Mat 21

Yesu oloŵa mu Yelusalemu

(Mk 11:1-11; Lk 19:28-38; Yh 12:12-19)

1Penze kufupi na ku Yelusalemu, nofwika ku Betifage, ku lupili ya Olivi, Yesu etuma aŵili mwa asambili ŵake, 2noŵawuzya kuti, “Nkhoyani mu munzi wamuwona uyo. Mukafwane bulu womangililiwa pamo na mwana wake. Muŵamangulule nipo muŵalete kuno. 3Aliyense akakukonshani, mumuwuzye kuti, ‘Asikulu oŵapangwa,’ nipo aŵazyoshe lombapano.”

4Ivi vecitika kuti vikwanilisheke vecilaŵila mneneli vakuti,

5 “Wuzyani mzinda wa Ziyoni kuti,

‘Ona mfumu yako ikuza kwa wewo,

molicefya, nipo yakwela pa bulu,

yakwela pa mwana wa bulu, cinyama cotakulilapo katundu.’”

6Asambili ŵala eluta nocita mweciŵawuzyila Yesu. 7Eleta bulu na mwana wake, noyanzikapo vovwala vawo, nipo Yesu enkhalapo. 8Winji wala weyanzyika vovwala vawo pa njila, nipo ayakine enzokhozola misambo ya vimiti noyanzyika pa mseu. 9 Winji wenze pa nthangu pake na wala wenze ku vuli wenzoŵilikizya kuti,

“Mcinzi#21:9 Mcinzi Pa Cigiliki malizu aŵa “Hosanna” otanthauza “tipulumusheni” kwa Mwana wa Davide!

Ni woshukishiwa akuza mu zina ya Leza.

Mcinzi kwa Mulungu Kululu ngako.”

10Yesu peciloŵa mu Yelusalemu, mzinda wonse witangwanika. Ayakine enzokonshana kuti, “Ni ŵani uyu?”

11Winji wonse wenzolaŵila kuti, “Uyu ni mneneli Yesu, wa ku Nazaleti ku Galileya.”

Yesu owamya mu Ngʼanda ya Mulungu

(Mk 11:15-19; Lk 19:45-48; Yh 2:13-22)

12Yesu peciloŵa mu Ngʼanda ya Mulungu efumyamo ŵala enzocitilamo malonda. Egudubula posinthishila ndalama na mipando ya ositisha nkhunda. 13 Eŵawuzya kuti, “Malembo olaŵila kuti, ‘Ngʼanda yangu ikayitiwe kuti Ngʼanda ya malombelo,’ koma mwayiyalusha kuŵa ‘malo ŵa anyankapondo.’”

14Ŵanthu olemala na mphofu enzokuza kwa yeve mu Ngʼanda yala, nipo enzoŵapozya. 15Koma Akulu ŵa Ansembe na Asambizyi ŵa Matetulo peciwona vinthu viweme venzocita, na ŵana enzoŵilikizya mwala kuti, “Mcinzi ku Mwana wa Davide,” eyipizyiwa. 16 Emukonsha kuti, “Ukumvwa vakulaŵila aŵa?”

Yesu eyasuka kuti, “Eee, mukaliyoŵelengapo kuti, ‘Mu kamwa mwa ŵana na malucece mufuma matamando?’” 17Efumako kwala nakuya ku Betaniya nonkhala kwamene uko.

Yesu oshamika mkuyu

(Mk 11:12-14,20-24)

18Mmamawa penzozyokela mu mzinda, Yesu ecimvwa njala. 19Peciwona mkuyu mu mbali mwa mseu, elutamo koma efwana kuti muliye cilimo koma tyala vitepo veka. Ewuzya cimuti cala kuti, “Usakatwalepo soti citwalo!” Cimuti ceyuma pamene apo.

20Asambili peciwona ici, ekanganishiwa nolaŵila kuti, “Nga mkuyu wayuma tyani pamene apa?”

21Yesu eyasuka kuti, “Nukuwuzyani vyendi kuti keno muli na cicetekelo nipo mukayikalini, mukocitalini tyala ivi vacitika ku mkuyu, koma cukanga kuwuzya lupili kuti, ‘Fuma apa uzitaye mu cimmana,’ cikocitika. 22Keno mukuŵa na cicetekelo, ciliconse camungasenge mu lombelo, mukopokela.”

Okonsha va ulamulilo wa Yesu

(Mk 11:27-33; Lk 20:1-8)

23Yesu peciloŵa mu Ngʼanda ya Mulungu, Akulu ŵa Ansembe na Akulu ŵa Ayuda ewela kwake penzosambizya nolaŵila kuti, “Kansi ulamulilo wamucitila ivi muwufumya kuni? Keno ni ŵani ekupani ulamulilo pa ivi?”

