लूका 4

ईशु ची परीक्षा

(मत्ती 4:1–11; मरकुस 1:12,13)

1बल्ति ईशु पवित्र आत्मा लारे भरीती कर, यरदन कनु वापिस आला, ते चालीस ङिहां तक पवित्र आत्मा चे सिखावणे लारे बरब्याना मां फिरता रेहला, 2ते उठे चालीस ङिहां तक शैतान ओची परीक्षा करता रेहला। वा ङिहां मां ओणे कोच्छ वी कोनी खाले, ते जब वे ङिहें बीतती चुकली, तां ओनु भोक्‍क लाग़ली।

3ते शैताना ने ओनु केहले, “अगर तु नरीकारा चा पूत छी, तां ऐ पत्थरा नु केह, कि रोटी बणती जाओ।”

4ईशु ने ओनु उत्तर ङिला, “लिखले आले छै, ‘बन्दे सेर्फ रोटी लारे जीते ना रिही।’ ”

5बल्ति शैतान ओनु गेहती गेला ते ओनु पल भर मां सारे जग़त चे राज़ ङिखाणले, 6ते ओनु केहले, “मैं हा सारा अधिकार, ते ऐची शोहरत तनु ङी, कांकि ओ मनु सोंपला गेला ते जानु चाहवे ओनु ङिती ङिये। 7ऐवास्ते अगर तु मनु प्रणाम करी तां ईं सब कोच्छ दुधे हुती जई।”

8ईशु ने ओनु उत्तर ङिला, “पवित्रशास्त्रा मां लिखले पले, ‘तु प्रभु आपणे नरीकारा नु प्रणाम कर, ते सेर्फ ओची ही उपासना कर।’ ”

9तब ओणे ईशु नु यरुशलेम मां जती कर मन्दरा चे कंगूरे उपर खड़े करले ते ओनु केहले, “अगर तु नरीकारा चा पूत छी, तां आपणे आप नु तले ढाती ङे। 10कांकि नरीकारा चे वचना मां लिखले पले,

“ ‘ओ दुधे बारे मां आपणे स्वर्ग़दूता नु आज्ञा ङी,

कि वे दुधी रक्षा करे,’

11ते ‘वे तनु हाथो हाथ चती गिहे,

इसड़े ना हो कि दुधे पग़्ग़ा नु पत्थरा लारे ठेस लाग़ो।’ ”

12ईशु ने ओनु केहले, “ईं वी पवित्रशास्त्रा मां लिखले पले, ‘तु प्रभु आपणे नरीकारा ची परीक्षा ना कर।’ ”

13जिसे बेले शैतान सारी परीक्षा करती चुकला, बल्ति कोच्छ समय चे वास्ते ओकनु चाह्‍ला गेला।

ईशु ने गलील मां काम शुरु करले

(मत्ती 4:12–17; मरकुस 1:14,15)

14बल्ति ईशु पवित्र आत्मा ची सामर्थ लारे परिपूर्ण हुती कर गलील प्रदेस सनु वापिस आला, ते ओची चर्चा आस-पास चे सारे देशा मां फैलती गेली। 15ओह वांचे प्राथनाघरा मां उपदेश करता रेहला, ते सब ओची बढ़ाई करते।

नासरत चे लौका ने ईशु नु कोनी मनले

(मत्ती 13:53–58; मरकुस 6:1–6)

16बल्ति ओ नासरत मां आला, जिठे ओ पाड़ला पोसला गेलता। ते आपणी रीति चे अनुसार सब्त चे ङिओ मां प्राथनाघरा मां जती कर पढ़ने चे वास्ते खड़ा हुला। 17यशायाह भविष्यवक्‍ता ची किताब ओनु ङिली गेली, ते ओणे किताब नु खोलती कर वा जग़हा काढ़ली जिठे लिखले पलते,

18“प्रभु ची आत्मा माये उपर छै, ऐवास्ते ओणे कंगाला नु सुसमाचार सुणावणे वास्ते माया अभिषेक करला, ते मनु ऐवास्ते चुणले कि जको बन्धन मां छी वानु छुटकारे चा ते अन्धा नु सोज़ले मिलणे चा सुसमाचार चा प्रचार करे ते लताड़ले आला नु छुड़ावे। 19ते प्रभु चे खौश रेहणे चे साल चा प्रचार करे।”

20बल्ति ओणे किताब बन्द करती कर सेवक चे हाथा मां ङिती ङिली बल्ति ब़ेसती रेहला ते प्राथनाघरा चे सारे लौका ची नजर ओचे उपर लाग़ली भिलती 21ओणे वानु केहले “आज़ हा लेख तम्चे सुणते हुले पूरा हुला। ”

22सब ने ओनु सराहले, ते जको अनुग्रह चीया बाता ओचे मुँहा कनु निकड़लीया हुतीया, वांचे कनु अचम्भित हुले, ते किहुं लाग़ले, “का हा यूसुफ चा पूत कोनी?”

