Matiyò 26

Ŋmanò mò lì òŋwà Yerzù

(Mak 14.1-2; Luk 22.1-2; Yòw 11.45-53)

1Nà òmà Yerzù à mà kulɛ̀ lì òhwa hwenè hweyà rzìi a òhweyà hwà-òkòwèlì hweni nanù ema, 2“È hwi nanù ema ò mèenyà mehwakɛ ema me hwèlì ò wòrzò, òma è ndèma yà lì Akà Ɔnɛyi e ma uka. O wòŋgò wùnyà ndi è Ŋmanà wà è Mòtò wà Hwènàmà a ò akɛlɛhwɛ ò màà mà hwatò ema hwa mò wòmeya ò mbarza.” 3O eŋge hvònda, Ipìlìrzì ndɛnɛ na hwatimbèlì hwa èkòmè hwa mà arzàŋganɛ ò è ndawò ya ama Kàyìhvàrzì, e Pìlìrzì ema e karzami. 4Aŋga ndi hwà mà hwɛ ò lì weka ŋmanò mò lì ŋgbaŋgɛ Yerzù ò jututa na ò lì mò òŋwa. 5Hwà mà kaka nanù ema, “I rza hwɛni lì gbeyà nanù ò wùnyà wò e ndèma èhwanja hwatò hwa ò jana lùwànje.”

Yerzù à Ɔ̀kirzɛ̀hwɛ̀yi ò Bɛ̀tanì

(Mak 14.3-9; Yòw 12.1-8)

6Yerzù à mà hwɛ ò ndawò yà ama Rzìmɔ̀nì mòtò ema à mà hwɛ à mà ɔ̀kìrzɛ̀ è nyàmbɛ yà mɔ̀lɔ̀ŋgɔ ò mbòwà yà Bɛ̀tanì. 7È hvònda ema Yerzù à mà hwɛ lì làa, mòlanà mɔ̀kɔ rzìi à mò jèeyà nà kòhwà yà lìyɔ̀kì là hvɛ̀ɛ̀hvɛ̀, lìyɔ̀kì ema lì andahwa wòlì rzayì-rzayì à mò kòmeya è lɔ̀ là arzɛ ò mòhvò mò eni. 8Nà òma Hwà-òkòwèlì hwa eni hwa mà ɛnɛ nanù rzìi hwa tàtà, rzìi hwa ijòwa nanù ema, “Mamɛ è hwèlì lìtiŋga là ene mbɔ̀lɔ̀nì e? 9Ò mà lìni lìyɔ̀kì lì àhwirzɛ̀hwɛ̀ mòrzurzèlì mò jɔ̀kɛ̀ rzìi iŋgi kahvà ì ŋgbàahwa mèlìrza mè hwatò.” 10Yerzù à mà hwiya mamɛ ema hwa mà hwɛ lì òhwa, rzìi à hwa ijòwa nanù ema, “Mamɛ ndeŋgatɛ è tàkìrzɛ̀ ònò mòlanà e? À nò gbèèlì ndi eyà yà gbamù. 11È ò òhva mèlìrza mè hwatò nà inyɔ ì hvònda jà arzɛ ndì è rza ò nò òhva imba ì hvònda jà arzɛ. 12Mɔ̀ à nò kòmi ndi lìnì lìyɔ̀ki ò mòhvò mò ami ò lì nò wòŋgirzɛnɛ hwèlàmèlì hwe ami. 13Nà è òhweyà nà è jɔ̀kɛ̀ nanù ema, tɔ̀ ima èki ema mònò Ŋmɛ̀ndì mò Gbamù mò òhwàhwa ò rze yà arzɛ, hwa ò òhwa enè eyà ema ònò mòlanà à gbèyi, ò lì mò ɔ̀ŋgɛ̀lɛ̀.”

