Fuɗɗoode 30
30
1Nde Rahiina yiinoo rimanaay Yaakuuba ndeen, hiri mawnum debbo oon. O wi'i Yaakuuba:
— Hokkam ɓiɓɓe! Si wanaa noon fu, mi maayan.
2Ɓernde Yaakuuba mettani Rahiina de wi'i:
— Ndelle miin woni Laamɗo kaɗuɗo maa ɓeyngu naa?
3Rahiina jaabii wi'i:
— Inan korɗo am Bilha. Wondu e muuɗum faa rimana kam, miin du mi heɓira ɓiɓɓe e muuɗum.
4O hokki Yaakuuba korɗo makko Bilha, oon laatii deekum. Yaakuuba wondi e Bilha. 5Oon reedi, rimani mo ɓiɗɗo gorko.
6Rahiina wi'i:
— Laamɗo saranake kam, jaabanake kam du'aaw am, de hokki kam ɓiɗɗo gorko. Saabe majjum, o inndiri oon Dan#30:6 Maanaa Dan e Ibraninkoore woni «o sarake».. 7Bilha, korɗo Rahiina oon, reedi katin, rimani Yaakuuba ɓiɗɗo gorko ɗiɗaɓo.
8Rahiina wi'i:
— Durwo naawngo kaɓumi e mawnam debbo. Mi jaalake.
Ɗum waɗi de o inndiri suka oon Naftali#30:8 Maanaa Naftali e Ibraninkoore woni «durwo am»..
9Nde Leya yiinoo selii rimude ndeen, hooƴi korɗo muuɗum Jilpa, hokki Yaakuuba. 10Jilpa, korɗo Leya oon, rimani Yaakuuba ɓiɗɗo gorko.
11Leya wi'i:
— Mi welii hoore.
Ndelle o inndiri oon Gad#30:11 Maanaa Gad e Ibraninkoore woni «mbelko'aaku».. 12Jilpa, korɗo Leya oon, rimani Yaakuuba ɓiɗɗo gorko ɗiɗaɓo katin.
13Leya wi'i:
— Mi seyake, sabo rewɓe fuu noddiran kam ceyiiɗo.
Ɗum waɗi de o inndiri oon Aser#30:13 Maanaa Aser e Ibraninkoore woni «weltaare». .
14Wakkati tayri alkama, Ruben yehi ley ladde. O heɓi toon ɓiɓɓe leɗɗe mandarago#30:14 Maanaa mandarago e Ibraninkoore woni ɓiɓɓe leɗɗe ko miilaa ina hokka neɗɗo ɓeyngu. ɓennduɗe, o waddani ɗe inniiko Leya.
Rahiina wi'i:
— Hokkaram ɓiɓɓe leɗɗe ɓiya ɗeen!
15Leya jaabii mo, wi'i:
— Ndelle ko teetuɗaa kam goram ɗuum fuu heƴaay ma, de katin aɗa tefa teetude mandarago ɓiyam du naa?
Rahiina jaabii mo, wi'i:
— Ndelle Yaakuuba waalan suudu maaɗa jemma hannden, loomta mandarago ɓiya oon.
16Nde Yaakuuba wartunoo ladde kiiral naange ndeen, Leya yalti hawri e muuɗum, wi'i ɗum:
— Mbaalaa ley suudu am jemma o, sabo mi yoɓiri walannde maa ndeen e mandarago ɓiyam.
Yaakuuba wondi e makko jemma oon.
17Laamɗo jaabanii Leya. O reedi, o rimani Yaakuuba ɓiɗɗo gorko njoyaɓo.
18Leya wi'i:
— Laamɗo yoɓirii kam moƴƴere, sabo mi hokkii goram korɗo am.
Ɗum waɗi de o inndiri ɓiɗɗo oon Isakar.#30:18 Maanaa Isakar e Ibraninkoore woni njobdi. 19Leya reedi katin, rimani Yaakuuba ɓiɗɗo gorko njeegaɓo.
20Leya wi'i:
— Laamɗo hokkii kam dokkal lobbal. Joonin goram teddinan kam, sabo mi rimanii mo ɓiɓɓe worɓe njeegom.
Ɗum waɗi de o inndiri ɓiɗɗo oon Jabulon#30:20 Maanaa Jabulon e Ibraninkoore woni teddinde.. 21Caggal ɗuum, o rimi ɓiɗɗo debbo, o inndiri ɗum Dina.
22Laamɗo miccitii Rahiina, jaabii du'aaw muuɗum, hokki ɗum ɓeyngu. 23O reedi, o rimi ɓiɗɗo gorko. O wi'i:
— Laamɗo ittanii kam semteende.
