Fuɗɗoode 26
26
Isiyaaka ley leydi Filistiyankooɓe
1Wakkati majjum rafo waɗi ley leydi ndiin. Ingo seedi e rafo waɗunoongo ley jamaanu Ibrahiima ngoon. Wakkati oon, Isiyaaka yehi leydi Abimelek kaananke Filistiyankooɓe, faa wuro Gerar.
2Joomiraaɗo ɓangi e makko wi'i:
— Taa yahu Misira. Jooɗa ley leydi ndi kaalananmaami haala muuɗum ndiin. 3Keddoɗaa ley leydi ndi ɗo. Mi wondan e maaɗa, mi barkinte. Sabo wo aan e ƴuwdi maa kokkammi leydi ndii fuu. Mi hiɓɓinan hunayeere nde kunaniimi bammaa Ibrahiima ndeen. 4Mi ɗuuɗinan ƴuwdi maa hono koode, mi hokkan ƴuwdi maa leyɗe ɗee fuu. Lenyi adunaaru fuu keɓan barke saabe ƴuwdi maa. 5Mi waɗiran noon sabo Ibrahiima hettindanake kam. O tinnake e jamirooje am e ekintinooje am e sariyaaji am.
6Isiyaaka jooɗii Gerar. 7Worɓe nokkuure ndeen kaaldi e makko haala jom suudu makko. O wi'i:
— Wo o sakiike am debbo.
O suusaay wi'ude oon wo jom suudu makko. Si goonga, o hulii taa worɓe nokkuure ndeen mbara mo saabe Rebeka, sabo oon wo jom ŋari sanne.
8Ɓe ɓooyi ley leydi ndiin. Nyannde gomma, Abimelek, kaananke Filistiyankooɓe oon, ndaari faro feneetere, yi'i Isiyaaka ina ŋawlondira#26:8 ŋawlo woni toolo juuɗe e deekum Rebeka. 9Abimelek noddi Isiyaaka, wi'i:
— Jaka wo o deeka! Ko saabii de mbiiɗaa wo o sakiike maa debbo?
Isiyaaka jaabii mo, wi'i:
— Mi wi'ii noon faa taa mi waree saabe makko.
10Abimelek wi'i:
— Ɗume woni ko ngaɗuɗaa min nii? Seeɗa haɗi gooto amin fukkodaade e jom suudu maaɗa de ngaddanaa min junuuba.
11Ndeen Abimelek wi'i yimɓe ɓeen fuu:
— Meemuɗo gorko o naa deekum fu, warete.
12Ley hitaande ndeen Isiyaaka aawi e leydi ndiin, de Joomiraaɗo barkini mo, ko o heɓi ɗuum ɓuri ko o aawi ɗuum kile 100. 13Jawdi makko ina ɓeydoo faa o laatii jom jawdi mawɗo. 14O laatii jom cogge be'i e baali e na'i e gollooɓe heewɓe. Ndeen Filistiyankooɓe kaasidii mo. 15Ɓulli ɗi gollooɓe baabiiko Ibrahiima mbasunoo fuu, Filistiyankooɓe uwi ɗum'en, kebbini ɗum'en leydi.
16Abimelek wi'i Isiyaaka:
— Dillu, mboɗɗoɗaa min, sabo a ɓurii min semmbe sanne.
17Isiyaaka dilli toon, yehi ley naɗɗol Gerar, jooɗii toon. 18Isiyaaka uuti ɓulli basanooɗi illa jamaanu bammum Ibrahiima ɗiin, ɗi Filistiyankooɓe uwunoo caggal maayde bammum ɗiin. O inndiri ɗi inɗe ɗe baabiiko inndirnoo ɗi.
19Gollooɓe Isiyaaka mbasi ley naɗɗol toon de keɓi ɓunndu ndu ndiyam iloojam sanne. 20Ndeen durooɓe Gerar pooɗondiri e durooɓe Isiyaaka, mbi'i:
— Ndiyam ɗam wo minen njeyi ɗam.
Isiyaaka inndiri ɓunndu nduun Eseka,#26:20 Maanaa Eseka e Ibraninkoore woni «Pooɗundural». sabo ɓe pooɗondirii dow mayru. 21Ndeen ɓe mbasi ɓunndu wonndu, de ɓe kaɓdi dow nduun du. Saabe majjum o inndiri nduun Sitna#26:21 Maanaa Sitna e Ibraninkoore woni «Nganyaandi».. 22O eggi, o dilli toon, o wasi ɓunndu wonndu, ammaa nduun kaa ɓe ndukidaay dow muuɗum. Ɗum waɗi de o inndiri ndu Rehobot#26:22 Maanaa Rehobot e Ibraninkoore woni «Njaayri».. O wi'i:
— Joonin Joomiraaɗo yaajinanii en nokkuure, en ɓeydoto ley leydi ndi.
Aadi hakkunde Isiyaaka e Abimelek
23Caggal ɗuum, Isiyaaka dilli toon, yehi Beerseba. 24Joomiraaɗo ɓangani mo ley jemma, wi'i:
— Miin woni Laamɗo bammaa Ibrahiima. Taa hulu, sabo miɗo wondi e maaɗa. Mi barkinte, mi ɗuuɗinan ƴuwdi maa saabe maccuɗo am Ibrahiima.
25O nyiɓi toon sakkirde, o du'ii e innde Joomiraaɗo. O darni hukum makko. Gollooɓe makko mbasi ɓunndu ɗoon. 26Abimelek ƴuuri Gerar wari to makko, wardi e Akusat, tindinoowo ɗum e Pikol, hooreejo sordaasiiɓe muuɗum. 27Isiyaaka ƴami ɓe:
— Ko saabii de ngarɗon ɗo am? Wanaa wo on mbanyuno kam de ndiiwuɗon kam naa?
28Ɓe mbi'i:
— Min nji'ii, min taƴorii Joomiraaɗo ina wondi e maaɗa. Min tawii sanaa ngaɗiden hunayeere hakkunde meeɗen. Adiden aadi. 29Taa ngaɗaa min ko boni, hono no min meemiraay ma noon, hono no min ngaɗaay ma faa'e si wanaa ko wooɗi tan, min njoppii ma ndilluɗaa e jam, aan laatiiɗo joonin barkinaaɗo Joomiraaɗo.
30Isiyaaka waɗani ɓe weltaare, ɓe nyaami, ɓe njari. 31Ɓe ndawi jaangoore majjum, ɓe adidi aadi, de Isiyaaka yoppi ɓe, ɓe ndilli e jam. 32Ley nyalooma oon gollooɓe Isiyaaka ngari kaalani ɗum kabaaru ɓunndu ndu mbasi nduun, mbi'i mo: «Min keɓii ndiyam». 33Isiyaaka inndiri ndu Seba, ɗum waɗi de huɓeere ndeen ina wi'ee Beerseba#26:33 Maanaa muuɗum woni ɓunndu hunayeere. faa warde hannden.
34Nde Isuwa heɓunoo duuɓi 40 ndeen, dewli Yehuditi ɓii Beeri Hittiyanke. O hooƴi du Basimat ɓii Elon, oon du Hittiyanke. 35Rewɓe ɗiɗo ɓeen mettini ɓernde Isiyaaka e Rebeka.
Obecnie wybrane:
Fuɗɗoode 26: FBF
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© SIM International 2012, 2022
