Luka 21
21
Waisa wename Gode repara muni alisaya ei
(Maka 12:41-44)
1Yesumi mo Gode repara alinau puaisimiya andaa anda para ara andisayapare mo para siaisimiya muni bokosina amo alinumi Gode repara kana adandi puaisimiya ei andisaya. 2Gupuma alenda menda diale narali pirisaya waisa wena ipumare weepi muni laapo peni komea manda ma-ipuma epa lopaisaya. 3Go ei andomare Yesumi gupi lisaya. Neme nimi para la gialo, lisaya. Go narali pi waisa wenasimi nimu raayo lu angulaoma nipumi andapu wi da, lisaya.
4Mo wenaali raayome nimuna muni andapu purupima purupili wi einu ma-loparimi, lisaya. Go pamepare monde waisa wename nipuri narali wena arale, nipuna siambaya ei raayo ma-loparipa, lisaya. Nipuna enda kambape eiri ma-loparipa, lisaya.
Gode repara alinau puaeme andaa anda ma-koyalimi, lo Yesumi lisaya ei angele lee ei
(Madiu 24:1-2; Maka 13:1-2)
5Yesuna kou nane raluaisimiya alinu mendapareme nimuna nimunale mo Gode repara alinau puaeme andaa anda andala ara lalore, Epepe kananu ralopu muma waremele andalepae, lisimiya. Gupumare Gode repara pakama wenaalimi ala moneala puaisimiya leenu pange ando pisimiya. Yesumi nimuna angele yango liada ara lalore gupi lisaya. 6Nimimi go alenu raayosi andalemepae, lisaya. Werepe nane naarele menda epeleandare ambia go andaleme kananuri komeasinu pange menda wandupao pa na-aliae, lisaya. Go anda waria kananu raayosi mu rumbembe pilimiae, lisaya.
Yesumi lalore, kendapi au ora epelea lisaya ei
(Madiu 24:3-14; Maka 13:3-13)
7Yesuna kou nane raluaisimiya alinumi lalore gupi lisimiya. Waloale Alio, lisimiya. Go einuri andepele piliayapae, lisimiya. Ande au pulu pea naare epae lo wada pea rupare naame ale ambala andelemayapae, lisimiya.
8Yesumi nimuna angele yango liada ara lalore gupi lisaya. Lee opoma waru andere-alepapeae, lisaya. Ali andapumi na bina ipulu ara lalore, Niri Yesu lalo, lomare ande naarere ambiare apo ipulandae, da, pemepare na-raluma pulupapeae, lisaya. 9Nimimi anda repaa mendame anda repaa menda rapu yanda pimi pinda deme einda pangelemenda pange mendaa repaa nimuna gole yanda pu pimi deme einu pango pu pilimindare nimimi paalame na-komalepape. Go einuri ambala pulu peapare su yaa pereda pea eiri ambe na-epeleale, lisaya.
10Gupuma nipumi angele la eiri puma gupi lisaya. Anda ruru mendame anda ruru menda rapu yanda pu pala pilia, lo pisaya. 11Gupuma sumisumi ora waru andaai epelea pange rea gipa andaai ipupu pange yainya gipa pange ipupu pilia pange so yaa nane aoma au menda paala pia alenu ipupu pilia, lisaya. 12Go einu ambe na-pi ainyalomare ririnare nee ambala sesekalomare nee one mone rendaa rendaanu ambala ma-naomare mo Godena angele kuruaeme andanu para karu puma nee kodanu laoma nee dipula anda paranu muma lopalimi. Gupuma ni mana nimi alimi gapamani alinu pange kini alinuna lee rona yolo ria epala pilimi, lisaya. 13Go aunu pilimindare gore neeme ande Epe Angele lainyayanda nee pora menda go piademenda, lisaya. 14Koda na-epe-ainyaloma nimimi da peme angelenuna kone ambe na-ma-ririyadalepape, lisaya. 15Akepeare nimimi da peme angelenuri neme nimina kone para epena doa pange neme nimi ora epe konenu rekele pu ma-sialua, lisaya. Gupuma neme go la gula angelenuri nimina yanda runguli alinumi pange manda na-yokeleme pange mandana na-rambua rambua pilimi, lisaya. 16Nimi nimina ama apanumi pange nimina amenumi pange nimina anda repaanumi pange nimina andami alinumi pange mo nimina yanda runguli alinuna ki nane masu monedemendare nimi mendaparere luma ma-komalimi, lisaya. 17Wenaali ambuname nimi ni mana aemendare nimi yanda dimi.
