लूका 3

यूहन्‍ना बपतिस्मा ङेणे आले चा सनेसा

(मत्ती 3:1–12; मरकुस 1:1–8; यूहन्‍ना 1:19–28)

1रोम चा तिबिरियुस कैसर चे राज़ चे पन्द्रवें साला मां, जिसे बेले पुन्तियुस पिलातुस यहूदिया इलाके चा राज्यपाल हुता, ते गलील मां हेरोदेस राजा, इतुरैया ते त्रखोनीतिस मां ओचा भऊ फिलिप्पुस राजा ते अबिलेने मां लिसानियास चौथाई चा राजा हुता। 2ते जब यरुशलेम मां हन्‍ना ते कैफा महायाजक चे पद्द उपर हुते, ओ बेले नरीकारा चा वचन बरब्याना मां जकरयाह याजक चे पूत यूहन्‍ना कनु पुज़ला। 3ते यूहन्‍ना यरदन नदी चे आस-पास सारे इलाका मां जती, पापा ची माफी वास्ते मन फिराव चे बपतिस्मे चा प्रचार करु लाग़ला। 4यूंही प्रचार करु लाग़ला जिंवे यशायाह भविष्यवक्‍ता चे केहले आले वचना ची किताबे मां पेहले कनु लिखले आले छै,

“बरब्याना मां हेक हकारने आले ची अवाज किहे पलती ली,

‘प्रभु चे वास्ते मार्ग़ तियार करा,

ओचे वास्ते सड़का सिधीया करा।

5हर हेक घटी भरती ङिली जई,

ते हर हेक पहाड़ ते टिब़्ब़ा झिका करला जई,

ते जको ङिंगा छै ओ सिधा,

ते जको ऊंचा झिका छै, ओ चौरस मार्ग़ बणी।

6ते हर हेक प्राणी नरीकारा चे उद्धार नु ङेखी।’ ”

7 # मत्ती 12:34; 23:33 ऐवास्ते जको भीड़ ची भीड़ ओकनु बपतिस्मा गेहणे वास्ते आती, यूहन्‍ना वानु केहता, “हे नाग़ा ची ब़च्‍ची! तम्हानु केहणे चिताती ङिले, कि तम्ही नरीकारा चे क्रोध कनु द्रोड़ा। 8#यूह 8:33सो मन फिराव चे जोगा फल आणा, ते आपणे आपणे मना मां ईं ना सोचा, ‘अम्चा ब़ा अब्राहम छै,’ कांकि मैं तम्हानु किहे पला कि नरीकार यां पत्थरा महु अब्राहम वास्ते ऊलाद्ध पैदा कर सग़े। 9#मत्ती 7:19ते हमा ही कुहाड़ा पेड़ा ची ज़हड़े चे उपर मेहला, ऐवास्ते जको-जको पेड़ आच्छे फल ना आणी, ओनु बाढती ते जाखते मां झोंकती ङिले जई।”

10ते लौका ने ओकनु पूछले, “तां अम्ही का करु?”

11बल्ति यूहन्‍ना ने वानु उत्तर ङिला, “जाये कनु ङोन चोले हो, ओ ओचे लारे जाकनु कोनी, बांटती ङियो, ते जाये कनु भोज़न छै, ओ यूंही करो।”

12 # लूक 7:29 कोच्छ रोमी राज़ चे चुंगी गेहणे आले वी बपतिस्मा गिहुं आले ते ओकनु पूछले, “हे गुरु अम्ही का करु?”

13ओणे वानु केहले, “जको तम्चे वास्ते ठहराले गेले ओकनु ज्यादा ना गिहा।”

14ते सिपाहीया ने वी ओकनु ईं पूछले, “अम्ही का करु?”

ओणे वानु केहले, “कि तम्ही काये उपर वी जुलम ना करा, ते ना काये उपर कूड़ा दोष लावा, ते आपणी तनखाई पर सब्र करजा।”

15जिसे बेले लौक आस लाली भिलते, ते आपणे आपणे मना मां यूहन्‍ना चे बारे मां विचार करी भिलते कि हाओ तां मसीह कोनी। 16यूहन्‍ना ने वां सारा लौका नु केहले, “मैं तां तम्हानु पाणीया लारे बपतिस्मा ङिये, पर ओ जको माये बाद मां आणे आला छै, ओ माये कनु महान छै, मैं तां ओचे ब़ूटा चा तणिया खोलणे चे लायक कोनी, ओ तम्हानु पवित्र आत्मा ते जाखते लारे बपतिस्मा ङी 17ओचे छाज़ ओचे हाथा मां छै, ते ओ आपणा पेएड़ आच्छी रीति लारे साफ करी, ते कणकी नु आपणे पिएड़ा मां भेली करी। पर भूंआ नु वे जाखते मां ब़ाली जको ब़िझणे चे कोनी ब़ालती ङी।”

