MATHI 5

Azong Chah Thsingyucho

1Jisu-nü sühdi tsü ngu akhang khüdu chah tuwücho, ko hütsüla pümcho. Amonotinü abi mükang shibülungcho, 2ko abinü arüh te donung dikehcho:

Amüwanung

(Luk 6.20-23)

3“Sürü anbüla müdsimükuro arüh amüwanung;

tunüo ninglang Yanglih arüh yo!

4 # Isa 61.2 Sürü me traro arüh amüwanung;

tunüo arüh tbachijünung.

5 # N. Khi 37.11 Sürü longlümro arüh amüwanung;

tunüo arühnü Tsingrangba-nü nyengchocho ngunung!

6 # Isa 55.1-2 Sürü Amüsaba nengdang yangxoro arüh amüwanung;

tunüo arüh longxosohnung!

7Sürünü chomangro arüh amüwanung;

tunüo arühnü achomang ngunung.

8 # N. Khi 24.3-4 Sürü lasih müsaro arüh amüwanung;

tunüo arühnü Tsingrangba ngunung!

9Sürünü yangtsa külüpro arüh amüwanung;

tunüo arüh Tsingrangba tsurüti dsinung!

10 # 1 Pet 3.14 Sürü Amüsaba nengdang dhsümthsero arüh amüwanung;

tunüo ninglang yanglih arüh yo!

11 # 1 Pet 4.14 “Nührü I mono thsacho ngang khode nyitsarünü nührü müchümükehnang ko dhsümthsedhsümlohnang ko nührü nyüm arahkheh apüm yonang nührü akünyangnung. 12#2 Roh 36.16; R. Ngu 7.52 Künyang ko longphieng, tunüo ninglang nührü khyang jiyü arangcheh yohpüjü lile. Nührü müngu azikehrütisü hiroh-i dhsümthsedhsümlohcho.

Mih ko Atsingse

(Mrk 9.50; Luk 14.34, 35)

13“Nührü alimih mih. Ta mih tsü amüsüp changpehkhang, thali müsüpsohnung lang tusü mühle. Hütsü amii müli kangre, hütsü thohpehpü nyitsarünü dhrümchire.

14 # Jhn 8.12; 9.5 “Nührü alimih atsingse, akhangchah liba yangdi khüdu mümüyümticheh. 15#Mrk 4.21; Luk 8.16; 11.33 Sünüsü dsi tahkehpü loh pohki müyohpüre; ta dsi vihsingla vihpüre, hütsünü kuh la lirü atümung khyang vijüre. 16#1 Pet 2.12 Hütsüroh-i nührü atsingse tsü nyitsarü atümung bete visasohng, hütsüta arühnü nührü nguchi atsa ngu ninglang liba nührü Au hechinung.

Yuzeng Nengdang Docho

17“Ih Mosa yuzeng ko azikehrütinü docho changjünung rochoepü tülüm. Ih hütsüri changjünung rocho mah, ta tikehsohnung rocho. 18#Luk 16.17 Ning ko alih müchangde ashingkehcho azauba mahkhang yuzeng yola azauba khüdu dusü mütikehpü mükhutsinung. 19Hütsünü, sürünü hiri yuzeng azauba khüdu dusü thsangnyangro, ko aparü tesü hütsüroh-i nguchinung thsingyuro, ninglang yanglih la azauba thsanung. Adesü, sürünü yuzeng nyiro ko aparü tesü hütsüroh-i nguchinung thsingyuro, ninglang Yanglih la arüh adiuba thsanung. 20Hütsüeko Ihnü nührü te yore, yuzeng athsingyurü ko Farisirü tenü nührü yudsi ahou müthsakhang, nührünü ninglang Yanglih la khodesü müzüdunung.

Ziichüroba Nengdang Docho

(Luk 12.57-59)

21 # Nüch 20.13; Azk 5.17 “Jümüchah yocho nührünü yochiko, ‘Tümüpseh; sünü müpsehnang abi yu khanung.’ 22Ta adelü Ihnü nührü te yore: sünü jünirü te ziichüronang abi yu khanung, sünü jünirü te ‘Nüh tulamüyoh’ pü yonang abi ashimükhong bete noronung, ko sünü jünirü te ‘Adongmücho adohrü’ pü yonang abi mümehmi dhsürüla linung. 23Hütsüeko mübüji chah nü Tsingrang khyang lango mübünungthsa yade, nü jünirünü nüh nyüm lango lilepü lümchehkhang, 24amübüji te nü jiyü tsü yohpülieng, ko wünü nü jünirü te akhu tsataang, hütsüpü du thali ro Tsingrangba khyang nü mübü tsü jüng.

