Mat 12

Nsiku ya Sabata

(Mk 2:23-28; Lk 6:1-5)

1Nsiku iyakine pa Sabata ya Ayuda, Yesu enzoyenda mu munda wa tiligu. Asambili ŵake ecimvwa njala, tetyo etatika kutyola ngala–ngala za tiligu nakulya. 2Afalisi peciwona ici, ewuzya Yesu kuti, “Onani, asambili ŵanu ocita cosazomelezyewa pa Sabata.”

3Yesu elaŵila kuti, “Kansi muliyoŵelenge cecicita Davide pecimvwa njala, yeve na ayake? 4Eloŵa mu Ngʼanda ya Mulungu nakulya mkate wotwaliwa kwa Mulungu. Kulingana na Matetulo, ni ansembe ŵeka ozomelezyewa kulya mkate wala, koma Davide ecilya. 5Keno muliyoŵelenge mu Matetulo kuti ansembe ofwaya Matetulo ŵa nsiku ya Sabata, koma ofwaniwa kuti ni wosayifya? 6Nukuwuzyani kuti pali muyakine pano opula Ngʼanda ya Mulungu yala. 7#Hs 6:6 Nipo kuti mwenzoziŵa tanthauzo ya malizu olaŵila kuti, ‘Nupangwa lusungu, osati nsembe,’ sembe muliyopingule ŵanthu osayifya. 8Tetyo, Mwana wa Munthu ni Asikulu ali na ulamulilo pa va nsiku ya Sabata.”

Yesu opozya munthu wolemala kwanja

(Mk 3:1-6; Lk 6:6-11)

9Pecifuma kwala eciyoloŵa mu kacisi wa Ayuda, 10mwecifwana munthu wolemala kwanja. Ŵanthu ayakine enzemo, emukonsha kuti, “Ni cozomelezyewa kupozya pa nsiku ya Sabata?” (Emukonsha kuti amuyopezyele kucita viyipa.)

11Yesu eŵakonsha kuti, “Ni ŵani pali mwewo ali na mbelele, nipo ikaponela mu cisengu pa Sabata, angaifumyelini? 12Nanji munthu wopula mbelele! Tetyo, ni cozomelezyewa kucita ciweme pa Sabata.” 13Yesu ewuzya wala munthu kuti, “Tambulula kwanja yako.” Eyitambulula kwanja yake, nipo yeciŵa soti luweme mweyenzele iyake. 14Koma Afalisi efuma nokuyopanga kaupo, kuti amvwane njila yopayilamo Yesu.

Yesu ni nyanchito wosaluliwa wa Mulungu

15Yesu pecimvwa va kaupo aka, efumako ku malo ŵala. Ŵanthu anyinji emukonkha nipo wonse eŵapozya 16noŵawuzya kuti asamuwulule. 17Uku kwenze kukwanisha velaŵiliwa na Mneneli Yesaya kuti:

18 # Ysa 42:1-4 “Wonani, nthumi yangu yanasalula,

wotemweka wangu wanusangalala naye mu mtima mwangu.

Nikayike Mzimu wangu pa yeve,

nipo akaŵilizye cilungamo ku asali Ayuda.

19Akocitalini nthota keno kulila koŵilikizya,

keno aliyense kumvwa lizu yake mu misewu.

20Tete yocenekeka awothyolalini,

nipo nyale yosayakisha awoizimyilatulini,

Mpaka akatweshe kuleta cilungamo,

21nipo asali Ayuda akaŵe na cicetekelo mu zina yake.”

Yesu na Belezebule

(Mk 3:20-30; Lk 11:14-23)

22Pa vuli pake kwiwela mphofu, yenze soti silaŵila nipo yenze yekatiwa na ciŵanda. Yesu eyipozya, nipo yetatika kulaŵila nololesha. 23Ŵanthu wonse ekanganishiwa nipo elaŵila kuti, “Kansi uyu angaŵe Mwana wa Davide?”

24Koma Afalisi pecimvwa ivi, elaŵila kuti, “Ni kupitila mwa Belezebule yeka, wala mkulu wa viŵanda, uyu munthu mwangafumyile viŵanda.”

25Yesu eziŵa ivi, tetyo eŵawuzya kuti, “Ŵanthu ŵa mu ufumu uliwonse akatatika kuwukilana, ufumu wala ucenekeka; nipo paliye munzi keno banja yoyaŵanikana ingakose. 26Keno Satana ofumyana na viŵanda vawo, ufumu wawo ungakose tyani? 27Keno newo nufumya viŵanda na mphamvu ya Belezebule, nga asambili wanu ovifumya na mphamvu ya ŵani? Ni cikomo cake, asambili ŵanu niye ŵatiazekupinguleni kuti nimwe woyifya. 28Koma keno newo nufumya viŵanda na Mzimu wa Mulungu, niye kuti Ufumu wa Mulungu wawela pali mwewo.

