Matiyò 27

Pìlatò à mà kàyìrzɛ̀ Yerzù

(Mak 15.1; Luk 23.1-2; Yòw 18.28-32)

1O ekpa arzɛ ya wùnyà, Ipìlìrzì ndɛ̀nɛ̀ ja arzɛ nà hwàmbaki hwà mbòwà hwà mà gbeyà hwètɛ̀yìrzèlì lì teŋgɛ̀nɛ̀ nɛ hwa hwɛni lì òŋwa Yerzù. 2Hwà mà mò kaka, rzi hwà tìmbà lì mò akɛlɛlɛ Pìlatò ema mɔ̀ ndi e kiŋgɛ ya èkòmè ya Ròmànì à mà ika ò lì kànèyà hwatò hwa erzòòkà yà Jùdeyà.

È kpelì ya ama Jùdàrzì

(Hwè 1.18-19)

3Nà òma Jùdàrzì ema à mà àhwirzɛ̀ Yerzù à mà ɛnɛ nanù ema e kòti e ma akɛlɛ e mbakò nanù ema Yerzù a òŋwàhwà, à mà kpa ŋmèma ò lìtòna ema à mà gbèèye. Èŋge eyà e ma mò gbeyà nanù ema a timbirzɛlɛlɛ ipìlìrzì ndɛnɛ na hwàmbaki hwa mbòwa e rzàyiyàwò ya hwɛ̀ɛkɛ̀ hwe rzilìhwa ema hwa mà mò ŋgbe. 4Jùdàrzì rzìi à òhwà nanù ema, “Nà gbèyi wòhwe, nà àhwirzɛ̀ mòtò ema a rzà gbèèyɛ̀ tɔ̀ eyà ya wòhwe. Mɔ̀ ònò naŋgɛ ema hwa hwɛni lì òŋwa ò ŋgundu.” Hwà mò àlahwɛ̀ hwà nanù emà, “Mamɛ e hwèlì e njɔ̀mì ya arzu aŋga e? Èŋge e hwèlì ndi è ya aŋgɔ̀!” 5Nà òma Jùdàrzì à mà hweye nanù rzìi a hwa rzɔnjɛ̀lɛ̀lɛ wòŋgò wòlì aŋga ò rze ya e Ndawò yà Lohwà rzìi à ɛ̀ndɛ, a àhvanɛ. 6Ipìlìrzì ndɛnɛ rzìi i rzàŋga wòŋgò wòlì rzìi jò òhwà nanù ema, “È hwèlì mbendà ò lì ikà wònò wòlì wò màyija ò lùùtà la e Ndawò ya Lohwà.” 7O èŋgànɛ̀lɛ̀ hwà mà kàka nanù ema wòŋgò wòlì hwa wò gbeyàna ndi ò lì andà etò ema è mà hwɛ è yà ama e mòtò ema a gbeyàna mɔ̀nyɛ̀ ò lì wèka hwètɛ̀ŋgɛ̀ na màànyà. Hwà mà anda ndi mòŋgò mɔ̀nyɛ̀ ò lì mò gbeyà mòndà mò rzɔ̀ŋgɔ̀ mò hwàyɛ̀nì hwa hwatò. 8Èŋge ŋgàna ɔ̀ndeŋgàtɛ̀ eŋge èkì e hwɛ̀lɛ̀hwɛ̀ ndi “Etò ya Màyìjà” nàtɛ̀ɛ nà yàwònò. 9O èŋgànɛ̀lɛ̀ rzɔ̀ ene eyà e ma gbèyɛ̀nɛ ndi ò lì òndìrzɛ̀ e mbɔrzi ya ama è mòòhwèlì wà èlìŋgɛ̀ Jèrìmayà à mà òhwe nanù ema, “Hwà ò wòwa wòŋgò wòlì wò rzayiyàwò ja hwɛ̀ɛkɛ̀ hwe rzilìwa, Mɔ̀rzɔ̀ŋgi ema mò ma rzèkahwɛlɛ na lòŋgò la hwatò hwa wònyà Irzàyɛ̀lì ò lì rzàawà ò mòhvò mò eni, 10rzìi hwa ò mò gbeyàna ò lì anda etò ya mòtò ema a gbeyàna mɔ̀nyɛ̀ ò lì wèka hwètɛ̀ŋgɛ̀ na màànyà. Ène eyà ndi Lohwɛ̀ à mà nò òhweyà ema na gbèèye.”