Jùdàrzì à emelì lì àhwirzɛ̀ Yerzù

(Mak 14.10-11; Luk 22.3-6)

14Rzìi Jùdàrzì Ìrzìkalìyɔ̀tɛ̀ ema à mà hwɛ mɔ̀kɔ wa lìyòmɛ̀ la hwà-òkòwèlì na hwahwàkɛ hwa ama Yerzù, à mà ɛ̀ndɛ lì ùŋmanɛlɛ Ipìlìrzì ndɛnɛ, 15rzìi a hwa ijòwa nanù ema, “È hwèlì tɛ ema nà e àkɛ̀lɛ̀lɛ̀yì tɛ Yerzù ò lì mò ŋgbaŋgɛ, mamɛ e tànɛyi lì nò ŋgbà e?” Rzìi hwa mò tɛ̀tìrzɛ̀ rzayiyàwò ja hwɛ̀ɛkɛ̀ hwe rzilìwa. 16Lìwòteya eŋge hvònda ndi Jùdàrzì a mà wòteya lì arza ŋmanò ò lì hwa akɛ̀lɛ̀lɛ̀ Yerzù.

Yerzù à lelì mòlelì mò lì Akà Ɔnɛyi nà hwà-òkòwèlì hwa eni

(Mak 14.12-21; Luk 22.7-13,21-23; Yòw 13.21-30)

17O wùnyà wò wòrzò wò e Ndema yà Èhvòòtò ema e rza hwɛnɛyi Èhwindi Hwà-òkòwèlì hwa ama Yerzù rzìi hwa jà lì mò ijòwa nanù èma, “One ò arza nanù ema jò ò rzèkeya hwèlèèlì hwe è Ndèma yà lì Akà Ɔnɛ̀yi e?” 18Yerzù rzìi a hwa omà ò mà mòtò mɔ̀kɔ ò mbòwà ema hwa mò òhweyà nanù ema e Mòòkòlelì a òhwi nanù ema, “È hvònda yà ami e ma uka. O ndawò ya aŋgɔ̀ ndi imba na hwà-òkòwèlì hwa ami jò ò leeya mòlelì mò e Ndemà yà lì Akà Ɔnɛyi.” 19Hwà-òkòwèlì hwà mà gbeyà na òmà Yerzù a mà hwa òhweyà, rzìi hwa rzèkeya hwèlèèlì hwe è Ndèma yà lì Akà Ɔ̀nɛyi. 20Nà òma e ŋgòmbe ya lohwà e ma uke, Yerzù na lìyòme la eni la hwà-òkòwèlì na hwahwakɛ hwa lìya ò hweleelì. 21Nà òmà hwa mà hwɛ lì laa, Yerzù rzìi a hwa òhweyà nanù ema, “Nà e òhweyà na e jɔ̀kɛ̀ nanù ema, mɔ̀kɔ wa anyu a ò nò akɛlɛlɛ ò màà mà hwàkɔ̀yèlì hwa ami.” 22Hwà-òkòwèlì hwa ama Yerzù hwà mà tuwa mèèmà rzìi hwa wòteyà lì mò ijòwa mɔ̀kɛ-mɔ̀kɛ nanù ema, “Ìi Rzàŋgò na lòkɛ̀ nanù ema rzeketɛ imba ndi ò òhwàna e?” 23Yerzù rzìi à hwa alàhwɛ̀ nanù ema, “Mɔ̀kɔ wà anyu ema à tɔ̀tɔ ehvòòtò yà eni ò mɔ̀njɔ nà imba à ò nò àhwirzɛ̀. 24È Ŋmanà wà è Mòtò wà Hwènàmà à hwɛnì lì ŋwa nà òma è kààtì yà Lohwà è òhwi, è ò hwɛ màwɔ̀ŋgɔ̀ nà òŋgò mòtò ema à ò nò ahwìrzɛ. È mà lɔ̀wu ema òŋgò mòtò à rzìi ŋyahwe hvɛ tɔ̀.” 25Jùdàrzì è mɔ̀ ema à mà hwɛnɛ lì mò àhwirzɛ̀ mɔ̀ hvɛ rzìi à mò ijòwa nanù ema, “Ìi Mòòkòlèlì, imba e?” Yerzù rzìi à mò tìmbìrzɛ̀lɛ̀ nanù ema, “Nà òma ò òhwi.”

