Sioné 19

1PEA toki puke ‘e Pailato ‘a Sīsū, ‘o ne kau‘imaea. 2Pea fī ‘e he kau tau ha kalauni talatala, ‘o ‘ai takai ki hono fofonga, pea nau ‘ai kiate ia ha kofu kulokula, pea nau holo mai kiate ia, 3‘o nau pehē, ‘Ēī, Tu‘i Siu! pea nau ‘oatu kiate ia–ha ngaahi pekalae.

4Pea toe ‘alu kitu‘a ‘a Pailato, ‘o ne pehē kiate kinautolu; Vakai, ‘oku ou ‘omi ia kitu‘a kiate kimoutolu, koe‘uhi ke mou ‘ilo ‘oku ‘ikai te u ma‘u ha‘ane momo‘i hia. 5Pea ha‘u ai ‘a Sīsū kitu‘a, kuo ‘ai kiate ia ‘a e kalauni talatala, mo e kofu kulokula. Pea me‘a ‘e Pailato kiate kinautolu; Vakai, ko ena ‘a e Tangata!

6Pea ‘i he mamata leva kiate ia ‘e he hou‘eiki taula‘eiki mo e kau ‘ōfisa, na‘a nau fekālanga‘i, ‘o pehē, Kalusefai ia, kalusefai ia.

Pea me‘a kiate kinautolu ‘e Pailato, Pe‘i mou ‘ave ia ‘o kalusefai ‘e kimoutolu: he ko au ‘oku ‘ikai te u ‘ilo ha‘ane hia.

7Pea tali ki ai ‘e ha‘a Siu, Ka ‘oku ‘i ai ha lao ‘amautolu, pea ‘i he lao ko ia ‘oku totonu ke ne mate, koe‘uhi na‘a ne lau, ko e ‘Alo ‘o e ‘Otua ia.

8Pea ‘i he fanongo leva ‘a Pailato ki he folofola ko ia, na‘e fakautuutu ai ‘ene teteki; 9pea ne toe hū ki he Palasi, ‘o ne pehē kia Sīsū, Mei fē tū koe? Ka ka ‘ikai fai ‘e Sīsū ha‘ane momo‘i tali ki ai.

10Pea me‘a ai ‘a Pailato kiate ia, ‘Oku ‘ikai te ke lea kiate au koā? ‘Oku ‘ikai koā te ke ‘ilo ‘oku ou mafai ke tukuange koe, pea ‘oku ou mafai ke kalusefai koe.

11Pea tali ‘e Sīsū ki ai, ‘E ‘ikai te ke momo‘i mafai ha me‘a kiate au, ‘oka ne ta‘e‘oua hono tuku kiate koe mei ‘olunga: ko ia ‘oku hulu atu ‘a e angahala ‘a‘ana na‘a ne tuku ange au kiate koe.

12Pea ‘i he me‘a ko ia na‘e feinga ‘a Pailato ke tuku ange ia: ka ka toutou kalanga pē ‘e ha‘a Siu, ‘o pehē, Kapau te ke tuku ange ‘a e siana ni, tā ‘oku ‘ikai ko e takanga ko e ‘o Sisa: ‘ilonga ‘a ia ‘oku ne lau ko e tu‘i ia ‘oku ne lea pau‘u kia Sisa.

13Pea ‘i he fanongo leva ‘a Pailato ki he ngaahi lea ko ia, na‘a ne taki ‘a Sīsū kitu‘a, pea ne nofo hifo ki he nofo‘anga fakamaau ‘i ha potu ‘oku ui ko Falikimaka, ka ‘i he lea faka-Hepelū ko Kāpata. 14Pea ko e ‘aho Tokonaki ia, ko e Tokonaki he Pāsova: ko hono houa ko e ono nai, mo ne me‘a ai ki ha‘a Siu; Vakai, ko ena homou Tu‘i!

15Pea fekālanga‘i leva ‘e he fa‘ahinga ko ia, Tafi‘i ia! tafi‘i ia! kalusefai ia.

Pea pehē ‘e Pailato kiate kinautolu, Ka u kalusefai koā homou Tu‘i?

Pea tali ‘a e hou‘eiki taula‘eiki, ‘Oku ‘ikai hamau tu‘i, ko Sisa pē.

