Fuɗɗoode 28
28
1Isiyaaka noddi Yaakuuba barkini ɗum, yamiri ɗum, wi'i:
— Taa ɓaŋu debbo e ley ɓiɓɓe rewɓe Kanaana. 2Umma, yahu faa Padan-Aram, faa suudu Betuwel baaba inna maa. Kooƴanaa hoore maa debbo ley ɓiɓɓe kaawu maa Laban, sakiike inna maa oon. 3Laamɗo jom Baawɗe barkine, waɗa ndimaa, ɗuuɗaa faa laatoɗaa lenyi keewɗi. 4O hokke barke Ibrahiima, aan e ƴuwdi maa. Ndonaa leydi ndi ngonɗaa ley muuɗum, ndi Laamɗo hokki Ibrahiima ndiin.
5Isiyaaka neli Yaakuuba yaha Padan-Aram to Laban ɓii Betuwel Aramanke. Kanko woni sakiike Rebeka, inna Yaakuuba e Isuwa. 6Isuwa faami Isiyaaka barkinii Yaakuuba, nelii ɗum Padan-Aram faa ɓaŋana hoore muuɗum debbo. O faami du nde Isiyaaka barkinnoo Yaakuuba ndeen, yamirii ɗum, wi'ii: «Taa ɓaŋu ɓiɓɓe rewɓe Kanaana!» 7Yaakuuba ɗowtanii saaraaɓe muuɗum, yehi Padan-Aram.
8Isuwa faami ɓiɓɓe rewɓe Kanaana mbelaa bammum Isiyaaka. 9Ndeen Isuwa yehi ɓaŋowi Makalat ɓii Ismaa'iila, taan Ibrahiima, sakiike Nebayot debbo. O hawrondini ɗum e rewɓe makko.
Koyɗol Yaakuuba
10Yaakuuba ƴuuri Beerseba, fonndii Haran. 11Naange yani mo nokku gomma, o tawi sanaa o walaa ɗoon. O hooƴi hayre, o wawlii, de o fukkii ɗoon. 12O yi'i e koyɗol, inan ƴeeŋirgal ina darii e leydi, hoore maggal ina meema kammu, maleyka'en Laamɗo ina ƴeenya ina njippoo.
13Joomiraaɗo darii dow maggal, wi'i:
— Miin woni Laamɗo, Joomiraaɗo bammaa Ibrahiima, Laamɗo Isiyaaka. Leydi ndi pukkiɗaa dow muuɗum ndiin, mi hokkete ndi, aan e ƴuwdi maa. 14Ƴuwdi maa ɗuuɗan hono gabbe njaareendi, ndi sankitoto faro lettugal e gorgal e soɓɓirre e horɗoore. Lenyi duuniyaaru fuu keɓan barke saabe maa e saabe ƴuwdi maaɗa. 15Aan du, miɗo wondi e maaɗa. Mi reenete ɗo njahuɗaa fuu. Mi wartirte e leydi ndii, sabo mi yoppataa ma. Mi hiɓɓinan ko aadaniimi ma ɗuum.
16Yaakuuba finti, wi'i:
— Tennyoral, Joomiraaɗo ina woni ley nokku oo! De mi anndaano.
17O huli, o wi'i:
— Hey nokku oo ina hulɓinii! Tennyoral, ɗoo wo suudu Laamɗo, wo dammbugal kammu.
18Ndeen Yaakuuba dawi law, hooƴi hayre nde wawlinoo ndeen, darni nde, waɗi maande miccinoore. O joori nebbam dow hayre ndeen. 19O inndiri nokku oon Baytila.#28:19 Maanaa Baytila woni suudu Laamɗo. Arande huɓeere ndeen ina inndirenoo Luus.
20Yaakuuba hunii, wi'i:
— Si Laamɗo wondii e am, reenii kam e jahaangal am ngaal, si o hokkii kam ko nyaamammi e ko koltanmi, 21faa mi wartii suudu baaba am e jam fu, Joomiraaɗo laatoto Laamɗo am. 22Wooɗi hayre nde ndarnumi, ngaɗumi maande miccinoore ndeen du, nde laatoto suudu maa aan Laamɗo. Ko kokkuɗaa kam fuu, mi ittante sappoɓerde muuɗum jakka.
Obecnie wybrane:
Fuɗɗoode 28: FBF
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© SIM International 2012, 2022