24Ɗuum waɗi de o inndiri oon Yuusufi#30:24 Maanaa Yuusufi e Ibraninkoore woni «o ɓeyda»..
O wi'i:
— Joomiraaɗo ɓeydanam ɓiɗɗo gorko goɗɗo!
No Yaakuuba hemri jawdi
25Nde Rahiina rimunoo Yuusufi ndeen, Yaakuuba wi'i Laban:
— Hokkam laawol mi hoota wuro am e leydi am. 26Hokkam rewɓe am e ɓiɓɓe am ɓe ngollanmi ma saabe muɓɓen ɓeen faa mi dilla. Sabo aɗa anndi golleeji ɗi ngollanmi ma.
27Laban wi'i mo:
— Si aɗa yardii fu, keddoɗaa ɗo am ɗoo. Mi yi'ii e tiimgal, Joomiraaɗo barkinii kam saabe maa. 28Haalanam njobdi maa, faa mi hokke ndi.
29Yaakuuba jaabii, wi'i:
— Aɗa anndi ko ngollanmaami. Aɗa anndi du no dammuuli maa ɓeydorii e junngo am. 30Ko njoginoɗaa fadde am e warude ɗuuɗaano. De joonin, ɗum ɓeydake, ɗum ɗuuɗii sanne. Gilla koyngal am yottii ley ɓaade maa, Joomiraaɗo barkinii ma. Joonin le, faa ndeye ngollananmi ɓaade am, miin du?
31Laban ƴami mo, wi'i:
— Ɗume kokkanmaami?
Yaakuuba jaabii, wi'i:
— Taa hokkam fay gootum. Si a jaɓii fu, mi yeccoto e durngol dammuuli maa ɗiin katin, mi hayba ɗi. 32Mi yiiltoto hakkunde cogge maa ɗeen fuu hannden, de mi sennda baali nyaawi e toddi e ɓaleeji fuu. Hono noon du be'i nyaawi e pantooji. Ɗiin fuu laatotoo njobdi am. 33Fonnditaare am seedanto kam yeeso maa ko waroyta. Nyannde ngaroyɗaa faa ndaaraa njobdi am, si a yi'ii ley be'i debbi ɗiin nga wanaa nyaawa naa pantoowa fu, naa ley baali ɗiin nga wanaa ɓaleewu fu, wo ko wujjaa.
34Laban wi'i:
— Ina wooɗi. En ngaɗa no mbiiruɗaa noon.
35Ammaa nyannde ndeen Laban wurtini ley be'i ɗiin damɗi toddi e pantooji. Hono noon du be'i debbi nyaawi e pantooji e ko woodi pelle daneeje fuu, e baali ɓaleeji fuu. O watti ɗi e juuɗe ɓiɓɓe makko worɓe. 36Caggal ɗuum, o woɗɗorii Yaakuuba yaadu balɗe tati. Yaakuuba duri dammuuli Laban keddiiɗi ɗiin.
37Ndeen Yaakuuba adi looci leɗɗe popiliye e amande e palatan kecci de feƴƴi ɗi. O siri ɗi faa leɗɗe majji daneeje ɗeen ɓanga. 38O fukkini ɗi yeeso dammuuli ɗiin nder akalawal ndiyam to ɗi njarata ɗoon. Nde dammuuli ɗiin ngari faa njara fu, kalahali majji ina tummbina debbi ɗiin ley ɗoon. 39Dammuuli ɗiin na tummba hakkunde looci ɗiin, de ndimi toddi e pantooji e nyaawi.
40Yaakuuba senndi ɓiɓɓe baali ɗiin. O wayliti keddiiɗi ɗiin, o huccini geese majji faro baali Laban toddi e ɓaleeji ɗiin. Hono nii o heɓirani hoore makko coggal dammuuli, o hawrondinaay ɗi e dammuuli Laban. 41Si dammuuli payɗi ɗiin ngarii faa njara de ina tummba fu, Yaakuuba wallinan looci ɗiin yeeso majji. 42Si dammuuli pooƴuɗi ɗiin ngarii yarude fu, o wallintaa looci ɗiin. Noon pooƴuɗi ɗiin laatorii ɗi Laban de payɗi ɗiin laatii ɗi makko.
43Noon Yaakuuba laatorii jom jawdi sanne. O heɓi dammuuli keewɗi e maccuɓe e horɓe e geelooɗi e araaji fuu.
Obecnie wybrane:
Fuɗɗoode 30: FBF
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© SIM International 2012, 2022