16Pea ne toki tukuange ia kiate kinautolu ke kalusefai.

Ko e Tutuki ‘o Sīsū ki he Kolosí

(Māt 27.32-44; Ma‘ake 15.21-32; Luk 23.26-43)

17Ko ia na‘a nau ma‘u ‘a Sīsū. Pea ‘alu atu ia ‘oku ne fua mo‘ona hono kolosi, ‘o ne a‘u ki he potu ‘oku ui koe potu ‘ulupoko, ko hono ui faka-Hepelū ko Kolokota. 18Pea ko e potu ko ia na‘a nau kalusefai ai ia, pea ai mo ha toko ua, ko e taha mei hē, mo e taha mei hē, kae ‘i loto ‘a Sīsū. 19Pea na‘e tohi foki ‘e Pailato ha tohi fakamatala, ‘o ne ‘ai ki he funga kolosi; pea na‘e tohi ai ‘o pehē, KO SĪSŪ MEI NĀSALETI KO E TU‘I SIU. 20Pea na‘e lau ‘a e tohi fakamatala ko ia ‘e ha tokolahi ‘o ha‘a Siu, koe‘uhi na‘e ofi ‘a e feitu‘u kolo na‘e kalusefai ai ‘a Sīsū: kae‘uma‘ā na‘e tohi ia ‘i he lea faka-Hepelū mo e lea faka-Loma, mo e lea faka-Kalisi. 21Ko ia na‘e lea ai kia Pailato ‘e he hou‘eiki taula‘eiki ‘o ha‘a Siu, ‘o pehē, ‘Oua te ke tohi, ko e Tu‘i Siu; ka ke tohi, Na‘a ne pehē, Ko e Tu‘i Siu au.

22Ka ka tali ‘e Pailato, Ko ia kuo u tohi, kuo tohi.

23Pea ko e kau sōtia, hili ‘enau kalusefai ‘a Sīsū, na‘a nau to‘o hono ngaahi kofu, ‘o nau vahefā, ‘o takitaha ‘a e sōtia ‘a e vahe; kae‘uma‘ā hono sote: ka ko e anga ‘o e sote na‘e ‘ikai hano hoko ‘anga, ka na‘e lalanga fua pē mei ‘olunga ‘o fai ki lalo. 24Ko ia na‘a nau fepehē‘aki, ‘ē, ‘oua na‘a tau hae ia, ka tau talotalo ki ai, pe ‘o hai ia–koe‘uhiā ke fakamo‘oni ‘a e folofola na‘e pehē,#Saame 22.18 Na‘a nau tufa kiate kinautolu hoku kofu. Pea nau talotalo ki he‘eku teu. Ko ia na‘e fai ‘a e ngaahi me‘a ko ia ‘e he kau sōtia.

25Pea na‘e tu‘u ‘i he tafa‘aki kolosi ‘o Sīsū ‘a ‘ene fa‘ē, mo e tokoua ‘o ‘ene fa‘ē, ko Mele foki ko e uaifi ‘o Kaliopasi, mo Mele mei Makitala. 26Pea ‘i he vakai ‘e Sīsū ki he‘ene fa‘ē, mo e tu‘u ai ‘a e tama ako na‘a ne ‘ofa ai, na‘a ne folofola ki he‘ene fa‘ē, Fefine, ko ena ho‘o tama!

27Hili ia na‘a ne folofola ki he tama ako, Ko ena ho‘o fa‘ē! Pea mei he taimi ko ia na‘e ‘ave ‘e he tama ako ‘a e fefine ko ia ki hono ‘api ‘o‘ona.

Ko e Pekia ‘a Sīsuú

(Māt 27.45-56; Ma‘ake 15.33-41; Luk 23.44-49)

28Pea hili ia, pea ‘i he mea‘i ‘e Sīsū, kuo ‘osi ‘eni ‘a e me‘a kotoa pē ke fakamo‘oni ‘a e Tohitapu, pea ne folofola mai, ‘Oku ou fie inua.#Saame 69.21; 22.15

29Pea na‘e tu‘u ai ha ipu kuo pito ‘i he vinika; ko ia na‘a nau humaki ‘i ha va‘a ‘īsope ha oma kuo fonu vinika, ‘o nau ‘ohake ki hono fofonga. 30Pea ‘i he ma‘u leva ‘e Sīsū ‘a e vinika, na‘a ne folofola, KUO ‘OSI, pea ne punou hono fofonga, ‘o ne tukuange hono laumālie.

