Mat 11

Nthumi za Yohane Mbatizi

(Lk 7:18-35)

1Yesu pecisilizya kulangizya asambili ŵake kumi na aŵili, eluta kuyosambizya noŵilizya mu mizinda mwawo.

2Yohane Mbatizi peenze mu jele ecimvwa vocita va Kristu, nipo etuma asambili ŵake, 3ekonsha kuti, “Kansi ni mwewo mukuza, keno tilindile muyakine?”

4Yesu eŵayasuka kuti, “Nkhoyani, mukawuzye Yohane vamukumvwa noviwona: 5mphofu zuwona, olemala oyenda, ŵa mambombo osukiwa, asimvwa akumvwa, akufwa owukishiwa, nipo osauka akumvwa Malizu Aweme. 6Ni woshukishiwa munthu asataya cicetekelo cikomo ca newo.”

7Pecifumapo ŵala atumiki, Yesu etatika kukonsha winji wa ŵanthu va Yohane kuti, “Kansi pemwiluta ku cipululu, mweciyowona vinji? Tete yosungʼuzyika na mphepo kansi? 8Nga mwenze kuti mukuyowona vinji? Munthu wovwala vovwala vofewa kansi? Yayi, ŵanthu wovwala vovwala vofewa ali mu mangʼanda ŵa mafumu. 9Laŵililantoni, mwelaŵila kuti mukuyowona vinji? Mneneli kansi? Ni vyendi, nulaŵilisha kuti mweciyowona wopula mneneli. 10#Mal 3:1 Wamene uyu niye wala Malembo olaŵila va yeve kuti,

‘Nutuma mtumiki wangu numutuma pa nthangu pako,

kuti akawamyiletu njila yakuzopitilamo wewo.’

11Nukuwuzya vyendi kuti mwa ŵanthu wonse evyalika pano pansi, paliye wopula Yohane. Koma cukanga wamene ali mtontho ngako mu Ufumu wa Mulungu omupula. 12Kutatikila mu masiku ŵa Yohane Mbatizi mpaka lomba, Ufumu wa Kululu watamana na ucenesi, nipo ucenesi wocitokakamizya. 13Pakuti aneneli wonse na Matetulo ŵa Mose enenela mpaka nsita ya Yohane, 14nipo keno ni mokonzeka kuzomela, ni Eliya akuza. 15Ali na matu, amvwishishe!”

16Yesu epitilizya kulaŵila, “Kaya luko ino ningailinganizye na vinji? Ili ngani ni vinji? Ili ngani ni ŵana wokangana pa msika, noyita ayawo kuŵawuzya kuti:

17‘Tikulizyilani ngʼoma ya ukwati,

ni cikomo canji mwewo muliyovine?

Tiyimba nzimbo za malilo,

ni cikomo canji mwewo muliyolile?’

18Pakuti Yohane peciwela enzokulyalini nipo enzokumwalini, nipo enzolaŵila kuti, ‘Ekatiwa na ciŵanda.’ 19Mwana wa Munthu ewela enzokulya na kumwa, nipo enzolaŵila kuti, ‘Muwoneni, uyu munthu ni wa matapika, cakolwa, nipo ni muyawo wa ŵanthu wosonkhesha msonkho na wosasamala Matetulo.’ Koma nzelu za Mulungu zusimikizyika na vocita vake.”

Shamu ku ŵanthu wosayaluka mtima

(Lk 10:13-15)

20Pa vuli pake Yesu etatika kucimula minzi kwecicita nchito zinyinji pakuti enzevoyaluke. 21“Uli na shamu, wewo Kolazini! Uli na shamu, wewo Betisaida! Pakuti keno mphamvu zicitika mwa mwewo zicitikila ku Tilo na ku Sidoni, sembe ŵanthu ŵawo evwala kale viguduli nozitila lukungu, kuwonesha kuti ayaluke mtima. 22Koma nukuwuzyani kuti pa nsiku ya cipingulo, kuzaŵe luweme kupula Tilo na Sidoni, nopula mwewo. 23Nipo wewo Kapilinamu, uyezya kuti akakukwezeke mpaka Kululu? Yayi, akakuselushe mpaka ku Gehena. Pakuti keno nchito zocitiwa mwa mwewo zecitiwa mu Sodomu, sembe zesalila mpaka lelo. 24Koma nukuwuzyani kuti pa nsiku ya cipingulo cikaŵeko luweme ku Sodomu kupula kwa mwewo.”

Yesu oyita ŵanthu ku mpumulo wake

(Lk 10:21-22)

25Nsita yamene iyo Yesu elaŵila kuti, “Numutembezyani Atata, Asikulu wa Kululu na pansi, kuti mwifisa ivi vinthu kufuma kwa ŵa nzelu na womvwisha noviwululila ku ŵana atontho. 26Eee, Atata, uku kwenze kupangwa kwanu kuweme.”

27Yesu ewuzya ŵanthu kuti, “Atata eyika vonse mu manja mwangu. Paliye muyakine woziŵa cendi Mwana, koma Atata ŵeka. Nipo paliye muyakine woziŵa Atata, koma Mwana yeka, nipo soti wala Mwana wakupangwa kumuwululila.

28“Welani kwa newo, mwewo ovupa na wolefuka, nipo nikupeni mpumulo. 29Takulani goli yangu, nipo sambililani kwa newo, pakuti nine wolezya na wolicefya, nipo mufwane mpumulo wa mizimu yanu. 30Pakuti goli yangu ni yosatamanisha, nipo katundu wangu ni wopepuka.”

Obecnie wybrane:

Mat 11: GMN

Podkreślenie

Udostępnij

Kopiuj