TOBITƐ 14
14
Tobitɛ fia
1-2'Da fala li Tobitɛ lɔa zi nɛ ni, nɛ nde a do 'bu sabɛlɛ gazɛlɛ ngɔ nɛ bɔa. Kɔ 'do kɛ a kpasa ni, nɛ a hɔa 'bɔ wi kpamɔ, nɛ a dɛa gbɛla hã Owi sãnɔ do dia sila. A 'bana zi fala hã iɔ̃nae hã Gale, do dɔnggɔ gã wi 'da a. Kɔ a ɔa sabɛlɛ kama do 'bu ngɔ nɛ bɔa, nɛ a fia fio tɔa, nɛ wa mi a tɛ Ninivɛ do gã dɔ̃lɔ̃ li.
3Nɛ nde dati kɛ na Tobitɛ fe ni, nɛ a sa mɔ hã bulu be 'da a Tobi, nɛ a tɔ̃ hã a na: 4“Be 'daa, mɔ kálá obenɔ 'da mɔ, hã mɔ kulu do wa dɛ ngɔ nù Medi. Kafi bina, lɛnggɛ zi Gale tɔ̃a dɛ ngɔ le Ninivɛ do wala 'da wi gba olo nu a Nahumɛ ni, ma dɛ sɛ tɛ̃ ɛ. A tɔ̃a zi na, ɛ gɔnɔ sɛ ngbangga 'da owi Ninivɛ. Nɛ mi lengge na, ma kɔlɔ fala dɛ tɛ̃ ɛ ia. Lɛnggɛnɔ vɛ̃ kɛ owi gba olo nu Gale tɛ Israɛlɛ, wa tɔ̃ zi dɛ ngɔ le Ninivɛ do ngɔ nù Asiri ni, ma dɛ sɛ tɛ̃ ɛ. Ngba soe nɛ hɔ, nɛ lɛnggɛnɔ ni ma dɛ sɛ gbãlã we do 'da nɛ kpo kpo vɛ̃. Nɛ nde ngɔ nù Medi i, mɔ kpa sɛ dungu fio nɛ ngɔ kɛ mɔ wia we kpa ma tɛ Asiri, tabi tɛ Babilɔnɛ ni. Mba gɔ, mi ĩ na wenɔ Gale tɔ̃a ni vɛ̃ ni, ma dɛ sɛ tɛ̃ ɛ, a fó sɛ tɛ ngamɔ kpo gɔ. Nɛ tala onya lɛ kɛ wa 'bana ɔ ngɔ nù Israɛlɛ i ni, wa pɛsɛ sɛ. Owi sɛnɛ wa, wa kala sɛ wa do ngbá, nɛ wa si sɛ do wa nyɛlɛ do dia nùi 'da wa. Nù Israɛlɛ vɛ̃ ma kifi sɛ li go, nɛ le Samaria do Yeruzalɛmɛ, ma kifi sɛ olo tɔa. Wa dɔ sɛ Tɛmpɛloe 'da Gale, nɛ ma gbɛsɛ, nɛ ma ɔ sɛ na mɛ ni 'do dɔa kɔ̃ tũ. 5Nɛ nde Gale a dɛ sɛ 'bɔ 'bako hã wa, nɛ a kala sɛ wa, nɛ a gese wa dɛ ngɔ nù Israɛlɛ. Wa zĩ sɛ 'bɔ Tɛmpɛloe dɛ olo nɛ, nɛ nde ma ndélé sɛ ɔ nɛ kɛ zi dati ni gɔ gbaa we 'bɔ na, ngba soe kɛ Gale ia ni ma we, sɛ nɛ de.
“'Do nɛ, nɛ obe Israɛlɛ wa yolo sɛ kɔlɔ 'duli, nɛ wa si vɛ̃, nɛ wa dɛ le Yeruzalɛmɛ dɛ olo nɛ, nɛ ma de sɛ nɛ́ mba mɔ ni. Wa zĩ sɛ Tɛmpɛloe 'da Gale dɛ di ni, ɔ nɛ kɛ Owi gba olo nu Gale tɛ ngɔ nù Israɛlɛ, wa tɔ̃a zi nɛ ni. 6Nɛ owinɔ ngɔ nù gɛ vɛ̃, wa siki sɛ li wa dɛ 'da ngbongbo Gale we dɔnggɔ a. Wa la sɛ fala ogale bɛlɛnɔ kɛ wa kã zi wa li 'dã walanɔ ni vɛ̃, nɛ wa dɔnggɔ sɛ Gale kɔ sabɛlɛ do sabɛlɛ. Nɛ wa dɛ sɛ bɔlɔ zu dɛa mɔ gbali a. 7Do 'da fala ni, nɛ Gale a kpasa sɛ obe Israɛlɛ vɛ̃ kɛ wa 'bana fala dɛ olo nu a ni. A ngɛmɛ sɛ li wa, nɛ a gese wa dɛ Yeruzalɛmɛ i. A dɛ sɛ na, wa dungu gɛ̃a dungu ngɔ nùi 'da Abrahama fai. Ongbongbo wi kɔ̃ Gale wa dungu sɛ do yangga. Ĩ na, owi dɛ 'dã mɛnɔ, do wanɔ wa dɛ́ olo nu a gɔɛ ni, wa kumu sɛ ngɔ nù gɛ.
