1 Korinthiko 12
12
Sonot Jiu emokʼ reaṅ
1E boehako, sonot Jiuteakʼ dan reaṅ bin baḍaepe tahen do baṅ sanań kana. 2Baḍaegeape, Isor bape sewawaekan tahẽkanre ape do nonkan muṭhạnko secʼpe ạyur ocokʼkan tahẽkana one okoe doko guṅgạge. 3Ińiń baḍae ocoyetʼpea, Isorren Jiute roroṛkanko do okoe hõ bako mena, “Jisu do sarapicʼ kanae mente.” Ar sonot Jiu begor, “Jisuge Probhu Isor” kanae mente okoe hõ bako men daṛeakʼa.
4 #
Rom 12.6-8
Ini mitʼ sonot Jiuakʼ daya danko do judạ judạgea; 5ar judạ judạ dharate abo do ini mitʼ Probhu Isorge bon sewawae kana. 6Abo mimitʼko do judạ judạ kạmi bon emocoakana, menkhan ini Isorge judạ judạ dharate mimitʼko talareye kạmikana. 7Sanamkoakʼ bhạlại lạgitʼge sonot Jiu do mimitʼ hoṛre mimitʼ lekae sodorokʼ kana. 8Adom adom hoṛ do uni sonot Jiu hotete akel reakʼ kathako roṛeda. 9Ar eṭakʼko do ini Jiu hotete pạtiạukʼ se ruạ hasoko boge reakʼ daṛe se hahaṛa kạmi reakʼ daṛe se nạbi leka Isorakʼ katha roroṛ reakʼ daṛe se boge ar bạṛicʼ jiuko oromko reakʼ daṛe; 10ar adomko do judạ judạ pạrsite roṛ reakʼ daṛe se judạ judạ pạrsite torjoma reakʼ daṛe ini mitʼ Jiugeye kạmi ocoyeda. 11Noako joto kạmi do ini sonot Jiugeye kạmiyeda. Uni do cetʼleka sanayede onkage onako dan mimitʼko judạ judạye emako kana.
Hoṛmo ar ona reakʼ hạṭińko
12 #
Rom 12.4,5 Mitʼṭen hoṛmore cetʼleka aema hạṭińko tahen ar ona hạṭińko ḍhergere hõ cetʼleka mitʼṭen hoṛmoge hoyokʼkan, Mạsi hõ ṭhik onkage. 13Abon do baṅ dobon Jihudikan, baṅ dobon boṅgan hoṛ jạtrenkokan, baṅ dobon golamko kan, baṅ dobon sạdhinko kan, jotoge ini mitʼ sonot Jiu hotete bon bạptis akana; ar jotokoge ini sonot Jiuge bon ńam akadea.
14Hoṛmo do eken mitʼṭen hạṭińte do baṅ benao akana, ona do aema hạṭińkotege tearakana. 15Jaṅgae menkhan, “Ti doń baṅkana, onate hoṛmo reakʼ hạṭiń hõń baṅkana,” Enḍekhan hoṛmo reakʼ hạṭiń baṅkana ona do baṅa. 16Luture menkhan, “Mẽtʼ doń baṅkana, onate hoṛmo reakʼ hạṭiń hõń baṅkana,” Enḍekhan hoṛmo reakʼ hạṭiń baṅkana ona do baṅa. 17Ar goṭa hoṛmoge mẽtʼ hoylen khan, enḍekhan ańjom reakʼ daṛe do okare tahẽkokʼa? Ar goṭa hoṛmoge lutur hoylen khan, enḍekhan ji reakʼ daṛe do okare tahẽkokʼa? 18Isor do cetʼlekae monejoṅkan onkage hoṛmo reakʼ hạṭińko hoṛmoreye bạisạu akada. 19Ar joto hạṭińko mitʼ lekage hoylen khan, enḍekhan hoṛmo do okare tahẽkokʼa? 20Hạṭińko aemagere hõ, menkhan hoṛmo do mitʼṭengea.
21Mẽtʼ do ti ohoe men daṛelea, “Amakʼ do jạruṛ bạnukʼtińạ,” Bohokʼ hõ jaṅga ohoe men daṛelekina, “Abenakʼ do jạruṛ bạnukʼtińạ.” 22Menkhan hoṛmo reakʼ oka hạṭińko nijorge aṭkarokʼkan onage bạ̃ṛti jạruṛa. 23Hoṛmo reakʼ oka hạṭińko thoṛa manotakʼ bon metakʼkan, ona hạṭińkoge bạ̃ṛti manot bon udukʼeda; ar oka hạṭińko baṅ udugokʼkan onako do ạḍi manot salakʼ bon poṭom esetʼkakʼ kana, 24menkhan oka hạṭińko bahrere udugokʼ, ona do poṭom esetʼ reakʼ jãhãn jạruṛge bạnukʼa; ar hoṛmo reakʼ oka hạṭińko jãhãn manot bạnukʼ, Isor do onakoge bạ̃ṛti manote emakada ar sanam hạṭińkoe mitʼakada, 25jemon hoṛmo do alo bhaga bhạgikʼ, bickom hoṛmo hạṭińko mitʼ lekako dạndikʼ. Mitʼ hạṭiń dukokʼ khan ona sãote goṭa hạṭińge dukokʼa. 26Mitʼ hạṭiń manote ńam khan enḍekhan goṭa hạṭińge ona sãote hulạsokʼa.
27Ape do Mạsiyakʼ hoṛmo kanape, ar mimitʼ hoṛ do ona hoṛmoren hạṭińkoge. 28#Eph 4.11 Isor do manḍerre pạhilte apostolko, dosarte nạbiko, tesarte cecetʼkoe dohoketʼkoa. Ona tayom noko hoṛkoe bachaoketʼkoa, one okoe do hahaṛa kạmi reakʼ ektiạriko ńamakatʼ, ar okoe do ruạ boge reakʼ daṛe, ar okoe do goṛowako reakʼ daṛe, ar okoe do calao ganao reakʼ daṛe, okoe do pạrsi torjoma reakʼ daṛeko ńamakatʼ, ar onko sanamkoge cetʼ apostol kanako? 29Sanamkoge cetʼ nạbi kanako? Jotoge cetʼ cecetʼko kanako? Sanamkoakʼge cetʼ hahaṛa kạmi reakʼ ektiạri menakʼtakoa? 30Sanamkoge cetʼ ruạ haso boge daṛeakʼ reakʼ ektiạri menakʼ takoa? Sanamkoge cetʼ aema lekan pạrsiteko roṛeda? Sanamkoge cetʼ ona reakʼ maneko bujhạuako kana? Khạṭige baṅa. 31Bickomiń mena, ape do joto khon jạruṛanakʼ danko ńam baṛae lạgitʼ gagojokʼpe.
Iń do soros utạrakʼ ar mitʼṭecʼ hor iń udukʼape kana:
Obecnie wybrane:
1 Korinthiko 12: SBT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Santali Bible © Bangladesh Bible Society, 2021.