Lì làa là Rzàŋgò

(Mak 14.22-26; Luk 22.14-20; 1Kɔ̀ 11.23-25)

26Nà òmà Yerzù na hwà-òkòwèlì hwa eni hwà mà hwɛ lì làa Yerzù rzìi a wòwà ehvòòtò, a ŋgba Lohwɛ̀ jeka, à è kahwa à è ŋgba hwà-òkòwèlì hwa eni rzìi a òhwa nanù ema, “È wòwè e lèè e nyò ya ami ene.” 27Rzìi à wòwà hvɛ lìwònde, à ŋgbà Lohwɛ̀ jèka rzìi à hwa ŋgba è lɔ̀ à hwa òhweyà nanù ema, “Inyɔ hwa arzɛ è nyɔ.” 28Yerzù rzìi à hwa òhweyà nanù ema, “Màyìjà mà ami manù ema mà kòmèlì ò mèyòhvò mè rzayì-rzayì ja hwatò. Manù màyija mà hwèlì ndi màyija mà hweyi hvènya, nanù ema Lohwɛ̀ à hwa làkìrzɛ̀ wòhwe wò awu. 29Nà è òhweyà nanù ema, nà rza ò nyɔ hvɛ hwene hwènyɔ̀ɔ̀nì tɔ̀ wùnyà, natɛ̀ɛ wùùnya ema nà ò hwe nyɔ̀ɔ hvɛ hwe hvènya nà inyɔ ò lìkànèyà là ama Tatɛ̀ wà ami.” 30Hwà mà emba rzɔ mɔ̀rzɔ̀kɔ̀ mò jeka rzìi hwa ɛ̀ndɛ ò mòòlì mò Njàhwɛ̀.

Yerzù à mà òhwa nɛ Pètrò a ò mò rzɔ̀rzɔ̀

(Mak 14.27-31; Luk 22.31-34; Yòw 13.36-38)

31Nà òma hwà mà uke ò ŋmanyu ya mòòlì, Yerzù rzìi a òhweyà hwà-òkòwèlì hwa eni nanù ema, “O wònò wuu mɛnɛ, inyɔ hwa arzɛ e ò hwaŋga ò lì nò lìya. È ò hwaŋga èhwanja ò mamɛ ema e ò nò gbèyɛ̀nɛ. È tìlahwì ò kààtì ya Lohwà nanù ema, ‘Nà ò òŋwa e mɔɔŋgelì wa mɛ̀lɛ̀ŋgù ndèŋgànà mɛ̀ɛlɛ̀ŋgù me arzɛ me ò wuhweyà. 32O mburza lì hvùmùlɛhwɛ la ami ò kpelì, na ò ɛndɛ ò wòrzò wò anyu ò lì kpèeyà ò mbòwa ya Galìlì ema e ò nò ùŋmànɛ̀lɛ̀.’” 33Nà òma Yerzù à mà kulɛ̀ lì òhwa nanù, Pètrò rzìi à mà alàhwɛ̀ nanù ema, “Tɔ̀ è hwɛ ndi ema hwanɛ̀yi hwa arzɛ hwa ò rzɔ̀rzì imba nà rza tànɛyi nà ò rzɔ̀rzɔ̀.” 34Yerzù rzìi à òhweyà Pètrò nànù ema, “Ìi Pètrò, nà è jɔ̀kɛ̀ wònò wùu mɛnɛ ndèŋgànà è mòmɛ̀ wà wuhwà à è tòŋga ò nò rzɔ̀rzɔ̀ ŋgelì iyàwò.” 35Pètrò rzìi à alàhwɛ̀ nanù ema, “Tɔ̀ è hwɛ ndi nanù ema nà hwɛni lì ŋwa nà ò wà nà rza tanɛ lì ò rzɔ̀rzɔ̀.” Hwanɛ̀yi Hwà-òkòwèlì hwa arzɛ wɔ̀ hvɛ hwa mà òhwa ndi nanù mɛnɛ.

