Luka 20
20
Yesuna puri angaa misimiya ei
(Madiu 21:23-27; Maka 11:27-33)
1Naare mendana Yesu nipu Gode para alinau puaisimiya andaa anda para piri wenaali repara Godena aunu pange Epe Angele walala pirinyalomare Gode repara alinau puaeme alinuna kalu alinu pange Mosesimi Rudule Angele waloae alinu pange anda rili alinu nimumi ipuma lalore gupi lisimiya. 2Neeme naa la giae, lisimiya. Neere go puriri a para meaepae, lisimiya. Neere go aunu painyayare puriri apimi giapae, lisaya.
3Yesumi nimuna angele yango liada arare gupi lisaya. Neme nimi angaa mea ei menda lora punuae, lisaya. Nimimi ni la gipanda. 4Dionimi Baparaisi au paya puriri a para ipuma peapae. Gode para ipuma pea o ali para ipuma peapae, lisaya.
5Monde alinumi nimuna golere ape lalolo pisimiya. Naamere ake laminyapae, lisimiya. Gode para epea demandare gore naa para lalo akepeanda Dioni Baparaisi para kone na-rulaisimipae, dea, lisimiya.
6Go peapare naame lalore, Wenaalimi puri alameae, demandare go para go pimi wenaalimi naa kaname dimiae, lisimiya. Akepeare nimuri Dioniri ora Godena poropedi ali kone wimi, lisimiya. 7Go einayandare nimumi Yesuna angele yango liada ara lalore gupi lisimiya. Dionina puri epea para naa marea, lisimiya.
8Gupuma Yesumi lalore gupi lisaya. Go einare nimi pange neme go aunu pi eina puri ipula parare mandana na-la gula, lisaya.
Waini e andabao-aisimiya alinuna siapi angele lea ei
(Madiu 21:33-46; Maka 12:1-12)
9Gupuma Yesumi ande wenaali go siapi angele menda la alisaya. Ambaisena ali menda aisayapare nipumi waini kili kope e menda poma kana mulameya alinuna ki nane suma nipu sumba andapu anda minyapalaoma pane pua ao-aisaya. 10Gupuma mo waini kili ralape naarele opolo epaya dinare monde alimi nipuna pupudengi nao-ae ali menda rapaomare monde waini kili kope e wala rapaoma epayande alinu repara nimuna ei meala ara nipuna ei sialimi ei minyayanda rapaisaya, lisaya. Go payapare ande alinumiri wala monde ali luma piri rapaisimiya. Gupuma nimumi ale menda na-alo pisimiya. 11Go pisimiyandare monde waini kili kope e realimi wala ali menda rapaisaya. Gonde ali pange mendaa rupa pumare luma piri suma yala ma-meariri puma alendanu pange menda na-ale rapaisimiya. 12Go au pisimiyandare monde alimi wala ali menda rana repopao rapaisaya. Go au pisayapare monde alinumiri luma yambuma rere rere ma-piraoma mo waini kili kope e para muma rumbisimiya. 13Go au pisimiyandare monde e realimi nipuna gole lalore, Neme ake pulapae, kone wisaya. Neme nina pumi pange na kepele naki gole rapaluae, kone wisaya. Go au puluandare gore nimumi mandana andasiaoma andeleme, kone wisaya.
14Go pisayapare ande alinumi wala monde naki andomare gupi lisimiya. Go ipula aliri go waini kili kope e realina siyale naame lu rumbaminya, lisimiya. Go au pumare go waini kili kope ere naame mininyaminya, lisimiya. 15Go einare monde alinumi ande naki monde e mapu kama nane ma-rumbumare liisimiya. Yesumi lalore gupi lisaya. Wala mo waini kili kope e realimiri mo waini kili kope e andambao-aeme alinu parare ake piliayapae, loma angaa misaya. 16Mo waini kili kope e realimiri ipuma mo alinu epa lu rumbumare alinu mendapare repara epa walo rapalia, lisaya. Gupuma monde wenaalimi go ei pangomare gupi lisimiya. Wala akepa gupinyaya lalepae, lisimiya.
