Broă 14

Pol mơ Banaba tòm Ikôni

1Tòm Ikôni, Pol mơ Banaba mut bal tòm hìu jum cau Juda dê mơ bơto yal lơh oă ngan cau Juda mơ cau Grek dòn Yàng. 2Mơya ală cau Juda ò dòn gen chồl bơchồt, lơh nùs cau làng bol bơdìh in kơlôi iơh di ală oh mi. 3Bulah behơ̆, Pol mơ Banaba ơm wơl tềng hơ̆ jŏ ngai, mơ bơto yal bơh Yàng dô bă khin cha, mơ Yàng ngui tê bol khai lơh gơs ală bơta krơi tềl is, nàng lơh cơng di ngan jơnau bơta nđàc Kơnràñ dê. 4Mơya làng bol tòm ƀòn dờng cah is; mpồl do jat cau Juda, mpồl ne jat bàr nă cau gơnoar bơto dờng. 5Tŭ hơ̆, ală cau làng bol bơdìh mơ cau Juda bal mơ ală cau kwang bol khai dê jòi kai lơh iơh mơ cơm lŭ di bàr nă cau gơnoar bơto dờng, 6Kơno jơnau hơ̆, bàr nă cau gơnoar bơto dờng pleh lòt hơ Listrơ mơ Derbơ, la ală ƀòn dờng gơrê bal mơ Likaôni mơ ală kơnhwàl gùt dar hơ̆, 7mơ bơto yal Jơnau Niam tềng hơ̆.

Pol mơ Banaba tòm Listrơ

8Tòm Listrơ gơs dô nă cau gơlte jơng bơh tŭ deh, ò tŭ lơi rgơi lòt. 9Khai iat jơnau Pol bơto yal. Pol sền trol di khai, gŏ khai gơs bơta dòn nàng geh sơmbòi, 10gen đơs dờng lah: “Ntào tĕ song jơng.” Khai sơnđoh mơ cơnđòa lòt.

11Làng bol gŏ broă Pol neh lơh, gen driau dờng mơ jơnau Likaôni lah: “Ală yàng neh ai rùp kòn mơnus tơlik să mù mơ bol he.” 12Bol hơ̆ sơnđan Banaba la yàng Jeus, ai Pol la yàng Hermes, tài bơh khai la cau lam bồ bơto. 13Cau ơn phan duh khoai yàng Jeus dê gơs dô nơm bơmồng hơ bơdìh ƀòn dờng, khai cèng kơnrồ dam mơ ñòng bơkào tus di đap mpồng, kòñ bal mơ mpồl làng bol ơn phan duh khoai bàr nă cau gơnoar bơto dờng in. 14Mơya dơ̆ bàr nă cau gơnoar bơto dờng la Banaba mơ Pol kơno bơta hơ̆ gen crè ào he, brồ mut tòm gùl mpồl làng bol, mơ driau dờng: 15#Lik 20:11; Đơs Crih 146:6.“Ơ ală oh mi, ñchi bơh tài lơh bơta hơ̆ taih? Bol hi la kòn mơnus kung be ală oh mi sơl, bol hi bơto yal Jơnau Niam ală oh mi in, nàng oh mi wèt sang ală yàng roh lơm ne, mơ rê wơl hơ Yàng Tom Trồ gam kis sùm, la Bơtau neh crơng gơs trồ tiah, dàlềng mơ ală phan tòm hơ̆. 16Tòm rài lài òr, Kơnràñ lòi jơh ală làng bol in lòt jat gùng is he dê, 17bulah behơ̆ Kơnràñ kư̆ lơh cơng sùm bơh să tòm he, pà bơta lơngai lơngò, ai mìu bơh đang trồ, pà ai sơnam kơnhai gơs oă plai đo, phan sa tơngkah tơngkañ, lơh nùs oh mi bềng lìu bơta hòn chò.” 18Bulah neh đơs jơh jơnau, bàr nă cau gơnoar bơto dờng kalke ngan, sồng geh kơryan mpồl làng bol ơn phan duh khoai bol khai in.

19Tŭ hơ̆, gơs ală cau Juda bơh Antiôt mơ Ikôni lòt tus bơchồt mpồl làng bol, bol khai cơm lŭ di Pol, tồnlah khai neh chơt rau, gen hwài khai hơ bơdìh ƀòn dờng. 20Mơya tòm tŭ ală cau bơtê ơm pơjum gùt dar Pol, gen khai guh mơ mut wơl tòm ƀòn dờng. Ngai hìng Pol lòt mơ Banaba tus hơ Derbơ.

Rê wơl hơ Antiôt

21Tòm tŭ bàr nă cau gơnoar bơto dờng neh sir bơto Jơnau Niam tòm ƀòn dờng hơ̆ rau, mơ lơh oă cau gơlik gơs cau bơtê, gen rê wơl hơ Listrơ, Ikôni mơ Antiôt, 22Lơh ală cau bơtê kơ̆ nùs, bơto pơndòm bol khai prap kơ̆ bơta dòn, mơ yal lah bol he pal kong oă bơta bòl glar gen sồng geh mut tòm lơgar Yàng Tom Trồ. 23Tơnơ̆ mơ tŭ neh bơtào gơnoar broă ală cau kwang kra tòm kòp nơm Hìu Jum Goh, bàr nă cau gơnoar bơto dờng hòi dan, ơt sa rau, mơ jào ală cau hơ̆ Yàng in la Bơtau bol khai dòn kơnòm. 24Bơh tềng hơ̆ bàr nă cau gơnoar bơto dờng lòt gan Pisidi mơ tus hơ Pamphili. 25Tơnơ̆ mơ tŭ neh bơto yal jơnau Yàng tòm Perje rau, gen mù tơn tòm Attali. 26Bơh tềng hơ̆, bol khai hào ơhò tus hơ Antiôt, la tiah bơh lài bol khai geh jào bơta nđàc Yàng Tom Trồ in nàng lơh broă bol khai pa lơh sir. 27Tòm tŭ tus tềng hơ̆, Pol mơ Banaba pơjum tơrgòm Hìu Jum Goh, yal wơl jơh ală broă Yàng Tom Trồ neh lơh bal mơ bol khai, mơ mbe lơi Kơnràñ neh pò mpồng bơta dòn cau làng bol bơdìh in. 28Bàr nă ồng ơm tềng hơ̆ jŏ ngai bal mơ ală cau dòn.

Obecnie wybrane:

Broă 14: KPM2018

Podkreślenie

Udostępnij

Kopiuj