25“Khürünü yuzengnü nüh mülangjü nüh yukhajilang nowükhang, yukhajilang müwüdenü abi te khiyu tsü tsidsa pehng. Nüh hütsülang tsü nowükhang, abinü nüh yukharü kheh la jünung, arühnü nüh anyahyehrü khyang jünung, ko nüh akhangtikuh la rangyohnung. 26Ihnü nührü te yore, nühnü akhang tsü müsahkhangdelü nüh hütsüla linung.

Nahtrahnaxeng Nengdang Docho

27 # Nüch 20.14; Azk 5.18 “Hiroh-i yocho nührünü yuchiko, ‘Nahtrahnaxeng tübichi.’ 28Ta adelü Ihnü nührü te yore: sünü khingkurü chah mükhyah dhingnang abükyü te lasih la nahtrahnaxengre. 29#Mat 18.9; Mrk 9.47 Hütsüeko nü nah tsalangbanü nüh münyisohkhang, hütsü hehcheh pehng! Mümehmi la nü füpüm shünü dhiyohchünung tenü nahtsenaha khüdu changcho atsau. 30#Mat 18.8; Mrk 9.43 Nü kheh tsalangbanü nüh münyisohkhang, hütsü kyüsah pehng! Mümehmi la nü füpüm shünü wünung tenülü jingkhehrü khüdu changcho atsau.

Zaba Nengdang Docho

(Mat 19.9; Mrk 10.11-12; Luk 16.18)

31 # Azk 24.1-4; Mat 19.7; Mrk 10.4 “Hisü yoko, ‘Sünü anitpü pehnang abükyü khyang azaba yuzi athrahcho jüsohng.’ 32#Mat 19.9; Mrk 10.11, 12; Luk 16.18; 1 Kor 7.10, 11 Ta adelü Ihnü nührü te yore: sünü anitpünü longmülangba tu münguchipü, abükyü zanang, ko abükyü xenglikhang abinü nahtrahnaxengsohre; ko sünü abükyü khyonang abisü nahtrahnaxengre.

Tsuyuchüm Nengdang Docho

33 # Lev 19.12; Khi 30.2; Azk 23.21 “Jümüchah yocho nührünü yuchiko, ‘Anyengchocho tüthsangnyang, ta Abüdongba te nührünü tu tsuyuchümcho hütsü nguching.’ 34#Jkb 5.12; Isa 66.1; Mat 23.22 Ta adelü Ihnü nührü te yore: nühnü lango nyengchode tsuyuchüm tüthsa. Ninglang dangchi tüyuchüm, tunüo hütsü Tsingrangba pümji; 35#Isa 66.1; N. Khi 48.2 alih sü tüdangchi, tunüo hi abi jing jükehsing; Jirusalemsü tüdangchi, tunüo hi adibong yangthsaba yangdi. 36Nü thah tangchi nüsü tsuyuchüm tüthsa, tunüo nühnü kuva khüdu dusü athru mahkhang anyah mükangchesoh. 37‘Ho’ mahkhang ‘Mah’ du young, nühnü lango dusü alaa yokhang hütsü amünyi chahnü lile.

Rühyangba Nengdang Docho

(Luk 6.29-30)

38 # Nüch 21.24; Lev 24.20; Azk 19.21 “Hi yochoba nührünü yuchiko, ‘Nahtse müli nahtse, ko aha müli aha.’ 39Ta adelü Ihnü nührü te yore: nüte amütsa nguchirü te rüh tüyang. Khürünü nü müchüp tsalangthring tangkhang, fülilangsü tangsohng. 40Ko khürünü nü pümkhüm khyünyonü yukhajilang nüh nowükhang, abi khyang nü shü mii khyüsohng. 41Ko khürünü abi bha lutri khüdu hisohnyükhang, hütsü lutri anyüh hijüng. 42Khürünü nüte lango chingkhang, abi khyang hütsü desahng; khode khürünü nüte lango nyanyünang, abi khyang nyasohng.

Arorüh Müiba

(Luk 6.27-28; 32-36)

43 # Lev 19.18 “Hi yochoba nührünü yuchiko, ‘Nü shangrü müing, ko nü rorüh thrünyieng’ 44Ta adelü Ihnü nührü te yore: nü rorüh müing ko nü dhsümthserü nengdang dangkhidangnangjüng. 45Hütsünü nührü ninglang liba Au tsurüti kangnung. Tunüo abinü atsarü ko amütsarü anyüding michah apu nyü thsakehjüre, ko atsa nguchirü ko amütsa nguchirü michah tsing rosohre. 46Nührü müirü te du nührünü müikhang, tuepü Tsingrangba-nü nührü jiyünung? Alih müthsü dhrirü nüsü hütsülü nguchire! 47Ko nührünü shangrü te du chotakhang aparü tenü alaa tu nguchicho? Müyudsirü nüsü hütsülü nguchire! 48#Lev 19.2; Azk 18.13 Nührü Au ninglang liba dekhingcho roh-i nührüsü dekhing lieng!

Atualmente Selecionado:

MATHI 5: SANGBSI

Destaque

Copiar