Matiyò 28
28
Yerzù à mà hvùmùwà
(Mak 16.1-10; Luk 24.1-12; Yòw 20.1-10)
1O mburzà wùnyà wò lì Arzìyòlɛ̀, na òma wùùnyà wò wòrzò wò e wiki wò ma wòteyà lì yahwa, Màlìyɛ̀ Màdàlènì, na Màlìyɛ̀ ema a mà ŋya Jèmìrzì nà Jòrzɛ̀hvù hwà mà ɛ̀ndɛ ò lì ɔ̀ŋgɔ e rzɔ̀ŋgɔ̀ ya ama Yerzù. 2Lìwòkìmɛ̀nɛ̀ ò ma hwɛ mònyìŋgìrzɛ̀nɛ̀ mò ndɛnɛ e aŋgèlì ya ama Rzàŋgò e ma uwɛ̀lɛ̀lɛ̀ ò ŋmanyu yà lohwà rzìi e jà e iŋgòlɛ lìŋgi lìŋyàyi ema lì mò umba eŋge wàna ya eŋge rzɔ̀ŋgɔ̀ rzìi a lì lìya ò ŋmanyu. 3Wòrzò wò ama eŋge aŋgèlì wò ma hvaya ndi nàa lìŋmɛ̀tiŋmɛ̀ti, lìwɔtì la eni hvɛ lì ma ɛneya ndi rzìlìhwà. 4Hwàŋga hwàànèlì wa njuma ema hwà mà hwɛ lì ɔŋgeya eŋge rzɔ̀ŋgɔ̀ hwà mà òhva wɔ̀ŋgɔ̀. Wòŋgò wɔ̀ŋgɔ̀ wò ma hwa tumìrzɛ̀ mòkambiya rzìi hwa kpa ò rze hwa embama na hwèembè. 5Èŋge aŋgèlì rzìi e òhweyà hwaŋga hwalanà nanù ema, “È rza òka wɔ̀ŋgɔ̀. Nà hwi nanù ema e arza ndi Yerzù ema à mà wòmàwɛlɛ̀hwɛ̀ ò mbarza. 6A rza enje anù. A ma hvùmùwà na òma à mà e òhweyà. È jèe e ɔ̀ŋgɔ èki ema à mà nàŋgɛlɛhwɛ. 7È ɛ̀ndɛ rzɔ karzi-karzi e òhweyà Hwà-òkòwèlì hwa eni nanù ema, ‘À mà Hvùmùwà ò kpelì. A ma màa lì ɛ̀ndɛ ò wòrzò wò anyu ò Galìlì, aŋga ndi e mò ɛnɛ.’ È ɔ̀ŋgɛ̀lɛ̀ mamɛ ema na e òhweyà.” 8Hwàŋga hwalanà rzìi hwa anjiyana lì ahwèŋgɛ̀ ò rzɔ̀ŋgɔ̀ na wɔ̀ŋgɔ̀ ndi hwà mà ònda na màlìŋgò. Hwa hwaŋga ò lì ɛndɛ lì òhweyà Hwà-òkòwèlì hwa ama Yerzù mamɛ ya arzɛ ema e ma gbèyɛ̀nɛ. 9Nà òma hwaŋga hwalana hwà mà hwɛ lì ɛndɛ, lìwòkimɛnɛ Yerzù rzìi a hwa taneya, a hwa òhweyà nanù ema, “Ɛ̀yɔ̀lɛ̀ e hwɛ na inyɔ” hwà mà mò jèeyà hwa mò lɛ̀mbɛ matàŋgà hwa mò kànɛ. 10Yerzù rzìi a hwa òhweyà nanù ema, “È rza òka wɔ̀ŋgɔ̀. È ɛ̀ndɛ e òhweyà hwà-òkòwèlì wa ami ema hwa hwèlì ndi nàa wònyànyàŋgò wa ami ema hwa ɛ̀ndɛ ò Galìlì. Aŋga ndi hwa nò ɛnɛ.”
Hwàanèlì hwa njuma hwa ò hwi mamɛ ema e gbeeyɛnɛ
11Nà òma hwaŋga hwalanà hwà mà hwɛ lì ɛ̀ndɛ lòŋgò la hwàanèlì hwa njuma ema hwà mà hwɛ lì ɔŋgeya e rzɔŋgɔ ya ama Yerzù, hwà mà ɛ̀ndɛ ò mbòwà lì òhweyà Ipìlìrzì ndɛnɛ mamɛ ya arzɛ ema e ma gbèyɛ̀nɛ e hvònda ema e aŋgèlì e ma jèe. 12Ipìlìrzì ndɛnɛ i ma lìya wùndɛ̀ na hwàmbaki hwa mbòwà ò lì wòŋgirzɛnɛ mamɛ ema hwa gbeyà. Rzìi hwa ŋgba hwaŋga hwàanèlì hwa njùma ema hwà mà hwɛ lì ɔŋgeya eŋge rzɔ̀ŋgɔ̀ wòlì wò ndɛnɛ. 13Hwa mà hwa kòkòwɛ̀lɛ̀ ò lì òhwa nanù ema, “Hwà-òkòlèlì hwa ama Yerzù hwà mà jà lì ihwa èèmbè ya ama Yerzù wùuwù ema hwa ma hwɛ lì naŋga. 14Pìlatò a hweyi tɛ ene eyà e mò gbeyà a hwiya nanù ema rzeketɛ e njɔ̀mì ya anyu. Aŋga nanù inyɔ e rza hwɛnɛ tɔ̀ mòhvùŋgu.” 15Hwàŋga hwàànà njùma rzìi hwa wòwa wòŋgò wòlì rzìi hwa gbèeya na òma hwà mà kòkòwɛlɛhwɛ. Nàtɛ̀ɛ na yawònò, wònyà Yudà hwa hwèlì hwa òhwa wònò gbitò.
Yerzù a wurzelì hwà-òkòwèlì hwa eni
(Mak 16.14-18; Luk 24.36-49; Yòw 20.19-23; Hwè 1.6-8)
16Rzìi lìŋgi Lìyòmɛ̀ la eni la Hwà-òkòwèlì na mɔ̀kɔ hwa ama Yerzù hwa ɛ̀ndɛ ò mòòlì ò Galìlì ema à mà hwa òmeya ŋmɛ̀ndì ema hwa ɛndɛ. 17Nà òma hwà mà mò ɛnɛ hwà mà mò kanɛ̀ tɔ̀ nɛ lòŋgò hwa rzi lòkɛ nanù ema mɔ̀ ŋmitɛ-ŋmitɛ òŋgò. 18Yerzù rzìi a tòmbeya lì hwa kòmbɛnɛ rzìi a hwa òhweyà nanù ema, “Nà ŋgbààhwi wònja ò lìkànèyà la ŋmanyu na e rze. 19O èŋgànɛ̀lɛ̀ rzɔ e ɛndɛ ò hwèkòmè hwe arzɛ hwe ene rze, e gbèèye hwatò ò lì hwɛ hwà-òkòwèlì hwa ami. È hwa lùhwìrzɛ̀ ò lìna la ama Tatɛ̀, ò lìna la ama e Ŋmanà, na ò lìna la Èlìŋgɛ̀ yà Wòtani. 20È hwa òkòlɛ̀ hvɛ ò lì nɔ̀ŋgɔ hweyà hwe arzɛ ema na e kànèlì ò lì gbeyà. È hwiye nanù ema na hwɛ na inyɔ natɛ̀ɛ na ò lìrzùkù la rze.”
Obecnie wybrane:
Matiyò 28: bri
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2022, CABTAL
