Fuɗɗoode 27
27
No Yaakuuba heɓiri barke e Isiyaaka
1Nde Isiyaaka naywunoo ndeen, gite muuɗum cuddi faa yi'ataa katin. O noddi Isuwa afo makko oon. Oon jaabii wi'i:
— Inani kam.
2O wi'i ɗum:
— Ndaar mi naywii, mi anndaa nde maayammi. 3Ndelle hooƴu kure maa e ɓaaru maa e laanyal maa de njahaa ladde, loohanoɗaa kam. 4Moƴƴinanaa kam nyaamdu welndu hono no njiɗirmi noon, ngaddanaa kam mi nyaama, de yonki am barkine gilla mi maayaay.
5Rebeka na hettinii nde Isiyaaka haaldannoo e ɓiyum Isuwa ndeen. Nde Isuwa yehunoo ladde faa loohowo waddana bammum ndeen, 6Rebeka haalani ɓiyum Yaakuuba, wi'i:
— Mi nanii bammaa na haalda e mawna Isuwa, na wi'a: 7«Loohanowam teewu ladde, moƴƴinanaa kam nyaamdu welndu faa mi nyaama de mi nyaagane Joomiraaɗo, barkine gilla mi maayaay.» 8Joonin, ɓiyam, hettindanam. Inan ko njamiranmi ma: 9Yahu to dammuuli toon, nannganaa kam ndamkoy ɗiɗoy lobboy faa mi moƴƴina koy, mi waɗa nyaamdu welndu no bammaa yiɗiri noon. 10Njaaranaa ɗum ndu faa nyaama, de barkine gilla maayaay.
11Yaakuuba jaabii inna mum, wi'i:
— Mawnam Isuwa wo gorko mo ɓanndu mum heewi leeɓi, de miin, mi worraa noon. 12Ina hasii baaba am meema kam, de ndaarda kam wo mi jambotooɗo. Ndeen mi heɓataa barke, wo kuddi tan ngaddananmi hoore am.
13De inniiko wi'i mo:
— Si wo noon fu, kuddi ndiin saama dow am. Suka am, hettinda haala am tan, yahu nannganowaa kam ko mbiimaami ɗuum.
14Ndelle o yehi, o nanngowi ndamkoy kooy, o waddani Rebeka inniiko. Inniiko oon moƴƴini nyaamdu welndu hono no baabiiko yiɗiri noon. 15Ndeen inniiwo oon hooƴi kaddule Isuwa ɓiyum mawɗo lobbe ɗe resunoo ley suudu waɗi Yaakuuba minyiiwo oon ɓoornii. 16O ɓoorni guri ndamkoy ɗiin e juuɗe muuɗum, e to leeɓi ngalaa e daande mum toon. 17O hokki ɗum nyaamdu welndu nduun e buuru mo o moƴƴini oon.
18Yaakuuba naati to bammum, wi'i ɗum:
— Baaba!
O jaabii o wi'i:
— Aan wo moy suka am?
19Yaakuuba wi'i bammum:
— Miin Isuwa, afo maa. Mi waɗii ko mbiiɗaa kam ɗuum. Umma jooɗa, nyaamaa teewu ngu loohoymi nguun, de mbarkinaa kam.
20Isiyaaka wi'i ɓiyum oon:
— Suka am, noy ngaɗuɗaa de keɓuɗaa teewu ladde faa ngartuɗaa law hono nii?
O jaabii, o wi'i:
— Joomiraaɗo, Laamɗo maa, kam waddi ngu to am.
21Ndeen Isiyaaka wi'i Yaakuuba:
— Suka am, ɓatta faa mi meeme, mi faama yalla aan woni ɓiyam Isuwa naa a wanaa.
22Yaakuuba ɓattii bammum Isiyaaka. Oon meemi mo, de wi'i:
— Haala kaa wo haala Yaakuuba, ammaa juuɗe ɗe wo juuɗe Isuwa.
23O annditaay ɗum sabo juuɗe muuɗum ina njogii leeɓi hono juuɗe Isuwa mawniiwo oon. Ndeen o barkini ɗum.
24Isiyaaka wi'i:
— Yalla goonga fuu a ɓiyam Isuwa naa?
O jaabii, o wi'i:
— Ayyo wo miin!
25Isiyaaka wi'i:
— Ɓiyam, ɓattinanam teewu nguun, faa mi nyaama, de mi barkine.
O ɓattinani ɗum, nyaami. Ndeen o waddani ɗum inaboojam du, yari.
26Ndeen baabiyo oon wi'i mo:
— Suka am, ɓatta muccoɗaa kam.
