Luka 19
19
Yesu para Sakiasi niipu laapona angele lee ei
1Go aunu pumare Yesu no Dieriko ree anda para konda pamboma puluaisaya. 2Go para dakisi muni muaisimiya alinuna andaa ali menda nipuna bi Sakiasi lee ali menda aisaya. Nipuri ora amo ali aisaya. 3Nipumi mo Yesu loaisimiya ali andolameya paisayapare nipu onge alisiyala ara mo wenaali mombea aisimiya eimi mandana andape-na-lisaya. 4Go pisaya eimiri nipu ambala alo puma repana menda pua rumuma piri Yesu go ei ma-wanduaoma popelea lena andola kone wisaya. 5Yesu go alena ipuma Sakiasi so repanana piruaisaya ei andoma nipu para lalore gupi lisaya. Sakiasi nee ambe kolopenya, lisaya. Akepeare ni nena anda para ambia aluae, lisaya.
6Sakiasi nipu rana komea kolopema raname komala ara lalore, Epeleae, lisaya. 7Go ei pangomare monde aisimiya wenaalimiri rono pangala ara lalore gupi lisimiya. Go aliri ande wenaalimi raname na-komoaeme alina anda para kimisu pulae, lisimiya.
8Sakiasi rekoma ara Reali para lalore gupi lisaya. Realio, pangae, lisaya. Neme na olemole runa rumaoma mendanere mo narali wenaali repara adoae, lisaya. Gupuma neme wenaalinda makiraoma pakenda nolandare gore neme rana malapupao wanduaoma alala pulae, lisaya.
9Go lisayandare Yesumi gupi lisaya. Ambiare Godeme go anda repaasi go rambamidandae, lisaya. Akepeare go ali nipu pange Eparame nipumi mandu rangala pae ali ayae, lisaya. 10Alina Siri alu pae wenaali andasuma rambamulameya epae, lisaya.
Golo munina siapi angele lee ei
(Madiu 25:14-30)
11Monde wenaalimi go angele pa pangala pirinyalomare Yesu nipumi wala siapi angele menda la ala pisaya. Nipu ambiare Diurusaleme ree anda para pua aripayandare ande wenaalinu nimuna konemere Godena Ki Rambuao-aya Eiri repara epolameya pia, kone wisimiya. 12Go eina Yesumi go lisaya. Ambaisena kalu ali menda andasu papare wala epolameyanda nipu kini ali ma-pirainyayandare paisaya. 13Nipu polameya arare nipuna pupudengi nao-aeme alinu raayosi ki laapo ora wi lama nimu raayo golo muni komea komealo alisaya. Ni pola nane go gialo kaname pupudengi nena dapapeae, lisaya. 14Monde ali penalomare nipuna anda alinumi nipu yanda liala ara wala angele rapada ara lalore gupi lisimiya. Naare go aliri naana kini ali na-pirinyayanda pimae, lisimiya.
15Ande andaa ali nipuri kini ma-piraisimiyandare wala nipu anda wala ipisaya. Anda ipumare rana komea lalore, Nipuna pupudengi nao-arimiyande alinu ipulupa, lama monde aloma paisayande kaname kondo paya ei menda milimiya andolameya wi lisaya. 16Ririna ali ipuma lalore, gupi lisaya. Anda alio, lisaya. Neeme ni gia puaende ei komeamere neme ki laapo golo muni andasiawae, lisaya. 17Go lisayandare monde andaa alimi gupi lisaya. Ora peleae, lisaya. Neere ora epe pupudengi nao-ale ali aleae, lisaya. Neeme go onge alesinu epe rupa andere-ao-alendare gore nee wala ree anda ki laapo andere-ainyayanda gulae, lisaya.
18Gupuma laapopao pupudengi noae ali ipuma lalore gupi lisaya. Andaa alio. Neeme ni gia puaende golo kana komeamere neme waponapao mendane kipu andasu meawae, lisaya. 19Go ali parare monde andaa alimi lalore gupi lisaya. Neemere ree anda mendane kipu andere-ainyae, lisaya. 20Monde nipuna pupudengi nao-aya ali menda opolo ipula ara lalore gupi lisaya. Andaa alio, lisaya. Nena golo muni ande gia puaende rupa gondae, lisaya. Neme aka rungulisina koraoma pangasiawae, lisaya. 21Nee rendaa waru pelendare neme nee paalame komawae, lisaya. Akepeare neemere nena alenu diaya leenu pange pa mualenda pange neeme na-pole wai alenu pange neeme pa meala puma noalenda pae, lisaya. 22Monde andaa alimiri wala gupi lisaya. Neere koae rupa pupudengi noale ali, lisaya. Nena lale angeleme gole nee go kondo lialenda, lisaya. Nena gole ambala apo andelenda, lisaya. Niri rendaa waru puma nai dia de alenu pange pa muma pange neme wai alenu na-pola leenu pange pa me eiri pamuala pea eiri ambala apo andelenda, lisaya. 23Go einare na muniri mo bange para na-wi auri akepea paepae, lisaya. Go au pulu paeyalore gore ni wala lekeya epola pawayalore mandana waponapaonu pange mandana mula pawa, lisaya. 24Gupuma nipumi mo para aisimiya wenaali para gupi lisaya. Go alimi go siambaya golo kana pane muma mo ki laapo kana kili andasuma mea pupudengi noae ali muma ma-adapae, lisaya. 25Go lisayapare monde alinumiri go lisimiya. Andaa alio, nipuri ki laapopao ambala mo siambayandae, lisimiya.
