Tuuma 13

Ba bo' Banabase la Sɔɔl tuunɛ

1Antiyoke sakereba lageŋɔ la puan, nɔtɔgeheba la pa'aleba n boi bini. Banabase, Simeyɔn se'em ti ba yi'ira Naiga la, dikɛ Lusiyuse n yehe Saarin, Manayin n de Naba Hɛrɔd kiima ayima la, nyaa dikɛ Sɔɔl. 2Daarɛ deyima ti ba bɔna Daana la na'ahegɔ puan la nɔlurɛ, ti Fa'a Sia la tɔgɛ yeti, “Yehe ya Banabase la Sɔɔl ze'ele bo' tuunse'ere ti mam yi' ba ti ba tum la.” 3Ti ban ta ba'ahɛ nɔlurɛ la pu'uhegɔ la, ba digehɛ la ba nu'uhi pagelɛ Banabase la Sɔɔl zuo gee bahɛ ba ti ba kiŋɛ.

Yezu tuntuneba la muulɛ Yelehum la Sapuruse

4Bala, Fa'a Sia la n tum ba ti ba yehe la, ba kiŋɛ Kilikiya, ze'ele bilam zom uureŋɔ kaaɛ Sapuruse. 5Ban ta paaɛ Salamise tiŋa la, ba muulɛ Yinɛ yelehum la mɛ Yuuduma zamehegɔ yire la puan. Ti Yɔn bɔna lagum suŋɛ ba. 6Ban doohe tiŋa la n boi ko'om tiŋasuka la za'a ta paaɛ Pafose la, ba tu'uhɛ la tiim daana ayima n de Yuda buuri nɔtɔgehe pumparema, ti ba yi'ira en Baa-Yezu. 7A boi mɛ la nɛŋa daana Segiyose Pɔɔlusi, en de mi'ilum daana yi' Barabase la Sɔɔl, bɔta ti a wum Yinɛ yelehum la. 8Gee tiindaana Elymas (a yu'urɛ la vuurɛ n bala), eŋa ka sakɛ bo' ba, gee zigera ti a tee nɛŋadaana wa puti'irɛ yehe sakerɛ la puan. 9Gee Sɔɔl me, se'em ti ba tee yi'ira Pɔɔl la, pirɛ la Fa'a Sia la bihɛ en zii 10gee yele en yeti, “Sagena dayua wa, fum se'em n zaberɛ la tuuntɔɔ vom wa. Fum pirɛ mɛ la pa'ahegɔ la ŋmɛlema ma'a. Fum kan bahɛ fum dole ŋmɛlena Daana tuuntɔɔ sɔya wa? 11Nananawa kelehe, Daana la nu'o n zaberɛ la hɔ, fum wan fɔ pun kan nyɛ yintule wa ta paaɛ saŋa kayima.” Bilam bilam ti puuhego la lika pi' en ti a tu'una, ɛɛra nɛra gurɛ a nu'o. 12Gee nɛŋadaana wa n nyɛ sɛla n iŋɛ la ti a nam yelehum la se'ere n sɔi la Daana la pa'alegɔ la iŋɛ en la pakerɛ paaɛ paaɛ.

