Mat 20
20
Linganizyo ya ŵa ganyu ŵa mu munda wa mphesa
1“Ufumu wa Kululu uli ngani munthu ecelela mmamawa kuyolemba ŵa ganyu mu munda wake wa mphesa. 2Pa vuli pokatizyana na ŵa ganyu pa malipilo ŵa nsiku imo, eŵatuma mu munda wake.
3“Peyikwana 9 koloko mmawa, elutako soti, nipo efwana kuti ayakine ali peneme pa msika osacita ciliconse. 4Eŵawuzya kuti, ‘Nkhoyani namwe ku munda wa mphesa, nipo nikulipileni mowamilila.’ 5Ŵala ŵanthu eluta.
“Peyikwana 12 koloko mzuŵa na 3 koloko mcingulo ecita soti cimozi–mozi. 6Nipo pa 5 koloko mcingulo#20:6 5 koloko mcingulo keno 17:00 hrs, efwana ayakine ali peneme osacita ciliconse. Eŵawuzya kuti, ‘Ni cikomo canji mwapanama pano zuŵa yonse osacita kanthu kalikonse?’
7“Emuyasuka kuti, ‘Pakuti paliye watilembako nchito.’
“Eŵawuzya kuti, ‘Nkhoyani namwe ku munda wa mphesa.’
8“Nipo pekwifipa, mwine wa munda ewuzya kapitawo wala kuti, ‘Yita ŵa ganyu wonse, nipo uŵape malipilo ŵawo, kutatikila wosilizyila mpaka wotatikila.’
9“Ŵala ŵecilemba pa 5 koloko mzuŵa epokela malipilo ŵa nsiku imo. 10Lomba ŵala ŵecilemba potatika peciwela eyezya kuti atole zinyinji kupula ayawo, koma etola soti malipilo ŵa nsiku imo. 11Pecitola, eciyocita vyongo na mwine wa munda, 12nolaŵila kuti, ‘Aŵa osilizyila aseŵenza tyala ola imo, nipo mwaŵapa ndalama zolingana na sewo taseŵenza na zuŵa nsiku yonse.’
13“Koma asikulu ŵala emuyasuka kuti, ‘Wewo, niliyekuyifyile newo. Tiliyokatizyane pa malipilo ŵa nsiku imo? 14Tola vako uŵekuya. Nasalula kupa uyu wosilizyila mwanapela wewo. 15Kansi nine wosazomelezyewa kucita vanupangwa na vinthu vili vangu? Keno uyipilwa na kuwama mtima kwangu?’
16“Tetyo, wosilizyila akaŵe wotatikila, nipo wotatikila akaŵe wosilizyila.”
Yesu olaŵila ka citatu va imfwa yake
(Mk 10:32-34; Lk 18:31-34)
17Yesu penzokuya ku Yelusalemu, etola asambili ŵake kumi na aŵili pa mbali, nipo pakuya eŵawuzya kuti, 18“Tikuya ku Yelusalemu. Kwamene uko, Mwana wa Munthu akatwaliwe kwa Akulu ŵa Ansembe na Asambizyi ŵa Matetulo. Akamupingule kuti akapayiwe, 19nipo akatwaliwe ku ŵanthu asali Ayuda kuti anyatiwe notafuliliwa nopanyikiwa. Koma akawukishiwe pa nsiku ya citatu.”
Kusenga kwa mwanakazi
(Mk 10:35-45; Lk 22:24-27)
20Pa vuli pake mkazi wake wa Zebedayo ewela kwa Yesu na ŵana ŵake, nofukama pafupi na yeve nomusenga cinthu. 21Yesu emukonsha kuti, “Mwewo mupangwanji?”
Yeve elaŵila kuti, “Layizyani kuti mu Ufumu wanu, ŵana ŵangu aŵa yumo akaŵe ku kwanja kwanu kwendi, nipo yumo akaŵe ku kwanja kwanu kwa manzyele.”
22Yesu eyasuka kuti, “Muziŵalini camusenga. Kansi mungatweshe kumwa nthumo ya matamano yatinikamwe newo?”
Ŵala ŵana elaŵila kuti, “Eee, tingatweshe.”
23Eŵawuzya kuti, “Mungamwe nthumo ya matamano, koma va kuŵa ku kwanja kwangu kwendi keno ku manzyele ningatweshelini kukulayizyani. Atata niye otwala malo aŵa kwa ŵala ŵakusalula.”
24Asambili ŵala kumi pecimvwa, ecipya mtima na ŵala aŵili. 25Koma Yesu eŵayita noŵawuzya kuti, “Muziŵa kuti pakati pa ŵanthu ŵa kunja, ulamulilo ulyela ŵanthu masuku pa mutu, nipo acitangulila ali na ulamulilo wonse. 26Koma pakati panu, osati paŵe zoteti. Uyo opangwa kuŵa mkulu pakati pa mwewo aŵe muzya wa monse, 27nipo keno aliyense opangwa kuŵa citangulila aŵe muzya wanu, 28Ngani mwecicitila Mwana wa Munthu: ewela osati kuti ayakine amutumikile yayi, koma kuti yeve aŵe otumikila ŵanthu na kutwala moyo wake kuti anunule ŵanthu anyinji.”
Yesu opozya mphofu ziŵili
(Mk 10:46-52; Lk 18:35-43)
29Pecifuma ku Yeliko, winji wimukonkha. 30Penze mphofu ziŵili zenze nkhezi mu mbali mwa mseu, pezicimvwa kuti Yesu opita, ziŵilikizya kuti, “Asikulu, Mwana wa Davide ticitileni lusungu!”
31Winji wala wiŵakalipila noŵawuzya kuti aŵe celele, koma epitilizya kuŵilikizya kuti, “Asikulu Mwana wa Davide, ticitileni lusungu!”
32Yesu epanama noŵayita nolaŵila kuti, “Mupangwa kuti nikucitileni cinji?”
33Mphofu zala zeyasuka kuti, “Asikulu, tupangwa kuti menso ŵasu avulike.”
34Yesu ecimvwa lusungu nokumya menso ŵawo. Pamene apo etatika kulolesha, nomukonkha.
Obecnie wybrane:
Mat 20: GMN
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Nsenga New Testament © The Bible Society of Zambia, 2015.