Pìlatò a kàyìrzɛ̀ Yerzù

(Mak 15.2-5; Luk 23.3-5; Yòw 18.33-38)

11Ò ene hvònda Yerzù à mà tɛ̀mɛ̀ ò wòrzò wò amà Pìlatò ema à mà hwɛ lì kànèyà erzòòkà yà Yudà. Pìlatò rzìi à mò ijòwa nanù ema, “Ò wà ndì ò hwèlì è kiŋgɛ̀ yà wònyà Yudà è?” Yerzù rzìi à mò alàhwɛ̀ nanù ema, “È hwèlì ndì nà òma ò òhwì” 12Ndi è hvònda ema Ipìlìrzì ndɛnɛ nà hwàmbaki hwà mbòwà hwà mà hwɛ lì mò rzàmbà à rzì òhwè tɔ̀ eyà. 13Aŋga ndì Pìlatò a à mò ijòwa nanù ema, “Ò rzà hwèyì menè mèrzàmbèlì me arzɛ ema hwanu hwatò hwà ò rzàmba è?” 14Ndì Yerzù a rzì òhwe tɔ̀ eyà, ene eyà e ma tàmìrzɛ̀ Pìlatò rzayi-rzayi.

Yerzù a òmahwi ò lì òŋwahwa

(Mak 15.6-15; Luk 23.13-25; Yòw 18.39–19.16)

15È mà hwɛ ndì ɛ̀ɛ̀mɛ̀ yà amà Pìlatò nanù ema, ŋma tɛ ò è hvònda yà è Ndèma yà lì Akà Ɔ̀nɛyi, à rzòlohwà mòtò mɔ̀kɔ wà hwèwòwà ema è ŋgindi è hvɔ̀rzɔ̀. 16Ò eŋge hvònda ò mà hwɛ mòtò mɔ̀kɔ ò hwèwòwà ema à mà hwɛ̀lɛ̀hwɛ̀ Bàlabàrzi. Oŋgò mòtò à mà hwiyahwa rzayi-rzayi ò hweyà hwe eni hwe wòhwe ema à mà hwɛ lì gbeyà. 17È hvònda è ŋgìndì è mà arzàŋganɛ Pìlatò rzìi à hwà ijòwa nanù ema, “Imà mɔ̀ rzɔ̀ ema è arzà nanù ema nà è rzòlòhweyà è? Bàlabàrzi ŋgà Yerzù ema à hwɛ̀lɛ̀hwɛ̀ è Mɔ̀ ema à Ɔ̀kirzɛ̀hwɛ̀yi è?” 18À mà gbeyà ndi nanù èhwanja mɔ̀ à mà hwiya kɔ̀yi-kɔ̀yi nanù ema Ipilìrzi ndɛnɛ nà hwàmbaki hwa mbòwa hwa mà mò akɛlɛlɛ Yerzù èhwanja hwa mà mò nòneyà. 19Nà òma Pìlatò à mà lìya ò kònda yà hwèkayirzelì, jòjìyɛ̀ wà eni à mà mò òmeya ŋmɛ̀ndì nanù ema, “Ò rzì kèka lì hwɛnɛ tɔ̀ eyà yà lì gbeyàna nà è mbakò yà ama òŋgò mòtò ema à rzi gbèyi tɔ̀ eyà yà wòhwe, èhwanja nà mò ɔ̀tɔ̀ ndɔ̀tɔ̀ wònò wuu eŋge ndɔ̀tɔ̀ è nò tàkìrzɛ̀ rzayì-rzayì.” 20Ipìlìrzì ndɛnɛ nà hwàmbaki hwà mbòwà hwà ma kɔ̀mɛlɛ̀ è ŋgìndì ò lì òhweyà Pìlatò nanù ema a hwɛmɛ Bàlabàrzi a ɛndɛ e ya eni ndi hwa òŋwe Yerzù. 21Pìlatò rzìi à hwà ijòwa nanù emà, “Imà mɔ̀ wà hwànu hwatò hwàahwàkɛ è arzà nanù ema nà è rzòlòhweyà è?” Rzìi wɔ̀ hwa arzɛ hwà àlahwɛ nanù ema, “Bàrabàrzì.” 22Pìlatò rzìi à hwà ijòwa nanù emà, “Mamɛ nà gbeyànà rzɔ̀ Yerzù ema à hwɛ̀lɛ̀hwɛ̀ è Mɔ̀ ema à Ɔ̀kirzɛ̀hwɛ̀yi è?” Wɔ̀ hwà arzɛ hwa mà alàhwɛ̀ nanù ema, “Ò mò wòmeya ò mbarza.” 23Pìlatò rzìi à hwà ijòwa nanù ema, “O mamɛ ndeŋgàtɛ̀ e? Imà lìtumbà la wòhwe ema a gbèyi e?” Ndi wɔ̀ hwà mà tɛɛ ndi nanù ema, “Ò mò wòmeya ò mbarza.” 24Nà òmà Pìlatò a mà ɛnɛ nanù ema mɔ̀ à rzi tànɛyi ò lì gbeyà tɔ̀ eyà, ndèŋgànà ema ò tànɛyi lì hwɛ lùwànje, rzìi à wòwa màlìhwà à rzòrza màa me eni ò wòrzò wò e ŋgindi rzìi a òhwà nanù emà, “Maà mà ami ma rza enje ò e kpelì yà amà ònò mòtò. Ène eyà e ɔŋgɔ̀ ndi inyɔ.” 25È ŋgìndì è arzɛ è àlahwɛ nanù ema, “Inyɛ̀ màyija mà enì mà hwɛ ò mèyòhvò mè àrzu nà hwàanà hwa arzu.” 26Aŋga ndì Pìlatò à a hwà rzòlòhweyà Bàrabàrzì. O mburza hvònda ema à mà akɛlɛ lìlò nanù ema hwa gbiyɛ Yerzù, rzìi a mò akɛlɛ nanù ema hwà mò wòmeya ò mbarza.