Pɔɔl la Banabase boi Pisidiya Antiyoke

13Ti Pɔɔl la a tuntuna tadaana wa zom uureŋɔ Pafose wa'am na paaɛ Piga en boi Pamfiliya puan. Gee Yɔn bahɛ ba mɛ gee lebe Yerusalɛm, 14gee ti bamam ze'ele Piga wa'am na paaɛ Antiyoke n boi Pisidiya puan. Ti vo'ohego daarɛ ti ba kɛ̃ zamehegɔ yire la puan, ta zi'ire. 15Ban kãalɛ Moose la nɔtɔgeheba ze'elego gɔŋɔ la puan ba'ahɛ la, ti zamehegɔ yire la puan kpɛ'ɛnduma la tum yele ba na yeti, “Tu suurɔ wa, Ya han tara kpemehego seko ti ya bo' nɛreba wa, bo' ya na.” 16Ŋwana ti Pɔɔl ihege ze'ele suŋa, gee pɔhɛ tugum yeti, “Yamam Izirale buuri, la yamam sɛba woo n zoti Yinɛ, kelehe ya. 17#Yɛh 1.7; 12.51 Yinɛ se'ere n sɔi Izirale buuri wa la, yuum looe la tumam sɔyaabeduma, gee iŋɛ Izirale buuri wa ti ba dɛna nɛrekãreba ban yuum nan boi Igipiti puan la. Ti Yinɛ mɛŋa zɛkɛ a nu'o tari ba ze'ele Igipiti la puan yehe na, 18#Kãl 14.34; Tii 1.31 bɔna la ba muuen di'iha suure la ba, ta paaɛ wuu yuum pihinaahi. 19#Tii 7.1; Yos 14.1 Ti Yinɛ ta sagum tihi siyopɔi nɛreba za'a, Keenan sɔ'ɔlum puan, gee nyaa dikɛ ba tihi la bo' Izirale buuri wa ti la dɛna ba sɔ'ɔlum, 20#Kiin 2.16; 1 Sam 3.20 yele ana woo n pi'ilum wa'am na paaɛ zina de wuu yuuma kɔbehi sinaahi la yuum pihinuu. Bilam n tole la, ti Yinɛ wa bo' ba kima ti ba biha ba, tara tara ta paaɛ nɔtɔgeha Samuwɛle saŋa. 21#1 Sam 8.5; 10.21 Saŋa kana puan ti Izirale buuri soke ti bamam boti la Naba, ti Yinɛ yehe Sɔɔl n de Kis dayua, n yehe Benyamin buuri puan bo' ba, ti a bihɛ ba yuuma pihinaahi. 22#1 Sam 13.14; 16.12; Yoo 89.20 Yinɛ n ta fooe Sɔɔl la, a tee dikɛ la Deviti zi'ire na'am kuka la zuo. Yinɛ n wa yeti a tɔgɛ Naba Deviti yele la, a yeti, ‘Mam nyɛ Yesi dayua Deviti wa ti a dɛna la se'em ti mam suure kɛ̃ paaɛ paaɛ, a wan ta'am tum mam sumboolum n de se'em la.’ 23Buraa kana wa yaahi puan ti Yinɛ doohe tari faara la n de Yezu wa'am Izirale puan na wuu en yuum biŋe a nuurɛ se'em la. 24#Mak 1.4; Luk 3.3 Faara la kinɛ na la, ti Yɔn pun diŋɛ nɛŋa wa'am na tɔgɛ suteere ko'om sua yele bo' Izirale buuri la mɛ za'a. 25#Mat 3.11; Mak 1.7; Luk 3.16; Yɔn 1.20, 27 Yɔn n wa pɔra a tuuma la ba'ahegɔ la, a yele a nɛreba la yeti, ‘Yamam ti'ihɛ mam dela ani? Mam dagi se'em ti ya gura la. Aayi, eŋa ye' la mam pooren na. Mam ka seke n zãla a nama tagera.’

26“N suurɔ wa, Aberaham yireduma yaahi wa, la yamam sɛba n zoti Yinɛ wa, Yinɛ tum faarɛ yelehum buna wa bo' la tumam na. 27Gee sɛba n ki'ire Yerusalɛm la la ba nɛheduma la daa ka baŋɛ en, bii nɔtɔgeheba la yelehum la ti nɛreba daa kãala pa'ala ba vo'ohego dabeherɛ woo puan la. Ba tugum daa bahɛ ti yelehum buna wa niiɛ la asira na, doohe la ban gakɛ en gee ku en la. 28#Mat 27.22-23; Mak 15.13-14; Luk 23.21-23; Yɔn 19.15 La ban daa pun ka nyɛ yele se'ere ti ba wan ze'ele de zuo ku en la, ba daa kelum yele Palete mɛ ti a bahɛ ti ba ku' en. 29#Mat 27.57-61; Mak 15.42-47; Luk 23.50-56; Yɔn 19.38-42 Ban doohe tum sɛla woo n gulehɛ a yele se'em ba'ahɛ la, ba yakɛ en mɛ tia la zuo, tari en ta laaɛ yɔɔ puan. 30Gee Yinɛ vo'e en mɛ kum la puan, 31#Tuum 1.3 Ti a niiɛ a mɛŋa dabeha kekeko pa'alɛ sɛba n doohe la en ze'ele Galilii ta paaɛ Yerusalɛm, bamam n nyaa de aze' nyɛ duma boi a nɛreba. 32#Yoo 2.7 Tumam tari la yelesuma la wa'am na, ti sɛla ti Yinɛ yuum biŋe a nuurɛ la tu yaabeduma la, 33a tum dɛ bo' la tumam n de ba kɔma la, doohe la n ihege Yezu a kum la puan wuu lan gulehɛ se'em bɔna yuuma gɔŋɔ zuo buyi' puan se'em la. La gulehɛ yeti,

‘Fum dela mam Dayua,

Zina mam dɔgɛ hɔ.’

34 # Aza 55.3 En tɔgɛ se'em doohe en wan vo'e en a kum la puan ti a kan le lebe pu'urɛ puan.

‘N wan bo' fum tuulum yɛla la sum sebo ti n biŋe nuurɛ la Deviti ti n bo' la.’

