Fuɗɗoode 29
29
No Yaakuuba hawriri e Rahiina
1Caggal ɗuum, Yaakuuba adi laawol muuɗum, yehi leydi yimɓe lettugal. 2O yi'i ɓunndu ley ngesa gomma. Cogge baali tati ina pukkii ɗakkol mayru. Ɗoon ɗe njarata. Hayre mawnde ina uddi hunnduko ɓunndu nduun. 3Toon durooɓe kawrondinta cogge muɓɓen fuu, de tallita hayre ndeen, itta nde e hunnduko ɓunndu nduun, njarna baali muɓɓen. Caggal ɗuum, ɓe ngartira hayre ndeen nokku muuɗum, ɓe ommba ɓunndu nduun.
4Yaakuuba wi'i ɓe:
— Sakiraaɓe, toy ƴuuroton?
Ɓe njaabii, ɓe mbi'i:
— Haran min ƴuurata.
5O wi'i ɓe:
— Oɗon anndi Laban ɓii Nahor naa?
Ɓe njaabii mo, ɓe mbi'i:
— Miɗen anndi mo.
6O wi'i ɓe:
— Imo selli naa?
Ɓe njaabii:
— Baasi fuu walaa o. Inan ɓiyiiko debbo Rahiina ina warda e dammuuli.
7O wi'i ɓe:
— Joonin wo hakkunde naange, wanaa wakkati hawritingol dammuuli. Njarnee baali ɗiin de ɗi oora.
8Ɓe njaabii, ɓe mbi'i:
— Min mbaawaa, sanaa cogge ɗeen fuu kawrita. Ndeen min tallitan hayre ndeen ƴuwa e hunnduko ɓunndu nduun, de min njarna dammuuli ɗiin.
9Nde ɓe kaaldannoo e makko ndeen, Rahiina yottodii e dammuuli bammum, sabo wo o duroowo. 10Yaakuuba yi'i denɗum Rahiina ɓii kaawu mum Laban ina wondi e dammuuli bammum. O wari, o talliti hayre ndeen, o itti nde e hunnduko ɓunndu toon de o yarni baali kaawiiko Laban. 11Yaakuuba muccii Rahiina. Ɓernde makko hecciɗi, o woyi. 12O humpiti Rahiina, bammum wo kaawiiko, wo o ɓii Rebeka. Nde Rahiina nannoo ɗum ndeen doggi haalanowii bammum. 13Nde Laban nannoo haala Yaakuuba, doggi hawrowii e makko, mumilii mo, muccii mo, de yaari mo galle muuɗum. Yaakuuba haalani Laban ko waɗi ɗuum fuu.
14Laban wi'i mo:
— Sikke fuu walaa, wo a enndu am en ƴiiƴam ngootam.
Yaakuuba woni ɗo makko faa waɗi lewru.
No Yaakuuba dewliri
15Caggal ɗuum, Laban wi'i Yaakuuba:
— Wo a sakiike am ammaa saabe ɗuum waɗataa de ngollanaa kam ɓolum? Haalanam njobdi maa.
16Tawi Laban ina jogii ɓiɓɓe rewɓe ɗiɗo, mawniiwo oon ina wi'ee Leya, minyiiwo oon ina wi'ee Rahiina. 17Rahiina na wooɗi alhaali, wo jom ŋari, de Leya du wo jom gite koobaaje.
18Yaakuuba yiɗi Rahiina, de wi'i Laban:
— Mi gollante duuɓi jeɗɗi, de kokkaa kam Rahiina, ɓiya minyiiwo oon. 19Laban jaabii, wi'i:
— Mi hokke mo na ɓurani kam mi hokka mo gorko goɗɗo. Hedda ley ɓaade am.
20Yaakuuba golli duuɓi jeɗɗi faa heɓa Rahiina. Duuɓi ɗiin nanndani mo hono balɗe seeɗa tan saabe no yidde makko Rahiina mawniri.
21Nde duuɓi jeɗɗi ɗiin kiɓɓunoo fu, Yaakuuba wi'i Laban:
— Hokkam deekam faa mi sudda ɗum sabo wakkati mo kaaldunoɗen oon hiɓɓii.
22Laban hawrondini yimɓe nokku oon fuu, waɗani ɓe weltaare mawnde. 23Ammaa nde futuro warnoo fu, o adi ɓiyiiko Leya, o waddi ɗum to Yaakuuba. Yaakuuba suddi mo. 24Laban hokki korɗo mum bi'eteeɗo Jilpa oon ɓiyum Leya faa gollana ɗum.
25Nde weetunoo fu, Yaakuuba tawi wo Leya hokkaa. Ndeen o wi'i Laban:
— Noy woni no ngaɗuɗaa kam ni? Wanaa saabe Rahiina ngollanmaami naa? Ko waɗi njambiɗaa kam?
26Laban jaabii, wi'i:
— Minyiiwo artoo mawniiwo suddeede, ɗuum wanaa finaatawaa amin. 27Kiɓɓinee jeɗɗiire mon nde, de ngollanaa kam duuɓi jeɗɗi katin faa mi hokke minyiiwo oon du.
28Yaakuuba hiɓɓini jeɗɗiire ndeen. O golli hono no Laban wi'iri noon. Ndeen oon hokki mo ɓiyum Rahiina du, laatii jom suudu makko. 29Laban hokki ɓiyum Rahiina oon korɗo muuɗum bi'eteeɗo Bilha faa heddoo na gollana ɗum. 30Yaakuuba suddi Rahiina du. Oon o ɓuri yidde dow Leya. O gollani Laban duuɓi jeɗɗi goɗɗi.
Ɓiɓɓe Yaakuuba
31Nde Joomiraaɗo yiinoo Leya yiɗaaka ndeen, hokki ɗum ɓeyngu. Ammaa Rahiina laatii dimaro. 32Leya reedi, rimi ɓiɗɗo gorko, o inndiri ɗum Ruben.#29:32 Maanaa Ruben e Ibraninkoore woni, «Ndaar ɓiɗɗo gorko».
Sabo o wi'i:
— Joomiraaɗo yi'ii mettorgal am. Joonin goram yiɗan kam.
33O reedi katin, o rimi ɓiɗɗo gorko. O wi'i:
— Joomiraaɗo nanii mi jeebaaɗo, saabe majjum o hokki kam o du. O inndiri oon Simeyon#29:33 Maanaa Simeyon e Ibraninkoore woni «nanuɗo»..
34O reedi katin, o rimi ɓiɗɗo gorko.
O wi'i:
— Joonin kaa, goram takkoto kam, sabo mi rimanii ɗum ɓiɓɓe worɓe tato.
Ɗum waɗi de o inndiri oon Lewi#29:34 Maanaa Lewi e Ibraninkoore woni «takkiiɗo»..
35O reedi katin, o rimi ɓiɗɗo gorko.
O wi'i:
— Joonin mi yettan Joomiraaɗo.
Ɗum waɗi de o inndiri ɗum Yahuuda#29:35 Maanaa Yahuuda e Ibraninkoore woni «yettoore».. Ndeen o seli rimude.
Obecnie wybrane:
Fuɗɗoode 29: FBF
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© SIM International 2012, 2022