Hwaànèlì hwa njùma hwa kùwa Yerzù

(Mak 15.16-20; Yòw 19.2-3)

27Hwaànelì hwa njùma hwà mà Pìlatò rzìi hwa wòwa Yerzù hwa mò ɛ̀ndɛnɛ ò ewòka ya e mòkànèlì. Rzìi e ŋgindi ya arzɛ ya hwaànèlì hwa njùma e tòŋga Yerzù. 28Hwa mà mò rzòlòwà lìwɔti rzìi hwa mò wɔ̀tìrzɛ̀ mòŋgòmbè mò teyàa ema mò gbèyi ndi nàa mòŋgòmbe mò ama è kiŋgɛ. 29Aŋga ndì hwa à wòwa ekɔ̀kɔ̀ yà gbee wò njenje rzìi hwa è òŋga nàa ekòòtò yà kìŋgɛ rzi hwa mò wɔ̀tìrzɛ̀ è yɔ̀ ò mòòhvò mò eni. Hwa mò tɛ̀tìrzɛ̀ mòtìmbò ò lìya là eni là mòme rzìi hwa rzùma màwɔ̀ŋgɔ̀ŋgɔ̀ ò rze lì mò kuwa. Hwa mà hwɛ lì òhwa nanù ema, “Èluhwe è hwɛ nà ò wà è kìŋgɛ yà wònyà Yudà!” 30Hwa mà wòteyà lì mò rzɔ̀yèya hwèyɔ̀lì rzìi hwa wòwa mòŋgò mòtìmbò è ma hwà mà mò tɛ̀tìrzɛ̀ hwa mò hvahva è mɔ̀ mòòhvò. 31Nà òma hwa mà kulɛ lì mò kuwa, rzìi hwa ulɛ mòŋgò mòŋgòmbè mò teeya ema hwa mà mò wɔ̀tìrzɛ̀. Rzìi hwa mò wɔ̀tìrzɛ̀ è là eni lìwɔti. Ò mburza nanù rzìi hwa mò ɛ̀ndɛ̀nɛ̀ ò lì mò wòmeyà ò mbarza.