Ko Hono Hoka‘i e Vakavaka ‘o Sīsuú

31Pea ko e ‘aho Tokonaki ia; ko ia na‘e feinga ai ‘a ha‘a Siu ke ‘oua na‘a tautau ‘i he kolosi ‘a e ngaahi ‘anga‘anga ‘i he Sāpate: (he ko e ‘aho lahi ‘a e Sāpate ko ia) pea nau kole kia Pailato ke fesi‘i honau va‘e, ‘o ‘ave kinautolu. 32Ko ia na‘e omi ‘a e kau sōtia, ‘o nau fesi‘i ‘a e kauva‘e ‘o e ‘uluaki, pea mo e siana ‘e taha na‘e kaungā kalusefai mo ia. 33Ka ‘i he‘enau hoko kia Sīsū, ‘o nau vakai kuo pekia ia, na‘e ‘ikai te nau fesi‘i hono va‘e ‘o‘ona: 34ka ko e toko taha ‘o e kau sōtia na‘a ne hoka‘i hono vakavaka ‘aki hono tao, pea na‘e tafe leva mei ai ha ta‘ata‘a mo ha vai. 35Pea ko ia na‘a ne mamata ai kuo ne fakamo‘oni ki ai, pea ko ‘ene fakamo‘oni ko e mo‘oni ‘o e mo‘oni: pea ‘oku ‘ilo ‘e he toko taha ko ia ‘oku mo‘oni pē ‘ene lau, koe‘uhiā ke mou tui foki.#19.35 ke mou tui foki: ‘Oku pehē ‘i hono ngaahi hiki fuoloa ‘e ni‘ihi: ke mou tui ai pē. 36He na‘e hoko ‘a e ngaahi me‘a ko ia koe‘uhi ke fakamo‘oni ‘a e potu tohi ‘oku pehē, ‘e ‘ikai maumau ha hui ‘e taha ‘o‘ona.#‘Eki 12.46; Nōm 9.12; Saame 34.20 37Pea ‘oku toe ‘i ai mo e potu tohi ‘e taha ‘oku ne pehē, Te nau mamata kiate ia kuo nau hoka‘i.#Sāk 12.10; Fkhā 1.7

Ko Hono Telio ‘o Sīsū

(Māt 27.57-61; Ma‘ake 15.42-47; Luk 23.50-56)

38Pea hili ‘a e ngaahi me‘a ko ia, ko Siosifa mei ‘Alematea, ‘a ia ko e ako ‘a Sīsū, na‘a ne kole kia Pailato ke ne ‘ave ‘a e sino ‘o Sīsū; ka na‘a ne fai fufū pē ko ‘ene manavahē ki ha‘a Siu: pea tuku ‘e Pailato ke ne fai. Ko ia na‘a ne ha‘u ‘o ‘ave hono sino. 39Pea ha‘u mo Nikotimasi foki, (‘a ia na‘e ha‘u po‘uli kiate ia ‘i he kamata‘anga pea ne ha‘u mo ia ha koto mula mo e ‘alosi kuo fetuiaki, fe‘unga nai mo e pāuni ‘e teau.#Sioné 3.1-2 40Ko ia na‘a nau to‘o ‘a e sino ‘o Sīsū, ‘o nau takai ia ‘aki ha ngaahi tupenu, fakataha mo e ongo fa‘ahinga ahi ni; he ko e anga ia ‘o e teu pekia ‘a ha‘a Siu ki fa‘itoka. 41Pea na‘e tu‘u ‘i he potu na‘e kalusefai ai ia ha ngoue tapu; pea na‘e ‘i he ngoue tapu ha fonualoto fo‘ou, ‘a ia kuo te‘eki telio ai ha taha. 42Pea koe‘uhi ko e ‘aho Tokonaki ia ‘o ha‘a Siu, mo e ofi mai ‘a e fonualoto, ko ia na‘a nau telio ai ‘i he potu ko ia ‘a si‘i Sīsū.

Obecnie wybrane:

Sioné 19: TMB

Podkreślenie

Udostępnij

Kopiuj