikhang, nührü Au ninglang liba chahnü jiyü tusü müngunung.
2“Hütsüeko khode nührünü chongcharü khyang lango jünang, akhürahrütinü amübükuh la ko yanglongla ngusohnung nengdang nguchicho roh-i tünguchi. Arühnü hütsü nyitsarünü arüh sesohnung nengdang nguchire. Ihnü yore, arüh khyang ajeng jopehko. 3Ta khode nührünü chongcharü tronang, nü shangrükhungnüsü hütsü mümüdhenungthsa nguching. 4Hütsütakhang hütsü arang nguchi thsanung. Ko nührü Au, sünü nührünü rang nguchicho nguro, abinü nührü khyang jiyünung.
Dangkhidangnang Nengdang Docho
(Luk 11.2-4)
5 #
Luk 18.10-14
“Khode nührünü dangkhidangnangnang, akhürahrü roh-i tüthsa! Arühnü nyitsarünü ngunung nengdang Sinagog amübükuh la ko langtpah la yapü dangkhidangnangnyüre. Ihnü yore, arüh khyang ajeng jopehko. 6Ta khode nührünü dangkhidangnangnang, kuh yonglang züdung ko kuh khangtipü nahnü münguba nührü Au te dangkhidangnang. Ko nührü Au sünü nührünü rang nguchicho nguro, abinü nührü khyang jiyünung.
7“Khode nührünü dangkhidangnangnang, müyudsirünü bichicho roh-i, adüzü müliba yu dee tübichi, tunüo arühnü asheng dangkhidangnangchonü arüh tsingrangnü yuchinungepü lümre. 8Arüh tüithsa. Nührü Aunü abi te müchingenü nührü dhsütah müdhele. 9Hütsüeko, nührünü hiroh-i dangkhidangnang.
“‘Ninglang liba Uwa:
Nü neng Amüsa hechisohng;
10Nü Yanglih rosohng;
Ninglang roh-i limih la nü müci thsaang.
11Ihrü khyang chünye dhsütah tsuyongnung khülo.
12Ihrü te thsamehrü khyang ihrünü mülang pehjücho roh-i,
Ihrü thsamehcho mülang pehjüng.
13Ihrü athsadsü amüling yang tünü,
ta amünyi lanü khümchoung.’
14 #
Mrk 11.25-26
“Nührü te amütsa nguchirü khyang nührünü mülang pehjükhang, ninglang liba Au nüsü nührü khyang mülang pehjünung. 15Ta nührünü bürü mülang müpehjükhang, nührü Au nüsü nührü mülang müpehjünung.
Kongcho Nengdang Docho
16“Ko khode nührünü kongnang, akhürahrü roh-isü romih tümükhüm. Arüh kongcho nyitsarü khyang ngusohnung nengdang arühnü arüh romih mükhümre. Ihnü yore, arüh khyang ajeng jopehko. 17Nührünü khode kongnang, nü romih müpieng ko nü thah sühng. 18Hütsünü du, nahtsenü münguba nührü Au chah khu aparünü nührü konglepü mümüdhenung. Ko nührü Au sünü rang nguchicho nguro, abinü nührü khyang jiyünung.
Ninglang Kuthsi
(Luk 12.33, 34)
19 #
Jkb 5.2-3
“Hiba lih la palu nengdang kuthsi tüzahkeh, khüde azah ko dhrongnü tsuro, ko aführünü rohphoh führo. 20Hütsü mülih, ninglanglih la nührü kuthsi zahkehng, khüde azah ko dhrongnü mütsuro ko aführünü rohphoh müführe. 21Tunüo nü kuthsi khüde linang hütsüla nü lasih linung.
Afü Dsi
(Luk 11.34-36)
22“Nahtse tsü afü nengdang dsi khüdu kyole. Nü nahtse tsa likhang, nü fü apüm tsingsenung; 23ta nü nahtse mütsakhang, nü fü tsü marürah linung. Hütsüeko nü chah liba atsingse tsü marürahkhang, amarürah tsü khütoh-i adrünung thsanung!
Tsingrangba ko Kuthsi
(Luk 16.13; 12.22-31)
24“Sünüsü abüdongrü anyüh müdikehcheh; abinü khüdu thrünyinung ko akhüu müinung; khüdu te yochonyinung ko akhüu tsü müchümükehnung. Nührünü Tsingrangba ko kuthsi anyüding müdikehcheh.
25“Hütsünü Ihnü nührü akang linung nengdang tsuyongnung mahkhang afü nengdang müpinung tu tülümxü pü yore. Tunüo akang tsü tsuyongnung tenü awüba mahrü do? Ko afü tsü shü tenü awüba mahrü do? 26Uzati tsü dhing: arühnü ma müchirü, xabülung shih la müyohpürü; ta ninglang liba nührü Aunü arüh xükümre! Nührü uza tenü khütang awüba mahrü do? 27Nührü khürünü hütsü nengdang lümxüchonü khü ashengu lichehnung mah-o?
28“Tuepü müpinung nengdang lümxüro? Rangmü yungpi khüta ziro lümdhing: arühnü münguchire mahkhang shü mükyahre. 29#1 Yang 10.4-7; 2 Roh 9.3-6 Ta Ihnü nührü te yore, Solomon yangthsabanü mii akuthsi hütsütoi linye hiri yungpi tsah tsacho kyo müjengkicho. 30Za chünye liko atu müliba, ta la tahpehba khyang mii Tsingrangba-nü müpisohkhang, abinü nührü khyang alaa mümüpisohnung do? Nührü yudsi sümrüti!
31“Hütsüeko, tu tsunung, mahkhang tu yongnung mahkhang tu müpinung pü tülümxü! 32(Müyudsirü dunü hiri nengdang lümre) Ninglang liba nührü Aunü hiri apüm nührü nengdang dhsütahlepü müdhele. 33Hütsü mülih akhu nührünü Tsingrangba Yanglih ko abi Amüsaba yangching, ko hiri atümung nührü yo thsanung. 34Hütsüeko atu nengdang tülümxü; tunüo atu tsü ajangjang lümxünung. Nyümong mükhu abükyü chongcha tsü hütsü nyümong nengdang kükyüsohng.
Atualmente Selecionado:
MATHI 6: SANGBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