Yerzù à kànɛ̀ ò Gɛ̀trzɛ̀mànì

(Mak 14.32-42; Luk 22.39-46)

36O mburza nanù Yerzù na Hwà-òkòwèlì hwa eni hwà mà ɛndɛ ò èki ema e ma hwɛ̀lɛ̀hwɛ̀ Gɛtrzɛmani. Nà òma hwà mà uke aŋga, Yerzù rzìi a hwa òhweyà nanù ema, “È lìya anù na tòmba ɔ̀nɛyi wate ò lì kanɛ̀.” 37Yerzù à mà wòwa Pètrò nà hwàànà hwa wunyanà hwa ama Rzɛ̀bɛ̀dì hwahwàkɛ. A ma ònda ndùtù na mòtaka ò ŋmèma. 38Yerzù rzìi a hwa òhweyà nanù ema, “Ŋmemà mò ami mò òndi na ndùtù ema e tànɛyi lì nò òŋwa. È lìya anù è lìya ò ehvɛ̀nyɛ̀ nà imba.” 39Yerzù à mà tòmba ŋmanà hvòkà teŋyi, rzìi à ahvimbɛ nà lùùŋgà ò rze, rzìi à kanɛ̀ nanù ema, “Ìi Tatà wà ami, è hwèlì tɛ ema è tànɛyi tɛ lì gbèyɛ̀nɛ, ò nò ulɛ̀ ò tenì yà mònò mòtàkà. Ndi tɔ̀ nanù gbeyà ndi mamɛ è ò lɔ̀ɔ̀nì ndi rzeketɛ nà òma imba nà àrzeyà.” 40Nà òma à kùlɛ̀ lì kanɛ̀, rzìi à tìmbeya hwaŋga Hwà-òkòwèlì hwa eni hwààyɛ̀. À hwa ùŋmanɛlɛ ema hwa lìmelì ndi ò ijɔ, rzìi à ijòwa Pètrò nànù ema, “È rza tanɛ tɔ̀ lì nò àyinjɛ̀lɛ̀nɛ̀ tɔ̀ awa hvɔ̀kɔ e? 41Lìya èhvɛnyɛ, kanɛ̀ aŋga nanù Lohwɛ̀ a rza emeyà ema màkèkìrzɛ̀nɛ̀ mò ò jèeya. Ŋmèma mò lìŋgàni, ndi e nyàmà ya nyò e ɔ̀tɔ̀.” 42Yerzù a tìmba hvɛ ò lì kanɛ̀ rzìi a òhwa nanù ema, “Ìi Tatà wa ami, e hwèlì tɛ ema ò rza tanɛ lì nò wòwàna mònò muna mò mòtàkà ema na rzi mò hwanɛ inyɛ lì emeyà lì aŋgɔ̀ lì gbèyɛ̀nɛ.” 43A ma tìmba hvɛ rzìi a ùŋma hwaŋga hwà-òkòwèlì hwa eni hwa lìmelì ndi ò ijɔ, èhwanja hwà mà òhva ijɔ ò mìirzɔ̀ ma awu rzayi-rzayi. 44Yerzù à mà hwɛmɛ hvɛ hwaŋga hwà-òkòwèlì hwa eni hwaayɛ, rzìi a tìmba hvɛ ò màkanɛ̀ e ŋgelì ema e ma ùkirzɛ̀ iyàwò, rzi a òhwa mòlemilemi mò mbɔrzi ò màkanɛ̀. 45Rzìi à jèeyà hvɛ Hwà-òkòwèlì hwa eni hwaayɛ a hwa òhweyà nanù ema, “È lìmelì ndi ò ijɔ nanù mɛnɛ na lì Arzìyòlɛ̀ e? È ɔ̀ŋgɔ tɛ! È hvònda ene ema è Ŋmanà wà è Mòtò wà Hwènàmà a ò ŋgbààhwà ò màà mà hwatò hwa wòhwe. 46È tɛ̀mɛ̀ je ɛ̀ndɛ. È ɔ̀ŋgɔ tɛ, e mòtò ema à mà màa lì nò àhwirzɛ̀ mɔ̀ ò nò a jà.”