26Go eina neme nimi para la gialo. Wenaali apiminda olemole komenda siambalimindare gore nipumi ora andapupe waru milia. Go peapare mendame ale menda na-siambaliandare onge alesinu pange nipumi siambali alere ora pane mu palia, lisaya. 27Go einare mo na yanda runguli alinu ni nimuna kini ali na-pirano kone siamende alinu raayo muma ipuma na lee rona epa diapae, lisaya.
Yesu kini ali mandana Diurusaleme ree anda para kondo pambisaya ei
(Madiu 21:1-11; Maka 11:1-11; Dioni 12:12-19)
28Yesumi go angelenu lomare nipu ambala ririna mo wenaali ma-werepeyaoma mo Diurusaleme ree anda para nipu ambala paisaya. 29-30Gupuma nipu so Olipi kana repara ae anda laapo Bedapasi pange Bedani repara pua arare mana angelenu la lomare nipuna kou nane raluaisipiya ali laapo ambala ririna rapaisaya. Gupi lomare go lisaya. Go pulupi ei ongepusi pumare onge andasi menda apo alia, lisaya. Gupumare dongi menana si mendalimi pange ambe na-pira pamuaya ei apo andimba aliale koyo muma gone ma-ipulupape, lisaya. 31Go pilipinda mendame niipi lora piliandare gore niipimi lalore, Realimi pua mipa landa pipae, dapape, lisaya.
32Gupuma monde nipuna kou nane raluaisipiya ali laapo puma pua andapeyapare ande Yesumi lande rupa ora pua andisipiya. 33Monde dongi menana si koyo meala-ainyalomare mo menana realinumi lalore, Akepea koya midapepae, lameyapare monde ali laapome lalore gupi lisipiya.
34-35Realimi pua mealepae, landa pipae, lisipiya. Go lomare ande dongi menana siri Yesu repara ma pumare nipuna mandaa aka koyomare mo mena mandaa sumare Yesu mo menana kouna pirinyayandare niipu laapome rambamisipiya. 36Gupumare Yesumi mo menana kou mandaa pirapale pulu-ainyalomare mo wenaalimiri nimuna mandaa akanu koyo mumare mo Yesu nipu pola paya porana koyoma wisimiya.
37Gupuma nipu mo Diurusaleme ree anda para opolo polameya no Olipi kana ree nane sunyae porana kolopepa pulu-ainyalomare mo nipuna kou nane raluma puaisimiya wenaalinu andapumi Gode repara ranae angele lomare Godena bi minyasiaomare andapu poya pa la puaisimiya. Akepeare nipumi pisaya einu au menda menda pi einu ora andapupe andisimiya.
38Go wenaalimiri go au loaisimiya.
Godena bina epelea aliri Godeme ora epe aunu
andapu walena, lisimiya.
Godeme wenaali repara yanda ma-paliaya eina
ranae angele pange Gode reparare epe
paa pi puri winyae, lisimiya.
39Go lisimiyanda go wenaali angalapuna aisimiya Parisi alinumi lalore go lisimiya. Waloale alio. Neeme nena kou nane raluaeme alinu para angele na-dapape, lae, lisimiya.
40Yesumi nimuna angele yango liada ara lalore gupi lisaya. Neme nimi para la gialo. Nimumi angele na-demendare gore go kananumi nimuna golere elala ara poya andaai loalimi, lisaya.
Yesumi Diurusaleme ree andana ree lisaya ei
41Gupuma Yesu nipu mo Diurusaleme ree anda repara opolo polameya pala-ainyalomare mo anda andomare nipumi yarame komala ara ree lalo arare gupi lisaya. 42Neeme kuma pi ei epenayanda pi ei ambia kone sula paeyalore epeda pae, lisaya. Go peapare ambiare neeme mandana na-andeleae, lisaya.
43Naare mendana nena yanda runguli alinu ipuma nee epa para ponyaoma pidimiae, lisaya. Gupuma nee mendane mendane para ponyaoma nee opalumba popere ora ana na-piliae, lisaya. 44Nimumi nee pange nena reere palia pimi wenaalinu raayo ora lu ma-pereyalimi, lisaya. Gupuma kana menda nipuna wia rupa pa na-wilia. Akepeare neemere Godeme nee rambamulameya epea naarelere penameyao na-andisi, lisaya.
Yesu Gode para alinau puae andaa anda para paisaya ei
(Madiu 21:12-17; Maka 11:15-19; Dioni 2:13-22)
45Gupuma Yesu nipu mo Gode repara alinau puaisimiya andaa anda para pua konda pamboma enda olemolenu rapao-aeme alinumi enda go alenu rapada pirinya ralu liisaya. 46Gupuma nipumi gupi lisaya. Godena angele wia bukame wape pea eina Godeme lalore gupi lea, lisaya.
Na alinau puae andare yainya puae anda demeae,
lea, lisaya.
Go peapare nimimiri wala pake noae alinuna anda
mandana ma-lekeyoma wi dame, lisaya.
47Yesumi go Gode repara alinau puaisimiya andaa anda para naare raayosi angele waloaisaya. Go puaripayapare Gode repara alinau puaisimiya alinuna kalu alinumi pange Mosesimi Rudule Angelenu waloaisimiya alinu pange anda rili alinu andapumi nipu duameyanda rapao-aisimiya. 48Go au pulameya pisimiyapare nimumi go au pape pora menda na-andisimiya. Akepeare monde wenaalimi Yesumi lisaya angele pangolameya waru andaisimiya. Akepeare nimumi kupusinu pange menda minya rapapeya pisimiya.
Obecnie wybrane:
Luka 19: POLENT23
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
