Luka 17
17
(Madiu 18:6-7,21-22; Maka 9:42)
Koae aunumi wenaalina kone rulada einu ma-koyao-aya ei
1Yesumi nipuna kou nane raluaisimiya alinu para gupi lisaya. Wenaalinu ma-lopape aunuri ora pula peapare go wenaali lopenayanda ki kinyalu kondo dia aliri gore koaeyanda ora andele, lisaya. 2Alinumi go ali muma nipuna maa para kana kopena andi lopaoma go ali no ipa lee para lopalimindare go eiri rendaa andaai pea ale menda nipu repara pia. Go peapare nipu repara go au piliandare gore epedea. Akepeare nipu pa arare pena Keriso wenaalinu ni repara kone rulaeme ei ma-bembolaliandare gore Godeme nipu para ada pea rendaare ora go ei pange wanduaoma ora andaaipe adea, lisaya. 3Go einare neeme pili einu waru andere-ape, lisaya. Nena ameme koae aunu piliandare gore neeme puri pale mana angele la alape, lisaya. Go peapare wala nipuna konenu wala lekeyoma nipuna koae aunu pande ei wala gialiandare gore neeme wala kone menda na-siape, lisaya. 4Nipumi yapi komeana nee repara koae aunu rana warapu puma golere nee repara epala puma lala ara lalore, Neme wala gonde pawande aunu wala na-pula ae lala piliandare gore neeme wala go nipuna koae aunu pande einu repara kone konenu na-siapeae, lisaya.
Kone rulada ei
5Ande Yesuna angele ma-puao-aeme alinumiri monde Reali para lalore, gupi lisimiya. Naana kone rulaema eiri neeme waru ma-andayae, lisimiya.
6Ande Realimi nimuna angele yango liada ara lalore, gupi lisaya. Nimina kone rulaeme einda go ora enge masidadi kilisi mandana da payalore gore nimimi go mupili repana para lalore, Nena golere nee ree rongona yokomare no ipa kendo para pua poae da paeyalore gore mandana pangolapae, lisaya.
Pupudengi nao-ae alimi pula pea einu
7Nimi mendame pupudengi nao-aya ali menda milimindare gore neeme nipu no mapuna su rombo piruma o sipisipi menanu andere piruma ipula-ainyalomare neeme nipu para lalore, Rana komea nena enda epa na piri, loalepae, lisaya. 8Dia. Gupi ora na-deme, lisaya. Gupi na-lere neemere gupi de, lisaya. Na enda ambe wamo paomare neeme enda pana pulameyanda ma-rao-ale aka pambao pumare neeme ni enda pange ipa no punuyare maisambaomare werepe nanere gurupa nena enda nainya, lisaya. 9Mo pupudengi noae alimi go aunu peandare nipuna andaa alimiri ora epe rupa pupudengi noale piri na-dea, lisaya. 10Nimi pange mendaa rupa mandana, lisaya. Nimi para pipape deme aununda pu pereyalimindare gore nimimiri go dapape. Naare ora naana pape aunu pimale naa para ranae angelenu na-dapape, loalepape, lisaya.
Yesumi ki laapo alinuna yainya ma-epeaisaya ei
11Yesu nipu Diurusaleme ree anda nane polameyandare nipu Galili pange Sameria andasu laapona rombo kuru puaisaya. 12Nipu no anda para pua konda pambala polameya pala-ainyalomare ki laapo alimi nimuna do yongalena koae yainya ae alinumi nipu epa mandaisimiya. Nimu ongepusi papare ara Yesu wi loma gupi lisimiya. 13Yesu andaa alio, neeme naa yarame komae, lisimiya.
14Yesumi nimu andoma lalore, gupi lisaya. Mo Gode repara alinau puaya alimi nimi andena pulupae, lisaya. Monde alinu go para polameya pulu-ainyaloma runa arare nimu ma-epeaisaya. 15Monde ma-epeaisayande ali komeame go ei andomare nipumi Godena biri andapu ma-minyasia eiri wala lekeya ipula ara raname komisaya. 16Gupuma go ali nipumi Yesuna lee rona epa rumu yaruaoma piruma ranae angele epa lisaya. Go ali nipuri Sameria alimi pisaya. 17Go ei andoma Yesumi gupi lisaya. Ande ma-epeae auri ki laapo ali ma-epearipundele mo mendane ki pereya mendane kina malapu alinuri ane puamepae, lisaya.
