Luka 18
18
Waisa wena para angele rumada ali lapo niipu laapona siapi angele lee ei
1Gupuma Yesumi nipuna kou nane raluaisimiya alinu siapi angele menda waloma nimu naare raayosi yainya waru puma pange nimuna punu kana ma-yaruae angelenu la alisaya. 2Ree anda menda para angele rumao-aya ali menda aisaya. Go ali nipumiri Gode pange paalame na-komea pange alinuri na-andasiaoma andisaya. 3Go ali nipu aisaya mendaa ree anda para waisa wena menda piru pisaya. Go wename mo angele rumao-ae ali para epala puala pulu ara kongeyala ara lalore gupi lisaya. Neeme ni rapu yanda dia ali rambameapeae, lisaya. 4-5Monde angele rumao-aya alimi na-pangayapare mone gisina nipuna gole lala arare gupi laya. Niri Gode pange paalame na-komo pange aliri na-andasiaoma andoayopare go waisa wenasimi wala kama epala puala pulu ara ni para rendaa andaai gidandare neme nipuna lora pia angele ora pinyadoa, kone wisaya. Neme go au na-puluandare nipumi wala kama epala puma ni pupudengi waru ma-nalia, kone wisaya.
6Gupuma ande Realimi lalore gupi lisaya. Monde makirara puma angele rali puaya alimi laya ei pangalepae, lisaya. 7-8Godemere nipu repara ree lalo paliala puaeme nipuna wenaalina einu rali paluameyare nipuna wenaalina ranana pada ara rana komea palia, lisaya. Neme nimi para la gialo. Alina Si nipu go suna wala epeleandare wenaalimi kone rulalimi eiri epa andeleapae, lisaya.
Parisi ali pange dakisi muni muaya ali niipu laapona siapi angele lee ei
9Wenaalinumi nimuri epe rupa aema kone suma pa wenaaliri andainyoma andoaeme repaa reparare Yesumi go siapi angele menda laripaya. 10Ambaisena ali laapo mo Gode repara alinau puaisimiya andaa anda para yainya pulu paisipiya. Ali menda nipuri dakisi muni muae ali. Ali menda nipuri Parisi ali.
11Ande Parisi ali nipu ongepusi wenaali arimiya para na-ae, papare ara gurupa yainya pisaya. Godeo, neme wenaali ambuname puaeme rupa ni ni lo panda lia lia na-puayo pange yayapi angelenu na-lo pange ni wena akopunu na-rungulu pu pe eina nee repara ranae angele laloae, lisaya. Ni mango dakisi muni muaya ali mandana na-ayondare nee repara ranae angele laloae, lisaya. 12Neme warapu naare komeana ruparare yapi laapome nee repara yainya puluameya enda na-nala puayo pange neme nina me kanare ki laapo meala pumare komeare nee giala puayoae, lisaya.
13Go lisayapare ande dakisi muni muaisaya ali nipuri nipuna kunuma papare ara so yaa nane pange na-andasioma nipuna kalu andainyoma yalame komala ara lalore gupi lisaya. Godeo, niri koae aunu puae alimi lalole ni yarame komae, lisaya. 14Go einayandare Yesumi lalore, Neme nimi para la gialo, lisaya. Niipu laapo anda puapeyandare Godeme kone sialore, Ande Parisi ali nipuri ni rapu epe ali diayapare monde dakisi muni muaisaya ali nipuri ni rapu aya auri ma-rendepoyaripaya, kone wisaya. Akepeare menda ali apimi nipu andaa ali ma-aulaliandare Gode nipumi nipuna kalu andainyaoma ma-pamualia pange menda ali apimi nipu kalu andainyao pamiliandare, Godeme nipu andaa ali ma-alia, lisaya.
Yesu pange onge nongo nakisinu nimuna angele lee ei
(Madiu 19:13-15; Maka 10:13-16)
15Yesumi nipuna ki mandaa winyayandare mendapare wenaalinumi nimuna nongo nakisinu Yesu repara karu muma ma-ipisimiya. Go ei andomare nipuna kou nane raluaisimiya alinumi mo wenaali waru andolisimiya. 16Go pisimiyapare Yesumi mo nongo nakisinu nipu repara epenaya wi lomare gupi lisaya. Go nongo nakisinu ni repara epena na-rudu dapape, lisaya. Akepeare Godena Ki Rambuao-aya Eiri gurupa repaana ei, lisaya. 17Neme ora angele la gialo, lisaya. Go nongo nakisinumi pimi rupa ali mendame Godena angele raayo na-miliandare Godena Ki Rambuao-aya Ei para na-konda pambeleme, lisaya.
Amo ali Yesu para ipisaya ei
(Madiu 19:16-30; Maka 10:17-31)
18Isaraelimi mandu rangala pae kalu ali mendame Yesu para angaa meala arare gupi lisaya. Epe rupa Waloale Alio, neme endoaya ei mulameyandare neme ake pulayapae, lisaya.
19Go angele lisayandare Yesumi gupi lisaya. Niri Epe Ali piri akepea lalepae, lisaya. Mendalinda epe rupa na-ayapare Gode nipu komea koma epe rupa ayae, lisaya. 20Godena Rudule Angelenuri neere kone wilinde, lisaya. Ali pe wena pake na-nape. Wena lami ali rapu pake na-nape. Ali menda ora komena rupa na-liape pange pake na-nape pange yango na-pi na-laopape pange nena ama pange nena apa laapo raname waru komape lea lisaya.