24Yesu eŵayasuka kuti, “Nane soti nikukonsheni konsho imo. Mukaniyasuka, niye patinikuwuzyeni kwenetola ulamulilo wanucitila voteti. 25Ubatizo wa Yohane wefuma kuni? Kululu keno ku ŵanthu?”

Ŵeve etatika kulaŵizyana kuti, “Tikati, ‘Kululu,’ alaŵile kuti, ‘Ni cikomo canji muliyomucetekele?’ 26Koma tikati, ‘Ku ŵanthu,’ tuyopa winji, pakuti wenzotola Yohane kuti ni mneneli.” 27Niye eyingomuyasuka Yesu kuti, “Kaya nase tuziŵalini.”

Yesu elaŵila kuti, “Nane soti nikuwuzyenilini kwenetola ulamulilo wanucitila voteti.”

Linganizyo ya ŵana aŵili

28“Mulingililanji? Munthu muyakine enze na ŵana aŵili. Nipo eluta ku wotatikila nolaŵila kuti, ‘Mwana wangu, nkhoya ukaseŵenze mu munda wa mphesa lelo.’

29“Mwana wala eyasuka kuti, ‘Nilutelini,’ koma pa vuli pake eyaluzya malingililo ŵake noluta.

30“Munthu wala peciluta ku mwana wake muyakine, nomuwuzya cimozi–mozi, nipo eyasuka kuti, ‘Nilute,’ koma aliyolute.

31“Mwa aŵa aŵili, ni ŵani ecita kupangwa kwa awisi?”

Eyasuka kuti, “Wotatikila.”

Yesu eŵawuzya kuti, “Nukuwuzyani vyendi kuti, wosonkhesha misonkho na mahule akuya mu Ufumu wa Mulungu mukaliyofwika mwewo. 32Pakuti Yohane ewela mu njila ya cilungamo, koma muliyomucetekele, koma wosonkhesha msonkho na mahule emucetekela. Cukanga pemwiviwona ivi, pa vuli pake muliyoyaluzye malingililo ŵanu nomucetekela.”

Linganizyo ya olima mu munda wa mphesa

(Mk 12:1-12; Lk 20:9-19)

33“Mvwani linganizyo iyakine. Kwenze munthu muyakine ekomola mphesa mu munda mwake, nomanga mpanda kuzunguluka munda wake, ekumba nkhuti yowamyilamo mphesa, nomanga tala yopokela munda. Pa vuli pake wala munda ewuzyamikisha, yeve eciya pa ulwendo utali ku calo ciyakine. 34Nsita yowezya vitwalo peyifwika pafupi, etuma anyanchito ŵake kwa ŵala ŵecizyamika munda kuti akatole vitwalo vake.

35“Koma ŵala ezyamika etola anyanchito ŵake nonyatapo yumo, nopayapo yumo, notemapo yumo. 36Munthu wala etuma soti anyanchito ayakine, anyinji kupula otatika. Nipo ecita cimozi–mozi. 37Posilizyila wala munthu etuma mwana wake nolaŵila kuti, ‘Akamupe mcinzi mwana ŵangu.’

38“Koma ŵala ezyamika munda pecimuwona mwana wake, enzolaŵizyana kuti, ‘Uyu niye watiakasiyile cuma. Tiyeni timupaye titole cuma cake.’ 39Tetyo, emukata nomutayila kunja kwa munda nomupaya.

40“Nga lomba mwine wa munda akawela, akacite nawo vinji ŵala ezyamika munda?”

41Eyasuka kuti, “Azeaŵapaye ŵala, nozyamika munda wala ku ayakine ŵatiakamupe vitwalo pa nsita yake.”

42 Yesu eŵawuzya kuti, “Mukaliyoŵelenga mu Malembo kuti,

‘Mwala wecikana amisili omanga ngʼanda,

wayaluka mwala wa pa ngondya,

Leza niye ecita ivo,

nipo vetikanganisha ngako.’

43“Tetyo, nukuwuzyani kuti Ufumu wa Mulungu ukapokewe kwa mwewo, nopewa ku ŵanthu otwala vitwalo vake. 44Nipo aliyense oponela pa uyu mwala akasunike–sunike, nipo ukaponela pa aliyense, ukomufyantha.”

45Akulu ŵa Ansembe na Afalisi pecimvwa malinganizyo ŵake, eziŵa kuti olaŵila ŵeve. 46Enzopangwa kumumanga, koma enzoyopa winji, pakuti enzomutola kuti Yesu ni mneneli.

Obecnie wybrane:

Mat 21: GMN

Podkreślenie

Udostępnij

Kopiuj