18ओ ब़ोहत सारीया बाता नु समझाणे चे रूपा मां लौका नु सुसमाचार सुणाता रेहला। 19#मत्ती 14:3,4; मरकु 6:17,18पर जब ओणे चौथाई देश चे राजे हेरोदेस नु ओचे भावा फिलिप्पुस ची घराआली हेरोदियास चे बारे मां ते सारे कुकर्म चे बारे मां जको ओणे करले हुते, उलाहणा ङिला, 20तां हेरोदेस ने वां सब कनु बधती कर हा कुकर्म वी करला कि यूहन्‍ना नु कैदखाने मां नाखती ङिले।

ईशु चा बपतिस्मा

(मत्ती 3:13–17; मरकुस 1:9–11)

21यूहन्‍ना नु कैदखाने मां नाखणे कनु पेहले इसड़े हुले कि जब सारे लौक बपतिस्मा गिही पलते, तां ईशु ने वी बपतिस्मा गेहती कर प्राथना करली, तां आसमान खुलती गेला। 22#मत्ती 3:17; मरकु 1:11; लूक 9:35ते पवित्र आत्मा कबूतरा चे समान ओचे उपर उतरला, ते हा आकाशवाणी हुली, “तु माया प्यारा पूत छी, मैं दुधे कनु ब़ोहत खौश छै।”

ईशु चा खानदान

(मत्ती 1:1–17)

23जिसे बेले ईशु आप उपदेश करु लाग़ला, तां करीबन त्रीस साल ची उम्र चा हुता, ते लौक सोचते कि ईशु यूसुफ चा पूत छै, ते ओ एली चा। 24ते ओ मत्तात चा, ते ओ लेवी चा, ते ओ मलकी चा, ते ओ यन्‍ना चा, ते ओ यूसुफ चा। 25ते ओ मत्तित्याह चा, ते ओ आमोस चा, ते ओ नहूम चा, ते ओ असल्याह चा, ते ओ नोगह चा। 26ते ओ मात चा, ते ओ मत्तित्याह चा, ते ओ शिमी चा, ते ओ योसेख चा, ते ओ योदाह चा। 27ते ओ यूहन्‍ना चा, ते ओ रेसा चा, ते ओ जरूब्बाबिल चा, ते ओ शलतियेल चा, ते ओ नेरी चा। 28ते ओ मलकी चा, ते ओ अद्दी चा, ते ओ कोसाम चा, ते ओ इलमोदाम चा, ते ओ एर चा। 29ते ओ येशु चा, ते ओ इलाजार चा, ते ओ योरीम चा, ते ओ मत्तात चा, ते ओ लेवी चा। 30ते ओ शमौन चा, ते ओ यहूदा चा, ते ओ यूसुफ चा, ते ओ योनाम चा, ते ओ इल्याकीम चा। 31ते ओ मलेआह चा, ते ओ मिन्‍नाह चा, ते ओ मत्तता चा, ते ओ नातान चा, ते ओ दाऊद चा। 32ते ओ यिशै चा, ते ओ ओबेद चा, ते ओ बोअज चा, ते ओ सलमोन चा, ते ओ नहशोन चा। 33ते ओ अम्मीनादाब चा, ते ओ अदमीन चा ते ओ अरनी चा, ते ओ हिस्रोन चा, ते ओ फिरिस चा, ते ओ यहूदा चा। 34ते ओ याकूब चा, ते ओ इसहाक चा, ते ओ अब्राहम चा, ते ओ तेरह चा, ते ओ नाहोर चा। 35ते ओ सरूग चा, ते ओ रऊ चा, ते ओ फिलिग चा, ते ओ एबिर चा, ते ओ शिलह चा। 36ते ओ कनान चा, ते ओ अरफक्षद चा, ते ओ शेम चा, ओ नूह चा, ते ओलिमिक चा। 37ते ओ मथूशिलह चा, ते ओ हनोक चा, ते ओ यिरिद चा, ते ओ महललेल चा, ते ओ कनान चा। 38ते ओ एनोश चा, ते ओ शेत चा, ते ओ आदम, जको नरीकारा ने आपणे हाथा लारे बणाले हुते।

Obecnie wybrane:

लूका 3: ODR

Podkreślenie

Udostępnij

Kopiuj