21Monde alimi Yesuna angele yango liada arare gupi lisaya. Ni onge nakisi ari ipuma go mana angelenu raayosi panga eiri ipuma komenda na-runguliae, lisaya.
22Yesumi go lisaya ei pangomare nipumi wala mo ali para go lisaya. Au menda neeme pula pele ei menda pa wia, lisaya. Nena olemole raayosi rapaomare kana mumare mo narali wenaali para alomare gurupa ni raluma epape. Gupumare nena amo alenuri so Godena Aya Lena meainya, lisaya. 23Go lisayapare ande alimi nipuri ora amo ali aisaya eimi go angele pangomare nipu pu kendame komisaya.
24Yesumi go ali nipumi pu kendame komisaya ei andomare gupi lisaya. Amo wenaalinumi Godena Ki Rambuao-aya Ei rupara konda pambadore rendaa waru peae, lisaya. 25Gamelo mename nira pondea para puluri rendaa pilia. Go peapare amo alimi Godena Ki Rambuao-aya Ei para puluri ora rendaa andaai pea, lisaya.
26Mo wenaali Yesu nipumi lisaya ei pangisimiya wenaalimiri angaa meala arare gupi lisimiya. Gupiliandare gore wenaali apirapome endoaya ei milimiyapae, lisimiya.
27Yesumi nimumi lisimiya angele pangomare gupi lisaya. Wenaalinumi pape-na-ya auri Godemere mandana pilia, lisaya.
28Gupuma Pidamere gupi lisaya. Andae, lisaya. Naamere naana andanu pange gioma nee raluma epamae, lisaya.
29-30Yesumi lalore, Neme nimi para ora angele lalo, lisaya. Menda apimi Godena Ki Rambuao-aya Eiyalo nipuna anda pange nipuna wena pange nipuna amenu pange nipuna ara anginu pange nipuna nongo nakinu pange minyapalao piliandare ambia go naarena minyapaloma ipula leenu raayo wanduaoma milia, lisaya. Gupuma werepe nane epelea pa ari pope naarena nipumi endoaya ei milia, lisaya.
Yesumi nipuna komola pea eina angele rana repo wala lisaya ei
(Madiu 20:17-19; Maka 10:32-34)
31Yesumi nipuna ki laapo pereyoma angena laapopu alinu para kundiripu lala ara lalore gupi lisaya. Pangalapae. Naame Diurusaleme ree anda nane puma ande Godena poropedi alinumi Alina Simi pula pea einu wape pisimiyande einu pula pea rupa ora pilia, lisaya.
32Gupuma Alina Si nipuri Isaraelimi na-mandu rangala pae wenaalina ki nane ala monedemeae, lisaya. Go wenaalimiri manda manda meao pange giri lala pu pange supi mo pu pilimi, lisaya. 33Nipu podeyao puma luma ma-komala pemepare wala yapi repomere nipu wala rekelea, lisaya.
34Go lisayapare monde nipuna kou nane raluaisimiya alinumi nipumi lisaya angelenuna reenuri ora komeasinu pange komenda na-pangisimiya. Akepeare go lisaya angelenuna reenu raayosiri nimumi ora mandana na-la siapeya, pange nimumi Yesuna angele kone na-wisimiya.
Yesumi lee rumbu pi ali olemole kongeyoaisaya ali ma-epeaisaya ei
(Madiu 20:29-34; Maka 10:46-52)
35Yesu no Dieriko ree anda para polameya pulu-ainyaloma porana piri lee rumbu pi ali mendame olemole kongeyala pirisaya. 36Nipumi piri wenaalinu popisimiya ei pangoma nimu angaa meala ara lalore, Gore aleyapae, lisaya.
37Go lisayandare mo wenaalimi lalore gupi lisimiya. Yesu Nasarere ali pupulae, lisimiya.
38Go lisimiya ei pangomare nipumi andapu wi lalo arare gupi lisaya. Yesu Deipidina Nakio, neeme ni para yarame komala ara rambameae, lisaya.
39Monde ririna aisimiya wenalimi nipu andoloma angele na-lape lisimiyapare monde alimi andapu wala lala ara lalore gupi lisaya. Deipidina Nakio, neeme ni para yarame komala ara rambameae, lisaya.
40Go lisaya ei pangomare Yesumi pora pua yoloma ara mo ali nipu repara karu ma-epainyaya, angele lisaya. Go einare Yesumi mo ali repara ma-ipisimiyandare gupi lisaya. 41Nena ranare neme nee ake panoyapae, lisaya. Mo alimi lalore wala gupi lisaya. Realio, lisaya. Ni olemole wala andolameya laloae, lisaya.
42Go lisayandare Yesumi lalore gupi lisaya. Gore neeme olemole andainyae, lisaya. Nena kone rulale eimi nee ma-epearipandeae, lisaya.
43Go gole monde lee rumbu pi alimiri olemole andisaya. Gupuma nipumi Gode repara ranae angele lala ara Yesuna kou nane ralisaya. Monde wenaalimi go ei andomare nimumi Godena bi minyasiarimiya.
Obecnie wybrane:
Luka 18: POLENT23
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