Hwèŋgbàŋgèlì hwe ama Yerzù

(Mak 14.43-50; Luk 22.47-53; Yòw 18.3-12)

47Nà òma Yerzù à mà hwɛ lì òhwa, Jùdàrzì Ìrzìkalìyɔ̀tɛ̀ mɔ̀kɔ wa eni hwa Lìyòmɛ̀ là Hwà-òkòwèlì nà hwahwàkɛ, à mà jà nà è ŋgindi ndɛnɛ yà hwatò ema hwa mà òhva ì rzɔ̀lɔ̀, nà hweeye hwa mà òmahwa ndi nà Ipìlìrzì ndɛnɛ nà hwàmbaki hwa mbòwà. 48È ŋmahwirzelì à mà hwɛ à mà màa lì hwa rzèkeya èmɛ̀nɛ̀nì nanù ema, “È mɔ̀ ema na arzàŋgànɛ̀lɛ̀ mɔ̀ òŋgò. È mò ŋgbaŋgɛ.” 49Liwòkimɛnɛ, Jùdàrzì rzì a ɛndɛ ò ma Yerzù rzìi a òhwa nanù ema, “Ɛ̀yɔ̀lɛ̀ e hwɛ na ò wa Mòòkòlèlì,” a mò arzàŋgànɛ̀lɛ̀. 50Yerzù rzìi a mò alàhwɛ̀ nanù ema, “Ìi ŋmàyi ɛ̀ndɛ ò wòrzò gbeyà mamɛ ò jɛlɛlɛ.” Hwaŋga hwatò rzìi hwa jà, hwà mà hvɔ̀ɔtɔ̀ Yerzù, rzìi hwa mò lɛmbɛ kɛlɛtɛ. 51Liwòkimɛnɛ, mɔ̀kɔ ema à mà hwɛ nà Yerzù à mà ɔ̀mɔ è rzɔ̀lɔ̀ yà eni à rzenjòwa lìtò là ama è mòkòmè wà ama è Pìlìrzì e karzami. 52Yerzù rzìi à mò òhweyà nanù ema, “Timbirzɛ è rzɔ̀lɔ̀ yà aŋgɔ̀ ò ekpa yà rzɔ̀lɔ̀, tɔ̀ ima mɔ̀ ema à ana nà rzɔ̀lɔ̀, rzɔ̀lɔ̀ ndi hwa mà òŋwàna. 53O rza hwi nanù ema, na tànɛyi lì hwɛlɛ e Tatɛ̀ wa ami ò lì nò òŋgòwànà, ndèŋgànɛ̀lɛ̀ ò lìwòkimɛnɛ a nò òmeya lì aka lìyòme la matutà mà aŋgèlì nà mà hwàkɛ e? 54Ndi na gbe tɛ nanù, nɛ rzɔ na hweyòhwèlì hwe e kààtì ya Lohwà ema e òhwa nanù ema ene e ò gbèyɛ̀nɛ e òndìrzɛ̀hwɛ e?” 55Yerzù rzìi a ijòwa eŋge ŋgindi nanù ema, “Nà hwèlì ndi ŋmìhwɛ̀ ema e jelì lì nò ŋgbaŋgɛ na hweeye na irzɔ̀lɔ̀ e? Mamɛ ndeŋgatɛ e rzi nò ŋgbaŋgɛ e hvònda ema nà mà hwɛ lì òkòlɛ̀ wùnyà tɛ ò e Ndawò yà Lohwà e? 56Ndi hwenè hwe arzɛ hwe ma gbèyɛ̀nɛ ò lì òndìrzɛ̀ mamɛ ema hwà-òhwèlì hwa hwèlìŋgɛ hwà mà tile ò e kààtì ya Lohwà.” Rzìi Hwà-òkòwèlì hwa arzɛ hwà mà mò rzɔnjɛ̀lɛ̀ rzìi hwa hwàŋga.

