Tuuma 14

Pɔɔl la Banabase boi Ikonium

1Bala mɛa n le iŋɛ, Ikonium puan, zi'an ti Pɔɔl la Banabase kiŋɛ ta kɛ̃' Yuuduma zamehegɔ yire la puan, muulɛ Yinɛ yelehum la paaɛ paaɛ ti Yuuduma la Girikiduma zo'e zo'e nam yelehum la. 2Gee Yuuduma sɛba n ka nam yelehum la dɔrɛ sɛba n dagi Yuda buuri la, tu'ule ba puti'ira la suurɔ la. 3Ŋwana zuo, ti Pɔɔl la Banabase yee tiŋa la puan yuue, tɔgera Daana la yelehum la ninmu'urɛ, ti Daana la mɛŋa bahɛ ti a tuntuneba la tuna daalehum la nyalema la ba nu'uhi ti la pa'alɛ ti zu'uhegɔ yelehum la dela eŋa yelehum. 4Gee tiŋa la nɛreba zo'e zo'e welehi mɛ buyi, ti basɛba pa' Yuuduma la n ka sakɛ yelehum la poore, ti basɛba me pa' Yezu tuntuneba la poore. 5Ti sɛba n dagi Yuuduma la Yuuduma la ba kima za'a, la n ta maahum ti ba iŋɛ ba sɛla en ka ani suŋa gee lobe ba la kuga la, 6ti Yezu tuntuneba la baŋɛ de yele, zɔ kiŋɛ Lisetira la Dɛɛbi n de Likoniya tinkãtɛ la puan, la tihi se'ehi n boi kɔrum kɔrum la puan. 7Bilam ti ba ta bɔna gee muula faarɛ yelehum la.

Pɔɔl la Banabase boi Lisetira la Dɛɛbi tihi puan.

8Lisetira puan, buraa n boi bini dɛna kɔɔreŋɔ ka dɔgum puan na, ka malum kiŋɛ. 9Ti buraa kana mɛa wa zi'a kɛleha Pɔɔl n tɔgeri la kpiri. Ti Pɔɔl ta biha en zii, ta baŋɛ ti buraa wa tari sakerɛ ti a wan nyɛ a tibegɔ, 10ti Pɔɔl yele en paŋa paŋa yeti, “Ihege ze'ele fum nama zuo.” Ti buraa wa ɛkɛ ze'ele, pɔhɛ kina kaara. 11Nɛrekuuŋɔ la n nyɛ Pɔɔl en tum se'em la, ti ba woole kpim Likoniduma yetɔgum puan yeti, “Tingama n lebege nɛreba wa'am tu zi'an na.” 12Ti ba sigɛ Barabase ti Zeyusi, gee sigɛ Pɔɔl ti Hɛmese, se'ere n sɔi la, eŋa n boi nɛŋa la tugum la. 13Ti tindaansɛka n kaaberi Zeyusi wa la bagerɛ bɔ'ɔ la kɔ'ɔm pɔra la tiŋa la kinkɛleŋa, ti a tari lɔlehi la mɔpuuro na, ti eŋa la nɛrekuuŋɔ la maahum ti ba kaabɛ ba. 14Yezu tuntuneba Banabase la Pɔɔl n ta wum ŋwana la, ba aahum la ba futo, gee zɔ gɛregɛ nɛreba la puan ha, tahera yeti, 15#Yɛh 20.11; Yoo 146.6 “Tu zɔduma wa, ŋwani ti ya ita ŋwana? Tumam dela nɛresaaleba wuu yamam la, tara la yelesuma wa'am na muula bɔ'ɔra ya ti ya ŋmɛregɛ ya puti'ira yehe yeleyotuna wa puan, gee wa'am Yinɛ vua wa ze'a na, se'em n naam saazuo la tiŋa wa, la ateko wa la sɛla woo n boi ba puan la. 16Buuri saŋa se'ehi n tole ha la, ti Yinɛ yuum bahɛ ti tihi woo ita ban boti se'em, 17gee la bala za'a, aze' nyɛ duma boi mɛ Yinɛ itesuŋɔ seko ti a ita doohe n baheri ti saa zɛ'ɛta saazuo na niira bɔ'ɔra ya, ti yuuma dɛna yuumsuma, ti a tigeha tɔ tu dia ti ya suya pirɛ la nyɛɛma.” 18La Pɔɔl duma n pun tɔgɛ yetɔge buna za'a la, bu ka nyaŋɛ la pika pika me, ta'am gu' nɛrekuuŋɔ la ti ba da kaabɛ ba.

19Gee Yuuduma basɛba n ze'ele Antiyoke la Ikonium tihi puan na, tɔgɛ nyaŋɛ ti nɛrekuuŋɔ la ti ba pa' ba poore. Nyaa lobe Pɔɔl, vuue en yehe tiŋa la yiŋa ha ta bahɛ ti'iha ti a ki mɛ. 20Gee zahereba la n lagehɛ kaaɛ en la, a ihege mɛ kiŋɛ kɛ̃ tiŋa la puan, ti yiimbeere ti eŋa la Banabase kiŋɛ Dɛɛbi.

Antiyoke lɛbega.

21Ban muulɛ yelesuma la tiŋa la puan ba'ahɛ la, ti nɛreba zo'e zo'e nam yelehum la, ba lebe la Lisetira, ze'ele bilam tole Ikonium nyaa ta tole Antiyoke. 22Ba doohe malum kpe'em zahereba la gee kpemehe ba ti ba bɔna ba sakerɛ la puan, yɛta ba yeti, “Tu wan doohe la namehegɔ zo'e zo'e puan gee kɛ̃ Yinɛ sɔ'ɔlum la puan.” 23Ban doohe lageŋɔ la woo puan lu' nuurɛ gee pu'uhɛ gee loohe kiinduma bahɛ lageŋɔ woo puan ba'ahɛ la, ba dikɛ ba woo iŋɛ la Daana se'em ti ba sakɛ bo' en la nu'uhen.

24Ti ba nyaa ze'ele bilam doohe Pisidiya tole, wa'am na paaɛ Pamfiliya. 25Ban tɔgɛ yelehum la Pɛga puan la, ba ze'ele bilam kiŋɛ sige la Atalia. 26Ba ze'ele la bilam le zom uureŋɔ lebe Antiyoke, ze'a ti ba daa lagehɛ dikɛ ba iŋɛ Yinɛ zu'uhegɔ puan la tuuma la ti ba tum ba'ahɛ la. 27Ban wa'am na na paaɛ la, ba yi' lageŋɔ la za'a mɛ lagehɛ na, nyaa yele sɛla woo ti Yinɛ dikɛ ba tum la ba, la Yinɛ n yu'ɛ sakerɛ kuleŋa se'em bo' sɛba n dagi Yuda buuri la se'em. 28Ŋwana pooren, ba yee mɛ la Yezu zahereba la yuue fiiwa.

Obecnie wybrane:

Tuuma 14: GBTP

Podkreślenie

Udostępnij

Kopiuj