17Go au lomare wala nimu andalore gupi lisaya. Gore wala mo Godena angele wia bukame lala arare gupi lea eiri ake loma leapae, lisaya.
Ande anda eloaeme alinumi pakama kana
kone wisimiyapare ande kanare wala puri pale
kana auda popayae, lea, lisaya.
18Go kana mandaa lopelea aliri singi sanga puma ke pilia. Go au puma go kana menda mandaa lopeleandare gore go ali nipuri danga su pambelea, lisaya.
Sisa para dakisi muni alomonoyapae, lo Yesu para lora pisimiya ei
(Madiu 22:15-22; Maka 12:13-17)
19Go einu lisayandare ande Mosesimi Rudule Angele waloaisimiyande alinumi pange ande Gode repara alinau puaeme alinuna andaa alinumi Yesu go siapi angele lala-ainyaloma Yesu seseka doameyanda andaisimiya. Akepeare nimumi kone siameyapare nipumi lisaya siapi angelere nimu repara la kone siala ara pisimiya. Go au puluameya pisimiyapare nimumi mo lena aisimiya wenaalinu paalame komisimiya.
20Go einayandare nimumi pora menda walisimiya. Go einayandare nimumi ali mendapare kamboma go alinumi Yesu repara ora epe kuma pi angelenu da kone winya angaa mipi pinyaya rapaisimiya. Go pulameyanda pimi kone winyayapare nimuna kone ruparare go angaa mipi pilimi einumi payapo makirada ara Yesuna ki kinyalu kondo luma mo Romo gapamani alina ki nane koso laoma linyaya alo mone doameyanda pisimiya. Go kambisimiya alinumi Yesu para go lisimiya.
21Waloale alio, lisimiya. Naame kone wimapare neeme loale angelenu pange neeme waloale angelenu raayosi ora loaleae, lisimiya. Neeme wenaali andolameyare nimuna kama nane aunumi na-andoalepare neemere Godena rana pea einu alimi pinya kone suale eina waloaleae, lisimiya. 22Naana Mosesimi Rudule Angelemere Romo anda andere pia ali repara dakisi muni na-adapape, leapae, loma angaa misimiya.
23Go lisimiyapare Yesumi nipuna ki kinyalu kondo duameya lisimiya angele ambala kone suma lalore gupi lisaya. 24Nimimi ni dakisi muni menda wadapae, lisaya. Gupuma go lisaya. Go muni mandaare bi pange lee angaare apina ei rungulu wiapae, lisaya. Go lisayandare mo wenaalimi lalore, Sisare, Romo andasu pange ree nane wia andasu raayo andere pia alina kalu rungulu wiae, lisimiya.
25Go lisimiyandare Yesumi lalore gupi lisaya. Gore go au piliandare gore apo Romo andasu andere pia alina ei alo moneala ara Gode nipuna einu dea ei adapape, lisaya.
26Go einayandare mo wenaalina lee rona nipu ma-lopape rupa marisayandare monde alinumi angelenu pange na-le lee opoma pirisimiya.
Komoma wala reke eina Yesu lora pisimiya ei
(Madiu 22:23-33; Maka 12:18-27)
27Gupumare wenaalinu komoma wala na-rekeleme loaeme Sadusi alinu ipuma lalore Yesu para gupi lisimiya. 28Waloale Alio, lisimiya. Mosesimiri naa go Rudule Angele wape paisaya, lisimiya. Ali menda nipu wena lamu mayapare nipumi nongo nakinu menda na-mandi komeleandare gore nipuna ameme mandana go wena waisame nongo nakinu mandiainyayanda lamu miliae, lisaya. Go eina niipu laapome nongo nakinu menda mandipindare monde komande alina nongo nakinu maindalipiae, lisaya. 29Gupuma monde alinumi Yesu para go ramani menda la alisimiya. Ambaisena mendane ki pereyoma mendane kina laapopao amealu aisimiya. Go au pisimiyapare ririna ali nipu wena lamisayapare nongo nakinu menda na-mandu wi komisaya. 30Go pisayandare werepe nane nipuna kou para ameme monde waisa wena lamisaya. 31Go pisayapare go ali nipu pange komisayandare wala go nipuna kou para ameme lamisaya. Go pisayapare gonde ali pange mendaa au pisaya. Monde warapu amealu raayosi mendaa rupa komo piraoma nongo nakinu pange na-mandu wisimiya. 32Gupuma pereyadore monde wena nipu komisaya. 33Go au pumare mo komame wenaalinu rekeleme naarenare go wena nipuri apina wena deapae, lisimiya. Akepeare mo warapu alinu raayosimi mo wena lamisimiyale.