29“Munthu angaloŵelini mu ngʼanda mwa munthu wotangʼa noyiŵa vinthu vake. Koma keno amumangilila wala munthu, niye pangamuyiŵile mu ngʼanda mwake.

30“Munthu wosakatizyana na newo, niye kuti osushana nane. Nipo wosaniyavya kuwunganisha, niye kuti yeve ni womwazya. 31Tetyo, nukuwuzyani kuti, ucimo uliwonse na mitafu ikalekelelewe, koma otafulila Mzimu Mtuŵa akalekelelewelini. 32Nipo aliyense olaŵilila malizu osushana na Mwana wa Munthu, Mulungu azeamulekelele. Koma wotafulila Mzimu Mtuŵa, Mulungu azeamulekelelelini.”

Cimuti na vitwalo vake

(Lk 6:43-45)

33“Cimuti ciweme cuwonekela na vitwalo vake viweme. Koma mukalaŵila kuti ni ciyipa niye kuti na vitwalo kumo ni viyipa, pakuti cimuti cuziŵika na vitwalo vake. 34Mwewo ŵana anjoka! Mungalaŵile tyani viweme koma nimwe ayipa? Pakuti pa kamwa polaŵila vozula mu mtima. 35Munthu muweme oleta viweme vili mu mtima mwake. Naye soti munthu muyipa oleta viyipa vili mu mtima mwake. 36Nukuwuzyani kuti pa nsiku ya cipingulo akapewe mlandu pa malizu aliwonse ayipa ŵakulaŵila. 37Pakuti cikomo ca malizu ŵanu mlandu ukakuyipileni keno kukuwamilani.”

Ciziŵikilo ca Yona

(Mk 8:11-12; Lk 11:29-32)

38Asambizyi ayakine na Afalisi emuyasuka kuti, “Msambizyi, tupangwa kuwona ciziŵikilo kufuma kwanu.”

39Koma Yesu eŵayasuka kuti, “Luko iyipa na ya ucende yupangwa ciziŵikilo cokanganisha koma iciwonelini koma tyala ciziŵikilo ca Mneneli Yona. 40Pakuti ngani mweenzele Yona masiku atatu mu mala mwa cisaŵi, naye Mwana wa Munthu akaŵe masiku atatu mu manda. 41Pa nsiku yopingula, ŵanthu ŵa ku Ninive ŵala azeawuke pamo na ŵanthu ŵa luko ino noŵasusha. Pala ŵanthu ŵa ku Ninive eyaluka mtima, pecimvwa kuŵilizya kwa Yona. Pano pali wopula Yona wamene. 42Pa nsiku ya cipingulo mfumukazi ya ku mmwela yala ikawuke pamo na luko ino noyisusha. Pala yeve yefumila ku nsilililo ya calo ca pansi kuzokumvwa volaŵila va nzelu va Mfumu Solomoni. Nipo pano pali wopula Solomoni wamene.”

Kuzyokela kwa ciŵanda

(Lk 11:24-26)

43“Ciŵanda cikafuma mu munthu, cuyenda–yenda ku malo kuliye manzi, kusakila ku malo kopumulilako koma osaŵafwana. 44Tetyo, culaŵila kuti, ‘Nuwelela ku ngʼanda kwangu kwenifuma.’ Tetyo, cikafwika, cufwana mu ngʼanda mwala muli kwazi, mopyela na mowamya luweme. 45Pamene apo cutola viŵanda viyakine visanu na viŵili, vikali kupula ceve, nipo vonse vuloŵa nonkhazikika mwamene umo. Tetyo, unkhalo wa munthu wala ukuŵa uyipa kupula unkhalo wake wotatika. Kukaŵe soti tetyo na ku luko iyipa ino.”

Anyina na enekwawo ŵa Yesu

(Mk 3:31-35; Lk 8:19-21)

46Yesu penzeakalulaŵila na ŵanthu, kwiwela anyina na enekwawo nopanama panja, nosenga kuti alaŵile naye. 47Munthu muyakine ewuzya Yesu kuti, “Anyina wanu na enekwanu ali panja, opangwa kulaŵila namwe.”

48Koma Yesu ekonsha wala munthu etumiwa kuti, “Amama ni ŵani? Enekwasu ni ŵani?” 49Elata pa asambili ŵake nolaŵila kuti, “Aŵa niye amama na enekwasu! 50Pakuti aliyense ocita cakupangwa Atata ali Kululu niye munekwasu, na mlongosi wangu, na amama.”

Obecnie wybrane:

Mat 12: GMN

Podkreślenie

Udostępnij

Kopiuj