8-9“Ngangga ni, benɔ 'daa, nɛ zélé mbulanɔ kɛ mi nɛ e hã nɛ gɛ: Nɛ dɛ́ to hã Gale do sila nɛ kpo, nɛ nɛ dɛ mɔ kɛ ma li a a dia ni. Nɛ bé hã obenɔ 'da nɛ na, wa dɛ́ bɔlɔ zu dɛa mɔ, nɛ wa ó wi dɛ gbɛla hã Owi sãnɔ. Wa dɛ́ olo nu Gale, nɛ wa dɔ́nggɔ́ a 'da fala fai do sila wa vɛ̃, do ngawi 'da wa vɛ̃.
“Tobi be 'daa, ngangga ni, mɔ lá le Ninivɛ, mɔ tɛ 'bànà dɛ dɛ gɔ. Fala kɛ mɔ mi naa mɔ dɛ kɛ zã mi do'do, nɛ mɔ tɛ 'bànà 'bɔ dɛ dɛ 'do dɔa tũ gɔ. Mba gɔ, mi zɔa na, 'dã mɔ nɛa ngɔ le nɛa, nɛ bɛlɛ nɛa ngɔ nu winɔ, nɛ nde sape ma bá li wele kpo gɔ. 10Be 'daa, ta zu mɔ tɛ èlè ngɔ mɛ Nadabɛ dɛa zi do Ahikarɛ, kɛ a zi a baa a wi dala a ni gɔ. A fa zi we gbɛ Ahikarɛ, ma kɛ a ili a do tunu li a dɛ kɔ kɔ̃ ɔ nɛ zunu ni. Nɛ Gale hã etumbu hã Nadabɛ dɛ gbali Ahikarɛ, we duzu 'dã mɛ a dɛa ni. Na mɛ ni, Ahikarɛ hɔa nza kɔ fio, nɛ Nadabɛ lia kɔ gba tũi 'da ofionɔ, tua kɛ a fa zi we gbɛ Ahikarɛ ni. Nɛ Ahikarɛ zɔlɔ li bili Nadabɛ ndɔa hã a ni, tua kɛ a dɛ zi gbɛla hã owi sãnɔ do kɔ sila a vɛ̃. Nɛ nde Nadabɛ ba bili a ndɔa do tɛ̃ a ni, nɛ ma gbɛa a. 11Ngangga ni, benɔ 'daa, nɛ ĩ na, owanɔ kɛ wa dɛ gbɛla hã Owi sãnɔ ni, wa kpa dia mɔ olo nɛ. Nɛ nde wanɔ kɛ wa dɛ 'dã mɔ do ngba wa ni, si olo nɛ hã wa mɛ a fio. Kɔ ngangga ni, mi zɔ na mi kɔlɔ do fio ia.”
Ma kɛ wa ba Tobitɛ, nɛ wa fi a dɛ ngɔ mɔ ɔi, nɛ a fe, nɛ wa mi a do gã dɔ̃lɔ̃ li.
12'Do ki ni, nɛ kɛnɛ Tobitɛ fia tɛ mɛ 'bɔ, nɛ be 'da a Tobi mi a dɛ kɛ zã wili a ni. Dɛ 'do nɛ, nɛ Tobi kulu ngɔ do kɛnɛ ɛ, nɛ wa kulu dɛ ngɔ nù Medi, nɛ Tobi zĩ tɔa 'da a dɛ kɛ zã kɛfɛ a Raguɛlɛ, tɛ kɔ le Ekbatanɛ. 13Nɛ a 'dafa fala gbɛlɛ okɛfɛ a do dia nɛ, kɔ wa fia, nɛ a mi wa dɛ Ekbatanɛ ni. Nɛ a dungu ngɔ kpamɛnɔ olo Raguɛlɛ, ɔ nɛ kɛ a kpa zi 'bɔ do mɛnɔ olo baa a Tobitɛ ni.
14Tobi ɔa sabɛlɛ kama do 'bu ngɔ nɛ sambo, nɛ a fe, nɛ wa mi a do dɔ̃lɔ̃ li. 15Dati fie 'da a, nɛ a zila we kɛ le Ninivɛ 'danga nɛ ni, nɛ a zɔa 'bɔ owi kɔ le Ninivɛ kɛ nwa Kiakizarɛ kala wa do ngbá, nɛ a si do wa dɛ ngɔ nù Medi i ni. Tobi nɛa we zɔ etumbui kɛ Gale hã ma hã Owi Ninivɛ do Oasiri ni, nɛ a dɔnggɔ a. Nɛ kɔ dungu nza 'da a vɛ̃, a dɛa yangga kɛ le Ninivɛ 'danga nɛ ni, nɛ a gisa iɔ̃nae hã NWA Gale kɛ wa dɔnggɔ a kɔ sabɛlɛ do sabɛlɛ ni.
Obecnie wybrane:
TOBITƐ 14: NGB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Ngbaka DC Bible (We Nu Gale) Version © Bible Society of the Democratic Republic of Congo, 1995.