27O ɓattitii, muccii ɗum. O nani uurngol kaddule muuɗum de o barkini ɗum o wi'i:
Uurngol suka am ina nanndi e
uurngol ngesa nga Joomiraaɗo barkini.
28Laamɗo jippinane peewol saawoore ƴuurunde dow.
O hokke du leydi lobbiri
e alkama ɗuuɗɗo, e inaboojam keewɗam.
29Cuuɗi baaba ngollane!
Laamuuji cujidane!
Laamoɗaa sakiraaɓe maa!
Ɓiɓɓe inna maa cujidane.
Kuɗuɗo ma fuu, kuddi ndiin saama dow muuɗum.
Du'aniiɗo ma fuu, Laamɗo barkin ɗum!
30Isiyaaka tilii barkinde Yaakuuba. Nde Yaakuuba wurtinoo to baaba muuɗum ndeen, wakkati oon pay, Isuwa sakiikem oon warti loohagol, naati. 31Kanko du o moƴƴini nyaamdu welndu, o nanni to baabiiɓe, de o wi'i ɗum:
— Baaba, umma nyaamu teewu ngu loohanoymi ma nguun, de mbarkinaa kam, miin ɓiya.
32Baabiiko Isiyaaka wi'i mo:
Aan, a moy?
O jaabii, o wi'i:
Wo miin Isuwa, ɓiya afo oon.
33Wakkati oon, Isiyaaka diwni sanne, wi'i:
— Moy woni loohoyɗo de waddani kam teewu ladde nyaamumi gilla a waraay mbarkinmaami oon? Mi barkinii joomum. Noon du barke oon heddortoo e muuɗum.
34Nde Isuwa nannoo haalaaji bammum ɗiin fu, wulli wullaango manngo mettungo sanne, wi'i bammum:
— Barkinam miin du baaba!
35Oon jaabii, wi'i:
— Minya wardii e hiila, heɓii barke maa oon.
36Isuwa jaabii, wi'i:
Wanaa innde makko wo Yaakuuba naa?#27:36 Maanaa Yaakuuba: ndaar 25:26. O hiilii kam kile ɗiɗi. O teetii mawniraagu am, joonin du o teetii barke am.
— A heddanaay kam barke naa?
37Isiyaaka jaabii Isuwa, wi'i:
— Ndaar, mi waɗii mo jooma, mi hokkii mo rimdaaɓe makko fuu ngollana mo, mi yooɓinii mo alkama e inaboojam. Ndelle ɗume mbaawumi waɗande ma katin, suka am?
38Isuwa wi'i bammum:
— Barke gooto tan njogiɗaa naa baaba? Barkinam miin du baaba!
Ndeen o wulli, o rufi gonɗi mettorgal.
39Baabiiko Isiyaaka wi'i mo:
Wuro maaɗa woɗɗoto e leydi lobbiri, ngoodundi barke,
ndi saawoore kammu jippataako dow muuɗum.
40A wuurdan e kaafaahi maa.
A gollanan minya oon.
Ammaa ley yiilnde maa,
a taƴan ɓoggol maccungaaku ngol o yowi e daande maa ngool.
No Yaakuuba doggiri Isuwa
41Ɓernde Isuwa wanyi Yaakuuba saabe barke mo bammum barkini ɗum oon. Isuwa anniyii, wi'i:
— Maayde baaba am ɓadake, caggal ɗuum, mi waran sakiike am Yaakuuba.
42Rebeka humpitaa haalaaji afo muuɗum Isuwa ɗiin. O neli o noddanee ɓiyiiko Yaakuuba minyiiwo oon.
O wi'i ɗum:
— Ndaar, sakiike maa Isuwa ina filoo warude maa faa itta dukkuru muuɗum e maaɗa. 43Joonin, suka am, hettina haala am:
— Umma, doggu, yahu to Laban sakiike am, gonɗo Haran oon. 44Keddoɗaa to makko seeɗa faa ɓernde sakiike maa oon feewa. 45Nde ɓernde makko waaltii faa o yeggiti ko ngaɗuɗaa o ɗuum fu, mi nelante ngartaa. Mi yiɗaa mursude on, on ɗiɗo fuu nde wootere.
46Caggal ɗuum Rebeka wi'i Isiyaaka:
— Mi sawtii adunaaru saabe rewɓe Isuwa Hittiyankooɓe ɓeen. Si Yaakuuba ɓaŋii debbo Hittiyanke hono maɓɓe ley rewɓe leydi ndi, ɗume nguurndam am nafata?
Obecnie wybrane:
Fuɗɗoode 27: FBF
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© SIM International 2012, 2022