Hwà mà kàyìrzɛ̀ Yerzù

(Mak 14.53-65; Luk 22.54-55,63-71; Yòw 18.13-14,19-24)

57Hwàŋga ema hwa mà ŋgbaŋgɛ Yerzù hwa mà mò ɛ̀ndɛnɛ ò è ndawò yà ama Kàyìhvàrzì è Pìlìrzì ema è kàrzamì. Aŋga ndi Hwà-òkòlèlì hwa mbenda nà hwàmbaki hwa mbòwà hwa mà arzàŋganɛ. 58Nà òma hwa mà wòwe Yerzù, Pètrò hvɛ à mà mò nɔ̀ŋgɔ ò mburzà ŋmanà hvòka natɛ̀ɛ hwa mà jà lì kòmbɛnɛ èwòka yà ama Kàyìhvàrzì. À mà kpèeyà rzìi à lìya nà hwà-ɔ̀ŋgèlì hwa è Ndawò yà Lohwà ò lì ɔ̀ŋgɔ nɛ mòŋgò ŋmaŋgò mò ama Yerzù mò kuweya. 59Ipìlìrzì ndɛnɛ nà hwanɛyi hwèkàyìrzèlèlì hwa arzɛ hwà mà keka lì arza hwatò ema hwa hwà tɛmeya mbòŋgi ja mòlàŋgà lì hvòmɛ̀nɛ̀ Yerzù aŋga nanù a ò òŋwahwa. 60Ndi hwa rzìi mò lùwane tɔ̀ njɔ̀mi tɔ̀ nɛ rzayì-rzayì ja hwatò hwà mà tɛ̀mɛ̀ mbòŋgi ja mòlàŋgà. O lìrzukù rzìi mbòŋgi ja mòlàŋgà ihwakɛ i wurza rzìi jò òhwa nanù ema, 61“Onò mòtò à mà òhwa nanù ema, ‘Mɔ̀ à tànɛyi lì wuulɛ ene Ndawò yà Lohwà rzìi à e òŋga hvɛ ò ìtììtènì ja mèenyà meyawò.’” 62Nà òma e Pìlìrzì e karzami e ma hweye nanù, e tɛ̀mɛ̀ ò ŋmanyu rzìi a ijòwa Yerzù nanù ema, “O rza òhvi tɔ̀ eyà ya lì òhwa ò lì alàhwɛ̀ mamɛ ini mbòŋgi jò òhwa ò lì ò teŋgɛ̀nɛ̀ e?” 63Ndi Yerzù à mà andama e ye eni ŋmɛɛ. È Pìlìrzì e karzami e ma mò òhweyà hvɛ nanù ema, “O lìinà la ama Lòohwà ema lì hwèlì lòŋgɛ, na ò kànèlì na yòmbò ema ò jò òhweyà ŋga ò wa ndi ò hwèlì è Mɔ̀ ema à Ɔ̀kirzɛ̀hwɛ̀yi, è Ŋmanà wà ama Lohwà e?” 64Yerzù rzìi à mò tìmbìrzɛ̀lɛ̀lɛ̀ nanù ema, “Nà òma ò òhwi. Nà è jɔ̀kɛ̀ imba nà è òhweyà inyɔ hwa arzɛ ema, lì wòteyà naŋgɛ è ɛnɛ̀ è Ŋmanà wà è Mòtò wà Hwènàmà à lìya ò lìyà là mòmɛ̀ là ama Lohwɛ̀ lì karzami. È ɛnɛ̀ nɛ à ò lììya ò ŋmanyu yà mbàkì a rzìhwà ò rze yà mɔ̀nyɛ̀.” 65Aŋga ndi e Pìlìrzì ema e karzami ya a nyààhwà mààtù ma eni ò lì uŋmɛ̀lɛ̀ nanù ema a tàti rzìi a òhweyà hwatò hwa e ndawò ya hwèkàyìrzèlèlì nanù ema, “A òhwi ndi ìrzìlàkò! Mamɛ ja àrzeyà hvɛ ehvɛhvɛ mbòŋgi e? Inyɔ hwa arzɛ e hweyi na òma a òhwàna ìrzìlàkò!” 66Rzìi à hwa ijòwa nanù ema, “Mamɛ inyɔ hvɛ e ɔ̀ŋgɛ̀lɛ̀ e?” Wɔ̀ hvɛ hwa tìmbìrzɛ̀lɛ̀lɛ̀ nanù ema, “A tùu ŋmaŋgò ò èŋgànɛ̀lɛ̀ rzɔ, a kànɛ̀ lì ŋwa.” 67Lòŋgò la hwatò rzìi hwa wòteyà lì mò rzɔ̀yeya hweyɔlì ò wòrzò wò eni, na lì mò tiyà. Lòŋgò hvɛ hwà mà hwɛ lì mò rzama màwumbɛ, 68hwà mà hwɛ lì òhwa nanù ema, “O wa ema ò òhwa nanù ema ò hwèlì ndi è Mɔ̀ ema à Ɔ̀kirzɛ̀hwɛ̀yi, ò jò òhweyà e mòtò ema a ò hvahvi.”