Yerzù à wòmàwɛ̀lɛ̀hwɛ̀ ò mbarza

(Mak 15.21-32; Luk 23.26-43; Yòw 19.17-27)

32Nà òma hwà mà wurze lì ɛ̀ndɛ rzìi hwa taneya mòtò mɔ̀kɔ ema à mà uhwɛlɛlɛ ò mbòwa ya Rzilenì ema à ma hwɛ̀lɛ̀hwɛ̀ Rzìmɔ̀nì. Hwà mà mò tìnɛlɛ ò lì hwanɛ̀ è mbarza ya ama Yerzù na lì mò nɔ̀ŋgɔ ò mburza. 33Hwà mà uke ò èki ema e hwɛ̀lɛ̀hwɛ̀ Gòlgotà, ema jànda i hwèlì ndi ema, “Èki ya Hwekeke hwe Mèyòhvò.” 34Aŋga ndì hwa mà ŋgbè Yerzù hwènyɔ̀ɔ̀nì ema hwe ma hvuŋguwahwa na yòma ema e mà ɔkɔ̀ hviyayi ò wàna, ndi na òma à mà mò òkànèyà, a rzɔ̀rzɔ̀ ò lì ma nyɔ. 35Hwa wòmeyà Yerzù ò mbarza. Rzìi hwà òka mèrzɔ̀ɔ̀nì ò lì hwàa è mbɔ̀ti ya eni. 36O mburza nanù, hwà mà lìya aŋga ò lì mò ɔ̀ŋgeyà. 37Hwa mà tìla jànda jà è kpelì yà eni ò tahvelì nanù ema, “Yerzù ònò, è Kiŋgɛ yà wònyà Yudà.” Rzìi hwa wòwa eŋge tahvelì hwa è wòmeyà ò ŋmanyu tènyi lì aka mòòhvò mò eni. 38Hwa mà wòmeyà hwàyihwɛ hwahwàkɛ ò mbarza nà Yerzù, mɔ̀kɔ ò lìya là eni là mòmɛ̀ ɔ̀nɛyi hvɛ ò lìya là eni là ŋmalì. 39Hwatò ema hwa mà akeyà ò tòŋgòŋgò yà eŋge èki, hwa mà hwɛ lì hvòkòmɛlɛ mèyòhvò mè awu rzìi hwa à mò kikòwa 40nanù ema, “Ò mà òhwa òma ò wùùlɛ̀ è Ndawò yà Lohwà rzìi ò è òŋga ò ìtììtènì ja mèenyà meyawò. À arzùŋgɛ̀ ò wà hwiti, ò hwèlì tɛ è Ŋmanà wà munyanà wà ama Lohwɛ̀! Rzihwa ò ŋmanyu yà eŋge mbarza!” 41Nànù mɛnɛ hvɛ ndi, Ipìlìrzì ndɛnɛ̀ nà hwà-òkòlèlì hwa mbenda na hwàmbàkì hwa mà hwɛ lì mò kùwa nanù ema, 42“À ma hwɛ lì rzùŋgà hwatò ndi nàŋgɛ à rza tànɛyi lì àwòŋgòwànɛ̀ tɔ̀ mɔ̀ ŋmìti. È hwèlì tɛ e jɔ̀kɛ̀ nanù ema mɔ̀ ndi à hwèlì e kiŋgɛ ya èkòmè ya Irzàyɛ̀lì, inyɛ a rzihwe rzɔ ò eŋge mbarza naŋgɛ. Aŋga ndi irzɔ i lòkɛ̀ nanù ema mɔ̀ ndi à hwèlì è Mɔ̀ ema à Ɔ̀kirzɛ̀hwɛ̀yi. 43À lòkɛ̀yì nanù ema Lohwɛ̀ a hwèlì na mɔ̀ ndèŋgànɛ̀lɛ̀ hvɛ a hwèlì ndi è Ŋmanà wà amà Lohwɛ̀. Òole! Inyɛ̀ Lohwɛ̀ a mò òŋgòwane rzɔ naŋgɛ inyɛ jɛ̀ɛ̀ ɛnɛ.” 44Hwaŋga hwayihwɛ hvɛ ema hwà mà wòmahwɛlɛ ò mbarza na Yerzù wɔ̀ ɔhvɛ hwà mà hwɛ lì kikòwa Yerzù.

