YUDITƐ 1
1
Nabukɔdɔnɔzɔrɛ nɛa ngɔ Arpaksadɛ li bolo
1Nabukɔdɔnɔzɔrɛ, nwa ngɔ nù Asiri ɔa tɛ to nwa 'da a sabɛlɛ 'bu ngɔ nɛ bɔa tɛ kɔ gã le Ninivɛ. Do 'da fala ni, nɛ nde Arpaksadɛ a nwa ngɔ Omɛdɛ, nɛ a ɔ kɔ gã le Ɛkbatanɛ. 2Nɛ Arpaksadɛ ni, a dɛa ngbo dɛ 'do le Ɛkbatanɛ do ota kɛ wa sɛ sɛa ni. 'Da pɛsa nu tanɔ ni wia mɛtrɛ kpo do dɔ nɛ, nɛ 'da du nɛ wia mɛtrɛ talɛ. Nɛ ngboe Arpaksadɛ dɛa ni, 'da pɛsa nu dɛlɛ 'bolo zã nɛ zi a mɛtrɛ 'bu nɛ bɔa ngɔ nɛ mɔlɔ, nɛ ngala nɛ mɛtrɛ 'bu nɛ talɛ ngɔ nɛ mɔlɔ. 3Nɛ nwa Arpaksadɛ dɛa ongala tɔa dɛ nu ngbo le kpo do kpo vɛ̃. Otɔanɔ ni, ngala nɛ zi a mɛtrɛ 'bu nɛ mɔlɔ, nɛ nyanga ma nù nga wia mɛtrɛ 'bu nɛ talɛ. 4Nɛ 'da du gbangga nu ngbo le dɛ ngɔ a mɛtrɛ 'bu nɛ talɛ ngɔ nɛ mɔlɔ, nɛ gã li nɛ a mɛtrɛ 'bu nɛ bɔa. A dɛa ma gã wena ní, takɔ ogili sodanɔ 'da a do mɔ bi bolonɔ 'da wa, do osoda nyanga winɔ, wa we tɛ la do di ni.
5Nwa Nabukɔdɔnɔzɔrɛ dɛa sabɛlɛ 'bu ngɔ nɛ bɔa tɛ toe da a, nɛ do kɔ sabɛlɛ ni, nɛ a nɛa, nɛ a bi do nwa Arpaksadɛ tɛ ngɔ mbɛ nù Rago. 6Nɛ owinɔ wa ɔ ngɔ kalanɔ, do Ogbangɔlɔ̃ li Efratɛ, do Tigrɛ, do Idaspɛ, wa vɛ̃ wa mba do nwa Nabukɔdɔnɔzɔrɛ. Nɛ owinɔ wa ɔ ngɔ mbɛ nùi kɛ ma ti mbula 'da Ariɔkɛ, nwa ngɔ le Elimaisi ni, wa mba 'bɔ do wa. Na mɛ ni, osoda ngɔ ogele nù dɛlɛ wena wa tɛa, nɛ wa mba ngba wa do osoda Babilɔnɛ.
