Broă 13

II. Jơnau Niam geh bơto yal cau làng bol bơdìh in

(13:1 – 28:31)

Sol mơ Banaba geh sồr lòt bơto yal

1Tòm Hìu Jum Goh Antiôt gơs ală cau gơnoar hwơr mơ ală cau bơto; hơ̆ la Banaba, Simeôn sơnđan la Nije,#13:1 Nije: cau jù. Lusius cau Siren, Manahen la oh ròng Herôt#13:1 Do la Herôt Antipa, at bồ jơh lơgar Galile (sền Luk 3:1). bơtau oh dê, mơ Sol sơl. 2Tòm tŭ bol khai ơm duh khoai Yàng mơ ơt sa, gen Yàng Hwềng Goh đơs lah: “Ơn is tĕ Banaba mơ Sol tòm broă lơh Añ neh hòi sac bol khai.” 3Tơnơ̆ mơ tŭ neh sir ơt sa mơ hòi dan rau, bol khai ơn tê hơđang bàr nă bol hơ̆, lồc behơ̆ sồr lòt.

Sol mơ Banaba tòm Ciprus

4Geh Yàng Hwềng Goh sồr lòt, Sol mơ Banaba mù hơ Selơsi, bơh tềng hơ̆ hào ơhò tus hơ bồt pơlào Ciprus. 5Tus tòm Salamis, bol khai bơto yal jơnau Yàng Tom Trồ dê tòm ală hìu jum cau Juda dê, kung gơs Jang Mak dong broă bal. 6Tòm tŭ lòt làm bồt pơlào tus tơn hơ Paphô, tềng hơ̆ bol khai tìp dô nă cau bơjơu la cau gơnoar hwơr ma blac cau Juda dê, sơnđan la Bar Jesu; 7khai gam ơm bal mơ cau kwang đơng lơgar la Sejus Polus, la dô nă cau jak chài. Cau kwang hơ̆ sồr jà Banaba mơ Sol tus, bơh khai kòñ iat jơnau Yàng Tom Trồ dê. 8Mơya cau bơjơu hơ̆ sơnđan jơnau Grek la Elimas, tòmdră mơ bàr nă bol hơ̆, jòi bơta kơryan cau kwang đơng lơgar dòn Yàng. 9Tŭ hơ̆, Sol kung sơnđan la Pol, geh bềng lìu Yàng Hwềng Goh, sền trol di cau bơjơu hơ̆ mơ đơs lah: 10“Mê la kòn cà ràk dê, cau sò tơm jơh ală bơta song ring dê, bềng bơta ma blac mơ iơh bơsak, mê kư̆ lơh kwe gùng song Yàng dê sùm ơ? 11Tŭ do tê Yàng lơh glài mê, mê rơp jơngo, ò gŏ mattơngai tòm dô pah tŭ.” Tŭ hơ̆ mo, bơta klam jơngo dùh hơđang Elimas, khai tơbư gùt dar, jòi cau tề khai lòt. 12Cau kwang đơng lơgar gŏ bơta neh gơlik gơs gen dòn, bơh ồng ai lơh krơi bơh bơta bơto sồr Yàng dê.