34-35Yesumi nimuna angele yango liada arare gupi lisaya. Ambia go suna aeme wenaalimi komea repaaya alolo puaemepare Godeme lalo wenaali mandana komoma wala rekalore nimu ana pea kone wilia wenaaliri werepe nane epelea naarenare pa ari pualimi wenaaliri mandana repaayalo na-alimi, lisaya.
36Nimuri eindiolonu mandana aomare komape-na-ya. Akepeandare nimuri komoma rekamendare Godena nakinu alimi. 37Go einayandare Mosesimi komaleme wenaali wala rekeleme lore penameyalo walea. Ande Godena angele wia buka rungulu wia ei mendame lalore, Mosesi nipu mo repanasi ralae para puma pua Reali repara angele doameyare Mosesimi gupi lisaya. Gode neere Eparame nipuna Gode pange Aisakena Gode pange Dieikopona Gode, lisaya. 38Gode nipuri na-kome pa ao-aeme wenaalina Gode aya. Komeme wenaalina Gode diama. Akepeare nipu reparare wenaali raayo pa ao-aeme, lisaya.
39Monde Mosesimi Rudule Angele waloaisimiyande ali mendapareme angele lala arare gupi lisimiya. Waloale Alio, neemere ora epe yangi liadeae, lisimiya. 40Akepeare nimumi manda angaa mea einu wala menda lapere ana na-pisaya.
Keriso apiyapae, loma Yesumi lora pisaya ei
(Madiu 22:41-46; Maka 12:35-37)
41Yesumi nimu angaa meala ara lalore, gupi lisaya. Wenaalimi Kerisore Deipidina anda repaa naki piri akipu lemepae, lisaya. 42-43Yesumi lala ara lalore, Akepeare Deipidi nipuna gole Godena Yainya pange Yaisa Bukanare gupi lea.
Reali Godeme nina Reali parare gupi lea,
Neere nina popeke ki nane pira lea.
Go au pumare werepenare nena yanda runguli
alinuri nena rolo para ma-piralua lea.
44Deipidimi nipu para lalore, Realio, lisaya. Ande Keriso nipuri Deipidina repaame mandu rangala palia dame eiri akepuma damepae, lisaya.
Yesumi Mosesimi Rudule Angele waloaeme alinu waru andere-alepape, loma angele lee ei
(Madiu 23:1-36; Maka 12:38-40)
45Gupuma mo wenaalimi Yesuna angele pangala pirinyalomare Yesumi nipuna kou nane raluaisimiya alinu parare gupi lisaya. 46Go Mosesimi Rudule Angele waloaeme alinuna au waru andere-alepape, lisaya. Andalu akanu pambaomare mo makedina eini ara wenaalinumi nimu para andasiaoma ki wange pinyaya pamuaeme, lisaya. Nimumi mo Isaraelimi mandu rangala pae wenaalinuna Godena angele kuruaeme andanu repara epe seana eini andena rupa ririna piduameya kone wimi, lisaya. Enda pambaleme paranu pange amo alinumi pimi rupa na bi winyaloma wenaalinumi andena rupa sopopare seana pongola siao piduame kone waru suaeme, lisaya. 47Go au puaeme pange waisa wenanuna andanu pange pake noaeme, lisaya. Gupuma nimumi peme einu wenaalimi andapanayare yayapi rupa yainya pu andalu pao-aeme, lisaya. Go au puaemenda mo alinumi nimuna koae ei yangore waru andaai menda milimi, lisaya.
Obecnie wybrane:
Luka 20: POLENT23
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