7Nɛ Nabukɔdɔnɔzɔrɛ, nwa 'da Oasiri tumba Owi to tɛ ngɔ nùnɔ vɛ̃. A tumba wa 'da Opɛrsɛ si 'biti gba wese, nɛ a tombo 'bɔ mbe si 'biti gɛ̃a wese, dɛ tɛ ngɔ nù Silisi, Damasi do Libanɛ gbaa we hɔ nu lì Meditɛrane. 8Nɛ a tombo 'bɔ mbe wi tonɔ 'da winɔ wa ɔ ngɔ kala Karmɛlɛ, do ngɔ nù Galadɛ, do Galile kɛ ma si gbãlã ngɔ, do owi ngɔ mbɛ nù Yizreɛlɛ. 9Nɛ mbe wi tonɔ wa nɛa 'bɔ tɛ kɔ lenɔ ngɔ nù Samaria, do nùnɔ kulu lì Yɔrdanɛ gbaa we hɔ tɛ le Yeruzalɛmɛ, Batane, Kelusi, Kadɛsɛ, gbaa we hɔ nu fua lì li ngbala nù Ezipeto i ni. Nɛ dɛ 'do li ngbala nù Ezipeto ni, ombe wi tonɔ 'da Nabukɔdɔnɔzɔrɛ wa nɛa tɛ le Tapanɛsi do Ramsɛsi, mba do nù Gosɛnɛ vɛ̃. 10Nɛ tala ombe wi tonɔ wa nɛa nyɛlɛ wena gbaa tɛ le Tanisi, do Mɛmfisi, do tala gele lenɔ ngɔ nù Ezipeto vɛ̃, gbaa we hɔ tɛ li ngbala nù Ezipeto do Etiopi. 11Nɛ nde ngɔ nùnɔ vɛ̃ kɛ Nabukɔdɔnɔzɔrɛ tumba owi tonɔ 'dɛ ɛ tɛ nɛ ni, owinɔ wa zɔa toe ni yala iko, nɛ wa bɛ̃a we gala Nabukɔdɔnɔzɔrɛ li bolonɔ a kɔ̃a we bi nɛ ni. Nɛ wa dɛ̀ kili nwa Nabukɔdɔnɔzɔrɛ gɔ, tua kɛ wa zɔa na, a tɛ mɛ 'bɔ a wele iko. Nɛ owi tonɔ 'da Nabukɔdɔnɔzɔrɛ wa kpà dia gisa nu we gɔ, nɛ wa si do sape. 12Nɛ dã ba Nabukɔdɔnɔzɔrɛ, nɛ a kana tɛ̃ a do zu li dɛa to nwa 'da a, do nùi 'da a na, ɛ bili sɛ nu gbã hã owinɔ wa bɛ̃a we gala ɛ ni. Nɛ a handa na, ɛ gbɛ sɛ owi ngɔ nù Silisi, do Damasi, do owi ngɔ nù Siri vɛ̃, do Omoabɛ, Oamoni, do owinɔ ngɔ nù Yude vɛ̃, do Owi ngɔ nù Ezipeto tɛ mɛ 'bɔ. Nɛ a kɔ̃a 'bɔ we gbɛ owinɔ nu gba lì Meditɛrane, do wanɔ nu gba lì “Sala Tɔ̃”.
13Kɔ ma nɛa we hɔ tɛ sabɛlɛ kɛ 'bu ngɔ nɛ sambo, kɔ dɛa to nwa 'da Nabukɔdɔnɔzɔrɛ, nɛ a nɛa, nɛ a bi do nwa Arpaksadɛ, nɛ a nɛ ngɔ a. Nɛ a ndaka osodanɔ 'da Arpaksadɛ, mba do osoda kũ mbalatanɔ, do osoda kũ ngilingilinɔ vɛ̃. 14Nɛ Nabukɔdɔnɔzɔrɛ kala olenɔ 'da Arpaksadɛ gbaa we hɔ tɛ le Ɛkbatanɛ i. A hɔa tɛ Ekbatanɛ, nɛ a kala ongala tɔanɔ, nɛ a kala omɛnɔ, nɛ a 'danga le Ɛkbatanɛ kɛ ma dia nɛ ge nde ni vɛ̃. 15Do 'da fala ni, nɛ nde nwa Arpaksadɛ yu dɛ ngɔ kala Rago. Nɛ Nabukɔdɔnɔzɔrɛ nɛa, nɛ a kpa a i mɔ, nɛ a to a do sɛlɛ, nɛ a gbɛ a. Na mɛ ni, nɛ to nwa 'da Arpaksadɛ 'danga fai. 16Nɛ Nabukɔdɔnɔzɔrɛ kala osodanɔ 'da ɛ, kɛ wa dɛlɛ nɛ mba mɛ ni, nɛ a si do wa vɛ̃ dɛ Ninivɛ i. Wa hɔa i mɔ, nɛ wa dungu ɛngga 'do zɛkɛ nalɛ.
Obecnie wybrane:
YUDITƐ 1: NGB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Ngbaka DC Bible (We Nu Gale) Version © Bible Society of the Democratic Republic of Congo, 1995.