È kpelì ya ama Yerzù

(Mak 15.33-41; Luk 23.44-49; Yòw 19.28-30)

45O lìrzàkò la kɔ̀rzì ya ŋmèrze rzìi jììtìtì i lìŋga èki ya arzɛ natɛ̀ɛ lì uka ŋgɛ̀ŋgi iyàwò. 46Ò eyà yà ŋgɛŋgi iyàwò jà mòŋgò ŋmerze, Yerzù rzìi à tɛ̀ɛ nà lìlò lì karzami ama, “Èlòyi, Èlòyi làma Rzàbatani!” Jànda ja ene eyà i hwèlì ndì nanù ema, “Ìi Lohwà là ami, ìi Lohwà là ami, mamɛ ndeŋgatɛ ò nò kìnyɛ̀lɛ̀ e?” 47Lòŋgò la hwatò ema hwa mà tɛ̀mɛ̀ aŋga, na òma hwa mà hwèya na òma a òhwa nanù rzìi hwa a òhwa nanù ema, “A hwɛlɛ ndi Èlàyijà nanù ema a jèe a mò òŋgòwanè.” 48O lìwòkimɛnɛ, munyanà mɔ̀kɔ à mà hwaŋga, à ɛndɛ, a wòwà e kùcha, à è kaka ò lìrzùkù la èèyè, à è tɔ̀tɔ̀ ò tenì ya hwènyɔ̀ɔ̀nì hwe kpanyi, rzìi a agbɛ̀lɛ̀lɛ̀ Yerzù ò wàna ema a nyɔ. 49Hwanɛ̀yi hvɛ rzìi hwà mò òhwàna nanù ema, “Ò mò hwɛmɛ ɔ̀nɛyi inyɛ jò ɔ̀ŋgɔ ŋga Èlàyijà a ja lì mò òŋgòwànà.” 50Yerzù rzìi a tɛ̀ɛ̀ hvɛ na lìlò lì karzami rzìi a rziyòwa mùùlù mò eni mò lìrzùkù. 51O eŋge hvònda mɛnɛ, lìhwàtù ema lì ma kɛ̀ɛ̀hwɛ̀ ò lì kahwa e Ndawò yà Lohwà rzìi lì nyàhweyà hwèhvàrzù hwèhwàkɛ̀ lì wòteyà ò ŋmanyu natɛ̀ɛ nà ò rze. Mònyìŋgìrzɛ̀nɛ̀ mò ma hwɛ hwèwòmà hwe màŋyàyi hwe ma kandeyà. 52Irzɔ̀ŋgɔ̀ ima lìhvòweya rzayi-rzayi ja hwatò hwa Lohwà ema hwà mà lòmɛ lì ŋwa, hwà mà hvùmùwà. 53Hwà mà hwɛmɛ irzɔ̀ŋgɔ̀ ja awu, ò mburzà hwèhvùmùwèlì hwe ama Yerzù, hwa mà ɛ̀ndɛ ò Jèrurzalɛ̀mù ema rzayì-rzayì ja hwatò hwà mà hwa ɛnɛ. 54Ndì è mòkànèlì hwa hwàànà njùma na hwanɛ̀yi hwàànà njuma ema hwà mà hwɛ lì ɔŋgeya Yerzù, hwà mà ɛnɛ mònyìŋgìrzɛ̀nɛ̀ na mamɛ ya arzɛ ema e ma gbèyɛ̀nɛ hwa mà lɛ̀mbeya mòkambiya rzìi hwa òhwa nanù ema, “Nà e jɔ̀kɛ̀ ònò mòtò à mà hwɛ ndi è Ŋmanà wà munyanà wà ama Lohwɛ̀.” 55Rzayi-rzayi ja hwalanà ema hwa mà wòteyà lì nɔ̀ŋgɔ nà ì òŋgòwànà Yerzù lì wòteyà ò Galìlì, hwa mà tɛ̀mɛ̀ hvòka, ò lì ɔ̀ŋgɔ mamɛ yà arzɛ ema è mà hwɛ lì gbèyɛ̀nɛ̀. 56Màlìyɛ̀ Màdàlènì, Màlìyɛ̀ è nyàŋgò yà ama Jèmìrzì nà Jòrzɛ̀hvù, nà è jòjìyɛ̀ yà ama Rzɛ̀bɛ̀dì hwa mà hwɛ ò ìtììtènì jà hwaŋga hwalanà.