35 # Yoo 16.10 Bala zuo la, a le yele yuuma gɔŋɔ la puan ze'a kayima yeti,

‘Fum kan bahɛ ti fu tuulum nɛra la pɔ'ɛ.’

36Naba Deviti n daa ta tum a Yinɛ la n boti a tum a mɛŋa saŋa la puan ba'ahɛ la, a ki mɛ, ti ba pi' en lɛm a yaabeduma, ti a pɔ'ɛ. 37Gee eŋa se'em daana ti Yinɛ vo'e en kum puan la ka makɛ pɔ'ɛ. 38Bahɛ ti n yele ya ti ya baŋɛ zina n suurɔ, ti la doohe la buraa kana Yezu Kiresta wa puan, ti tu muula sugeri dia yelehum wa bɔ'ɔra ya wa la. 39Doohe la Yezu wa zuo se'em woo n nam wan nyɛ faarɛ a be'em sebo woo puan. Be'em sebo woo ti Moose pa'alegɔ la daa kan ta'am faaɛ ya bu puan la. 40Bala zuo, bihɛ ya suŋa ti sɛla ti nɔtɔgeheba la purɛ biŋe la da sige ya zuo. La yeti,

41 # Hib 1.5 ‘Bihɛ ya, Yamam sɛba duma n ka dikɛ Yinɛ yelehum yi' sɛla wa,

Bahɛ ti la iŋɛ ya pakerɛ ti ya bahɛ yoo,

se'ere n sɔi la, mam tuni mɛ ya vom dabeha wa puan.

N tuni la tuunsɛ'a ti ya kan malum sakɛ, nɛra han pun yele ya.’ ”

42Pɔɔl la Banabase en ta yɛ'a yɛha la, ti nɛreba la bɛlena ba yeti, ba daan tɔgɛ yele ana mɛa bo' ba vo'ohego dabeherɛ se'ere n kini na la. 43Ban ta ba'ahɛ lageŋɔ la zamehegɔ yire la puan la, Ti Yuda buuri la zo'e zo'e la sɛba n kaabɛ ba mɛhi bo' Yuda pu'uhegɔ la dɔla Pɔɔl la Banabase poore, ti ba tɔgera bɔ'ɔra ba gee kpɛmeha ti ba kelum bɔna Yinɛ zu'uhegɔ la puan.

44Vo'ohego dabeherɛ la en le ta paaɛ la, la ŋwani ti tiŋa la za'a nɛreba n wa'am na ti ba kelehe Daana la yelehum. 45Gee Yuuduma la n nyɛ nɛrekuuŋɔ la, nyuure n kɛ̃ ba, ti ba pɔhɛ tuura, gee zɛregera Pɔɔl n tɔgɛ se'em la. 46Ti Pɔɔl la Banabase tɔgɛ la buraanɛ yele ba yeti, “La nari mɛ ti ba muulɛ Yinɛ yelehum la bo' yamam yia. Gee yamam n zagehɛ ka nam bu la, gee gakɛ ya ti yamam ka nari vom kamba'ahɛ wa la, tu nyaa ŋmɛregera lɛbera la sɛba n dagi Yuda buuri la zi'an. 47#Aza 42.6; 49.6 Ŋwana wa la zuo, Daana pun bo' tumam a nuurɛ mɛ yeti,

‘Mam iŋɛ ya ti ya dɛna la niihum bo' sɛba n dagi Yuda buuri la,

Ti ya bahɛ ti faarɛ paaɛ timpaberɛ wa zi'an woo.’ ”

48Sɛba n dagi Yuda buuri la n wum ŋwana la, ba pee puurɛ mɛ, ti ba pɛgera Daana la yelehum la. Bama sɛba ti ba pun maahum ti ba nyɛ vomkan ba'ahɛ la bamam en nam. 49Yinɛ yelehum la n yiregɛ zi'an la puan se'em n bala. 50Gee Yuuduma la doohe mɛ dɔrɛ pɔge se'ehi en kaabɛ si mɛhi bo' pu'uhegɔ la, mina si nɛŋa si poore la, la buraahi se'ehi n de zuto duma tiŋa la puan la, ti ba gbirege Pɔɔl la Banabase, sa'ɛ ba yehe tiŋa la puan. 51#Mat 10.14; Mak 6.11; Luk 9.5; 10.11 Ŋwana ti Pɔɔl la Banabase kpa'ahɛ ba nama puuhego bahɛ ti la dɛna yele bo' tiŋa la, gee nyaa kiŋɛ Ikonium tiŋa. 52Ti Yezu zahereba la pirɛ la nyɛɛma la Fa'a Sia la.

Obecnie wybrane:

Tuuma 13: GBTP

Podkreślenie

Udostępnij

Kopiuj