Tòm Antiôt Pisidi

13Pol mơ ală cau bơyô lòt bal bơh Paphô hào ơhò tus hơ Perje tòm ƀòn dờng Pamphili. Mơya Jang sang lòi bol khai, mơ rê wơl hơ Jerusalem. 14Bơh Perje bol khai kư̆ lòt gùng tus hơ Antiôt ƀòn dờng Pisidi; tus di ngai Saƀat, bol khai mut nggui tòm hìu jum cau Juda. 15Tòm tŭ sir sền sră bơta boh lam mơ sră ală cau gơnoar hwơr, ală cau at bồ hìu jum sồr cau đơs mơ bol khai lah: “Ơ oh mi, dilah gơs jơnau lơi bơto tơngkah làng bol, dan đơs tĕ.” 16Pol ntào, ai tê lơh tềl mơ đơs lah: “Ơ ală cau Israel mơ ală cau làng bol bơdìh duh rngòt di Yàng Tom Trồ, dan iat tĕ do: 17#Lik 1:7; 12:51.Yàng Tom Trồ làng bol Israel dê neh sac rwah ồng pàng bol he dê, lơh làng bol hơ̆ in gơlik gơs dô làng bol dờng tòm tŭ ơm ing tòm lơgar Ejiptơ, mơ Kơnràñ ngui gơnap gơnoar dờng Kơnràñ dê lam bol khai lik klàs bơh lơgar hơ̆. 18#Khà 14:34; Yalw 1:31.Kơnràñ kong ơt#13:18 Gơs sră cih tê cih la: sền gàr. di bol khai pơgap poan jơt nam tòm ƀlàng bràs ngềt ngơt. 19#Yalw 7:1; Jôs 14:1.Tòm tŭ neh tơnroh poh làng bol tòm lơgar Kanaan rau, gen Kơnràñ ai bol khai in lơh gơs cau tòm ù tiah hơ̆, 20#Kwang 2:16; I Sam 3:20.pơgap poan rhiang pram jơt nam.Tơnơ̆ hơ̆, Kơnràñ bơtào bol khai in kwang cahrña jơl tus di rài gơnoar hwơr Samuel. 21#I Sam 8:5; 10:21.Tŭ hơ̆ bol khai dan dô nă bơtau, behơ̆ tàng Yàng Tom Trồ ai bol khai in Sol, kòn klau Kis dê, tòm jơi bơtiàn Benjamin, at bồ bol khai tòm poan jơt nam. 22#I Sam 13:14; Đơs Crih 89:20.Lồc behơ̆ Kơnràñ sang bơtau hơ̆, bơtào Dabit lơh gơs bơtau mơ đơs bơh khai lah: ‘Añ neh jòi bàn Dabit kòn Jese dê, la cau di nùs Añ; khai rơp lơh jat nùs kòñ Añ jê tòm jơh ală bơta.’ 23Bơh jơi bơtiàn Dabit, Yàng Tom Trồ neh tơngguh làng bol Israel in dô Bơtau Dong klàs hơ̆ la Yàng Jesu, be Kơnràñ neh ho. 24#Mak 1:4; Luk 3:3.Lài mơ tŭ Yàng Jesu sơntòm lơh broă, Jang neh bơto yal jơh làng bol Israel in, pal gơjrañ sang glài mơ gơs ƀaptem. 25#Mat 3:11; Mak 1:7; Luk 3:16; Jang 1:20,27.Tòm tŭ Jang mòr sir jơh broă he dê,#13:25 Hơ̆ la mòr jơh rài kis khai dê. gen đơs lah: ‘Ală ồng kơlôi añ la ñcau taih? Añ ò di la Bơtau Krist be ală ồng kơlôi ò, mơya ne gơs Bơtau tus tơnơ̆ añ, añ ò pal hồ gơltau jă Kơnràñ in.’

26Ơ oh mi la kòn sau jơi bơtiàn Abraham dê, mơ ală cau làng bol bơdìh duh rngòt di Yàng Tom Trồ, hơ̆ la jơnau bơta dong klàs do geh bơto yal bol he in rau. 27Tài bơh ală làng bol mơ ală cau kwang bol khai dê ơm tòm Jerusalem, ò dòp git Yàng Jesu la Bơtau dong klàs, mơ kung ò git wă jơnau ală cau gơnoar hwơr mơ cau sền tòm kòp ngai Saƀat, bulah behơ̆ tòm tŭ lơh nền glài Yàng Jesu bol khai neh lơh jơnau gơnoar hwơr hơ̆ in gơlik di ngan. 28#Mat 27:22-23; Mak 15:13-14; Luk 23:21-23; Jang 19:15.Bulah ò jòi bàn bơta lơi nàng lơh nền glài chơt, bol khai kư̆ dan Pilat tơnchơt Kơnràñ. 29#Mat 27:57-61; Mak 15:42-47; Luk 23:50-56; Jang 19:38-42.Tòm tŭ bol khai neh lơh gơlik di ngan jơh ală bơta neh cih bơh Kơnràñ rau, gen tơmù Kơnràñ bơh chi pơng nàng tơp tòm bơtô ƀồc. 30Mơya Yàng Tom Trồ neh lơh Kơnràñ in kis wơl bơh bơta chơt. 31#Broă 1:3.Tòm oă ngai, Kơnràñ neh tơlik să mơ ală cau jat Kơnràñ bơh Galile guh hơ Jerusalem, mơ tŭ do bol khai la cau lơh cơng bơh Kơnràñ làng bol Israel in. 32Ai bol hi, gen bơto yal ală oh mi in Jơnau Niam mơ Yàng Tom Trồ neh ho ai ồng pàng bol he in, 33#Đơs Crih 2:7.lah Kơnràñ neh lơh gơlik di ngan jơnau ho pơgon hơ̆ bol he in la kòn sau bol khai dê, tòm tŭ lơh Yàng Jesu in kis wơl, be neh cih tòm sră Đơs Crih tap bàr lah: ‘Mê la Kòn Añ, Ngai do Añ neh tơnggơs mê.’ 34#Esai 55:3.Yàng Tom Trồ neh lơh Yàng Jesu in kis wơl bơh bơta chơt, ò tŭ lơi ồm lề, be jơnau Kơnràñ neh đơs: ‘Añ rơp ai bol mê in ală bơta lơngai lơngò sàng goh, nền cê mơ Añ neh ho pơgon mơ Dabit.’ 35#Đơs Crih 16:10.Tài behơ̆, tòm sră Đơs Crih ndai kung neh đơs lah: ‘Yàng ò ai Bơtau sàng goh Kơnràñ dê gŏ bơta ồm lề ò.’ 36Mơya bơtau Dabit tòm tŭ duh broă jat nùs kòñ Yàng Tom Trồ dê tòm rài kis khai, khai neh chơt, geh tơp bal mơ ồng pàng khai dê, mơ neh gŏ bơta ồm lề. 37Ai Bơtau mơ Yàng Tom Trồ neh lơh kis wơl gen ò gŏ bơta ồm lề ò. 38Behơ̆, ơ oh mi, git tĕ lah kơnòm di Yàng Jesu mơ bơta toh glài geh bơto yal oh mi in; 39Kơnòm di Kơnràñ kòp nă cau lơi dòn gen geh hồ toh, ai jơh ală bơta boh lam Môise gen ò rgơi hồ toh. 40Gen tàng kơrhia tĕ, bañ lòi gơkòl tòm ală bơta ală cau gơnoar hwơr neh đơs:

41 # Hab 1:5. ‘Ơ cau pơnhừ să!

Nrơt nrơl mơ roh rui tĕ!#13:41 Rct: chơt tĕ.

Bơh tòm rài bol mê, Añ rơp lơh dô nơm broă,

Bulah gơs cau yal wơl, bol mê kung ò dòn.’”

42Tòm tŭ Pol mơ Banaba lik lòt, bol hơ̆ dan bàr nă ồng kư̆ bơto yal ală jơnau hơ̆ tòm ngai Saƀat tơnơ̆ tai sơl. 43Tòm tŭ bơta pơjum neh sir, gơs oă cau Juda mơ cau bơdìh neh jat gùng duh khoai cau Juda lòt jat Pol mơ Banaba; bàr nă bol khai tòmbơhbơr mơ bơto pơndòm bol khai kư̆ ntào kơ̆ sùm tòm bơta nđàc Yàng Tom Trồ dê.

44Tòm ngai Saƀat tơnơ̆, mòr jơh làng bol tòm ƀòn dờng pơjum bal nàng iat jơnau Yàng. 45Mơya tòm tŭ gŏ mpồl làng bol oă gen ală cau Juda gơs bềng nùs ƀoah gơjrañ, tòmdră mơ jơnau bơto Pol dê mơ srat rma. 46Chòp Pol mơ Banaba khin cha đơs mơ bol khai lah: “Sơnròp ngan pal bơto jơnau Yàng Tom Trồ oh mi in; mơya tài bơh oh mi neh pơndang sang, mơ sơwì is să he ò di pal dòp bơta kis gam sùm sùm, gen tàng tŭ do bol hi wèt wơl hơ làng bol bơdìh. 47#Esai 49:6.Bơh Yàng neh đơs mơ bol hi lah: ‘Añ neh bơtào mê lơh gơs bơta àng ală làng bol in, tồ mê in cèng bơta dong klàs làm jơh plai ù.’”

48Tòm tŭ kơno jơnau hơ̆ gen làng bol bơdìh hòn chò ngan mơ jòng ro jơnau Yàng Tom Trồ, mơ ală cau neh geh lơh nền geh bơta kis gam sùm sùm gen gơlik gơs cau dòn.

49Jơnau Yàng geh lìu làc làm jơh tòm kơnhwàl hơ̆. 50Mơya ală cau Juda chồl bơchồt ală cau ùr duh rngòt pas ryŭ mơ ală cau at bồ tòm ƀòn dờng chồl bol khai kup kơryan Pol mơ Banaba, mơ bơtrơh tơlik bơh di kơnhwàl bol khai dê. 51#Mat 10:14; Mak 6:11; Luk 9:5; 10:11.Bàr nă bol khai rtuh thul di mpàng jơng nàng tòmdră di bol hơ̆, lồc behơ̆ lòt tus hơ Ikôni. 52Ai ală cau dòn tòm Antiôt gen geh bềng lìu bơta hòn chò mơ Yàng Hwềng Goh.

Obecnie wybrane:

Broă 13: KPM2018

Podkreślenie

Udostępnij

Kopiuj