Lì làmìrzɛ là ama Yerzù

(Mak 15.42-47; Luk 23.50-56; Yòw 19.38-42)

57Nà òma ehwàna mòkò è mà uke rzìi èwàŋgì yà mòtò yɔ̀kɔ ema è mà uhwɛlɛlɛ ò mbòwa ndɛnɛ yà Àrìmàtìyà rzìi è jà. Lìinà là eni lì mà hwɛ ndi Jòrzɛ̀hvù, mɔ̀ hvɛ à mà hwɛ ndi mɔ̀kɔ ema à mà nɔ̀ŋgɔ Yerzù. 58À ma ɛ̀ndɛ ò ma Pìlatò ema a mò ŋgbe e wònja ò lì wòwa ŋmìimbà mò ama Yerzù. Pìlatò rzìi a ŋgba e wònja nanù ema hwa mò ŋgbe ŋmìimbà mò ama Yerzù. 59Jòrzɛ̀hvù à mà wòwà ŋmììmbà mò ama Yerzù, rzìi à mò lìŋgɛ̀lɛ̀ nà mbɔ̀mi hvènya. 60Rzìi à naŋgɛ̀lɛ mòŋgò ŋmììmbà ò rzɔ̀ŋgɔ̀ yà eni ema è mà hvòmàhwà ò tenì yà ekɔ̀kɔ̀ yà lìŋyàyi. Èŋge rzɔ̀ŋgɔ̀ è mà hwɛ ndi rzɔ̀ŋgɔ̀ hvènya yà ama Jòrzɛ̀hvù. Ò mburza nanù, rzìi à iŋgòlɛ lìŋyàyi lì ndɛ̀ɛ̀nɛ̀ ò lì umba hwèkpèèlì hwe eŋge rzɔ̀ŋgɔ̀ rzìi à ɛndɛ è yà eni. 61Màlìyɛ̀ Màdàlènì na Màlìyɛ̀ ema me ma ŋya Jèmìrzì nà Jòrzɛ̀hvù hwà mà lìya aŋga, ò tòŋgòŋgò ya wàna ya eŋge rzɔ̀ŋgɔ̀.

Pìlatò a òmi hwàànèlì hwa njuma ò lì ɔ̀ŋgeya è rzɔ̀ŋgɔ̀ yà ama Yerzù

62O wɔ̀nɛyi wùnyà ema wò ma hwɛ ndi wùnyà wò lì àrzìyòlɛ̀, Ipìlìrzì ndɛnɛ nà Ihvàlìrzàyì i ma arzàŋganɛ rzìi i ɛ̀ndɛ lì ùŋmànɛ̀lɛ̀ Pìlatò. 63Rzìi hwa mò òhweyà nanù ema, “Rzàŋgò, jò ɔ̀ŋgɛ̀lɛ̀ nanù ema, e hvònda òŋgò mòtò ema à mà hwɛ lì kɔ hweyà à mà hwɛ lòŋgɛ à mà hwɛ lì òhwà nanù ema, ‘Lohwɛ̀ a nò hvùmùlɛ̀ ò mburzà mèenyà meyawò.’ 64O èŋgànɛ̀lɛ̀ akɛlɛ lìlò nanù ema eŋge rzɔ̀ŋgɔ̀ e ɔ̀ŋgɔ̀hwɛlɛ natɛ̀ɛ na wùùnya ema wò ùkirzɛ̀ menya meyawò, aŋga nanù Hwà-òkòwèlì hwa eni hwa rza ihwa èembè ye eni, rzìi hwa ja lì òhweyà hwatò nanù ema, à mà hvùmùlɛhwɛ ò kpelì. Ène eyà ya lì kɔ yò ò lòkɛ̀hwɛ lì aka hweyà wa eni hwe lì kɔ hwe wòrzò.” 65Pìlatò rzìi a hwa alàhwɛ̀ nanù ema, “È ɛndɛ e wòwe hwàanèlì hwa njuma hwa e ɔ̀ŋgeya eŋge rzɔ̀ŋgɔ̀ gbàamù, aŋga nanù tɔ̀ eyà e rza gbèyɛ̀nɛ.” 66O èŋgànɛ̀lɛ̀ rzɔ, wɔ̀ hwà mà ɛ̀ndɛ rzìi hwa ika embànèlì ò lìŋgi lìŋyàyi ema lì ma ikawa ò lì keka e wàna ya eŋge rzɔ̀ŋgɔ̀, aŋga nanù hwa hwiya ŋga mòtò a lìhvò eŋge rzɔ̀ŋgɔ̀. Hwà mà lìya hwaànelì wa njuma aŋga ò lì ɔŋgeya eŋge rzɔ̀ŋgɔ̀.

Obecnie wybrane:

Matiyò 27: bri

Podkreślenie

Udostępnij

Kopiuj