23ईशु नु वानु केहले, “तम्ही माये उपर हा कहावत जरुर किहा, ‘हे वैद, आपणे आप नु ठीक कर!’ ते ईं वी किहा, ‘जको कहीं अम्ही सुणले छै कि कफरनहूम मां करले गेले, ओनु इठे आपणे देशा मां वी कर।’ ” 24#यूह 4:44ते ओणे केहले “मैं तम्हानु सच्‍च किहे पला, ‘कुई भविष्यवक्‍ता आपणे देशा मां मान-समान ना गे सग़ी।’ ”

25“मैं तम्हानु सच्‍च किहे कि एलिय्याह चे ङिहां मां साढे तीन साला तक मिंही कोनी बरसला ओह बेले सारे देशा मां अकाल हुता, इस्राएल मां घणीया सारीया बांढीया हुतीया। 26नरीकारा ने एलिय्याह नु ओह देशा मां काये वी घरे कोनी भेज़ले, पर सैदा शहरा चे सारफत गांवा मां हेक बांढी सनु भेज़ला। 27बल्ति एलीशा भविष्यवक्‍ता चे समय मां इस्राएल मां घणे सारे कोहड़ी हुते, पर सीरिया मां रेहणे आला सैनापति नामान कोहड़ी नु छोड़ती कर कुई वी ठीक कोनी हुला।”

28हा बात सुणते ही जितने प्राथनाघरा मां हुते। सारे गुस्से लारे भरीती गेले। 29ते उठती कर ओनु शहरा चे ब़ाहर काढ़ती, ते जिसे पहाड़ा उपर वांचा शहर बसला हुता, कि ओनु पहाड़ा ची चोटी कनु धिक्‍का ङिऊं लाग़ले। 30पर ओ वांचे महु निकलती कर चाह्‍ला गेला।

बन्दे मां बुरी आत्मा

(मरकुस 1:21–28)

31ईशु गलील चे तले हेक कफरनहूम शहरा मां गेला ते सब्त चे ङिओ लौका नु उपदेश ङिये पलता। 32#मत्ती 7:28,29वे ओचे उपदेश कनु हैरान हुती गेले, कांकि ओचा वचन अधिकारा समेत हुता। 33वांचे प्राथनाघरा मां हेक इन्सान हुते, जाये मां हेक अशुद्ध आत्मा हुती। ओणे रौल मचाला, 34“हे ईशु नासरी, अम्हानु दुधे लारे का काम ? का तु अम्हानु नाश करु आला? मैं तनु जाणे, तु कूण छी, तु नरीकारा चे पवित्र इन्सान छी!”

35ईशु ने ओनु धमकाती कर केहले, “चोप रेह, ते ओचे महु निकलती जा।” तब दुष्टात्मा ओनु आधे मां ढाती कर बिना नुकसान पुचाले ओचे महु निकलती गेली।

36ऐचे उपर सब नु अचम्भा हुला, ते वे आपस मां बाता करती कर किहुं लाग़ले, “हा किसड़ा वचन छै? कांकि ओ अधिकार ते सामर्थ चे लारे अशुद्ध आत्मा नु आज्ञा ङिये ते वे निकलती जई।” 37यूं करती चारो-तरफ हर जग़ह ओची चर्चा हुं लाग़ली।

ईशु ने नेरा लौका नु ठीक करले

(मत्ती 8:14–17; मरकुस 1:29–34)

38ईशु प्राथनाघरा महु उठती कर शमौन चे घरे गेला। उठे शमौन ची सासवे नु बुखार चढ़ले आले हुते, ते चैला ने विचे वास्ते ईशु कनु बिनती करली। 39ईशु ने विचे गोढु भिले रेहती बुखारा नु दड़काले, ते बुखार उतरती गेले, ते वा तुरन्त उठती कर वांची सेवा-टहल करु लाग़ली।

40सूरज डुब़ते बेले, जाये-जाये इठे लौक हर-प्रकार ची बिमारीया मां पले आले हुते, वे सब वानु ओचे गोढु गेहती आले, ते ओणे हेके-हेके उपर हाथ मेहलती कर वानु ठीक करले। 41ते दुष्टात्मा वी चीकतीया ते हा केहतीया हुलीया कि, “तु नरीकारा चा पूत छी,” घणा महु निकलती गेलीया। पर ईशु वानु धमकाता ते ब़ोलु ना ङिता, कांकि वे जाणतीया कि ओ मसीह छै।

ईशु प्राथनाघरा मां

(मरकुस 1:35–39)

42जब ङिओ हुला तां ओह निकलती कर हेक सुनसान जग़हा मां गेला, ते भीड़ ची भीड़ ओनु सोती हुली ओचे गोढु आली, ते ओनु रोकु लाग़ली कि ओ वांचे गोढु ना जाओ।

43पर ओणे वानु केहले, “मनु नेरे शहरा मां वी नरीकारा चे राज़ चा सुसमाचार सुणावणा जरुरी छै, कांकि मैं ऐवास्ते भेज़ला गेला। ” 44ते ओ गलील प्रदेस चे प्राथनाघरा मां प्रचार करता रेहला।

Obecnie wybrane:

लूका 4: ODR

Podkreślenie

Udostępnij

Kopiuj