18Go peapare mendame nimina kalu irisinu pange menda na-waralimi, lisaya. 19Irulaoma ara alimindare nimimi nimina endo-aya ei milimi, lisaya.
Yesumi Diurusaleme ree anda ma-koyala peme eina angele lisaya ei
(Madiu 24:15-21; Maka 13:14-19)
20Gupuma Yesumi angele pa la pulu ara gupi lisaya. Nimimi Diurusaleme ree anda para endali ripinyi alinuminda epa kuda pilimindare gore nimimi kone kone sialore repara go anda ma-koyalimi, kone wilimiae, lisaya. 21Go aunu piliandare gore mo Diudia andasu nane alia repaare so kana ree naini pongola pena, lisaya. Gupuma mo anda repara alimindare nimu pange minyapalao pinya. Gupuma kama alimindare wala go anda para na-pua konda pamboma pena, lisaya. 22Akepeare go aunu raayo ande Godena angele wia bukame lea rupa ora minyayanda go epelea naarere Godeme nipu repara rendaa rendaa puaeme wenaali repara yangi mula pea naarenu, lisaya. 23Naki do romba pidimi wenanu pange andu nala piri nakinuna anginu nimumi ora koae yandanu pange ando pilimi, lisaya. Gupuma paala pili aunu raayosi go suna epelea pange Godeme nipuna rendaa ada einu pange go wenaali repara popelea, lisaya. 24Mendapare wenaaliri raimi luma mendapare wenaaliri sesekaloma anda yayasi muma peleme. Gupuma parere Isaraelimi na-mandu rangala pae wenaalinumi Diurusaleme ree anda epa rambuaoma nimuna naarele peredeanda peredea, lisaya.
Alina Si Naki epola pea eina angele lea ei
(Madiu 24:29-31; Maka 13:24-27)
25Yesumi angele pa la eiri pulu ara gupi lisaya. Na-pi aunu so naare para pange so sumba para pange so kumba para pange pu pilia, lisaya. Gupuma wenaalimi dawalaimi dea ipa ome pange go ipana momalu andaaipe andoma su kuni alenda para pange wenaali raayo pu kole wenaali pamboalimi. 26Gupuma so yaa paranu alia kumba danganu pange rando lopa lopa piliandare wenaalinumi andoma werepe pula pea auna maisambo piri paalame waru komoma pururumi komeleme, lisaya. 27Go au pilia naarenare Alina Si nipu paa pi puri pale ei rapu pange nipuna puri rapu koana epelea, lisaya. 28Go aunu kini pu piliandare rekoma nimina kalunu minyasiaoma ara rana komalepape. Akepeare rambami eiri repara ipulale, lisaya.
Anga repaname wada aunu
(Madiu 24:32-35; Maka 13:28-31)
29Gupuma Yesumi nimu para go siapi angele menda la alisaya. Anga repana pange pa repananu kone sialepapeae, lisaya. 30Nimimi anga maanu siala aliandare gore nimimi lalore, Ropapi yai ipuma pani pulameya pia demeae, lisaya. 31Go einu andaleme rupa mo paala pi aununda piliandare Godena Ki Rambuao-aya Ei pange repara epelea kone wilimi, lisaya.
32Go aunu raayo ambia go aeme wenaalinu raayosi na-kome pa ainya mendapare pa ainyaloma pilia, lisaya. 33Su yaa laapore pereda peapare na angele komea mandana na-peredea, lisaya.
Waru andere-ape eina angele lea ei
34Yesumi lalore gupi lisaya. Nimi waru andere-alepape, lisaya. Nimimi enda pange ipa pange suna aunu naini nimi kone andaai suma ao-aliminyaloma go Naareme nimi rungulu mealo pamboaliminya konana nimi raleme rupa mandana na-ralepape, lisaya.
35Akepeare go auri wenaali go suna aeme repaa raayo para mendaa aunu pilia, lisaya. 36Naare raayosi waru andere-alepape, lisaya. Go aunu pulu-ainyalomayapare pa lombae puma Alina Sina lee rona pua aliminyaya yainya waru pualepape, lisaya.
37Yesumi gonde naarenuna einiri mo Gode repara alinau puaeme andaa anda para angele walala pumare gaepame nanere mo Olipi su wili para pua paliala pisaya. 38Palumusi yalosiri monde wenaalimi Yesu nipumi lisaya angelenu pangolameya pua mo Gode repara alinau puaisimiya andaa anda para pua pirala pisimiya.
Obecnie wybrane:
Luka 21: POLENT23
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