Pètrò à rzɔ̀rzì Yerzù

(Mak 14.66-72; Luk 22.56-62; Yòw 18.15-18,25-27)

69Nà òma Pètrò à mà lìya aŋga èwòka, rzìi mògbèèlì mɔ̀kɔ wà ŋgɔ̀ndɔ̀ wà ama è pìlìrzì è kàrzamì è mò jèeyà, rzìi à mò òhweyà nanù ema, “Ò hwèlì ndi mɔ̀kɔ hwa hwaŋga hwatò ema hwa ɛ̀ndɛ̀lɛ̀nɛ̀ nà Yerzù òŋgò munyanà wà erzòòkà yà Galìlì” 70Pètrò à mà rzɔ̀rzɔ̀ ò marzò mà wɔ̀ hwa arzɛ rzìi à òhwa nanù ema, “Nà rza hwi mamɛ inyɔ e òhwa hvɛ tɔ̀.” 71Aŋga ndi à anjiya aŋgà rzìi à ɛ̀ndɛ lì kòmbɛ̀nɛ̀ hwèkpèèlì hwe è kɔ̀tɔ̀ yà eŋge ewòka rzìi ò hvɛhvɛ mògbèèlì wà ŋgɔ̀ndɔ̀ à mò ɛnɛ rzìi à òhweyà hwatò ema hwa mà hwɛ aŋga nanù ema, “Onò mòtò à mà hwɛ nà Yerzù è mòtò wà è mbòwa yà Nàrzarɛ̀tì.” 72Pètrò à mà rzɔ̀rzɔ̀ hvɛ rzìi à òhwa nanù ema, “Nà ààtɛ̀ ema nà rza hwi òŋgò mòtò.” 73Ò ŋmanà hvòka hvònda hwaŋga hwa mà tɛ̀mɛ̀ aŋga hwa à gbèeyà Pètrò rzìi hwa òhwa nanù ema, “Ò kɔ̀ɔ̀ ndi hweyà hwe ŋgundu, ò jɔ̀kɛ̀ ò hwèlì ndi mɔ̀kɔ ema à mà nɔ̀ŋgɔ òŋgò mòtò. Èhwanja hweyòhwèlì hwe aŋgɔ̀ hwe ò wulu nanù ema ò uhwɛlɛlɛ ò erzòòkà yà Galìlì.” 74Pètrò rzìi ààtɛ̀ nanù ema, “Nà rza hwi ònò mòtò. Inyɛ̀ Lohwɛ̀ à nò kɔ̀kìrzɛ̀ è hwèlì tɛ ema nà kɔ̀ɔ̀ ndi hweyà!” Liwòkimɛnɛ è mòme wà wuhwà rzìi à tòŋga. 75Pètrò rzìi à ɔ̀ŋgɛ̀lɛ̀ jòòhwì ema Yerzù à mà mò òhweyà nanù ema, “Ndèŋgànà è mòme wà wuhwà à è tòŋga, ò nò rzɔ̀rzɔ̀ ŋgelì iyàwò nanù ema ò rza nò hwi.” À mà wurza ò èwòka rzìi à eyà ije-ije.

Obecnie wybrane:

Matiyò 26: bri

Podkreślenie

Udostępnij

Kopiuj