18Wala pa anda ruru ali menda nipu komea wala lekeya ipuma Gode repara ranae da epe auri akepea pamepae, lisaya. 19Gupuma Yesumi mo nipu repara wala lekeya epande ali para lalore, gupi lisaya. Nena kone rulale eimi nee ma-epeayale nee rekoma puae, lisaya.
Godena Ki Rambuao-aya Ei epola pea rupa walisaya ei
(Madiu 24:23-28,37-41)
20Parisi ali mendapareme Yesu para angaa meala ara Godena Ki Rambuao-aya Ei epola pea naare angaa misimiya. Gupi lisimiyandare Yesu nipumi go lisaya. Gode nipuna Ki Rambuao-aya Eiri penameyao wenaalimi andola pea rupa na-epelea, lisaya.
21Mendame lala ara lalore, Go para goyale andalapa o mo para moyale andalapa, pi na-dea, lisaya. Akepeare Godena ande Ki Rambuao-aya Eiri nimi rapu aya, lisaya.
22Gupuma Yesumi nipuna kou nane raluaisimiya alinu para gupi lisaya. Naare menda nimimi Alina Si nipumi andambao pida pea naare menda andawe, kone sula pemepare nimimiri mandana ora na-andelemeae, lisaya. 23Mendapare repaame nimi para gupi lala ara lalore, Mango para andalepae o go para andalepae, deme, lisaya. Go peapare na-wasuma pulupapeae, lisaya. 24Alina Si epola pea rupare kari yapa pulu ara go su yaa laapo raidipuna paa ma-pao-aya ei andaleme rupa mandanare nipuna epola pea naarena pangere mendaa au pilia. 25Go peapare ririnare ambia aeme wenaalimi ambala ririna nipu gialimi pange nipumi rendaa andapupe nelea, lisaya. 26Ande Noa nipuna naarena puaisimiya rupa Alina Si nipuna naarena pangere mendaa aunu pilimi, lisaya. 27Go Noa nipuna naarenare enda pange ipanu pa na eiri pa puaisimiya pange wena para ali lapome repaaya ala pala pa eiri puma Noa nipuna kawasona pua konda pambaripaya naarenare ande ipa piru siaomare wenaali raayosi luma piraisaya, lisaya. 28Mendaa au pange ande Lode nipuna naarena pu pisimiya einu pu pilimi. Go naarenare wenaali raayosimiri enda nala ipa nala olemole rapala kambala wai alenu poala anda elala puaisimiya, lisaya.
29Gupuma Lodeme go Sodomo anda minyapalaisaya naarena repana lengaa pange rala rala ae danga so yaa parayame ipuma epa lopoma wenaali raayosi lu ma-komaripaya.
30Alina Si penameyao wadea naarenare mendaa rupa go au pilia, lisaya.
31Go naarenare anda kuluna pidia ali nipumiri wala kolopema nipuna anda para pua konda pamboma nipuna olemole na-pua milia, lisaya. Mendaa rupa ali menda ena alia ali nipumiri wala anda na-lekeya pelea. 32Lode nipuna werere kone sialepape, lisaya.
33Ali menda apimi nipuna endo-aya ei alu papanaya sese pulameya piliandare ma-alu palia. Go peapare mendame nipuna endo-aya ei ma-alu paliandare gore nipuna endo-aya ei rambamilia, lisaya. 34Neme nimi para la gialo. Go rimbare ali laapo anda para padipipare mendare pa palinyaloma mendare pane ma-pelea, lisaya. 35Wena laapomere enda wamo pala pirinyalomare komea ma-pulu ara menda pa pirinyademe. 36Ali laapo mapuna pupudengi nala-ainyaloma komea pane ma-pulu ara menda pa alia, lisaya.
37Monde Yesuna kou nane raluaisimiya alinumi lalore, Realio, go lale eiri a para piliayapae, lisimiya. Yesumi go lora pisimiya ei pangoma nimuna angele yango liada arare gupi lisaya. Kome ro alenda wiliaparere ro pa rumame andea yaanu penameyao mombedeme alena andeleme, lisaya.
Obecnie wybrane:
Luka 17: POLENT23
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
