Mat 10

Nthumi kumi na ziŵili

(Mk 3:13-19; Lk 6:12-16)

1Yesu eyita asambili ŵake ŵala kumi na aŵili, noŵapa ulamulilo pa viŵanda, kuvifumya nopozya malwele aliwonse na volefuka vilivonse. 2Mazina ŵa nthumi kumi na ziŵili zala ni aŵa: wotatika, Simoni woyitiwa kuti Petulo, na mkwawo Andeleya; Yakobe mwana wa Zebedayo, na mkwawo Yohane; 3Filipo na Batulumeyo; Thomasi na Mateyo wosonkhesha msonkho; Yakobe mwana wa Alifeyo, na Thadeyo; 4Simoni wa mu cipani ca Zelote; na Yudasi Isikaliyoti, enzekuyomutwala kwa alwani ŵake.

Yesu otuma nthumi kumi na ziŵili zala

(Mk 6:7-13; Lk 9:1-6)

5Aŵa kumi na aŵili Yesu eŵatuma noŵawuzya kuti, “Osaluta kulikonse pakati pa asali Ayuda noloŵa mu munzi wa Asamaliya, 6koma ngako–ngako mulute ku mbelele zosoŵa za ngʼanda ya Isilayeli. 7Nipo poyenda mukoŵilizya kuti, ‘Ufumu wa Kululu uli pafupi.’ 8Mukopozya olwala, mukowusha akufwa, mukosuka ŵa mambombo nofumya viŵanda. Mwipokela cosalipila; nipo mukokupa cosalipiliwa. 9Osatola golide keno siliva keno ndalama ya mkuwa. 10Osatola thumba pa ulwendo wanu, keno mikanjo iŵili, keno nkhwaŵilo keno ndodo, pakuti nyanchito owamila cakulya cake.

11“Mu mzinda keno mu munzi mwatimukaloŵe, mukofufuza munthu muweme nipo mukaŵe kwamene uko mpaka kufumako. 12Poloŵa mu ngʼanda mukolaŵila kuti, ‘Mtendele unkhale namwe.’ 13Keno ni wowamila, mtendele wanu ukokuŵa pa ŵeve, koma keno ni wowamilalini, mtendele wanu ukozyokela kwa mwewo. 14Keno okupokelanilini luweme keno kumvwa malizu ŵanu, mukokunkhumula lukungu ya ku mendo kwanu nofumako ku malo uko. 15Nukuwuzyani vyendi kuti pa nsiku ya cipingulo, cikaŵeko luweme cipingulo ca Sodomu na Gomola kupula cipingulo ca munzi uyo.”

Manzunzo akuza

(Mk 13:9-13; Lk 21:12-17)

16“Mvwishishani, nukutumani ngani mbelele pakati pa mimbulu, tetyo cenjelani ngani njoka nipo mufase ngani nkhunda. 17Ŵani menso na ŵanthu, pakuti akakutwaleni ku ngʼanda ya milandu nokunyatani mu makacisi ŵa Ayuda. 18Mukotwaliwa kwa akulu–akulu ŵa boma na mafumu cikomo ca newo, kucitila umboni pa menso pawo na asali Ayuda. 19Akakutwalani, osaŵa na nkhawa mwatimukolaŵilila na vatimukolaŵila, pakuti mukapewe vatimukolaŵila pa nsita iyo. 20Nipo ni mwewolini mwatimukolaŵila, koma Mzimu wa Awusu wanu ukolaŵila kupitila mwa mwewo.

21“Mkwawo akotwala mkwawo kuti apayiwe, nipo awisi akotwala ŵana ŵawo. Ŵana akowukila avyazi ŵawo, kufwikila kuŵapayisha. 22Ŵanthu wonse azemtinkheni cikomo ca newo. Koma ŵala ŵatiazetangʼilile kufwikila ku nsilililo, niye ŵatiazepulumushiwe. 23Akakutamanishani ku munzi umo, nkhoyani kuyakine. Nukuwuzyani vyendi kuti mukasilizyelini kuya mu minzi yonse Mwana wa Munthu akaliyowela.

24“Msambili ni wopulalini msambizyi wake, keno nyanchito kupula asikulu ŵake. 25Ni comuwamila msambili kuŵa ngani msambizyi wake, na nyanchito kuŵa ngani asikulu ŵake. Keno oyita mkulu wa ngʼanda kuti Belezebule, nanji ŵa mu banja mwake, angaŵapelini mazina ayipa?”

Osayopa ŵanthu

(Lk 12:2,7)

26“Tetyo, osayopa ŵanthu. Pala cinthu ciliconse cofisika cizeciwululike, nipo va cisinsi vizeviziŵike nowonekela patuŵa. 27Vanukuwuzyani mu mfinzi mukovilaŵila patuŵa, nipo camukumvwa coŵeleŵesha, ciŵilizyeni palulu pa ngʼanda. 28Nipo osayopa ŵala opaya muŵili tyala, koma angapayelini mzimu. Koma yopani yeve angaceneke muŵili na mzimu wake ku Gehena. 29Kansi tunyoni tuŵili tusitishiwalini na kandalama kamo? Nipo paliye cukanga yumo mwa ŵeve angapone pansi koma Awusu wanu ŵeka. 30Nipo sisi yanu eyiŵelenga yonse. 31Tetyo, osati mwakuyopa yayi. Mwewo nimwe ŵa mtengo ngako kupula tunyoni tunyinji.”

Kuzomela Yesu pa menso pa ŵanthu

(Lk 12:8-9)

32“Aliyense wonizomelezya pa menso pa ŵanthu, nane soti nikamuzomelezye pa menso pa Atata ali Kululu. 33Koma aliyense onikana pa menso pa ŵanthu, newo nane nikamukane pa menso pa Atata ali Kululu.”

Kupatukana cikomo ca Kristu

(Lk 12:51-53; 14:26-27)

34“Osalinga kuti newela kuzoleta mtendele pa calo, koma nkhondo. 35#Mi 7:6 Pakuti nicizokekesha

‘Mwana na awisi,

na mwana mwanakazi na anyina,

na mmikazi na anyavyala.

36Alwani ŵa munthu akaŵe ŵa mu ngʼanda mwake.’

37“Aliyense otemwa anyina na awisi kupula newo ni wosawamila kuŵa msambili wangu, nipo aliyense otemwa mwana mwanakazi keno mwanalume kupula newo ni wosawamila. 38Aliyense asatola mtanda wake nonikonkha ni wosaniwamila. 39Aliyense ofwana moyo wake azeawutaye, nipo aliyense otaya moyo wake cikomo ca newo akawufwane.”

Cilambu

(Mk 9:41)

40“Aliyense opokela mwewo opokela newo, nipo aliyense opokela newo opokela wala enituma. 41Aliyense opokela mneneli pakuti ni mneneli akapokele cilambu ca mneneli; wala opokele munthu wolungama pakuti ni wolungama akapokela cilambu ca wolungama. 42Aliyense akupa cukanga nthumo ya manzi otonthola ku aŵa pakuti ni asambili ŵangu, nukuwuzyani vyendi kuti akakangiwelini kupokela cilambu cake.”

Obecnie wybrane:

Mat 10: GMN

Podkreślenie

Udostępnij

Kopiuj